Għandek Għalxiex Tittama f’Ġenna?

“Naf raġel f’unjoni maʼ Kristu li . . . ittieħed fil-​ġenna.”—2 KORINTIN 12:2-4.

1. Liema wegħdi fil-​Bibbja jolqtu lil ħafna wħud?

ĠENNA. Tiftakar kif ħassejtek l-​ewwel darba li smajt bil-​wegħda t’Alla taʼ ġenna taʼ l-​art? Forsi tiftakar meta sirt taf li se ‘jinfetħu għajnejn l-​għomja, jinfetħu widnejn it-​torox, u fid-​deżert igelgel l-​ilma’ u jsir għammiel. Jew xi ngħidu dwar il-​profezija li l-​lupu jgħix mal-​ħaruf, u l-​leopard mal-​gidi? Ma fraħtx meta qrajt dwar il-​maħbubin mejtin li se jirxoxtaw bil-​prospett li jibqgħu f’dik il-​Ġenna?—Isaija 11:6; 35:5, 6; Ġwanni 5:28, 29.

2, 3. (a) Għala tistaʼ tgħid li t-​tama tiegħek mill-​Bibbja m’hijiex bla bażi? (b) Liema bażi oħra għandna biex nittamaw?

² It-​tama tiegħek m’hijiex bla bażi. Għandek għalxiex temmen il-​wegħdi tal-​Bibbja dwar din il-​Ġenna. Per eżempju, għandek fiduċja fil-​kliem li Ġesù qal lir-​raġel ħażin imsammar maʼ zokk: “Int tkun fil-​Ġenna miegħi.” (Luqa 23:43) Int tafda fil-​wegħda: “Hemm smewwiet ġodda u art ġdida li aħna qed nistennew skond il-​wegħda tiegħu, u f’dawn tgħammar il-​ġustizzja.” Tafda wkoll fil-​wegħda t’Alla li se jixxottalna kull demgħa minn għajnejna; mhux se jkun hemm iżjed mewt; in-​niket u l-​għajat u l-​uġigħ se jispiċċaw. Dan ifisser li l-​art se terġaʼ ssir ġenna!—2 Pietru 3:13; Rivelazzjoni 21:4.

³ Madankollu, bażi oħra għal din it-​tama taʼ Ġenna hi xi ħaġa li l-​Kristjani madwar id-​dinja diġà jagħmlu parti minnha bħalissa. X’inhi? Alla għamel ġenna spiritwali u ġabar lin-​nies tiegħu fiha. It-​terminu “ġenna spiritwali” jistaʼ jinstemaʼ bħala li hu teorija u diffiċli biex tifhmu, imma din il-​ġenna ġiet imbassra u teżisti tassew.

Viżjoni taʼ Ġenna

4. Liema viżjoni tissemma fit-​2 Korintin 12:2-4, u min probabbilment esperjenzaha?

⁴ Dwar dan, innota x’kiteb l-​appostlu Pawlu: “Naf raġel f’unjoni maʼ Kristu li . . . ittieħed b’dan il-​mod lejn it-​tielet sema. Iva, naf raġel bħal dan—jekk hux fil-​ġisem jew mingħajr il-​ġisem ma nafx, Alla jaf—li ttieħed fil-​ġenna u semaʼ kliem li ma jitlissinx u li skond il-​liġi ebda bniedem ma jistaʼ jgħidu.” (2 Korintin 12:2-4) Dan ir-​rakkont jiġi eżatt wara l-​versi li fihom Pawlu jiddefendi l-​appostolat tiegħu. Iktar minn hekk, il-​Bibbja ma titkellem dwar ħadd iktar li kellu esperjenza bħal tiegħu, u Pawlu hu l-​wieħed li jgħidilna dwarha. Allura, wisq probabbli kien Pawlu li kellu din il-​viżjoni. F’din l-​esperjenza sopranaturali, f’liema “ġenna” daħal?—2 Korintin 11:5, 23-31.

5. Pawlu x’ma rax, u għalhekk il-​“ġenna” x’tip kienet?

⁵ Il-​kuntest m’huwiex jissuġġerixxi li “t-​tielet sema” tirreferi għall-​atmosfera madwar il-​globu tagħna, lanqas għall-​ispazju jew xi univers ieħor, bħalma jispekulaw ixxjenzati taʼ l-​ispazju. Spiss il-​Bibbja tuża n-​numru tlieta biex jenfasizza, isaħħaħ il-​punt, jew juri iżjed qawwa. (Koħèlet 4:12; Isaija 6:3; Mattew 26:34, 75; Rivelazzjoni 4:8) Għalhekk, dak li ra Pawlu fil-​viżjoni kien xi ħaġa ogħla jew superjuri. Kienet xi ħaġa spiritwali.

6. Liema żvilupp storiku jgħinna nifhmu x’ra Pawlu?

⁶ Profeziji Bibliċi taʼ qabel jagħtuna iktar dehen. Wara li l-​poplu tiegħu tal-​qedem ma baqax leali lejh, Alla ddetermina li jħalli lill-​Babiloniżi jiħduha kontra Ġuda u Ġerusalemm. Fl-​aħħar mill-​aħħar, dawn saru ħerba fis-​sena 607 Q.E.K., skond il-​kronoloġija tal-​Bibbja. Il-​profezija kienet tgħid li l-​art kellha tkun ħerba għal 70 sena; imbagħad Alla kien se jħalli lil-​Lhud niedma jirritornaw u jirrestawraw il-​qima vera. Dan seħħ mis-​sena 537 Q.E.K. ’l quddiem. (Dewteronomju 28:15, 62-68; 2 Slaten 21:10-15; 24:12-16; 25:1-4; Ġeremija 29:10-14) Iżda xi ngħidu għall-​art stess? Matul is-​70 sena, saret post miżgħud bil-​ħaxix ħażin, u post niexef fejn jgħammru x-​xakalli. (Ġeremija 4:26; 10:22) Xorta waħda, kien hemm din il-​wegħda: “Il-​Mulej iħenn għal Sijon; iħenn għall-​ħrieb kollha tagħha. Jagħmel Għeden mid-​deżert u ġnien [jew Ġenna, Settanta] tal-​Mulej mix-​xagħri tagħha.”—Isaija 51:3.

7. X’kellu jseħħ wara s-​70 sena taʼ ħerba?

⁷ Dan seħħ wara s-​70 sena. Minħabba l-​barka t’Alla, l-​affarijiet inbidlu għall-​aħjar. Immaġina dan: “Ħa jifirħu d-​deżert u l-​art maħruqa; ħa jifraħ ix-​xagħri u jwarrad, ħa jwarrad bħar-​ranġis. Ħa tifraħ fuq li tifraħ, taqbeż u tgħanni. . . . Iz-​zopp jaqbeż bħal għażżiela u lsien l-​imbikkma jinħall bil-​ferħ. Iva, igelgel l-​ilma fid-​deżert, u l-​widien fix-​xagħri. L-​art maħruqa tinbidel f’għadira, u l-​art niexfa f’għejun taʼ ilma ġieri. Fejn qabel kienu jimteddu x-​xakalli, issa hemm il-​ħmiemel tal-​qasab u l-​ġummar.”—Isaija 35:1-7.

Poplu Restawrat u Trasformat

8. Kif nafu li Isaija kapitlu 35 kien japplika għan-​nies?

⁸ X’bidla! Minn ħerba għal ġenna. Madankollu, din il-​profezija li tistaʼ torbot fuqha u oħrajn bħalha wrew li kien se jkun hemm bidla wkoll fin-​nies, bħal art li filli tkun ħerba u filli ssir għammiela. Għala nistgħu ngħidu dan? Isaija kien qed jiffoka fuq “il-​mifdijin tal-​Mulej,” li kellhom jirritornaw lejn arthom “jgħajjtu bil-​ferħ” u jiksbu “l-​ferħ u l-​hena.” (Isaija 35:10) Dan ma kienx japplika għall-​ħamrija letterali, imma għan-​nies. Barra minn hekk, f’partijiet oħra Isaija bassar dwar in-​nies li kellhom jiġu restawrati f’Sijon: “Isejjħulhom ballut tas-​sewwa, mħawwla mill-​Mulej . . . Bħalma l-​art tnibbet, . . . hekk il-​Mulej inibbet il-​ġustizzja u l-​foħrija, quddiem kollha kemm huma l-​ġnus.” Isaija qal ukoll dwar il-​poplu t’Alla: “Il-​Mulej jibqaʼ jmexxik għal dejjem, . . . u jsaħħaħlek għadmek. Int tkun bħal ġnien bis-​saqwi.” (Isaija 58:11; 61:3, 11; Ġeremija 31:10-12) Għalhekk, l-​istess bħalma kellhom jitjiebu l-​kundizzjonijiet taʼ l-​ambjent, hekk ukoll kienu se jsiru xi bidliet fil-​poplu Lhudi restawrat.

9. Liema “ġenna” ra Pawlu, u meta twettqet?

⁹ Dan il-​mudell storiku jgħinna nifhmu x’ra Pawlu fil-​viżjoni. Kellu jinvolvi l-​kongregazzjoni Kristjana, li ġiet imsejħa “l-​għalqa t’Alla li qed tiġi kultivata” u li kellha tkun għammiela. (1 Korintin 3:9) Meta kellha sseħħ din il-​viżjoni? Pawlu sejjaħ dak li ra ‘rivelazzjoni,’ xi ħaġa li kellha sseħħ fil-​futur. Hu kien jaf li wara mewtu kellha tiżviluppa apostasija kbira. (2 Korintin 12:1; Atti 20:29, 30; 2 Tessalonikin 2:3, 7) Ma tantx stajt tqabbel lill-​Kristjani maʼ ġnien li qed jiffjorixxi meta l-​apostati kienu żdiedu iktar minnhom u dehru li kienu qed jirnexxu iktar. Madankollu, kellu jiġi l-​waqt meta l-​qima vera terġaʼ tispikka. Il-​poplu t’Alla kellu jiġi restawrat ħalli “n-​nies sewwa [jkunu jistgħu] jiddu bħax-​xemx fis-​saltna taʼ Missierhom.” (Mattew 13:24-30, 36-43) Dan fil-​fatt seħħ ftit snin wara li s-​Saltna t’Alla ġiet stabbilita fis-​sema. U mal-​mogħdija tas-​snin, qed isir iżjed evidenti li l-​poplu t’Alla jgawdi ġenna spiritwali li Pawlu kien ra bil-​quddiem f’din il-​viżjoni.

10, 11. Għala nistgħu ngħidu li ninsabu f’ġenna spiritwali minkejja li aħna imperfetti?

¹⁰ Nafu li aħna lkoll imperfetti bħala individwi, allura ma niskantawx li kultant jinqalgħu xi problemi, l-​istess bħalma kienu jinqalgħu fost il-​Kristjani taʼ żmien Pawlu. (1 Korintin 1:10-13; Filippin 4:2, 3; 2 Tessalonikin 3:6-14) Madankollu, aħseb dwar il-​ġenna spiritwali li qed ingawdu bħalissa. Meta tqabbilha mal-​kundizzjoni marida li darba konna fiha, aħna ġejna mfejqin spiritwalment. U hemm kuntrast bejn il-​ġuħ spiritwali li kellna u l-​abbundanza taʼ ikel spiritwali li għandna issa. Minflok ma qed jissielet bħallikieku kien f’art niexfa spiritwalment, il-​poplu t’Alla għandu l-​approvazzjoni tiegħu u qed igawdi xita taʼ barkiet. (Isaija 35:1, 7) Minflok ma qed niġu mogħmijin bħallikieku f’post taʼ dlam spiritwali, aħna qed naraw id-​dawl tal-​ħelsien u taʼ l-​approvazzjoni t’Alla. Ħafna li kienu bħallikieku torox għax ma kienu jifhmu xejn dwar il-​profeziji Bibliċi issa qed jisimgħu u jifhmu dak li tgħid l-​Iskrittura. (Isaija 35:5) Per eżempju, miljuni taʼ Xhieda taʼ Ġeħova madwar id-​dinja studjaw il-​profezija taʼ Danjel, vers b’vers. Imbagħad, eżaminaw bir-​reqqa kull kapitlu tal-​ktieb tal-​Bibbja taʼ Isaija. M’huwiex dan l-​ikel spiritwali li jserraħ evidenza tal-​ġenna spiritwali tagħna?

¹¹ Ukoll, aħseb ftit dwar il-​bidliet fil-​karattru li għamlu wħud sinċiera taʼ esperjenzi u ċirkustanzi differenti, li stinkaw biex jifhmu u japplikaw il-​Kelma t’Alla. Bażikament huma ħadmu biex iwarrbu tendenzi annimalistiċi li kienu jispikkaw fihom qabel. Forsi int għamilt xi ħaġa bħal din b’riżultati tajbin, u hekk għamlu wkoll ħutek spiritwali. (Kolossin 3:8-14) Għalhekk, meta tissieħeb maʼ kongregazzjoni tax-​Xhieda taʼ Ġeħova, int tkun maʼ nies li saru jħobbu l-​paċi iktar u iktar pjaċevoli. Le, għadhom m’humiex perfetti, imma żgur li ma tistax tiddeskrivihom bħala ljuni salvaġġi jew bhejjem feroċi. (Isaija 35:9) X’tindika din is-​sħubija paċifika u spiritwali? Jidher ċar li aħna ngawdu kundizzjoni spiritwali li nistgħu b’mod xieraq insejħulha ġenna spiritwali. U l-​ġenna spiritwali tagħna tiffigura bil-​quddiem il-​ġenna taʼ l-​art li se ngawdu jekk nibqgħu leali lejn Alla.

12, 13. Xi rridu nagħmlu biex nibqgħu fil-​ġenna spiritwali tagħna?

¹² Xorta waħda, għad hemm xi ħaġa li ma nistgħux ninjorawha. Alla qal lill-​Iżraelin: “Ħarsu kull ma nordnalkom jien illum, sabiex titqawwew, u tidħlu u tieħdu f’idejkom l-​art.” (Dewteronomju 11:8) F’Levitiku 20:22, 24 tissemma l-​istess art: “Ħarsu l-​liġijiet tiegħi kollha u d-​digrieti tiegħi kollha, u agħmluhom, li ma tobżoqkomx ’il barra l-​art li fiha jien se neħodkom biex tgħammru fiha. Imma lilkom ngħidilkom: Intom tirtu l-​art tagħhom u jien nagħtihielkom biex tirtuha, art tnixxi ħalib u għasel.” Iva, biex jieħdu taħt idejhom l-​Art Imwiegħda ried ikollhom relazzjoni tajba m’Alla Ġeħova. Minħabba li l-​Iżraelin m’obdewhx, Alla ħalla lill-​Babiloniżi jirbħulhom u jneħħuhom minn arthom.

¹³ Hemm ħafna affarijiet li nistgħu nitgħaxxqu bihom fil-​ġenna spiritwali tagħna. L-​ambjent ipaxxi l-​għajn u jserraħ lil dak li jkun. Aħna ninsabu fis-​sliem maʼ Kristjani li ħadmu biex ineħħu karatteristiċi annimalistiċi. Huma qed iħabirku biex juru qalb tajba u jkunu t’għajnuna. Xorta waħda, biex nibqgħu fil-​ġenna spiritwali tagħna għandna bżonn iktar minn sempliċi relazzjoni tajba maʼ dawn in-​nies. Neħtieġu li jkollna relazzjoni tajba maʼ Ġeħova u nagħmlu r-​rieda tiegħu. (Mikea 6:8) Dħalna f’din il-​ġenna spiritwali minn jeddna, imma malajr nistgħu ninġarru mal-​kurrent—nintefgħu ’l barra—jekk ma naħdmux biex nippreservaw ir-​relazzjoni tagħna m’Alla.

14. X’se jgħinna nibqgħu fil-​ġenna spiritwali?

¹⁴ Fattur importanti li se jgħinna hu li nkomplu nissaħħu bil-​Kelma t’Alla. Innota l-​lingwa figurattiva f’Salm 1:1-3: “Hieni l-​bniedem li ma jimxix fuq il-​parir tal-​ħżiena . . . imma fil-​liġi tal-​Mulej hi l-​għaxqa tiegħu, lejl u nhar jaħseb fil-​liġi tiegħu. Hu bħal siġra mħawwla ħdejn nixxigħat taʼ l-​ilma li tagħmel il-​frott fi żmienha, u l-​weraq tagħha ma jidbielx; hu jirnexxi f’kull ma jagħmel.” Barra minn hekk, il-​pubblikazzjonijiet ibbażati mill-​Bibbja tal-​klassi taʼ l-​ilsir leali u għaqli jipprovdu ikel spiritwali fil-​ġenna spiritwali.—Mattew 24:45-47.

Saħħaħ il-​Ħarsa Tiegħek dwar il-​Ġenna

15. Mosè għala ma setax imexxi lill-​Iżraelin għal ġo l-​Art Imwiegħda, imma x’ra?

¹⁵ Ikkunsidra dehra bil-​quddiem oħra tal-​Ġenna. Wara li Iżrael dam jiġġerra fix-​xagħri għal 40 sena, Mosè mexxieh lejn il-​Witat taʼ Mowab, fil-​lvant tax-​Xmara Ġordan. Minħabba ċertu nuqqas min-​naħa taʼ Mosè, Ġeħova ddetermina li Mosè ma kienx se jmexxi lil Iżrael għan-​naħa l-​oħra tal-​Ġordan. (Numri 20:7-12; 27:12, 13) Mosè talab bil-​ħniena lil Alla: “Ħa naqsam in-​naħa l-​oħra u nara din l-​art tajba li qiegħda n-​naħa l-​oħra tal-​Ġordan.” Avolja ma kienx se jidħol fiha, wara li niżel mill-​Muntanja Pisga u ra diversi partijiet minn din l-​art, Mosè żgur li rrealizza kemm kienet “art tajba.” Kif taħseb li kienet dik l-​art?—Dewteronomju 3:25-27.

16, 17. (a) L-​Art Imwiegħda b’liema mod hija differenti llum minn kif kienet fil-​qedem? (b) Għala nistgħu nemmnu li darba l-​Art Imwiegħda kienet bħal ġenna?

¹⁶ Jekk tibbaża l-​opinjoni tiegħek fuq il-​kundizzjoni tar-​reġjun f’dawn l-​aħħar snin, għandek mnejn timmaġinah bħala art niexfa kollha ramel, b’deżert mimli blat, u xemx tikwi. Madankollu, għandna għalxiex nikkonkludu li bħala reġjun kien differenti ħafna fiż-​żminijiet tal-​Bibbja. Fil-​ġurnal Scientific American, l-​espert fuq l-​ilma u l-​ħamrija, Dr. Walter C. Lowdermilk spjega li l-​art f’dan ir-​reġjun “tħassret minħabba l-​abbuż li seħħ f’dawn l-​aħħar elf sena.” Hu kiteb: “Id-​‘deżert’ li issa ħa post l-​art li darba kienet tiffjorixxi kkaġunah il-​bniedem u mhux in-​natura.” Fil-​fatt, l-​istudji tiegħu indikaw li “din l-​art darba kienet ġenna naturali mill-​isbaħ.” Allura, jidher ċar li l-​abbuż mill-​bnedmin ħassar dik li darba kienet “ġenna naturali mill-​isbaħ.”a

¹⁷ Meta tirrifletti dwar dak li tkun qrajt mill-​Bibbja, tistaʼ tinduna kemm hi loġika din il-​konklużjoni. Ftakar f’dak li Ġeħova żgura lill-​poplu permezz taʼ Mosè: “L-​art li int se tgħaddi għaliha biex teħodha f’idejk hi art miżgħuda bil-​muntanji u lwidien; art li tixrob l-​ilma tax-​xita mis-​smewwiet; art li jieħu ħsiebha l-​Mulej.”—Dewteronomju 11:8-12.

18. L-​iskrittura f’Isaija 35:1, 2 (35:2, NW) kif tathom idea lill-​Iżraelin eżiljati taʼ kif kienet se tkun l-​Art Imwiegħda?

¹⁸ Il-​ġmiel tal-​ħdura kif ukoll il-​frott li kienet tagħmel l-​Art Imwiegħda tant kienu jispikkaw li l-​fatt li jissemmew ċerti postijiet kien iġibilhom f’moħħhom kundizzjonijiet bħal taʼ ġenna. Dan jidher ċar fil-​profezija taʼ Isaija kapitlu 35, li kellha l-​ewwel twettiq meta l-​Iżraelin irritornaw minn Babilonja. Isaija bassar: “Ħa jwarrad bħar-​ranġis. Ħa tifraħ fuq li tifraħ, taqbeż u tgħanni. Sebħ il-​Libanu jingħata lilha, il-​ġmiel tal-​Karmel u taʼ Saron. Għad jaraw is-​sebħ tal-​Mulej, il-​ġmiel taʼ Alla tagħna.” (Isaija 35:1, 2 [35:2, NW]) Ir-​referenzi għal-​Libanu, il-​Karmel, u Saron bilfors li ġabu f’moħħ l-​Iżraelin stampa mill-​isbaħ u taʼ sodisfazzjon kbir.

19, 20. (a) Iddeskrivi l-​inħawi taʼ Saron tal-​qedem. (b) Liema hu mod wieħed kif insaħħu t-​tama tagħna fil-​Ġenna?

¹⁹ Ikkunsidra lil Saron, wita mal-​baħar bejn l-​għoljiet tas-​Samarija u l-​Baħar il-​Kbir, jew il-​Mediterran. (Ara r-​ritratt f’paġna 10.) Din kienet magħrufa għall-​ġmiel tagħha u għall-​fatt li kienet art għammiela. Peress li kellha rabaʼ saqwi, kienet ideali għall-​mergħat, imma din kellha foresti taʼ siġar tal-​ballut fil-​partijiet tat-​tramuntana. (1Kronaki 27:29; Għanja taʼ l-​Għanjiet 2:1; Isaija 65:10) Għalhekk, f’Isaija 35:1, 2 (35:2, NW) hemm imbassar restawrazzjoni u art li tiffjorixxi bil-​ġmiel li ssir bħal ġenna. Din il-​profezija kienet ukoll qed tipponta lejn ġenna spiritwali mill-​isbaħ, fi qbil maʼ dak li ra Pawlu iktar tard fil-​viżjoni. Fl-​aħħar, din il-​profezija, flimkien maʼ profeziji oħra, issaħħaħ it-​tama tagħna f’ġenna taʼ l-​art għall-​bnedmin.

²⁰ Hekk kif ngħammru fil-​ġenna spiritwali tagħna, nistgħu nsiru napprezzawha iktar u nsaħħu t-​tama tagħna taʼ Ġenna fuq l-​art. Kif? Billi nkabbru l-​fehma tagħna dwar dak li naqraw fil-​Bibbja. Id-​deskrizzjonijiet fil-​Bibbja u l-​profeziji spiss isemmu postijiet speċifiċi. Tixtieq tifhem aħjar fejn kienu dawn il-​postijiet u x’konnessjoni kellhom maʼ referenzi ġeografiċi oħra? Fl-​artiklu li jmiss, se nikkunsidraw kif int tistaʼ tibbenefika meta tagħmel dan.

[Nota taʼ taħt]

Tiftakar Int?

• Liema “ġenna” ra l-​appostlu Pawlu fil-​viżjoni?

• Isaija kapitlu 35 kellu liema twettiq fil-​bidu, u dan kif inhu marbut maʼ dak li ra Pawlu fil-​viżjoni?

• Kif nistgħu nkabbru l-​apprezzament għall-​ġenna spiritwali tagħna u nsaħħu t-​tama li għandna fil-​ġenna taʼ l-​art?

[Stampa f’paġna 10]

Il-​Wita taʼ Saron, post għammiel fl-​Art Imwiegħda

[Sors]

Pictorial Archive (Near Eastern History) Est.

[Stampa f’paġna 12]

Mosè jirrealizza li kienet “art tajba”