Ġenituri, Ipproteġu l-Wirt Prezzjuż Tagħkom
“Fih kenn l-għerf . . . Iħarreġ għall-ħajja lil min għandu lilu.”—KOĦÈLET 7:12.
1. Għala għandhom il-ġenituri jqisu lil uliedhom bħala rigali?
IL-ĠENITURI jġibu fid-dinja persuna ħajja ġdida li għandha kemm mill-karatteristiċi fiżiċi kif ukoll mill-personalità tagħhom. Il-Bibbja ssejjaħ lil uħud żgħar bħal dawn “wirt il-Mulej.” (Salm 127:3) Ladarba hu d-Donatur veru tal-ħajja, Ġeħova qiegħed tassew jafda lill-ġenituri b’dak li fl-aħħar mill-aħħar huwa tiegħu. (Salm 36:10 [36:9, NW]) Ġenituri, kif tqisuh l-għoti taʼ rigal daqshekk prezzjuż mingħand Alla?
2. Kif irreaġixxa Manuħa meta sar jaf li kien se jkollu iben?
2 Żgur li rigal bħal dan għandu jintlaqaʼ b’umiltà u apprezzament. Hekk għamel ir-raġel Iżraeli Manuħa iżjed minn 3,000 sena ilu, meta anġlu qal lil martu li kien se jkollha tarbija. Hekk kif semaʼ bl-aħbar tajba, Manuħa talab: “Iddew, ja Sidi, ħa jerġaʼ jiġi għandna r-raġel taʼ Alla, li bgħattilna, u jurina x’għandna nagħmlu bit-tifel li se jitweldilna.” (Mħallfin 13:8) Ġenituri, x’tistgħu titgħallmu mill-eżempju taʼ Manuħa?
Għala l-Għajnuna t’Alla Hija Meħtieġa Issa
3. Għala l-għajnuna taʼ Ġeħova għat-trobbija tat-tfal hija speċjalment meħtieġa llum?
3 Issa iżjed minn qatt qabel, il-ġenituri jeħtieġu l-għajnuna taʼ Ġeħova biex irabbu lil uliedhom. Ir-raġuni? Satana x-Xitan u l-anġli tiegħu twaddbu mis-sema għal fuq l-art. “Gwaj għall-art u għall-baħar,” twissi l-Bibbja, “għax ix-Xitan niżel għandkom u għandu rabja kbira, għax jaf li żmien qasir baqagħlu.” (Rivelazzjoni 12:7-9, 12) Il-Bibbja tispjega li Satana hu “bħal iljun jgħajjat, jipprova jiblaʼ lil xi ħadd.” (1 Pietru 5:8) Is-soltu l-iljuni jaqbdu l-iktar annimali bla difiża, l-iżjed iż-żgħar. B’mod għaqli, mela, il-ġenituri Kristjani jieħdu l-gwida taʼ Ġeħova biex jipproteġu ’l uliedhom. Kemm qed tħabirku biex tagħmlu hekk?
4. (a) Xi jkunu pronti jagħmlu l-ġenituri malli jkunu jafu li hemm iljun iħuf fl-inħawi tagħhom? (b) X’għandhom bżonn it-tfal għall-protezzjoni?
4 Kieku kontu tafu li kien hemm iljun iħuf fl-inħawi tagħkom, żgur li l-ewwel ma taħsbu hu biex tipproteġu ’l uliedkom. Satana hu bħal annimal tal-priża. Hu jara kif se jikkorrompi lill-poplu t’Alla, u b’hekk jagħmlu mhux denju taʼ l-approvazzjoni t’Alla. (Ġob 2:1-7; 1 Ġwanni 5:19) It-tfal huma priża faċli. Biex jeħilsu min-nases tax-Xitan, it-tfal għandhom isiru jafu lil Ġeħova u jobduh. L-għarfien mill-Bibbja hu essenzjali. “Il-ħajja taʼ dejjem tfisser dan,” qal Ġesù, “li jieħdu għarfien dwarek, l-uniku Alla veru, u dwar Ġesù Kristu li int bgħatt.” (Ġwanni 17:3) Barra minn hekk, iż-żgħar jeħtieġu l-għerf—l-abbiltà li jifhmu u japplikaw dak li jitgħallmu. Ladarba ‘l-għerf iħarreġ għall-ħajja lil min għandu lilu,’ intom il-ġenituri tridu ddaħħlu bil-mod il-mod il-verità fil-qlub taʼ wliedkom. (Koħèlet 7:12) Kif tistgħu tagħmlu dan?
5. (a) Kif jistgħu l-ġenituri jgħaddu l-għerf lil uliedhom? (b) Il-ktieb tal-Proverbji kif jiddeskrivi l-valur taʼ l-għerf?
5 Intom tistgħu—u għandkom—taqraw lit-tfal tagħkom mill-Kelma t’Alla. Imma jirrikjedi iżjed minn hekk biex tgħinuhom iħobbu u jobdu lil Ġeħova—hemm bżonn li, min-naħa tagħhom, huma jifhmu. Biex inġibu eżempju: Tifel jistaʼ jintqallu biex iħares lejn kull naħa tat-triq qabel jaqsam. Madankollu, xi tfal ma jobdux. Għala le? Il-konsegwenzi taʼ li jittajjar minn karozza ma jkunux ġew spjegati spiss biżżejjed jew b’mod li t-tifel ikun fehem għalkollox il-periklu biex b’hekk jegħleb “il-bluha” li twassal għal xi aċċident. Biex tgħaddulhom l-għerf tagħkom hemm bżonn iż-żmien, kif ukoll ħafna paċenzja. X’valur għandu l-għerf! “Fihom għaxqa triqatu,” il-Bibbja tgħid, “kollha sliem mogħdijietu; hu siġra tal-ħajja għal min iħaddnu; hieni hu min iżomm sħiħ miegħu.”—Proverbji 3:13-18; 22:15.
L-Għerf li Jiġi mit-Tagħlim
6. (a) Taʼ spiss it-tfal għala jaġixxu mingħajr għaqal? (b) Liema gwerra tinsab għaddejja?
6 Taʼ spiss it-tfal jaġixxu b’mod ħażin mhux għax ma jkunux ġew mgħallmin x’inhu tajjeb, imma għax it-tagħlim ma jkunx laħqilhom qalbhom—il-persuna taʼ ġewwa. Ix-Xitan qed jiġġieled biex jieħu fil-kontroll tiegħu l-qlub taʼ wħud żgħar. Il-metodu tiegħu hu li jara li huma esposti għall-influwenzi ħżiena tad-dinja tiegħu. Hu jipprova wkoll jieħu vantaġġ egoistiku mill-inklinazzjoni midinba li wirtu biex jagħmlu affarijiet ħżiena. (Ġenesi 8:21; Salm 51:7 [51:5, NW]) Il-ġenituri jeħtieġ jirrikonoxxu li gwerra vera tinsab għaddejja biex jinkiseb kontroll fuq qalb uliedhom.
7. Għala mhux biżżejjed tgħid lit-tfal x’inhu tajjeb jew x’inhu ħażin?
7 Il-ġenituri ġeneralment jgħidu lit-tfal x’inhu tajjeb jew ħażin, mingħalihom li jkunu għallmuhom ċertu prinċipju morali. Jistgħu jgħidu lit-tfal li huwa ħażin li tigdeb, li tisraq, jew li jkollok relazzjonijiet sesswali maʼ xi ħadd li m’intix miżżewweġ miegħu. Madankollu, it-tfal jeħtieġ li jkollhom motivazzjoni iżjed b’saħħitha biex jobdu milli għax sempliċement qalulhom il-ġenituri tagħhom. Dawn huma l-liġijiet taʼ Ġeħova. It-tfal għandhom jitgħallmu li t-triq għaqlija hi li jobdu l-kmandamenti t’Alla.—Proverbji 6:16-19; Ebrej 13:4.
8. Liema tip taʼ tagħlim jistaʼ jgħin lit-tfal jaġixxu bl-għaqal?
8 Il-komplessità taʼ l-univers, il-varjetà taʼ laffarijiet ħajjin, il-bidla fl-istaġuni—affarijiet bħal dawn jistgħu jgħinu tifel żgħir japprezza l-eżistenza taʼ Ħallieq kollu għerf. (Rumani 1:20; Ebrej 3:4) Ukoll, it-tfal għandhom jiġu mgħallmin li Ġeħova jħobbhom u li għamel provvediment permezz tas-sagrifiċċju taʼ Ibnu biex jagħtihom il-ħajja taʼ dejjem u li huma jistgħu jferrħu lil Alla billi jobdu dak li jgħid hu. X’aktarx li mbagħad it-tfal se jkunu jridu jaqdu lil Ġeħova, minkejja li x-Xitan jipprova jwaqqafhom.—Proverbji 22:6; 27:11; Ġwanni 3:16.
9. (a) X’hemm bżonn li jsir biex it-tagħlim ikun wieħed li jsalva l-ħajjiet? (b) X’inhuma istruwiti jagħmlu l-missirijiet, u x’jinvolvi dan?
9 It-tip taʼ tagħlim li jipproteġi lit-tfal u li jimmotivahom jagħmlu dak li hu tajjeb jeħtieġ il-ħin, l-attenzjoni, u l-ippjanar. Jeħtieġ li l-ġenituri jaċċettaw il-gwida minn Alla. Il-Bibbja tgħid: “Intom, missirijiet, . . . ibqgħu rabbuhom [lil uliedkom] fid-dixxiplina u l-gwida mentali taʼ Ġeħova.” (Efesin 6:4) Xi jfisser dan? Fil-Grieg oriġinali, “gwida mentali” tagħti l-idea taʼ li “tpoġġi l-moħħ fi.” Għalhekk, il-missirijiet huma bażikament imħeġġin biex ipoġġu l-moħħ taʼ Ġeħova f’uliedhom. Xi protezzjoni tkun dik għat-tfal! Jekk huma jkollhom il-ħsibijiet t’Alla, il-mod kif jaħseb hu, imnaqqxin f’moħħhom, huma jkunu protetti milli jagħmlu l-ħażen.
Xewqa Mqanqla mill-Imħabba
10. X’inhu importanti li tkunu tafu biex tgħallmu ’l uliedkom b’mod effettiv?
10 Madankollu, biex twettqu xewqitkom li ttellgħu ’l uliedkom kif suppost, l-isforzi tagħkom iridu jkunu motivati mill-imħabba. Fattur importanti huwa li jkun hemm komunikazzjoni tajba. Siru afu xi jkun għaddej fil-ħajja taʼ wliedkom u kif jaħsbuha. F’atmosfera rilassata, inkuraġġixxu bit-tattika lit-tfal biex jitkellmu. Kultant tistgħu tkunu sorpriżi b’dak li joħorġu bih. Oqogħdu attenti ferm biex ma tidhrux ixxokkjati. Minflok, isimgħu sew u interessaw ruħkom f’dak li jgħidulkom.
11. Ġenitur kif jistaʼ jpoġġi moħħ Alla fit-tfal?
11 Veru, jistaʼ jkun li lit-tfal qrajtulhom mill-Bibbja dwar il-liġijiet t’Alla li jipprojbixxu l-immoralità sesswali, u forsi wkoll għamiltu dan għal ħafna drabi. (1 Korintin 6:18; Efesin 5:5) B’hekk, it-tfal setgħu fehmu l-importanza taʼ dak li jogħġob u dak li ma jogħġobx lil Ġeħova. Madankollu, li tpoġġi l-moħħ tiegħu fit-tfal jirrikjedi iżjed. It-tfal għandhom bżonn l-għajnuna biex jirraġunaw dwar il-valur tal-liġijiet taʼ Ġeħova. Għandhom bżonn jiġu konvinti li l-liġijiet tiegħu huma tajbin u taʼ benefiċċju u l-fatt li nobduhom huwa xieraq u evidenza taʼ mħabbitna. Biex it-tfal jaċċettaw il-mod kif Alla jqis l-affarijiet, intom il-ġenituri tridu tirraġunaw magħhom mill-Iskrittura, u b’hekk biss ikun jistaʼ jingħad li qegħdin tpoġġu l-moħħ tiegħu fihom.
12. Ġenitur kif jistaʼ jgħin lit-tfal ikollhom il-ħarsa xierqa lejn ir-relazzjonijiet sesswali?
12 Meta titkellmu dwar is-sess, tistgħu tistaqsu, “Taħseb int li meta nobdu l-liġi taʼ Ġeħova biex ma jkollniex relazzjonijiet sesswali qabel iż-żwieġ se niġu mċaħħdin mill-ferħ?” Inkuraġġixxu lit-tifel, jew it-tifla, jispjega t-tweġiba tiegħu. Wara li terġgħu tqisu l-arranġament meraviljuż t’Alla biex tinġieb tarbija fid-dinja, tistgħu tistaqsu: “Taħseb li Alla tagħna kollu mħabba se jagħmel liġijiet biex jisirqilna t-tgawdija tal-ħajja? Jew taħseb li l-liġijiet tiegħu qegħdin hemm biex iferrħuna u jipproteġuna?” (Salm 119:1, 2; Isaija 48:17) Siru afu kif qed jaħsibha binkom dwar din il-ħaġa. Imbagħad tkunu tistgħu tiġbdu għall-attenzjoni xi eżempji taʼ kif l-immoralità sesswali wasslet għall-uġigħ taʼ qalb u l-inkwiet. (2 Samwel 13:1-33) Billi tirraġunaw mat-tifel tagħkom biex b’hekk hu jifhem u jaċċetta l-ħarsa t’Alla, intom se tkunu ħdimtu ħafna biex tpoġġu l-moħħ t’Alla fih. Madankollu, hemm ħaġ’oħra x’tistgħu tagħmlu.
13. It-tfal x’għandhom jifhmu dwar Ġeħova sabiex jiġu motivati jobduh?
13 B’mod għaqli, mhux biss se tgħallmu lit-tifel tagħkom il-konsegwenzi li jiġu jekk ma nobdux lil Ġeħova imma se tispjegawlu wkoll kif Ġeħova jiġi effettwat personalment bil-mod kif ngħixu. Uru lit-tifel tagħkom mill-Bibbja li nistgħu nweġġgħu qalb Ġeħova meta nonqsu li nagħmlu r-rieda tiegħu. (Salm 78:40, 41) Tistgħu tistaqsu, “Għala ma tixtieqx tweġġaʼ qalb Ġeħova?” u spjega: “L-għadu t’Alla, Satana, jgħid li aħna naqdu lil Ġeħova għal raġunijiet egoistiċi u mhux għax inħobbuh.” Imbagħad spjega kif Ġob ferraħ qalb Ġeħova billi żamm l-integrità, u b’hekk ta tweġiba għall-akkuża falza taʼ Satana. (Ġob 1:9-11; 27:5, KŻ) It-tifel tagħkom jeħtieġ li jifhem li skond kif iġib ruħu jistaʼ jnikket jew iferraħ lil Ġeħova. (Proverbji 27:11) Dan u ħafna tagħlim vitali ieħor jistaʼ jiġi mgħallem lit-tfal billi tużaw il-ktieb Tgħallem mill-Għalliem il-Kbir.a
Riżultati li Jġibu l-Ferħ
14, 15. (a) Liema lezzjonijiet mill-ktieb Għalliem immotivaw lit-tfal? (b) Liema riżultati tajbin kellek int u tuża l-ktieb? (Ara wkoll il-kaxxa f’paġni 18-19.)
14 Nannu fil-Kroazja li jaqra l-ktieb Għalliem maʼ neputih taʼ sebaʼ snin jgħid li t-tifel qallu dan li ġej: “Il-mamà qaltli nagħmel xi ħaġa, imma jien ma ridtx nagħmilha. Imbagħad ftakart fil-kapitlu ‘L-Ubbidjenza Tipproteġik,’ allura rġajt lura u għedtilha li se nibda nobdiha.” Dwar il-kapitlu “Għala M’Għandniex Nigdbu,” koppja minn Florida, fl-Istati Uniti taʼ l-Amerika, qalet: “Fih mistoqsijiet li jistiednu lit-tfal jiftħu qalbhom u jammettu l-iżbalji li altrimenti ma kinux se jammettu.”
15 Il-ktieb Għalliem fih iżjed minn 230 stampa, u maʼ kull stampa jew grupp taʼ stampi hemm xi kliem, jew deskrizzjoni. “Spiss ibni jsammar għajnejh fuq stampa u ma jkunx iridni ndawwar il-paġna,” innotat omm bl-apprezzament. “L-istampi mhux biss jolqtu l-għajn imma wkoll fihom lezzjonijiet, jew għallinqas iġagħlu lit-tfal jistaqsu mistoqsijiet. Dwar stampa fejn hemm tifel jara t-televixin f’kamra mudlama, ibni staqsa, ‘Ma, x’inhu jagħmel dan it-tifel?’ b’ton li wera li kien jaf li hemm xi ħaġa ħażina.” Il-kliem taʼ maʼ l-istampa jgħid: “Min jistaʼ jara kulma nagħmlu?”
Edukazzjoni Vitali għal-Lum
16. Illum x’inhu vitali li ngħallmu lit-tfal, u għaliex?
16 It-tfal għandhom bżonn ikunu jafu l-użu xieraq u dak mhux xieraq tal-partijiet privati taʼ ġisimhom. Madankollu, m’huwiex dejjem faċli titkellem dwar dan. Ġurnalista rrimarkat li hi kibret fi żmien li fih l-użu tal-kliem li jirreferi għall-organi sesswali kien meqjus bħala offensiv. Rigward it-tagħlim taʼ wliedha, kitbet: “Se jkolli negħleb din il-mistħija.” Fil-fatt, meta minħabba l-mistħija l-ġenituri jevitaw is-suġġett tas-sess, ma jkunux qed jipproteġu lit-tfal. Dawk li jittantaw lit-tfal sesswalment ikunu qed jieħdu vantaġġ mill-innoċenza tagħhom. Il-ktieb Tgħallem mill-Għalliem il-Kbir jittratta dan is-suġġett b’rispett u b’mod deċenti. L-informazzjoni dwar is-sess ma tneħħix l-innoċenza mit-tfal, filwaqt li n-nuqqas tagħha jistaʼ jwassal għal li jiġu misruqin minnha.
17. Il-ktieb Għalliem kif jgħin lill-ġenituri biex jgħallmu ’l uliedhom dwar is-sess?
17 F’kapitlu 10, li fih diskussjoni dwar l-anġli l-ħżiena li niżlu fuq l-art u kellhom it-tfal, it-tifel jiġi mistoqsi, “Int x’taf dwar ir-relazzjonijiet sesswali?” Il-ktieb jagħti tweġiba sempliċi u bir-rispett. Iktar tard, kapitlu 32 jispjega kif it-tfal jistgħu jiġu protetti minn dawk li jittantawhom sesswalment. Ħafna ittri mibgħutin lill-pubblikaturi taʼ din ir-rivista kkonfermaw li tagħlim bħal dan huwa vitali. Ittra minnhom qalet: “Il-ġimgħa l-oħra meta ħadna lit-tifel tagħna Javan għand it-tabiba, din staqsiet jekk konniex iddiskutejna miegħu l-użu xieraq tal-partijiet privati tal-ġisem. Baqgħet impressjonata ħafna li konna għamilna hekk permezz tal-ktieb il-ġdid tagħna.”
18. Il-ktieb Għalliem kif jiddiskuti l-wiri taʼ qima lill-emblemi nazzjonali?
18 Kapitlu ieħor jittratta dwar ir-rakkont Bibliku tat-tliet żgħażagħ Ebrej Sidrak, Mesak, u Għabednegu, li rrifjutaw li jagħtu qima lil statwa li kienet tirrappreżenta lill-Istat Babiloniż. (Danjel 3:1-23, 91-97 [3:1-30, NW]) Xi wħud jistgħu ma jifhmux il-konnessjoni li hemm bejn li tqim statwa u li ssellem lill-bandiera, bħalma jindika li hemm il-ktieb Għalliem. Madankollu, innota dak li kellu x’jgħid l-awtur Edward Gaffney meta ġie intervistat mir-rivista U.S. Catholic. Hu semma li wara li bintu attendiet l-ewwel ġurnata tagħha l-iskola, hi qaltlu li kienet tgħallmet “talba ġdida fl-iskola.” Għalhekk, talabha tirripetihielu. “Poġġiet idha fuq qalbha,” qal Gaffney, “u b’ċerta kburija bdiet, ‘Jien inwiegħed il-lealtà tiegħi lill-bandiera . . . ’” Hu kompla: “F’daqqa waħda bdejt nifhem. Ix-Xhieda taʼ Ġeħova kellhom raġun. Hemm aspett taʼ spiritwalità nazzjonali li qed tiġi inkuraġġita fl-iskejjel tagħna sa minn età żgħira—ċertament lealtà bla limitu.”
Jiswa li Tagħmel Kull Sforz
19. Liema premjijiet jiġu jekk tgħallem lit-tfal?
19 Tassew, l-isforzi kollha li tagħmel biex tgħallem lit-tfal huma siewja ferm. Waħda omm minn Kansas, fl-Istati Uniti taʼ l-Amerika, qabżilha d-dmugħ meta rċiviet ittra mingħand binha. Hu kiteb: “Inħossni fortunat ħafna li kelli trobbija li għenitni nkun stabbli u bilanċjat emozzjonalment. Int u l-papà ċertament li jistħoqqilkom tifħir.” (Proverbji 31:28) Il-ktieb Tgħallem mill-Għalliem il-Kbir jistaʼ jgħin ħafna iżjed ġenituri jgħallmu ’l uliedhom biex b’hekk jipproteġu dan il-wirt prezzjuż.
20. X’għandhom jiftakru dejjem il-ġenituri, u x’effett għandu jkollu dan fuqhom?
20 It-tfal tagħna jistħoqqilhom li nagħtuhom il-ħin, l-attenzjoni, u l-isforz kollu li nistgħu. Iż-żmien tat-tfulija huwa qasir wisq. Ħudu vantaġġ minn kull opportunità biex tkunu magħhom u tgħinuhom. Ma jiddispjaċikomx żgur. Maż-żmien isiru jħobbukom. Ftakru dejjem li wliedkom huma rigal għalikom mingħand Alla. X’wirt prezzjuż huma! (Salm 127:3-5) Għalhekk, ittrattawhom fi qbil maʼ dan, daqslikieku intom responsabbli quddiem Alla taʼ kif trabbuhom għax fil-fatt hekk hu!
[Nota taʼ taħt]
a Pubblikat mix-Xhieda taʼ Ġeħova. Ara kapitlu 40, “Kif Tferraħ lil Alla.”
Int Kif Twieġeb?
• Għala l-ġenituri jeħtieġu speċjalment issa li jipproteġu lil uliedhom?
• Minn liema tip taʼ tagħlim jiġi l-għerf?
• Liema kwistjonijiet vitali hemm x’tiddiskutu maʼ wliedkom illum?
• Il-ktieb Għalliem kif għen lill-ġenituri jgħallmu lil uliedhom?
[kaxxa/Stampi f’paġni 18, 19]
Ktieb għal Kulħadd
Il-ktieb Tgħallem mill-Għalliem il-Kbir ġie preparat biex jgħin lill-ġenituri jew adulti oħrajn jaqraw u jiddiskutu t-tagħlim taʼ Ġesù Kristu mat-tfal. Madankollu, adulti li qraw il-ktieb esprimew l-apprezzament sinċier għal dak li tgħallmu.
Raġel f’Texas, l-Istati Uniti, qal: “Il-ktieb Tgħallem mill-Għalliem il-Kbir iqanqal lil nies taʼ kull età bis-sempliċità tiegħu—anki lili li għandi 76 sena. Grazzi ħafna, mingħand xi ħadd li ilu jaqdi lil Ġeħova sa minn żgħożitu.”
Qarrejja minn Londra, l-Ingilterra, tgħid: “It-tixbihat mill-isbaħ li fih żgur li jilħqu l-qlub tal-ġenituri u t-tfal bl-istess mod. Il-mistoqsijiet u l-mod kif inhu mħejji tassew jispikkaw u kemm huwa sabiħ li tara kif jiġu diskussi suġġetti delikati, bħal kapitlu 32, ‘Kif Ġesù Ġie Protett.’” Hi kkonkludiet: “Għalkemm dan il-ktieb bla dubju ġie preparat primarjament għat-tfal tax-Xhieda taʼ Ġeħova, naħseb li l-għalliema u oħrajn se jkunu ferm kuntenti li jirċievu kopja wkoll. Inħares ’il quddiem biex nużah fix-xhur u s-snin li ġejjin.”
Mara minn Massachusetts, l-Istati Uniti, ikkummentat dwar il-ħafna “stampi preparati sew.” Hi osservat: “Innotajt li għalkemm il-ktieb huwa disinjat għat-tfal, is-suġġetti diskussi fih jistgħu wkoll jgħinu lilna l-adulti naħsbu dwar ir-relazzjoni persunali tagħna maʼ Ġeħova.”
“Illaħwa! Xi ktieb meraviljuż!” esprimiet waħda mara minn Maine, l-Istati Uniti. “M’huwiex biss għat-tfal iż-żgħar imma għalina lkoll bħala wlied Alla. Laqatli l-iktar emozzjonijiet profondi li lanqas biss kont naf bihom u tassew qanqalni. Imbagħad, ħassejt paċi kbira. Inħossni tant qrib Ġeħova bħala Missieri. Neħħieli l-uġigħ kollu li kelli matul is-snin u wrieni l-iskop tiegħu b’mod ċar.” Hi kkonkludiet: “Qed ngħid lil kulħadd, ‘Jekk jogħġbok aqrah.’”
Mara minn Kyoto, il-Ġappun, qalet li meta kienet qed taqra lin-neputijiet tagħha, huma staqsew mistoqsijiet, bħal: “‘X’inhu jagħmel dak it-tifel? X’qed tgħidilha lil din it-tifla? X’inhi tagħmel din l-omm? U dan l-iljun?’ Dan il-ktieb jgħallem affarijiet li jinteressawna, u allura nħobbu iktar minn kwalunkwe ktieb ieħor li nistaʼ nsib fil-librerija.”
Missier f’Calgary, il-Kanada, qal li malli rċieva l-ktieb, hu beda jaqrah lit-tifla tiegħu taʼ sitt snin u lit-tifel taʼ disaʼ snin. “Mill-ewwel stagħġibt bir-reazzjoni tagħhom,” hu jgħid. “It-tfal kienu attenti u bdew iwieġbu l-mistoqsijiet minn qalbhom. Ħassewhom involuti fl-istudju, u dan tahom ċans jesprimu ruħhom. Imtlew bl-entużjażmu, u t-tifla qalet li tixtieq tistudja l-ktieb kull fil-għaxija.”
Wara studju minnhom, il-missier qal: “It-tifel u jien tkellimna dwar Ġeħova u l-iskopijiet tiegħu għal sigħat sħaħ. It-tifel kellu ħafna mistoqsijiet mill-ktieb. Qabiżli d-dmugħ minn għajnejja meta qalli l-lejl it-tajjeb u staqsieni: ‘Pa, nistgħu nerġgħu nagħmluha? Għandi ħafna mistoqsijiet, u rrid inkun naf kollox dwar Ġeħova.’”
[Stampa f’paġna 15]
Ġenituri, x’tistgħu titgħallmu mill-eżempju taʼ Manuħa?
[Stampa f’paġna 16]
Tfal, x’tistgħu titgħallmu mill-eżempju tat-tliet Ebrej?
[Stampi f’paġna 17]
L-istampi u l-kliem taʼ magħhom fil-ktieb “Għalliem” huma għodda effettiva għat-tagħlim
Ananija x’gidba qed jgħid lil Pietru?
Min jistaʼ jara kulma nagħmlu?