Ħabta u Sabta Sseħħ Traġedja

OWEN, tifel taʼ sentejn u nofs, kien qed jilgħab fil-​kamra tal-​banju fid-​dar tiegħu. Irnexxielu jilħaq fejn kienu jżommu l-​mediċina, post li l-​ġenituri tiegħu ħasbu li ma setax jilħqu. Fost l-​affarijiet li kien hemm, hu sab flixkun li qajjimlu l-​kurżità. Fetaħ il-​flixkun u xorob il-​kontenut. Ħabta u sabta seħħet traġedja.

Il-flixkun kien fih aċidu perikoluż, u b’dispjaċir, iċ-​ċkejken Owen miet. Il-​ġenituri tiegħu kellhom qalbhom maqsuma. Missieru, Percy, fittex il-​faraġ mill-​knisja li kien jattendi. “Dan għala ġara?” staqsa hu. Il-​qassis wieġeb, “Alla ried anġlu żgħir ieħor fis-​sema.” Maħkum min-​niket, missier Owen ħass li dan kien nuqqas taʼ ġustizzja. Huwa minnu li Alla ried li sseħħ traġedja bħal din? Percy kien diżappuntat ħafna bil-​knisja u ddeċieda li ma jibqax jassoċja magħha.

Meta kien qed jirrifletti fuq dak li ġara, Percy staqsa: ‘It-​tifel ċkejken tiegħi għadu jħoss l-​uġigħ? Qatt se nerġaʼ narah?’

Int ukoll forsi ħsibt dwar x’jiġri meta xi ħadd imut u jekk hux possibbli li fil-​futur terġaʼ tingħaqad mal-​maħbubin li mietu. Il-​Kelma t’Alla, il-​Bibbja, tagħti tweġibiet għal dawn il-​mistoqsijiet. Il-​paġni tagħha fihom tweġibiet ċari taʼ faraġ għal dawk kollha li ffaċċjaw traġedji simili. Iżjed minn hekk, tikxef prospett glorjuż li wiegħed Alla​—l-​irxoxt.

Jekk jogħġbok aqra l-​artiklu li jmiss biex titgħallem iktar dwar din it-​tama meraviljuża.