Id-​Dinja f’Liema Direzzjoni Sejra?

L-​UNITÀ FID-​DINJA. Kemm iddoqq għal widnejna! Żgur li kulħadd jixtieqha, hux hekk? Iva, saru ħafna taħditiet dwar l-​unità. Kemm-il darba, il-​laqgħat tal-​mexxejja dinjin iċċentraw fuq dan is-​suġġett. F’Awissu tas-​sena 2000, iktar minn 1,000 mexxej reliġjuż iltaqgħu l-​Istati Uniti fi New York għas-​Summit tal-​Millennju għall-​Paċi Dinjija. Huma ddiskutew is-​soluzzjonijiet għall-​konflitti tad-​dinja. Madankollu, il-​konferenza fiha nfisha kienet riflessjoni tal-​kontroversji jbaqbqu tad-​dinja. Wieħed mufti, uffiċjal Musulman minn Ġerusalemm, irrifjuta li jattendi minħabba li kien se jkun hemm rabbi Lhudi preżenti. Oħrajn ħassewhom offiżi minħabba li d-​Dalai Lama, mexxej reliġjuż tal-​Buddisti, ma ġiex mistieden għall-​ewwel żewġ ġranet minħabba l-​biżaʼ li dan setaʼ jqajjem l-​għadab taċ-​Ċina.

F’Ottubru tas-​sena 2003, in-​nazzjonijiet taʼ madwar l-​Oċean Paċifiku ddiskutew kwistjonijiet dwar is-​sigurtà fid-​dinja fis-​summit Asia-Pacific Economic Cooperation (APEC) li nżamm fit-​Tajlandja. Il-​21 nazzjon li kien hemm preżenti wiegħdu solennement li jġibu fix-​xejn lill-​gruppi terroristiċi u qablu bejniethom dwar modi kif jistgħu jżidu s-​sigurtà tal-​globu kollu. Madankollu, waqt il-​konferenza, diversi rappreżentanti gergru dwar ir-​rimarki taʼ prim ministru wieħed, għax intqal li dawn ir-​rimarki kienu attakk mimli mibegħda għal-​Lhud.

Għala M’Hawnx Unità?

Avolja nisimgħu ħafna dwar l-​unità fid-​dinja, ftit li xejn naraw riżultati konkreti. Minkejja l-​isforzi sinċieri taʼ ħafna wħud, l-​unità fid-​dinja għala għadha ma tistax tinkiseb mill-​umanità fis-​seklu 21?

Parti mit-​tweġiba tidher fil-​kummenti taʼ wieħed mill-​prim ministri li attendew il-​konferenza APEC. Hu qal, “Jeżisti fattur li jissejjaħ kburija nazzjonali.” Iva, is-​soċjetà umana hija mgħaddsa fin-​nazzjonaliżmu. Kull nazzjon u grupp etniku huwa maħkum minn xewqa li jkun indipendenti minn pajjiżi oħrajn. Is-​sovranità nazzjonali flimkien maʼ l-​ispirtu taʼ kompetizzjoni u regħba pproduċew sitwazzjoni tbaqbaq. F’każ wara l-​ieħor, meta l-​interessi nazzjonali jiġu f’konflitt maʼ l-​interessi globali, huma l-​interessi nazzjonali li joħorġu rebbieħa.

In-nazzjonaliżmu jiġi deskritt tajjeb bl-​espressjoni mis-​salmista, “mard tal-​mewt.” (Salm 91:3) Huwa bħallikieku pjaga fuq l-​umanità, li twassal għal tbatija kbira. In-​nazzjonaliżmu, bil-​mibegħda għal popli oħra li tirriżulta minnu, ilu jeżisti għal sekli sħaħ. Illum, in-​nazzjonaliżmu jkompli jrewwaħ il-​fjammi tal-​firda, u l-​ħakkiema umani ma kinux kapaċi jwaqqfuh.

Ħafna awtoritajiet jirrikonoxxu li n-​nazzjonaliżmu u l-​egoiżmu huma l-​għeruq tal-​problemi tad-​dinja. Per eżempju, U Thant, li qabel kien is-​Segretarju Ġenerali tal-​Ġnus Magħquda osserva: “Ħafna mill-​problemi li niffaċċjaw illum huma ħtija, jew riżultat, t’attitudnijiet ħżiena . . . Fost dawn insibu l-​konċett taʼ nazzjonaliżmu ristrett​—‘il-​pajjiż tiegħi, tajjeb jew ħażin.’” Xorta waħda, illum in-​nazzjonijiet, mitlufin fl-​egoiżmu, qed jinsistu dejjem iktar għas-​sovranità tagħhom stess. Dawk li qegħdin minn fuq, ma jridu jċedu lanqas farka mill-​vantaġġi li għandhom. Per eżempju, l-​International Herald Tribune għamlet din l-​osservazzjoni dwar l-​Unjoni Ewropea: “Ir-​rivalità u n-​nuqqas taʼ fiduċja jibqgħu l-​mod bażiku kif timxi l-​politika Ewropea. Il-​maġġuranza mill-​pajjiżi membri taʼ l-​Unjoni Ewropea għadhom ma jistgħux jaċċettaw li xi wieħed mill-​membri l-​oħra jkun iktar influwenti u jieħu t-​tmexxija.”

Il-Kelma t’Alla, il-​Bibbja, tiddeskrivi tajjeb ir-​riżultat taʼ ħakma mill-​bniedem, billi tgħid: “Bniedem jaħkem fuq ieħor u jagħmillu l-​ħsara.” (Koħèlet 8:9) Minħabba li qasmu d-​dinja f’nazzjonijiet separati għalihom infushom, gruppi taʼ bnedmin kif ukoll nies individwali esperjenzaw it-​twettiq taʼ dan il-​prinċipju Bibliku: “Min irid jinfired mill-​oħrajn jara x’jaqlaʼ, u għal kull xejn jiġġieled.”—Proverbji 18:1.

Il-Ħallieq tagħna, li jaf x’inhu l-​aħjar għalina, qatt ma kellu l-​intenzjoni li l-​bnedmin iwaqqfu gvernijiet tagħhom u jaħkmu lilhom infushom. Billi għamlu dan, il-​bnedmin injoraw l-​iskop t’Alla u l-​fatt li kollox jappartjeni lilu. Salm 95:​3-5 jgħid: “Alla kbir hu l-​Mulej, sultan kbir fuq l-​allat kollha. F’idejh huma qigħan l-​art, tiegħu huma qċaċet l-​għoljiet. Tiegħu l-​baħar, għax hu għamlu; tiegħu l-​art, għax b’idejh saret.” Alla bi dritt huwa s-​Sovran li lkoll għandna nqisuh bħala ħakkiem. Billi joqogħdu jfittxu li jiksbu s-​sovranità tagħhom stess, il-​ġnus qed jaħdmu kontra r-​rieda tiegħu.​—Salm 2:2.

X’Inhu Meħtieġ?

L-​uniku mod kif id-​dinja tistaʼ tingħaqad huwa billi jkollha awtorità dinjija waħda li taħdem għall-​ġid tan-​nies kollha. Ħafna nies li jaħsbu dwar is-​sitwazzjoni għarfu dan il-​bżonn. Dawk li jirnexxilhom jaslu għal din il-​konklużjoni, madankollu, spiss ma jfittxux is-​sors it-​tajjeb. Per eżempju, ħafna kummentaturi oħra, fosthom mexxejja reliġjużi, ħeġġew lin-​nies jittamaw fil-​Ġnus Magħquda biex iġġib l-​unità fid-​dinja. Madankollu, organizzazzjonijiet magħmula mill-​bniedem, ikunu kemm ikunu nobbli l-​ideali tagħhom, qatt ma kienu kapaċi jsolvu l-​problemi internazzjonali taʼ l-​umanità. Minflok, ħafna minn dawn l-​organizzazzjonijiet saru mera tal-​firda li teżisti bejn diversi pajjiżi.

Il-Bibbja twissi biex il-​bniedem ma jħarisx lejn istituzzjonijiet tal-​bniedem għas-​soluzzjonijiet meta tgħid: “La tittamawx fil-​kbarat, għax il-​bniedem ma jsalvakomx.” (Salm 146:3) Iħallina dan bla tama għal dak li għandu x’jaqsam maʼ l-​unità fid-​dinja? Lanqas xejn! Hemm mod ieħor.

Ħafna nies m’humiex konxji li Alla diġà waqqaf gvern li hu kapaċi jgħaqqad id-​dinja. Il-​Bibbja tgħid li Alla Ġeħova qal: “‘Jien għamiltu s-​sultan tiegħi, fuq Sijon, l-​għolja mqaddsa tiegħi!’ Itlobni, u l-​ġnus nagħtik b’wirtek, u truf l-​art bi priża tiegħek.” (Salm 2:​6, 8) Innota li l-​Iskrittura tgħid li Alla Ġeħova ‘għamlu s-​sultan tiegħu,’ u jirreferi għalih bħala “ibni” fil-​vers 7. Dan m’hu ħadd ħlief l-​aqwa Iben spirtu li għandu Alla, Ġesù Kristu, li ngħata awtorità fuq il-​ġnus kollha.

Kif Se Tiġi l-​Unità fid-​Dinja

Ħafna nies ma jirrikonoxxux din il-​ħakma mis-​sema li waqqaf Alla. Il-​ġnus jibqgħu mqabbdin b’mod persistenti mad-​dritt li jaħsbu li għandhom għas-​sovranità tagħhom stess. Madankollu, Alla mhux se jittollera lil dawk li jirrifjutaw li jirrikonoxxu s-​sovranità tiegħu u lill-​gvern li waqqaf. Dwar dawk li ma jridux jaċċettaw dan l-​arranġament, Salm 2:9 jgħid: “B’virga tal-​ħadid int [l-Iben, Ġesù Kristu] tkissirhom, bħal ġarra tal-​fuħħar frak tagħmilhom.” Kemm jekk jirrealizzaw u kemm jekk le, il-​ġnus jinsabu f’mixja li se twassalhom f’konfront dirett m’Alla. L-​aħħar ktieb tal-​Bibbja jitkellem dwar “is-​slaten taʼ l-​art abitata kollha” li jinġabru flimkien “għall-​gwerra tal-​jum il-​kbir t’Alla li Jistaʼ Kollox.” (Rivelazzjoni 16:14) Il-​ġnus flimkien mal-​metodi tagħhom li jġibu firda se jinqerdu għalkollox. Dan se jwitti t-​triq biex il-​gvern t’Alla jkun jistaʼ jagħmel xogħlu bla xkiel.

Bħala s-​Sovran Universali, Alla Ġeħova permezz taʼ Ibnu se jeżerċita l-​qawwa bl-​għerf biex jagħmel il-​bidliet meħtieġa għal dinja magħquda. Il-​gvern t’Alla se jġib unità vera u se jbierek lil dawk kollha li jħobbu s-​sewwa. Għala ma twarrabx ftit minuti biex taqra Salm 72 mill-​Bibbja tiegħek? Hemmhekk, tingħata stampa profetika taʼ dak li se tagħmel il-​ħakma taħt l-​Iben t’Alla għall-​umanità. In-​nies se jesperjenzaw unità dinjija taʼ veru, u l-​problemi tagħhom kollha​—moħqrija, vjolenza, faqar, u nibqgħu sejrin​—se jkunu affarijiet taʼ l-​imgħoddi.

Fid-dinja mifruda taʼ llum, ħafna jaħsbu li tama bħal din m’hijiex realistika. Imma nagħmlu żball jekk naħsbu hekk. Il-​wegħdi t’Alla qatt ma fallew, u qatt m’hu se jfallu. (Isaija 55:​10, 11) Tixtieq taraha din il-​bidla? Tistaʼ jekk trid. Fil-​fatt, diġà hawn poplu li qed jipprepara għal dak iż-​żmien. Dawn in-​nies jiġu minn kull ġens, imma minflok jiġġieldu, huma jinsabu magħqudin f’sottomissjoni lejn is-​sovranità t’Alla. (Isaija 2:​2-4) Dawn min huma? Huma magħrufin bħala x-​Xhieda taʼ Ġeħova. Għala ma taċċettax l-​istedina tagħhom biex iżżur il-​postijiet fejn jiltaqgħu? X’aktarx li se tgawdi minn sħubija li tibni maʼ nies li jistgħu jgħinuk tkun sottomess għas-​sovranità t’Alla u tgawdi unità li ma se tispiċċa qatt.

[Stampi f’paġna 7]

Nies minn kull ġens qed jippreparaw għal ħajja f’dinja magħquda

[Sors tal-​Istampa f’paġna 4]

Saeed Khan/AFP/Getty Images

[Sors tal-​Istampi f’paġna 5]

Mara mnikkta: Igor Dutina/AFP/Getty Images; protesta: Said Khatib/AFP/Getty Images; vetturi tal-​gwerra: Joseph Barrak/AFP/Getty Images