X’Sar Minnha l-​Unità fid-​Dinja?

“Għall-​ewwel darba mit-​tieni gwerra dinjija ’l hawn, il-​komunità internazzjonali hija magħquda. . . . Għaldaqstant, id-​dinja tistaʼ taħtaf din l-​opportunità biex twettaq il-​wegħda tant mistennija taʼ ordni dinjija ġdida.”

HEKK qal president taʼ l-​Istati Uniti fl-​aħħar snin tas-​seklu għoxrin. Dak iż-​żmien, il-​ġrajjiet internazzjonali kienu donnhom qegħdin juru li l-​unità fid-​dinja kienet fuq ix-​xefaq. Il-​gvernijiet totalitarji bdew jaqgħu wieħed wara l-​ieħor. Il-​Ħajt taʼ Berlin waqaʼ, u għall-​Ewropa dan kien ifisser era ġdida. L-​Unjoni Sovjetika, meqjusa minn ħafna fil-​Punent bħala li tqajjem konflitti globali, għabet u ħalliet lil kulħadd skantat. Il-​Gwerra Bierda waslet fit-​tmiem, u bdew isiru taħditiet favur id-​diżarmament, inkluż id-​diżarmament nukleari. Huwa minnu li faqqgħet gwerra fil-​Golf Persjan, imma din dehret li kienet biss problema temporanja u ħalliet il-​maġġorparti tad-​dinja iktar determinata biex issus wara l-​paċi fid-​dinja.

Setgħu jidhru sinjali pożittivi mhux biss fil-​politika imma wkoll f’aspetti oħra tal-​ħajja. Il-​livell t’għajxien beda jitjieb f’ħafna partijiet tad-​dinja. Il-​progress fil-​qasam mediku għamilha possibbli biex it-​tobba jagħmlu affarijiet li sa ftit għexur taʼ snin qabel kienu jidhru daqslikieku mirakli. Iż-​żjieda fl-​ekonomija f’ħafna pajjiżi tant imxiet ’il quddiem li kien jidher li se twassal għal prosperità globali. L-​affarijiet kienu jidhru li sejrin f’direzzjoni tajba.

Illum, ftit snin wara, ma nistgħu nagħmlu xejn ħlief nistaqsu: ‘X’ġara? Fejn hi l-​unità fid-​dinja li tant ġiet imwiegħda? Għal kuntrarju, id-​dinja tidher li sejra fid-​direzzjoni opposta. Nies jisplodu lilhom infushom, attakki terroristiċi, żjieda rapportata t’armi li jeqirdu bil-​massa, u żviluppi oħrajn li jinkwetawk saru fatturi regulari li jiġu pubblikati fl-​aħbarijiet. Dawn il-​ġrajjiet jidhru li qed jimbottaw lid-​dinja iktar u iktar ’il bogħod mill-​unità globali. Wieħed kapitalista prominenti dan l-​aħħar qal: “Qed ninqabdu ġo ċirku vizzjuż taʼ vjolenza li dejjem tiżdied.”

Unità fid-​Dinja jew Diviżjoni Globali?

Meta fformat il-​Ġnus Magħquda, wieħed mill-​iskopijiet li ġew mistqarra kien li “tiżviluppa relazzjonijiet taʼ ħbiberija fost il-​ġnus ibbażati fuq rispett għall-​prinċipju taʼ drittijiet ugwali u l-​jedd taʼ indipendenza tal-​popli.” Wara kważi 60 sena, intlaħaq dan l-​għan nobbli? ’Il bogħod minn hekk! Minflok “relazzjonijiet taʼ ħbiberija,” l-​espressjoni “jedd taʼ indipendenza” tidher li qiegħda iktar f’moħħ il-​ġnus. Popli u gruppi etniċi li qed jitħabtu biex jistabbilixxu identità u sovranità għalihom infushom qed ikomplu jifirdu d-​dinja. Meta fformat il-​Ġnus Magħquda, din kellha 51 pajjiż bħala membru. Illum għandha 191.

Kif rajna, lejn tmiem is-​seklu 20, kulħadd kien qed jittama għal dinja magħquda. Minn dak iż-​żmien, dik it-​tama sfaxxat hekk kif il-​bnedmin komplew jaraw b’għajnejhom it-​tkissir bil-​mod il-​mod tal-​komunità dinjija. Il-​mod kif il-​Jugoslavja nqasmet bi vjolenza, in-​nuqqas taʼ qbil bejn iċ-​Ċeċnija u r-​Russja, il-​gwerra fl-​Iraq, u l-​massakru kontinwu fil-​Lvant Nofsani​—dan kollu jagħti evidenza taʼ nuqqas li dejjem jikber taʼ unità.

M’għandniex xi ngħidu, ħafna mill-​isforzi li jsiru għall-​paċi kienu sinċieri u b’intenzjoni tajba. Minkejja dan, l-​unità fid-​dinja donnha ma tistax tintlaħaq. Ħafna jibqgħu jaħsbu: ‘L-​unità fid-​dinja għala donnha li qatt ma tistaʼ tinkiseb? Id-​dinja f’liema direzzjoni sejra?’

[Sors tal-​Istampi f’paġna 3]

AP Photo/Lionel Cironneau

Arlo K. Abrahamson/AFP/ Getty Images