Proklamaturi tas-​Saltna Jirrapportaw

Poplu Onest Iġib Tifħir lil Ġeħova

MADWAR id-​dinja, ix-​Xhieda taʼ Ġeħova​—kbar u żgħar​—huma magħrufin għall-​onestà tagħhom. Ikkunsidra dawn l-​eżempji minn tliet kontinenti.

Ġurnata waħda, Olusola, li għandha sbatax-il sena u li toqgħod in-​Niġerja, sabet kartiera fl-​art fi triqitha lura d-​dar mill-​iskola. Ħaditha għand is-​surmast, u meta għadd il-​flus dawn ammontaw għal ₦6,200 (xi Lm15). Is-​surmast ta lkartiera lura lill-​għalliem li kien tilifha. L-​għalliem ta ₦1,000 (ftit iktar minn Lm2) lil Olusola, bħala apprezzament, u qalilha biex bihom tħallas l-​istudji taʼ l-​iskola. Meta l-​istudenti l-​oħra semgħu x’kien ġara, huma bdew iwaqqgħu għaċ-​ċajt lil Olusola. Ftit ġimgħat wara, student irrapporta li flusu ġew misruqin, u għalhekk l-​għalliema ġew mitluba jfittxu għand l-​istudenti kollha. “Int oqgħod hawn,” qal l-​għalliem lil Olusola. “Jien naf li int bħala Xhud taʼ Ġeħova, ma tistax tisraq.” Il-​flus instabu għand tnejn mis-​subien li kienu waqqgħu għaċ-​ċajt lil Olusola, u dawn ġew kastigati bl-​aħrax. Olusola tikteb: “Verament ferħana li jien magħrufa bħala waħda mix-​Xhieda taʼ Ġeħova, li qatt ma jisirqu, u għalhekk tingħata glorja lil Ġeħova.”

Darba minnhom, wara li ħareġ mid-​dar, Marcelo mill-​Arġentina, sab bagalja fl-​art xi ftit metri ’l bogħod mill-​bieb taʼ wara tad-​dar tiegħu. Wara li daħħalha fid-​dar, fetaħha bil-​mod maʼ martu. B’sorpriża, sabu somma kbira fi flus kontanti, credit cards, u xi ċekkijiet iffirmati, wieħed minnhom taʼ miljun pesos (kważi Lm108,000). Fuq irċivuta, huma sabu numru tat-​telefon. Huma ċemplu lill-​proprjetarju u rranġaw ħalli jieħdu l-​bagalja lura, b’dak li kien fiha, fuq il-​post tax-​xogħol taʼ Marcelo. Meta l-​proprjetarju wasal, hu deher inkwetat. Is-​sid qallu biex jikkalma għaliex Marcelo kien wieħed mix-​Xhieda taʼ Ġeħova. Il-​proprjetarju ta biss 20 pesos (xi Lm1.72ċ) lil Marcelo biex jirringrazzjah talli sab il-​bagalja. Is-​sid irrabja ferm minħabba dan għaliex kien verament impressjonat bl-​onestà taʼ Marcelo. Permezz t’hekk, Marcelo kellu l-​opportunità biex jispjega li bħala Xhud taʼ Ġeħova jrid ikun dejjem onest.

L-​esperjenza li jmiss ġejja mill-​Kyrgyzstan. Rinat, tifel taʼ sitt snin, sab portmoni li kien taʼ mara toqgħod viċin tiegħu. Il-​portmoni kien fih 1,100 som (xi Lm7). Meta Rinat ta lura l-​portmoni mitluf lill-​mara, hi għaddet il-​flus u informat lil omm Rinat li sabet 200 som (xi Lm2) neqsin. Rinat qalilha li l-​flus ma kienx ħadhom hu. Wara ħarġu jfittxu l-​flus neqsin u sabuhom viċin il-​post fejn instab il-​portmoni. Il-​mara baqgħet skantata. Hi rringrazzjat lil Rinat u lil ommu, l-​ewwelnett minħabba li ta lura l-​flus mitlufin u t-​tieninett, għall-​mod kif ġie mrobbi bħala Kristjan.