“Henjin Dawk li Huma Konxji tal-​Bżonn Spiritwali Tagħhom”

META l-​għasafar iqumu fil-​għodu, huma spiss ipespsu għal ftit ħin u mbagħad itiru biex ifittxu l-​ikel. Fil-​għaxija, imorru lura fil-​bejtiet tagħhom, ipespsu ftit ieħor, u jmorru jorqdu. F’ċerti staġuni huma jitgħammru, ibidu l-​bajd, u jrabbu liċ-​ċkejknin tagħhom. Annimali oħra għandhom stil taʼ ħajja simili li tistaʼ tbassru minn qabel.

Aħna l-​bnedmin differenti. Veru, aħna nieklu, norqdu, ikollna t-​tfal, imma ħafna minna m’aħniex kuntenti biss b’dawn l-​affarijiet. Irridu nkunu nafu għala qegħdin hawn. Infittxu skop għal ħajjitna. Nixtiequ wkoll tama għall-​futur. Dawn il-​bżonnijiet iktar profondi jippontaw lejn kwalità li hi unika għall-​bnedmin​—l-​ispiritwalità, jew il-​bżonn u l-​potenzjal għal affarijiet spiritwali.

Magħmulin fuq Xbihat Alla

Il-​Bibbja tispjega r-​raġuni għala l-​bniedem għandu bżonn ġewwieni għall-​ispiritwalità, billi tgħid: “Alla ħalaq il-​bniedem fuq xbihietu fuq xbihat Alla ħalqu, raġel u mara ħalaqhom.” (Ġenesi 1:27) Il-​fatt li aħna maħluqin “fuq xbihat Alla” jfisser li avolja ġejna mtebbgħin bid-​dnub u l-​imperfezzjoni, aħna għandna l-​abbiltà li nirriflettu ċerti kwalitajiet li għandu Alla. (Rumani 5:12) Per eżempju, nistgħu nkunu kreattivi. Għandna wkoll ammont taʼ għerf, sens taʼ ġustizzja, u l-​abbiltà li nħobbu tant li lesti nagħmlu sagrifiċċju persunali għal xulxin. Iktar minn hekk, nistgħu nirriflettu fuq il-​passat u nippjanaw għall-​futur.—Proverbji 4:7; Koħèlet 3:​1, 11; Mikea 6:8; Ġwanni 13:34; 1 Ġwanni 4:8.

Il-potenzjal għall-​ispiritwalità tagħna jidher b’mod tassew ċar mix-​xewqa naturali li għandna biex inqimu lil Alla. Jekk ma nissodisfawx kif suppost dan il-​bżonn li nkunu f’kuntatt mal-​Ħallieq, ma nistgħux insibu ferħ veru u dejjiemi. “Henjin dawk li huma konxji tal-​bżonn spiritwali tagħhom,” qal Ġesù. (Mattew 5:3) Però, irridu noqogħdu attenti li nissodisfaw dan il-​bżonn bil-​verità spiritwali​—fatti dwar Alla, il-​livelli tiegħu, u l-​iskop tiegħu għall-​umanità. Fejn nistgħu nsibu l-​verità spiritwali? Fil-​Bibbja.

“Kelmtek Hi l-​Verità”

L-​appostlu Pawlu kiteb: “L-​Iskrittura kollha hi mnebbħa minn Alla u tiswa biex tgħallem, twiddeb, tikkoreġi, tiddixxiplina fis-​sewwa.” (2 Timotju 3:16) Il-​kliem taʼ Pawlu hu fi qbil maʼ dak taʼ Ġesù, li qal fit-​talb lil Alla: “Kelmtek hi l-​verità.” Illum, aħna nafu dik il-​Kelma bħala l-​Bibbja Mqaddsa, u nkunu għaqlin meta niċċekkjaw jekk it-​twemmin u l-​livelli tagħna jaqblux magħha.​—Ġwanni 17:17.

Meta nqabblu t-​twemmin tagħna mal-​Kelma t’Alla, inkunu qed nimitaw lin-​nies taʼ Berea tal-​qedem, li aċċertaw ruħhom li t-​tagħlim taʼ Pawlu kien fi qbil maʼ l-​Iskrittura. Minflok ma kkritika lil Bereani, Luqa faħħarhom għall-​attitudni tagħhom. Huma “laqgħu l-​kelma bl-​akbar ħeġġa u kienu jeżaminaw bir-​reqqa l-​Iskrittura kuljum biex jaraw jekk dak li semgħu kienx minnu.” (Atti 17:11) Meta tqis kemm hu abbundanti t-​tagħlim reliġjuż u morali kontradittorju llum, huwa importanti li aħna nimitaw l-​eżempju tal-​Bereani li kellhom moħħ nobbli.

Mod ieħor kif nidentifikaw il-​verità spiritwali hu billi naraw kif din tinfluwenza l-​ħajjiet tan-​nies. (Mattew 7:17) Per eżempju, jekk ngħixu skond il-​verità tal-​Bibbja għandna nkunu rġiel miżżewġin aħjar, missirijiet aħjar, nisa miżżewġin aħjar, jew ommijiet aħjar, u għalhekk inżidu l-​hena tal-​familja u l-​hena persunali. “Henjin dawk li jisimgħu l-​kelma t’Alla u jħarsuha,” qal Ġesù.—Luqa 11:28.

Il-kliem taʼ Ġesù jfakkarna f’dak taʼ Missieru tas-​sema, li qal lill-​Iżraelin tal-​qedem: “Jien hu l-​Mulej, Alla tiegħek; jien ngħallmek għall-​ġid tiegħek, u nqabbdek it-​triq fejn għandek timxi. Li kieku tajt widen għall-​kmandamenti tiegħi, kien ikun bħal xmara sliemek, u sedqek bħal mewġ tal-​baħar.” (Isaija 48:​17, 18) Kulmin iħobb it-​tjieba u s-​sewwa żgur li jitqanqal minn dan l-​appell kollu mħabba!

Xi Wħud Jippreferu li “Jgħarrxulhom Widnejhom”

Alla għamel dan l-​appell mill-​qalb lill-​Iżraelin għaliex kienu qed jiġu żvijati minn gideb reliġjuż. (Salm 106:​35-40) Aħna wkoll irridu noqogħdu attenti minn affarijiet li m’humiex minnhom. Dwar dawk li jriduha taʼ Kristjani, Pawlu kiteb: “Ikun hemm perijodu taʼ żmien meta ma jittollerawx it-​tagħlim mimli saħħa, imma, fi qbil max-​xewqat tagħhom, jiġbru għalliema madwarhom biex jgħarrxulhom widnejhom; u jbiegħdu widnejhom mill-​verità, u jduru lejn stejjer foloz.”—2 Timotju 4:​3, 4.

Il-mexxejja reliġjużi jgħarrxu widnejn in-​nies billi jagħlqu għajnejhom għal prattiċi li jissodisfaw xewqat ħżiena, bħas-​sess barra ż-​żwieġ, l-​omosesswalità, u s-​sokor. Il-​Bibbja tgħid ċar u tond li dawk li japprovaw dawn l-​affarijiet u li jipprattikawhom “ma jirtux is-​saltna t’Alla.”—1 Korintin 6:​9, 10; Rumani 1:​24-32.

M’għandniex xi ngħidu, trid il-​kuraġġ biex tgħix skond il-​livelli tal-​Bibbja, speċjalment meta tiġi ridikolat, imma dan hu possibbli. Fost ix-​Xhieda taʼ Ġeħova hemm ħafna wħud li kienu drogati, sakranazzi, żienja, ġellieda, ħallelin, u giddieba. Però, huma ħadu l-​Kelma t’Alla bis-​serjetà u bl-​għajnuna taʼ l-​ispirtu qaddis għamlu bidliet f’ħajjithom biex ‘jimxu kif jixraq lil Ġeħova.’ (Kolossin 1:​9, 10; 1 Korintin 6:11) Ladarba għamlu paċi m’Alla, huma kisbu wkoll il-​paċi ġewwinija u, kif se naraw, kisbu tama ġenwina għall-​futur.

It-​Tama tas-​Saltna

It-​tama li toffri l-​Bibbja taʼ paċi dejjiema għall-​bnedmin se titwettaq permezz tas-​Saltna t’Alla. “Ħa tiġi saltnatek. Ħa jkun li trid int, kif fis-​sema, ukoll fuq l-​art.” (Mattew 6:10) Iva, is-​Saltna t’Alla biss tistaʼ tiżgura li r-​rieda t’Alla sseħħ fuq l-​art. Għala? Għaliex dik is-​Saltna tas-​sema​—gvern f’idejn Ġesù Kristu​—hija l-​mezz t’Alla biex jeżerċita d-​dritt li għandu għas-​sovranità Tiegħu fuq l-​art.—Salm 2:​7-12; Danjel 7:​13, 14.

Bħala s-​Sultan taʼ dik is-​Saltna tas-​sema, Ġesù Kristu se jeħles lill-​bnedmin ubbidjenti minn kull forma taʼ jasar, inkluż il-​ħakma persistenti tad-​dnub taʼ Adam u l-​konsegwenzi tal-​mard u l-​mewt li ġab miegħu. Rivelazzjoni 21:​3, 4 jgħid: “Ara! It-​tinda t’Alla hi mal-​bnedmin . . . U [Alla Ġeħova] jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ. L-​affarijiet taʼ qabel ikunu spiċċaw.”

Il-paċi dejjiema se tirrenja madwar l-​art kollha. Għala nistgħu nkunu ċerti dwar dan? Ir-​raġuni hija rivelata f’Isaija 11:​9, li jgħid: “[Is-sudditi tas-​Saltna] ma jagħmlux aktar deni u anqas ħsara fuq il-​muntanja qaddisa kollha tiegħi, għax mimlija hi l-​art bl-​għarfien tal-​Mulej bħalma l-​baħar hu miksi bl-​ilmijiet.” Iva, kull bniedem fuq l-​art se jkollu għarfien eżatt dwar Alla u se jkun ubbidjenti lejh. Iqawwilek qalbek dan il-​prospett? Jekk iva, issa hu ż-​żmien li tibda tieħu l-​“għarfien tal-​Mulej” li hu tant prezzjuż.

Se Tagħti Kas il-​Messaġġ tas-​Saltna?

Permezz tas-​Saltna, Alla se jreġġaʼ lura lgħemejjel taʼ Satana u se jgħallem lin-​nies dwar il-​mogħdijiet ġusti Tiegħu. Għalhekk, mhux taʼ b’xejn li s-​Saltna kienet is-​suġġett prinċipali fit-​tagħlim taʼ Ġesù. “Irrid inxandar l-​aħbar tajba tas-​saltna t’Alla lil bliet oħrajn ukoll, għax għal dan intbgħatt.” (Luqa 4:43) Kristu kkmanda lid-​dixxipli tiegħu biex jaqsmu dan l-​istess messaġġ m’oħrajn. (Mattew 28:​19, 20) “Din l-​aħbar tajba tas-​saltna,” bassar hu, “tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.” (Mattew 24:14) Dan it-​tmiem ġej b’ħeffa kbira. Kemm hu importanti, mela, li nies taʼ qalb onesta jagħtu kas l-​aħbar tajba li ssalva l-​ħajjiet!

Albert, li ssemma fl-​artiklu taʼ qabel, semaʼ l-​messaġġ tas-​Saltna meta martu u ibnu bdew jistudjaw il-​Bibbja max-​Xhieda taʼ Ġeħova. Għall-​ewwel Albert kien xettiku. Hu saħansitra staqsa lil xi ħadd mill-​kleru lokali biex iżur lil martu u lil ibnu sabiex jikxef il-​fatti dwar ix-​Xhieda. Imma dan il-​membru tal-​kleru ma riedx jindaħal. Allura Albert iddeċieda li jismaʼ d-​diskussjoni Biblika ħalli jipprova jsib l-​iżbalji hu stess. Wara biss sessjoni waħda, hu ngħaqad fl-​istudju, ħerqan biex jitgħallem iktar. Iktar tard spjega għala l-​attitudni tiegħu nbidlet. “Dan hu eżatt dak li dejjem kont qed infittex,” qal hu.

Fl-aħħar, Albert beda jissodisfa l-​bżonn spiritwali tiegħu, u qatt ma ddispjaċieh. Il-​verità tal-​Bibbja tagħtu dak li kien ilu jfittex ħajtu kollha​—is-​soluzzjoni għall-​inġustizzja u l-​korruzzjoni mifruxa fis-​soċjetà, u tama għall-​futur. Il-​verità tal-​Bibbja tatu l-​paċi ġewwinija. Int qed tissodisfa l-​bżonn spiritwali tiegħek? Għala ma tiħux ftit ħin biex taqra l-​mistoqsijiet imniżżlin fil-​kaxxa f’paġna 6? Jekk tixtieq iktar informazzjoni, ix-​Xhieda taʼ Ġeħova se jieħdu pjaċir jgħinuk.

[kaxxa/Stampi f’paġna 6]

QED TISSODISFA L-​BŻONN SPIRITWALI TIEGĦEK?

Tħossok sodisfatt bl-​ikel spiritwali li qed tingħata? Nistidnuk taqra l-​mistoqsijiet li ġejjin u timmarka dawk li taf tweġibhom sew.

□ Min hu Alla, u x’jismu?

□ Min hu Ġesù Kristu? Għalfejn kellu jmut? Kif tistaʼ tibbenefika mill-​mewt tiegħu?

□ Ix-​Xitan jeżisti? Jekk iva, minfejn ġie?

□ X’jiġrilna meta mmutu?

□ X’inhu l-​iskop t’Alla għall-​art u għall-​umanità?

□ X’inhi s-​Saltna t’Alla?

□ X’inhuma l-​livelli t’Alla dwar il-​moralità?

□ Fil-​familja, Alla liema rwol jagħtihom lir-​raġel u l-​mara? Liema huma xi prinċipji Bibliċi li jġibu l-​hena fil-​familja?

Jekk m’intix ċert dwar it-​tweġibiet taʼ xi wħud mill-​mistoqsijiet, tistaʼ titlob kopja tal-​browxer Alla X’Jirrikjedi Minna? Dan il-​browxer, li hu pubblikat mix-​Xhieda taʼ Ġeħova fi kważi 300 lingwa, jiddiskuti 16-il suġġett bażiku mill-​Bibbja u jipprovdi tweġiba Skritturali għall-​mistoqsijiet kollha mniżżlin hawn fuq.

[Stampi f’paġna 4]

Kuntrarju għall-​annimali, il-​bnedmin għandhom bżonn spiritwali

[Stampa f’paġna 5]

“Jiġbru għalliema madwarhom biex jgħarrxulhom widnejhom.”—2 Timotju 4:3

[Stampa f’paġna 7]

Il-​paċi dejjiema se tiġi permezz tas-​Saltna Messjanika t’Alla