Fittex lil Alla b’Qalbek u b’Moħħok

Il-​Kristjanità vera tinkuraġġina nużaw kemm qalbna kif ukoll moħħna biex nibnu fidi li togħġob lil Alla.

FIL-​FATT, Ġesù Kristu, il-​fundatur tal-​Kristjanità, għallem li aħna rridu nħobbu lil Alla ‘b’moħħna kollu,’ jew bl-​intellett tagħna, minbarra ‘b’qalbna u b’ruħna kollha.’ (Mattew 22:37) Iva, il-​qawwa tar-​raġuni tagħna jrid ikollha rwol fundamentali fil-​qima tagħna.

Meta kien jistieden lis-​semmiegħa tiegħu biex jirriflettu fuq it-​tagħlim tiegħu, Ġesù spiss kien jgħid: “Int x’jidhirlek?” (Mattew 17:25; 18:12; 21:28; 22:42) Bl-​istess mod, l-​appostlu Pietru kiteb lil sħabu fit-​twemmin sabiex ‘iqajjem fihom il-​fakultà tal-​ħsieb.’ (2 Pietru 3:​1, NW) L-​appostlu Pawlu, l-​iktar missjunarju li vvjaġġa fl-​ewwel seklu, ħeġġeġ lill-​Kristjani biex jużaw il-​qawwa tar-​raġuni tagħhom u biex ‘jagħrfu x’inhi r-​rieda taʼ Alla, x’inhu t-​tajjeb li jogħġbu, x’inhu perfett.’ (Rumani 12:​1, 2) Huwa biss billi jeżaminaw it-​twemmin tagħhom bir-​reqqa u b’attenzjoni kbira li l-​Kristjani jistgħu jibnu fidi li tkun togħġob lil Alla u li biha jkunu jistgħu jiffaċċjaw b’suċċess il-​provi li jħabbtu wiċċhom magħhom fil-​ħajja.—Lhud 11:​1, 6.

Biex jgħinu lil oħrajn jibnu fidi bħal din, l-​evanġelizzaturi Kristjani tal-​bidu ‘kienu jiddiskutu magħhom fuq l-​Iskrittura, ifehmuhom u jipprovawlhom’ bir-​referenzi l-​affarijiet li kienu jgħallmuhom. (Atti 17:​1-3) Dan il-​metodu raġunevoli taʼ tagħlim qanqal reazzjoni mill-​aħjar f’nies taʼ qalb onesta. Per eżempju, għadd taʼ nies fil-​belt taʼ Berija, fil-​Maċedonja, “laqgħu l-​kelma [t’Alla] bil-​ħeġġa kollha, u kuljum bdew iqallbu l-​Iskrittura biex jaraw jekk dak li semgħu [spjegat minn Pawlu u sħabu] kienx minnu.” (Atti 17:11) Hawnhekk ikun tajjeb li ninnotaw żewġ affarijiet. L-​ewwel, il-​Berijani kienu ħerqanin biex jisimgħu l-​Kelma t’Alla; it-​tieni, m’aċċettawx b’għajnejhom magħluqa dak li semgħu, bħallikieku dan kien żgur korrett, imma rreferew għall-​Iskrittura. Il-​missjunarju Kristjan Luqa bl-​umiltà kollha faħħar lill-​Berijani għal dan, billi sejħilhom “taʼ qalb kbira.” Turi int qalb kbira bħal din fil-​mod kif tħares lejn kwistjonijiet spiritwali?

Il-​Moħħ u l-​Qalb Jaħdmu Id f’Id

Bħalma ssemma qabel, il-​qima vera tinvolvi kemm il-​moħħ kif ukoll il-​qalb. (Mark 12:30) Ftakar fit-​tixbiha li ntużat fl-​artiklu taʼ qabel dwar il-​bajjâd li uża l-​kuluri żbaljati meta żebaʼ dar. Kieku qagħad attent għall-​istruzzjonijiet taʼ min qabbdu jiżbogħ, kien ikun jistaʼ jwettaq xogħlu b’ruħu u ġismu u kien ikollu l-​fiduċja li xogħlu kien se jkun approvat minn sid id-​dar. L-​istess japplika għall-​qima tagħna.

“Dawk li tassew jaduraw,” qal Ġesù, “jibdew jaduraw lill-​Missier fl-​ispirtu u l-​verità.” (Ġwann 4:​23, korsiv tagħna.) Għaldaqstant, l-​appostlu Pawlu kiteb: “Għalhekk aħna wkoll . . . ma hedejniex nitolbu għalikom, u nibqgħu nitolbu li tagħrfu sewwa [“timtlew bl-​għarfien eżatt dwar,” NW] r-​rieda taʼ Alla bl-​għerf kollu u d-​dehen spiritwali. Hekk tkunu tistgħu tgħixu sewwa kif jixraq lill-​Mulej u togħġbuh f’kollox.” (Kolossin 1:​9, 10) Bis-​saħħa taʼ dan l-​“għarfien eżatt,” individwi sinċieri jkunu jistgħu jpoġġu qalbhom u ruħhom fil-​qima tagħhom b’fiduċja sħiħa għaliex huma ‘jaduraw lil dak li jafu.’—Ġwann 4:22.

Għal dawn ir-​raġunijiet, ix-​Xhieda taʼ Jehovah ma jgħammdux lit-​trabi jew lil nies li jkunu għandhom kif bdew juru interess fil-​Bibbja għax dawn ma jkunux studjaw l-​Iskrittura bir-​reqqa. Ġesù inkariga lis-​segwaċi tiegħu: “Agħmlu dixxipli mill-​ġnus kollha, . . . u għallmuhom iħarsu dak kollu li ordnajtilkom jien.” (Mattew 28:​19, 20) Huwa biss wara li jkunu kisbu għarfien eżatt dwar ir-​rieda t’Alla li studenti sinċieri tal-​Bibbja jkunu jistgħu jieħdu deċiżjoni bbażata fuq l-​għarfien eżatt dwar dik li hi qima. Qiegħed int tistinka biex tikseb dan l-​għarfien eżatt?

Nifhmu t-​Talba tal-​Missierna

Biex naraw id-​differenza bejn li jkollok għarfien eżatt u li tkun taf fuq fuq dak li tgħid il-​Bibbja, ejja nikkunsidraw dik li hi magħrufa kważi minn kulħadd bħala l-​Missierna, jew it-​Talba tal-​Mulej, kif insibuha f’Mattew 6:​9-13.

Meta jmorru l-​knisja, miljuni sħaħ jgħidu regolarment it-​talba mudell li għallimna Ġesù. Imma kemm minnhom ġew mgħallmin xi tfisser eżatt, speċjalment l-​ewwel parti tat-​talba li tittratta dwar l-​isem u s-​Saltna t’Alla? Dawn is-​suġġetti tant huma importanti li Ġesù poġġiehom fl-​ewwel post fit-​talba.

Din tibda hekk: “Missierna, li inti fis-​smewwiet, jitqaddes ismek.” Innota li Ġesù qalilna biex nitolbu li jitqaddes l-​isem t’Alla. Għal ħafna nies, dan iqajjem mill-​inqas żewġ mistoqsijiet. L-​ewwel, x’inhu l-​isem t’Alla? U t-​tieni, għala għandu bżonn jitqaddes?

Ir-risposta għall-​ewwel mistoqsija nistgħu nsibuha f’iktar minn 7,000 post fil-​Bibbja bil-​lingwi oriġinali li bihom inkitbet. Post wieħed insibuh f’Salm 83:19 [83:​18, NW]: “Biex jagħrfu li Jaħweh [jew, Jehovah] hu ismek, li int waħdek l-​Għoli fuq l-​art kollha.” (Korsiv tagħna.) Dwar l-​isem divin, Jehovah, Eżodu 3:15 jgħid: “Dan ikun ismi għal dejjem u dan l-​isem ifakkarkom fija minn nisel għal nisel.”a Imma l-​isem t’Alla, li hu l-​istess essenza tas-​safa u l-​qdusija, għala għandu bżonn jitqaddes? Għax ġie mmaqdar u malafamat mill-​bidunett taʼ l-​istorja tal-​bniedem.

Fil-​Ġnien taʼ l-​Għeden, Alla qal lil Adam u Eva li jekk jieklu l-​frotta projbita jmutu. (Ġenesi 2:17) Satana kkontradixxa b’mod insolenti lil Alla, billi qal lil Eva: “Le, żgur ma tmutux.” Għaldaqstant, Satana akkuża lil Alla li kien qed jigdeb. Madankollu, ma waqafx hemm. Hu kompla jmaqdar l-​isem t’Alla, billi qal lil Eva li Alla kien qed iċaħħadha b’mod inġust minn għarfien siewi. “Alla jaf li dak in-​nhar li tieklu [mis-siġra taʼ l-​għarfien tat-​tajjeb u tal-​ħażin] jinfetħu għajnejkom u ssiru bħal allat, li jafu t-​tajjeb u l-​ħażin.” X’malafama!—Ġenesi 3:​4, 5.

Billi ħadu mill-​frott projbit, Adam u Eva ħadu l-​waqfa tagħhom favur Satana. Minn dak iż-​żmien ’l hawn, il-​biċċa l-​kbira mill-​bnedmin, kemm jekk jafu u kemm jekk ma jafux, żiedu maʼ dak it-​tmaqdir oriġinali billi ċaħdu l-​livelli taʼ tjieba t’Alla. (1 Ġwann 5:19) In-​nies għadhom jimmalafamaw ’l Alla billi jwaħħlu fih għas-​sofferenzi tagħhom, avolja dawn għandhom mnejn jiġu minħabba l-​imġiba ħażina tagħhom stess. “Bi bluhatu l-​bniedem jgħarraq ħajtu, u mbagħad jeħodha kontra l-​Mulej,” jgħid Proverbji 19:3. Tistaʼ tifhem issa għala Ġesù, li verament ħabb lil Missieru, talab li jitqaddes Ismu?

“Tiġi Saltnatek”

Wara li talab biex jitqaddes l-​isem t’Alla, Ġesù qal: “Tiġi saltnatek, ikun li trid int, kif fis-​sema, hekkda fl-​art.” (Mattew 6:10) Dwar din is-​silta, nistgħu nistaqsu: ‘X’inhi s-​Saltna t’Alla? U l-​miġja tagħha x’għandha x’taqsam maʼ li jkun li jrid Alla fuq l-​art?’

Fil-Bibbja, il-​kelma “saltna” tfisser bażikament “ħakma minn sultan.” B’mod loġiku, allura, is-​Saltna t’Alla tirreferi għal ħakma, jew gvern, minn Alla, b’sultan magħżul minnu. Dan is-​Sultan m’hu ħadd ħlief Ġesù Kristu rxoxtat—is-​“Sultan tas-​slaten u Sid tas-​sidien.” (Apokalissi 19:16; Danjel 7:​13, 14) Dwar is-​Saltna Messjanika t’Alla f’idejn Ġesù Kristu, il-​profeta Danjel kiteb: “Fi żmien dawn is-​slaten [il-gvernijiet umani li qed jaħkmu issa], Alla tas-​sema jqajjem saltna li ma tinqered qatt, u li l-​ħakma tagħha ma tgħaddix għal poplu ieħor. Hija tfarrak u ttemm is-​saltniet l-​oħra kollha, waqt li hi tibqaʼ wieqfa għal dejjem.”—Danjel 2:44.

Iva, is-​Saltna t’Alla se jkollha kontroll sħiħ taʼ l-​art, se teħlisha mill-​ħżiena kollha u se taħkem fuqha “għal dejjem,” jiġifieri, għall-​eternità. B’dan il-​mod, is-​Saltna t’Alla hija l-​mezz li bih Jehovah iqaddes ismu u jnaddfu minn kull tmaqdir giddieb taʼ Satana u tal-​bnedmin mill-​agħar.—Eżekjel 36:23.

Is-Saltna t’Alla għandha s-​sudditi bħalma għandhom il-​gvernijiet kollha. Min huma dawn? Twieġeb il-​Bibbja: “Il-​ġwejdin għad jirtu l-​art, u bi sliem kotran jitgħaxxqu.” (Salm 37:11) B’mod simili, Ġesù qal: “Henjin taʼ qalbhom ħelwa, għax huma jkollhom b’wirthom l-​art.” M’għandniex xi ngħidu, dawn għandhom għarfien eżatt dwar Alla, għax dan huwa meħtieġ biex jiksbu l-​ħajja.—Mattew 5:5; Ġwann 17:3.

Tistaʼ int timmaġinaha l-​art kollha mimlija nies ġwejdin u qalbhom ħelwa li verament iħobbu ’l Alla u lil xulxin? (1 Ġwann 4:​7, 8) Ġesù għal dan talab meta qal: “Tiġi saltnatek, ikun li trid int, kif fis-​sema, hekkda fl-​art.” Tifhem int għala Ġesù għallem lis-​segwaċi tiegħu biex jitolbu hekk? Iktar importanti, tara int kif it-​twettiq taʼ din it-​talba jistaʼ jeffettwak personalment?

Miljuni Qegħdin Issa Jiddiskutu fuq l-​Iskrittura

Ġesù bassar kampanja globali t’edukazzjoni spiritwali li kellha tħabbar is-​Saltna t’Alla li ġejja. Hu qal: “Dan l-​Evanġelju tas-​Saltna jixxandar fid-​dinja kollha, biex il-​ġnus kollha jkollhom xhieda. Mbagħad jiġi t-​tmiem [tad-dinja, jew sistema, preżenti].”—Mattew 24:14.

Madwar id-​dinja, xi sitt miljun Xhud taʼ Jehovah qed ixandru dan l-​evanġelju lill-​ġirien tagħhom. Huma jistidnuk titgħallem iktar dwar Alla u s-​Saltna tiegħu billi ‘tqalleb fl-​Iskrittura’ u tuża l-​qawwa tar-​raġuni tiegħek. Dan se jsaħħaħlek il-​fidi, u għajnejk jibdew jixegħlu bit-​tama taʼ ħajja fuq l-​art magħmula ġenna, li se tkun “mimlija . . . bl-​għarfien tal-​Mulej bħalma l-​baħar hu miksi bl-​ilmijiet.”—Isaija 11:​6-9.

[Nota taʼ taħt]

[Kaxxa/Stampa f’paġna 8]

IMITA LILL-​GĦALLIEM IL-​PRIM

Ġesù spiss kien jgħallem billi jiffoka fuq suġġetti Bibliċi speċifiċi. Per eżempju, wara li rxoxta, hu spjega l-​irwol tiegħu fl-​iskop t’Alla lil żewġ dixxipli li kienu mifxulin minħabba l-​mewt tiegħu. Luqa 24:27 jgħidilna: “Beda minn Mosè u l-​Profeti kollha jfissrilhom kull ma kien hemm fl-​Iskrittura fuqu.”

Innota kif Ġesù għażel suġġett speċifiku—‘fuqu nnifsu,’ il-​Messija—u kif fid-​diskussjoni tiegħu kkwota minn “kull ma kien hemm fl-​Iskrittura.” Fil-​fatt, Ġesù poġġa xi skritturi rilevanti flimkien bħall-​biċċiet taʼ xi ġigsopażil, u bis-​saħħa t’hekk id-​dixxipli tiegħu setgħu jaraw ċar il-​verità spiritwali. (2 Timotju 1:13) B’riżultat taʼ dan, huma ma kinux biss imdawlin imma wkoll imqanqlin profondament. Ir-​rakkont jgħidilna: “Wieħed lill-​ieħor bdew jgħidu: ‘Ma kinitx imkebbsa qalbna ġewwa fina huwa u jkellimna fit-​triq u jfissrilna l-​Iskrittura?’”—Luqa 24:32.

Ix-​Xhieda taʼ Jehovah jagħmlu ħilithom kollha biex jimitaw il-​metodi taʼ Ġesù fil-​ministeru tagħhom. Il-​pubblikazzjonijiet ewlenin li jużaw għall-​istudju huma l-​browxer Alla X’Jirrikjedi Minna? u l-​ktieb Għarfien Li Jwassal Għall-​Ħajja Taʼ Dejjem. Dawn jittrattaw għadd taʼ suġġetti Bibliċi interessanti, bħal: “Min Hu Alla?,” “Alla Għala Jippermetti s-​Sofferenza?,” “Kif Tistaʼ Ssib il-​Vera Reliġjon?,” “Dawn Huma L-​Aħħar Jiem!,” u “Nibnu Familja Li Tonora Lil Alla.” Kull lezzjoni fiha għadd taʼ skritturi.

Int mistieden li tikkuntattja lix-​Xhieda taʼ Jehovah fil-​komunità tiegħek jew tikteb fl-​indirizz f’paġna 2 taʼ din ir-​rivista għal studju tal-​Bibbja fid-​dar bla ħlas fuq dawn is-​suġġetti u fuq suġġetti oħrajn.

[Stampa]

Ilħaq qalb l-​istudent tiegħek billi tiffoka fuq suġġetti Bibliċi speċifiċi

[Stampi f’paġna 7]

Tifhem int xi tfisser it-​talba mudell li għallimna Ġesù?

“Missierna, li inti fis-​smewwiet, jitqaddes ismek . . . ”

‘Tiġi s-​saltna [Messjanika] tiegħek . . . ’

“Ikun li trid int, kif fis-​sema, hekkda fl-​art”