Mistoqsijiet mill-​Qarrejja

Ladarba s-​Sultan Salamun taʼ Iżrael tal-​qedem ma baqax leali lejn Alla fi xjuħitu, nistgħu nikkonkludu li hu mhux se jiġi rxoxtat?—1 Slaten 11:​3-9.

Filwaqt li l-​Bibbja tagħti lista taʼ ismijiet taʼ xi rġiel u nisa li wrew fidi u li se jiġu rxoxtati, din ma titkellimx speċifikament dwar il-​prospetti taʼ rxoxt taʼ kull persuna individwali li ssemmi. (Ebrej 11:​1-40) Madankollu, fil-​każ taʼ Salamun nistgħu nieħdu idea tal-​ġudizzju t’Alla billi nqabblu dak li ġralu fil-​mewt maʼ dak li ġara lil xi wħud leali meta mietu.

L-Iskrittura titkellem dwar żewġ possibbiltajiet għal dawk li mietu—l-​istat temporanju taʼ ineżistenza u l-​istat taʼ mewt eterna. Dawk li huma ġudikati bħala li ma jistħoqqilhomx jiġu rxoxtati huma mitfugħin f’“Geħenna,” jew “l-​għadira tan-​nar.” (Mattew 5:22; Marku 9:​47, 48; Rivelazzjoni 20:14) Fost dawn se jkun hemm l-​ewwel koppja umana, Adam u Eva, it-​traditur Ġuda l-​Iskarjota, u xi wħud minn dawk li mietu meta Alla esegwixxa ġudizzju fuqhom, bħan-​nies taʼ żmien Noè u l-​abitanti taʼ Sodoma u Gomorra.a Malli jmutu, dawk li se jiġu rxoxtati jmorru fil-​qabar komuni taʼ l-​umanità—Xeol, jew Ħades. Meta titkellem dwar il-​futur tagħhom, il-​Bibbja tgħid: “U l-​baħar radd il-​mejtin li kienu fih, u l-​mewt u Ħades raddew il-​mejtin li kienu fihom, u ġew ġudikati individwalment skond l-​għemejjel tagħhom.”—Rivelazzjoni 20:13.

Mela l-​uħud leali li jirreferi għalihom Ebrej kapitlu 11 jinsabu f’Xeol, jew Ħades, jistennew l-​irxoxt. Fost dawn hemm il-​qaddejja leali t’Alla Abraham, Mosè, u David. Issa ikkunsidra x’tgħid il-​Bibbja dwar il-​mewt tagħhom. “Int,” qal Ġeħova lil Abraham, “tmur bis-​sliema għand missirijietek u tindifen meta tkun xjeħt sewwa.” (Ġenesi 15:15) Ġeħova qal lil Mosè: “Ara, int se tistrieħ maʼ missirijietek.” (Dewteronomju 31:16) Rigward David, missier Salamun, il-​Bibbja tgħid: “David strieħ maʼ missirijietu, u difnuh fil-​belt taʼ David.” (1 Slaten 2:10) Għalhekk, li tgħid ‘li dak li jkun straħ maʼ missirijietu’ huwa mod ieħor kif tgħid li l-​individwu mar f’Xeol.

X’ġara minn Salamun meta miet? Il-​Bibbja twieġeb: “U ż-​żmien li dam isaltan f’Ġerusalemm u fuq Iżrael kollu kien taʼ erbgħin sena. U Salamun strieħ maʼ missirijietu, u difnuh fil-​belt taʼ David missieru.” (1 Slaten 11:​42, 43) Għalhekk, jidher raġunevoli li nikkonkludu li Salamun huwa f’Xeol, jew Ħades, li minnu hu se jiġi rxoxtat.

Din il-​konklużjoni timplika li l-​possibbiltà taʼ l-​irxoxt hija miftuħa għal oħrajn li dwarhom l-​Iskrittura tgħid speċifikament, ‘strieħu maʼ missirijiethom.’ Fil-​fatt, l-​istess jingħad dwar ħafna mis-​slaten li ġew wara Salamun, għalkemm ma kinux leali. Dan m’huwiex diffiċli biex nifhmuh ladarba “se jkun hemm irxoxt kemm tan-​nies sewwa u kemm taʼ dawk li m’humiex sewwa.” (Atti 24:15) M’għandniex xi ngħidu, huwa biss wara li “dawk kollha li qegħdin fl-​oqbra tat-​tifkira” se jiġu rxoxtati li se nkunu nafu fiċ-​ċert min kellu l-​privileġġ li jiġi rxoxtat. (Ġwanni 5:​28, 29) Mela minflok ma nkunu dommatiċi dwar l-​irxoxt taʼ xi ħadd partikulari li kien jgħix fi żmien il-​qedem, aħna nistennew, filwaqt li nafdaw fid-​deċiżjoni perfetta taʼ Ġeħova.

[Nota taʼ taħt]