Mistoqsijiet mill-Qarrejja
Jistaʼ Kristjan iżomm kuxjenza tajba jekk jaċċetta impjieg li fih ikollu jġorr arma?
Ix-Xhieda taʼ Ġeħova madwar id-dinja kollha jieħdu bis-serjetà r-responsabbiltà li tahom Alla biex jipprovdu materjalment għall-familja tagħhom. (1 Timotju 5:8) Madankollu, ċerti impjiegi jmorru b’mod ċar kontra l-prinċipji tal-Bibbja u għandhom jiġu evitati. Dawn jinkludu impjiegi konnessi mal-logħob taʼ l-ażżard, l-użu ħażin tad-demm, u impjiegi li jinkuraġġixxu l-użu taʼ prodotti tat-tabakk. (Isaija 65:11, KŻ; Atti 15:29; 2 Korintin 7:1; Kolossin 3:5) Xi xogħlijiet oħrajn, għalkemm m’humiex kundannati direttament fil-Bibbja, jistgħu jmorru kontra l-kuxjenza taʼ dak li jkun jew il-kuxjenza t’oħrajn.
Jekk għandekx tieħu sehem f’xogħol sekulari li jeħtieġ li ġġorr arma tan-nar jew arma oħra hi deċiżjoni persunali. Però, f’impjieg li jinġarru l-armi hemm iċ-ċans li dak li jkun isir ħati tad-demm jekk ikollu juża l-arma tiegħu. Għalhekk, Kristjan irid jikkunsidra bit-talb jekk huwiex lest jaċċetta r-responsabbiltà li jkollu jieħu deċiżjoni malajr meta tkun involuta l-ħajja taʼ bniedem. Min iġorr arma jkun ukoll fil-periklu li jweġġaʼ jew imut minħabba xi attakk jew vindikazzjoni.
Oħrajn jistgħu jiġu effettwati wkoll mid-deċiżjoni taʼ l-individwu. Per eżempju, ir-responsabbiltà primarja taʼ Kristjan hi li jippriedka l-aħbar tajba tas-Saltna t’Alla. (Mattew 24:14) Huwa possibbli li hu jgħallem lil oħrajn biex ‘iżommu l-paċi mal-bnedmin kollha,’ waqt li fl-istess ħin jaqlaʼ l-għajxien tiegħu billi jġorr arma? (Rumani 12:18) Xi ngħidu għat-tfal jew membri oħra tal-familja? Minħabba li jkollu pistola fid-dar jistaʼ jkun li qed jipperikolalhom ħajjithom? Iktar minn hekk, jistgħu l-oħrajn jitfixklu minħabba d-deċiżjoni li jkun ħa individwu dwar il-kwistjoni?—Filippin 1:10.
F’dawn “l-aħħar jiem,” iktar u iktar nies huma “feroċi, mingħajr imħabba għat-tajjeb.” (2 Timotju 3:1, 3) Meta individwu jżomm dan f’moħħu, jistaʼ hu jibqaʼ ħieles minn kull akkuża li kieku kellu jagħżel impjieg bl-armi li jistaʼ jġibu f’konflitt maʼ individwi bħal dawn? (1 Timotju 3:10) Dażgur li le. Għal din ir-raġuni, il-kongregazzjoni m’hijiex se tħares lejn l-individwu bħala xi ħadd li “ma ssibx xi tgħid fih” kieku kellu jibqaʼ jġorr arma wara li b’qalb tajba jkun ngħata parir mill-Bibbja. (1 Timotju 3:2; Titu 1:5, 6) Għalhekk, individwu bħal dan, kemm jekk raġel jew mara, ma jkun jikkwalifika għal ebda privileġġ speċjali fil-kongregazzjoni.
Ġesù żgura lid-dixxipli tiegħu li jekk ipoġġu l-interessi tas-Saltna l-ewwel f’ħajjithom, huma ma kellhomx jinkwetaw iżżejjed dwar il-bżonnijiet l-oħra tal-ħajja. (Mattew 6:25, 33) Tabilħaqq, jekk inpoġġu l-fiduċja sħiħa tagħna f’Ġeħova, ‘hu jgħinna u jwiżinna; hu qatt ma jħalli l-ġust jitfixkel.’—Salm 55:23 (55:22, NW).