Armageddon—Bidu taʼ Ferħ

IL-​KELMA “Armageddon” ġejja mill-​espressjoni Ebrajka “Ħar–Magedon,” jew “Muntanja taʼ Megiddu.” Tinsab f’Rivelazzjoni 16:​16, fejn jgħid: “Ġabruhom flimkien lejn il-​post li bl-​Ebrajk jissejjaħ Ħar–Magedon.” Min se jinġabar f’Armageddon, u għala? Żewġ versi biss qabel, f’Rivelazzjoni 16:​14, naqraw: “Is-​slaten taʼ l-​art abitata kollha” jinġabru flimkien “għall-​gwerra tal-​jum il-​kbir t’Alla li Jistaʼ Kollox.” Naturalment, dawn l-​istqarrijiet iqajmu mistoqsijiet oħra interessanti ħafna. Dawn “is-​slaten” fejn jiġġieldu? Minħabba liema kwistjoni qed jiġġieldu, u kontra min? Se jużaw dawn is-​slaten, bħalma ħafna jemmnu, armi li jeqirdu bil-​massa? Se jkun hemm min isalva f’Armageddon? Ħalli l-​Bibbja tipprovdi t-​tweġibiet.

Tfisser ir-​referenza għall-​“Muntanja taʼ Megiddu” li Armageddon se tiġi miġġielda ħdejn ċerta muntanja fil-​Lvant Nofsani? Le. L-​ewwelnett, din il-​muntanja ma teżistix​—fil-​post taʼ Megiddu tal-​qedem hemm biss għolja taʼ madwar 20 metru ’l fuq mill-​pjanura tal-​wied fil-​qrib. Flimkien maʼ dan, il-​post madwar Megiddu hu żgħir wisq biex jesaʼ “s-​slaten taʼ l-​art u l-​armati tagħhom” kollha. (Rivelazzjoni 19:19) Madankollu, Megiddu kien il-​post fejn saru wħud mill-​iktar battalji ħorox u deċiżivi fl-​istorja tal-​Lvant Nofsani. B’hekk, l-​isem Armageddon huwa simbolu taʼ konflitt deċiżiv, b’rebbieħ wieħed, li se jispikka b’mod ċar.​—Ara l-​kaxxa “Megiddu​—Simbolu Adattat,” f’paġna 5.

Armageddon ma tistax tkun biss konflitt bejn in-​nazzjonijiet taʼ l-​art, ladarba Rivelazzjoni 16:14 jgħid li “s-​slaten taʼ l-​art abitata kollha” se jingħaqdu biex jifformaw grupp wieħed fil-​“gwerra tal-​jum il-​kbir t’Alla li Jistaʼ Kollox.” Fil-​profezija ispirata tiegħu, Ġeremija stqarr li dawk “maqtulin mill-​Mulej” se jkunu “minn tarf sa tarf taʼ l-​art.” (Ġeremija 25:33) B’hekk, Armageddon m’hijiex gwerra umana f’post partikulari fil-​Lvant Nofsani. Hija l-​gwerra taʼ Ġeħova, u hija globali.

Però, innota li f’Rivelazzjoni 16:​16, Armageddon tissejjaħ “post.” Fil-​Bibbja “post” jistaʼ jissinifika kundizzjoni jew sitwazzjoni​—f’dan il-​każ, li d-​dinja kollha kemm hi se tingħaqad kontra Ġeħova. (Rivelazzjoni 12:​6, 14) F’Armageddon in-​nazzjonijiet taʼ l-​art kollha jingħaqdu flimkien kontra “l-​armati li kienu fis-​sema” taħt il-​kmand militari tas-​“Sultan tas-​slaten u Sid tas-​sidien,” Ġesù Kristu.​—Rivelazzjoni 19:​14, 16.

Xi ngħidu dwar l-​istqarrija li Armageddon se tkun olokawst li jinvolvi armi li jeqirdu bil-​massa jew kolliżjoni maʼ xi meteorita? Se jħalli Alla li hu kollu mħabba lill-​umanità u d-​dar tagħha, l-​art, jintemmu b’mod daqshekk tal-​waħx? Le. Hu jistqarr speċifikament li ma ħalaqx l-​art “għall-​baħħ” imma “sawwarha biex jgħammru fiha.” (Isaija 45:18; Salm 96:10) F’Armageddon, Ġeħova mhux se jeqred il-​globu tagħna billi jaħarqu u jġibu fix-​xejn. Minflok, hu se ‘jeqred lil dawk li qed jeqirdu l-​art.’​—Rivelazzjoni 11:18.

Armageddon​—Meta?

Tul is-​sekli, mistoqsija persistenti li qajmet ħafna spekulazzjoni kienet, Armageddon meta se tiġi? Eżami tal-​ktieb tar-​Rivelazzjoni flimkien maʼ partijiet oħra tal-​Bibbja jistaʼ jgħinna niddeterminaw iż-​żmien taʼ din il-​battalja kruċjali. Rivelazzjoni 16:15 jorbot Armageddon mal-​fatt li Ġesù se jiġi bħal ħalliel. Din l-​illustrazzjoni tintuża wkoll minn Ġesù biex jiddeskrivi ż-​żmien meta hu se jiġi biex jagħmel ġudizzju minn din is-​sistema dinjija.​—Mattew 24:​43, 44; 1 Tessalonikin 5:2.

Bħalma jintwera mit-​twettiq tal-​profeziji Bibliċi, mill-​1914 ’l hawn qegħdin ngħixu fl-​aħħar jiem taʼ din is-​sistema dinjija.a L-​aħħar parti taʼ l-​aħħar jiem se tkun immarkata mill-​perijodu li Ġesù sejjaħlu t-​“tribulazzjoni kbira.” Il-​Bibbja ma tgħidx kemm se jdum dan il-​perijodu, imma l-​kalamitajiet assoċjati miegħu se jkunu l-​agħar li qatt rat id-​dinja. Din it-​tribulazzjoni kbira se tilħaq il-​quċċata tagħha f’Armageddon.​—Mattew 24:​21, 29.

Ladarba Armageddon hija l-​“gwerra tal-​jum il-​kbir t’Alla li Jistaʼ Kollox,” il-​bnedmin ma jistgħu jagħmlu xejn biex jipposponuha. Ġeħova għandu “żmien stabbilit” meta din il-​gwerra se tibda. “Mhix se tittardja.”​—Ħabakkuk 2:​3, NW.

Alla taʼ Ġustizzja Jiġġieled Gwerra Ġusta

Però, Alla għala se jiġġieled fi gwerra globali? Armageddon hija marbuta mill-​qrib maʼ waħda mill-​kwalitajiet kardinali tiegħu, il-​ġustizzja. Il-​Bibbja tistqarr: “Il-​Mulej iħobb is-​sewwa [jew, il-​ġustizzja].” (Salm 37:28) Hu ra l-​atti kollha taʼ inġustizzja li saru waqt l-​istorja tal-​bniedem. Dan naturalment iqanqal ir-​rabja ġusta tiegħu. B’hekk, hu ħatar lil Ibnu biex jiġġieled gwerra ġusta sabiex jeqred lil din is-​sistema mill-​agħar kompletament.

Ġeħova biss hu kapaċi jiġġieled gwerra li tassew hi ġusta u li se teqred biss lil dawk li jistħoqqilhom il-​mewt, filwaqt li individwi li għandhom qalbhom tajba, ikunu fejn ikunu fuq l-​art, se jibqgħu ħajjin. (Mattew 24:​40, 41; Rivelazzjoni 7:​9, 10, 13, 14) U hu biss għandu d-​dritt li jimponi s-​sovranità tiegħu fuq l-​art kollha, għax hi l-​ħolqien tiegħu.​—Rivelazzjoni 4:​11.

X’forzi se juża Ġeħova kontra l-​għedewwa tiegħu? Fi ftit kliem ma nafux. Li nafu hu li għandu disponibbli l-​mezzi biex jeqred kompletament lin-​nazzjonijiet mill-​agħar. (Ġob 38:​22, 23; Sofonija 1:​15-​18) Madankollu, il-​qaddejja t’Alla fuq l-​art mhux se jieħdu sehem fil-​battalja. Il-​viżjoni f’Rivelazzjoni kapitlu 19 tindika li l-​armati tas-​sema biss se jissieħbu maʼ Ġesù Kristu fil-​gwerra. Ħadd mill-​qaddejja Kristjani taʼ Ġeħova fuq l-​art m’hu se jieħu sehem.​—2 Kronaki 20:​15, 17.

Alla t’Għerf Jagħti Ħafna Twissijiet

Se jkun hemm min isalva? Tabilħaqq, kulħadd jistaʼ jsalva f’Armageddon. L-​appostlu Pietru osserva: “Ġeħova . . . ma jixtieqx li xi ħadd jinqered imma jixtieq li kulħadd jasal għall-​indiema.” (2 Pietru 3:9) U l-​appostlu Pawlu stqarr li Alla “jrid li bnedmin taʼ kull xorta jiġu salvati u jaslu għall-​għarfien eżatt dwar il-​verità.”​—1 Timotju 2:4.

Sabiex jilħaq din il-​mira, Ġeħova bl-​għerf tiegħu għamel żgur li “l-​aħbar tajba tas-​saltna” tixxandar kullimkien, b’mijiet taʼ lingwi. In-​nies kullimkien qed jingħataw l-​opportunità li jsalvaw u jibqgħu jgħixu. (Mattew 24:14; Salm 37:34; Filippin 2:​12) Dawk li jwieġbu b’mod favorevoli għall-​aħbar tajba jistgħu jsalvaw f’Armageddon u jgħixu għal dejjem f’perfezzjoni fuq art magħmula ġenna. (Eżekjel 18:​23, 32; Sofonija 2:3; Rumani 10:13) M’huwiex dan dak li wieħed jistenna minn Alla li hu mħabba?​—1 Ġwanni 4:8.

Jistaʼ Alla taʼ Mħabba Jiġġieled?

Madankollu, ħafna jaħsbu għala Alla li hu l-​personifikazzjoni taʼ l-​imħabba se jġib mewt u qerda fuq ħafna mill-​umanità. Is-​sitwazzjoni tistaʼ titqabbel maʼ dik taʼ dar invażata b’insetti perikolużi. Ma taqbilx li sid id-​dar li jagħti kas għandu jipproteġi s-​saħħa u l-​benesseri tal-​familja tiegħu billi jeqred l-​insetti?

B’mod simili, huwa minħabba l-​affezzjoni kbira li Ġeħova għandu għall-​bnedmin li l-​gwerra t’Armageddon se sseħħ. L-​iskop t’Alla hu li jagħmel l-​art ġenna u li jwassal l-​umanità għall-​perfezzjoni u għall-​paċi, “u ma jkunx hemm min iwerwirhom.” (Mikea 4:​3, 4; Rivelazzjoni 21:4) Allura, x’se jsir minn dawk li jheddu l-​paċi u s-​sigurtà taʼ sħabhom il-​bnedmin? Alla għandu jelimina dawn l-​“insetti perikolużi”​—dawk ħżiena għall-​aħħar​—għall-​ġid taʼ dawk li huma ġusti.​—2 Tessalonikin 1:​8, 9; Rivelazzjoni 21:8.

Ħafna mit-​taqbid u t-​tixrid tad-​demm illum hu kaġunat mill-​ħakma taʼ bnedmin imperfetti u l-​istinkar egoistiku għall-​interessi nazzjonalistiċi. (Koħèlet 8:9) Minħabba li jixtiequ jkabbru l-​influwenza tagħhom, il-​gvernijiet umani jwarrbu għal kollox is-​Saltna stabbilita t’Alla. M’hemm l-​ebda indikazzjoni li se jabbandunaw is-​sovranità tagħhom biex jagħtuha lil Alla u lil Kristu. (Salm 2:​1-9) Għalhekk, dawn il-​gvernijiet iridu jitneħħew biex jagħmlu post għall-​ħakma ġusta tas-​Saltna taʼ Ġeħova taħt Kristu. (Danjel 2:​44) Armageddon trid tiġi miġġielda sabiex issolvi l-​kwistjoni taʼ min għandu d-​dritt li jaħkem din il-​pjaneta u l-​umanità darba għal dejjem.

L-​intervent attiv taʼ Ġeħova f’Armageddon se jkun għall-​ġid taʼ l-​umanità. Meta naraw il-​kundizzjonijiet tad-​dinja li qed jiħraxu, il-​ħakma perfetta t’Alla biss se tissodisfa kompletament il-​bżonnijiet taʼ l-​umanità. Permezz tas-​Saltna tiegħu biss se jkun hawn paċi u prosperità vera. Kieku Alla qatt ma jieħu azzjoni, kif ikunu l-​kundizzjonijiet tad-​dinja? Ma jkomplux il-​mibegħda, il-​vjolenza, u l-​gwerer inikktu l-​umanità bħalma għamlu matul is-​sekli taʼ ħakma umana? Il-​gwerra t’Armageddon hija waħda mill-​aqwa affarijiet li tistaʼ sseħħ għall-​benefiċċju tagħna!​—Luqa 18:​7, 8; 2 Pietru 3:​13.

Il-​Gwerra li Se Ttemm il-​Gwerer Kollha

Armageddon se twettaq xi ħaġa li l-​ebda gwerra oħra ma qatt wettqet​—it-​tmiem tal-​gwerer kollha. Min ma jixxennaqx għal dak iż-​żmien meta l-​gwerer ikunu xi ħaġa tal-​passat? Però, l-​isforzi kollha tal-​bnedmin ma rnexxewx biex iġibu tmiem għall-​gwerer. Il-​fatt li l-​attentati tal-​bnedmin biex iġibu tmiem għall-​gwerer kollha spiċċaw fix-​xejn jenfasizza l-​verità tal-​kliem taʼ Ġeremija: “Jien naf, Mulej, triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.” (Ġeremija 10:23) Rigward dak li se jwettaq Ġeħova, il-​Bibbja twiegħed: “Iwaqqaf il-​gwerer sa truf l-​art; l-​ark jaqsam u l-​lanza jkisser, jaħraq it-​tarka bin-​nar.”​—Salm 46:​9, 10 (46:​8, 9, NW).

Hekk kif in-​nazzjonijiet jużaw l-​armi qattiela tagħhom fuq xulxin u jheddu li jeqirdu l-​ambjent, il-​Ħallieq taʼ l-​art se jieħu azzjoni​—f’Armageddon li hi msemmija fil-​Bibbja! (Rivelazzjoni 11:18) Għalhekk, din il-​gwerra se twettaq dak li wħud li għandhom il-​biżaʼ t’Alla setgħu biss jittamaw għalih tul is-​sekli. Se tivvindika l-​ħakma li tistħoqq lil Sid l-​art, Alla Ġeħova, fuq il-​ħolqien tiegħu.

B’hekk, Armageddon mhix tal-​biżaʼ għal dawk li jħobbu s-​sewwa. Minflok, tipprovdi bażi għal tama. Il-​gwerra t’Armageddon se tnaddaf l-​art mill-​korruzzjoni u l-​ħażen kollu u se tiftaħ it-​triq għal sistema ġdida taʼ ġustizzja taħt il-​ħakma tas-​Saltna Messjanika t’Alla. (Isaija 11:​4, 5) Minflok ma tkun tmiem katastrofiku tal-​biżaʼ, Armageddon se tkun sinjal għall-​bidu taʼ ferħ għal dawk l-​uħud ġusti, li se jgħixu għal dejjem fuq art magħmula ġenna.​—Salm 37:29.

[Nota taʼ taħt]

[Kaxxa/Stampa f’paġna 5]

MEGIDDU​—SIMBOLU ADATTAT

Megiddu tal-​qedem kienet f’lokazzjoni importanti ħafna, taħtha kien hemm in-​naħa tal-​punent tal-​wied fertili taʼ Ġeżragħel, fit-​tramuntana taʼ Iżrael. Kellha kontroll fuq il-​kummerċ internazzjonali u r-​rotot militari li kienu jgħaddu minn hemm. B’hekk, Megiddu saret post taʼ battalji deċiżivi. Il-​professur Graham Davies kiteb fil-​ktieb tiegħu Cities of the Biblical World​—Megiddo: “Il-​belt taʼ Megiddu . . . kienet aċċessibbli ħafna għal negozjanti u emigranti minn kull direzzjoni; imma fl-​istess ħin setgħet, li kieku kienet qawwija biżżejjed, tikkontrolla l-​aċċess għal dawn ir-​rotot, u b’hekk tidderieġi l-​iżvilupp kemm tal-​kummerċ u kemm tal-​gwerra. Għalhekk, mhux sorprendenti li kienet . . . priża li kienu jiġġieldu għaliha u li meta kienet tintrebaħ kienu jiddefenduha sew.”

L-​istorja twila taʼ Megiddu bdiet fit-​tieni millennju Q.E.K. meta l-​ħakkiem Eġizzjan Thutmose III għeleb lill-​mexxejja Kangħanin hemmhekk. Kompliet matul is-​sekli sa l-​1918 meta l-​Ġeneral Britanniku Edmund Allenby kiseb rebħa kbira fuq l-​armata Torka. Kien f’Megiddu li Alla ħalla lill-​Imħallef Barak jikseb rebħa devastanti fuq is-​Sultan Ġabin minn Kangħan. (Mħallfin 4:​12-​24; 5:​19, 20) Fl-​istess post l-​Imħallef Gidgħon rebaħ lill-​Midjanin. (Mħallfin 7:​1-22) Kien hemmhekk ukoll li s-​Slaten Aħażija u Ġosija nqatlu.​—2 Slaten 9:​27; 23:​29, 30.

B’hekk, il-​fatt li Armageddon hija assoċjata maʼ dan il-​post hu xieraq, ladarba kien il-​post taʼ diversi battalji deċiżivi. Huwa simbolu adattat għar-​rebħa totali t’Alla fuq dawk kollha li jopponuh.

[Sors]

Pictorial Archive (Near Eastern History) Est.

[Stampi f’paġna 7]

Madwar id-​dinja, in-​nies qed jingħataw twissija u opportunità li jsalvaw f’Armageddon

[Stampa f’paġna 7]

Armageddon se tkun sinjal għall-​bidu taʼ ferħ