Bijografija

Ġeħova Għenni Nsibu

KIF RAKKONTATA MINN FLORENCE CLARK

Żammejt id żewġi li kien marid serjament. Bħala Anglikana, jien tlabt lil Alla biex żewġi jirkupra, u għamilt wegħda li jekk jibqaʼ ħaj, kont se nfittex lil Alla sakemm insibu. Imbagħad kont se nkun tiegħu.

JIEN twilidt bħala Florence Chulung fit-​18 taʼ Settembru, 1937, fil-​Komunità Oombulgurri taʼ l-​Aboriġini fir-​reġjun imwarrab tal-​Pjanura Kimberley, fil-​punent taʼ l-​Awstralja.

Għandi ħafna memorji sbieħ tat-​tfulija tiegħi lura f’dawk il-​jiem taʼ ferħ u bla responsabbiltajiet. Mix-​xogħol tal-​missjoni tal-​knisja tgħallimt xi affarijiet bażiċi dwar Alla u l-​Bibbja, imma kienet ommi li għallmitni prinċipji Kristjani. Hi kienet taqrali l-​Bibbja b’mod regulari, u minn età żgħira żviluppajt imħabba għall-​affarijiet spiritwali. Ukoll, kont nammira lil waħda miz-​zijiet tiegħi li kienet missjunarja tal-​knisja tagħha. F’qalbi kont naf li ridt nimxi fil-​passi tagħha.

Il-komunità tagħna, li qabel kienet magħrufa bħala l-​Forrest River Mission, kienet tipprovdi l-​edukazzjoni mill-​ewwel sal-​ħames sena skolastika. Jien kont nattendi l-​iskola għal sagħtejn biss kull fil-​għodu. Dan kien ifisser li l-​edukazzjoni tiegħi kienet daqsxejn limitata u dan inkwieta lil missieri. Hu xtaq li t-​tfal tiegħu jkollhom edukazzjoni aħjar, allura ddeċieda li jitlaq minn Oombulgurri u jieħu lill-​familja fil-​belt taʼ Wyndham. Kont qalbi sewda l-​ġurnata li tlaqna, imma f’Wyndham stajt nattendi l-​iskola kuljum għall-​erbaʼ snin taʼ wara, mill-​1949 sa l-​1952. Jien grata ħafna li missieri għamilha possibbli għalija li nikseb dik l-​edukazzjoni.

Ommi kienet taħdem għat-​tabib lokali, u meta taʼ 15-il sena tlaqt mill-​iskola, dan it-​tabib offrieli xogħol bħala infermiera fl-​isptar taʼ Wyndham. Jien aċċettajt bil-​ferħ għax f’dak iż-​żmien kien diffiċli biex issib xogħol.

Xi snin wara ltqajt m’Alec, bidwi taʼ karnaġġjon bajda li jieħu ħsieb il-​bhejjem. Iżżewwiġna fl-​1964 fil-​belt taʼ Derby, fejn b’mod regulari kont nattendi l-​knisja Anglikana. Ġurnata waħda x-​Xhieda taʼ Ġeħova ħabbtuli l-​bieb. Jien għedtilhom li żgur ma kontx interessata u staqsejthom biex ma jerġgħux iħabbtuli. Iżda, xi ħaġa li qaluli tassew laqtitni​—Alla għandu isem persunali, Ġeħova.

“Ma Tafx Titlob Għalik Innifsek?”

Fl-​1965, ħajjitna bdiet issir diffiċli ħafna. Żewġi kellu tliet aċċidenti kemxejn serji​—tnejn biż-​żiemel tiegħu u wieħed bil-​karozza tiegħu. Fortunatament, hu rkupra minn dawn il-​feriti u rritorna għax-​xogħol. Madankollu, ftit wara, reġaʼ kellu aċċident ieħor biż-​żiemel. Din id-​darba, hu ġarrab ħsara kbira f’rasu. Hekk kif wasalt l-​isptar, it-​tabib qalli li żewġi kien se jmut. Kont qalbi maqsuma. Infermiera staqsiet lill-​qassis lokali biex jiġi jarani, imma hu qalilha: “Mhux issa. Niġi għada!”

Ridt li jkolli qassis ħdejja biex jitlob miegħi u tkellimt dwar dan maʼ soru. Hi qaltli: “Xi ġralek int? Ma tafx titlob għalik innifsek?” Allura bdejt nitlob lill-​istatwi tal-​knisja għall-​għajnuna​—imma kien kollu għal xejn. Żewġi deher li kien qed imut. Bdejt naħseb, ‘Kif se nkampa jekk żewġi jmut?’ Ukoll kont inkwetata dwar it-​tlett itfal tagħna​—Christine, Nanette, u Geoffrey. X’tip taʼ ħajja kien se jkollhom mingħajr missier? B’ferħ, tlett ijiem wara, żewġi ġie f’sensih u ħallewh joħroġ fis-​6 taʼ Diċembru, 1966.

Għalkemm b’mod ġenerali rkupra sew, żewġi kellu inkapaċità mentali. Hu beda jitlef il-​memorja u issa kellu t-​tendenza li jkun vjolenti u beda jbati minn bidliet fil-​burdata. Sabha diffiċli biex ikampa mat-​tfal u kien aggressiv ħafna meta ma kinux iwieġbu bħalma jagħmlu l-​adulti. Kien diffiċli li nieħu ħsiebu. Kelli nagħmel kważi kollox għalih. Saħansitra, erġajt għallimtu kif jikteb u jaqra. L-​istress minħabba li bdejt nieħu ħsiebu waqt li fl-​istess ħin ħadt ħsieb ix-​xogħol domestiku l-​ieħor ħadli saħħti u qabadni breakdown. Sebaʼ snin wara l-​aċċident tar-​raġel, aħna qbilna li ninfirdu għal xi żmien sabiex inkun nistaʼ nerġaʼ nikseb saħħti.

Ħadt it-​tfal miegħi u mort noqgħod lejn in-​nofsinhar fil-​belt taʼ Perth. Qabel ma tlaqna, oħti kienet bdiet tistudja l-​Bibbja max-​Xhieda taʼ Ġeħova f’Kununurra, raħal żgħir fil-​punent taʼ l-​Awstralja. Hi wrietni stampa mill-​ktieb Il-​Verità li Twassal għal Ħajja Eterna,a li kienet turi l-​wegħda tal-​Bibbja t’art magħmula ġenna. Minn dan il-​ktieb urietni wkoll li Alla għandu isem, Ġeħova, u dan il-​fatt għoġobni. Peress li qatt ma qaluli dawn l-​affarijiet fil-​knisja tiegħi, iddeċidejt li nċempel lix-​Xhieda taʼ Ġeħova hekk kif nissetilja f’Perth.

Però, żammejt daqsxejn lura milli nikkuntattjahom. Imbagħad, darba fil-​għaxija, daqqet il-​qanpiena. It-​tifel mar jiftaħ il-​bieb u ġie jiġri lura għandi, u qalli: “Ma, dawk in-​nies li għedt li se ċċemplilhom qegħdin hawn.” Kont daqsxejn sorpriża u għedtlu, “Għidilhom li m’iniex hawn!” Imma hu wiġibni, “Taf li mhux suppost nigdeb, Ma.” Irrealizzajt l-​iżball tiegħi, u mort inkellimhom. Hekk kif ilqajt il-​viżitaturi, indunajt li dehru xi ftit imħawdin. Kienu ġew biex jaraw persuna oħra, li ma kinitx għadha tgħix hawn. Stidinthom jidħlu ġewwa u staqsejthom ħafna mistoqsijiet u rċivejt tweġibiet sodisfaċenti mill-​Bibbja.

Il-​ġimgħa taʼ wara bdejt nistudja l-​Bibbja regolarment max-​Xhieda, bil-​ktieb Il-​Verità li Twassal għal Ħajja Eterna. L-​istudju reġaʼ qajjem fija l-​imħabba għall-​affarijiet spiritwali. Ħmistax wara attendejt it-​Tifkira tal-​mewt taʼ Ġesù Kristu. Bdejt nattendi l-​laqgħat kull nhar taʼ Ħadd, u wara ftit bdejt nattendi wkoll il-​laqgħat taʼ matul il-​ġimgħa. Ukoll, bdejt naqsam dak li kont qed nitgħallem m’oħrajn. Skoprejt li meta bdejt ngħin lil oħrajn jitgħallmu veritajiet mill-​Bibbja, is-​saħħa mentali u emozzjonali tiegħi bdew imorru għall-​aħjar. Sitt xhur wara tgħammidt f’konvenzjoni distrettwali f’Perth.

Hekk kif għamilt progress spiritwali, sirt nifhem kif Ġeħova jħares lejn il-​qdusija taż-​żwieġ, inkluż il-​prinċipju Bibliku li jinsab fl-​1 Korintin 7:​13, li jgħid: “Il-​mara li għandha żewġha li ma jemminx, iżda dan jaqbel li jgħammar magħha, ħa ma titlaqx lil żewġha.” Din l-​iskrittura qanqlitni mmur lura għand Alec.

Nirritorna Derby

Wasalt lura f’Derby fil-​21 taʼ Ġunju, 1979, wara li kont ili iktar minn ħames snin ’il bogħod mir-​raġel. Ovvjament, kont inċerta u mħassba fuq kif kien se jirreaġixxi ladarba mmur lura. B’sorpriża għalija, kien ferħan li rritornajt għandu, avolja wera ftit diżappunt minħabba li kont sirt waħda mix-​Xhieda taʼ Ġeħova. Hu immedjatament issuġġerixxa li nattendi l-​knisja tiegħu, dik li kont nattendi qabel ma tlaqt lejn Perth. Spjegajtlu li ma stajtx nagħmel hekk. Għamilt sforz biex nirrispetta l-​istat taʼ kap tiegħu u għamilt l-​aħjar li stajt bħala mara Kristjana miżżewġa. Ipprovajt inkellmu dwar Ġeħova u l-​wegħdi meraviljużi Tiegħu għall-​futur, imma hu ma riedx jismaʼ.

Iżda, maż-​żmien Alec mhux biss aċċetta l-​mod tal-​ħajja tiegħi imma wkoll beda jgħinni finanzjarjament sabiex inkun nistaʼ nattendi l-​konvenzjonijiet u l-​assembleat, kif ukoll il-​laqgħat taʼ matul il-​ġimgħa. Kont grata ħafna meta xtara karozza​—xi ħaġa taʼ valur f’din il-​parti mwarrba taʼ l-​Awstralja​—biex nużaha fil-​ministeru Kristjan. Ħuti rġiel u nisa, inkluż l-​indokratur tas-​circuit, spiss kienu jorqdu għandna għal diversi ljieli. Dan għen lil Alec isir jaf lil diversi Xhieda, u kien jidher li jieħu pjaċir bil-​kumpanija tagħhom.

Ħassejtni bħal Eżekjel

Kont nieħu gost biż-​żjajjar taʼ l-​aħwa, imma ffaċċjajt sfida. Jien kont l-​unika Xhud fir-​raħal taʼ Derby. L-​iktar kongregazzjoni viċin kienet fi Broome, 220 kilometru ’l bogħod. Allura ddeċidejt li nagħmel l-​aħjar li nistaʼ biex naqsam l-​aħbar tajba m’oħrajn. Bl-​għajnuna taʼ Ġeħova organizzajt ruħi u bdejt nagħti xiehda minn dar għal dar. Ħassejt li dan l-​inkarigu kien diffiċli, imma bqajt infakkar lili nnifsi dwar il-​kliem taʼ l-​appostlu Pawlu: “Għal kollox għandi s-​saħħa permezz taʼ dak li jagħtini l-​qawwa.”​—Filippin 4:​13.

Il-membri tal-​kleru lokali ma ħadux pjaċir bl-​attività tiegħi, speċjalment meta ppridkajt m’Aboriġini oħrajn. Huma pprovaw jintimidawni u jwaqqfu l-​attività taʼ l-​ippridkar tiegħi. L-​oppożizzjoni tagħhom sempliċement saħħet id-​determinazzjoni tiegħi biex ma naqtax qalbi, u tlabt lil Ġeħova regolarment biex jgħinni. Spiss kont niftakar fil-​kliem taʼ inkuraġġiment li ngħata lil Eżekjel: “Ara, jien nagħmlek wiċċek sfiq bħalhom, rasek iebsa daqs tagħhom, u nagħmillek fehemtek aktar iebsa mid-​djamant, aktar iebsa miż-​żnied. La tibżax minnhom u la titwerwirx quddiemhom.”​—Eżekjel 3:​8, 9.

F’diversi okkażjonijiet, żewġt irġiel minn grupp tal-​knisja kienu javviċinawni hekk kif kont inkun qed nixtri. Huma kienu jwaqqgħuni għaċ-​ċajt b’leħen għoli, biex jipprovaw jiġbdu l-​attenzjoni tan-​nies l-​oħra li jkunu qed jixtru. Jien ma kontx nagħti kashom. Darba, waqt li kont qed nagħmel żjara lura għand persuna interessata, ġie l-​ministru tal-​knisja lokali u akkużani li ma nemminx f’Ġesù. Ħatafli l-​Bibbja minn idi u xejjirha quddiem wiċċi, imbagħad tefagħha lura f’idi bil-​goff. Bil-​ħlewwa imma b’mod sod, ħarist dritt f’għajnejh, ikkwotajtlu Ġwanni 3:​16 u assigurajtu li jien kelli fidi f’Ġesù. Ma kienx jaf kif se jaqbad jirreaġixxi għar-​risposta kunfidenti tiegħi u telaq ’l hemm mingħajr ma qal kelma oħra.

Kont nieħu gost nippriedka lill-​Aboriġini fl-​inħawi taʼ Derby. Qassis lokali pprova jwaqqafni milli nilħaq komunità partikulari, imma hu ġie trasferit. B’hekk, stajt inwasslilhom il-​messaġġ tal-​Bibbja. Dejjem xtaqt inkun missjunarja bħal ziti, u issa kont qed nagħmel xogħol missjunarju billi ngħin lil oħrajn jitgħallmu dwar il-​Kelma t’Alla. Ħafna mill-​Aboriġini wieġbu għall-​ippridkar tiegħi, u bdejt diversi studji tal-​Bibbja.

Konxja tal-​Bżonn Spiritwali Tiegħi

Għal ħames snin, kont l-​unika Xhud taʼ Ġeħova f’Derby. Sibtha diffiċli biex nibqaʼ b’saħħti spiritwalment mingħajr l-​inkuraġġiment tal-​laqgħat regulari m’aduraturi sħabi. F’okkażjoni minnhom, ħassejtni skuraġġita ħafna u mort dawra bil-​karozza. Meta rritornajt id-​dar, tard wara nofsinhar, kien hemm oħt u s-​sebat itfal tagħha jistennewni. Huma ġabu magħhom provvista taʼ letteratura għalija mill-​kongregazzjoni fi Broome, li kienet tinsab ħafna kilometri ’l bogħod. Minn dakinhar ’il quddiem, din l-​oħt, Betty Butterfield, irranġat biex darba fix-​xahar tiġi Derby u toqgħod miegħi s-​Sibt u l-​Ħadd. Konna mmorru nippridkaw u mbagħad konna nistudjaw It-​Torri taʼ l-​Għassa flimkien f’dari. Mill-​banda l-​oħra, jien kont immur Broome darba fix-​xahar.

L-aħwa fi Broome kienu t’għajnuna kbira u kultant kienu jagħmlu l-​vjaġġ twil lejn Derby biex jassistuni fis-​servizz taʼ l-​għalqa. Huma kienu jħeġġu lill-​aħwa kollha mill-​irħula l-​oħra li jkunu se jgħaddu minn Derby biex jiġu jżuruni u joħorġu miegħi fil-​ministeru. Dawn il-​viżitaturi kienu wkoll iġibuli tejps taʼ taħditiet pubbliċi. Xi wħud minnhom kienu jingħaqdu miegħi fl-​istudju tat-​Torri taʼ l-​Għassa. Dawn iż-​żjajjar qosra kienu taʼ inkuraġġiment kbir.

Tintbagħatli Iktar Għajnuna

Għal xi snin, irċivejt saħansitra iktar inkuraġġiment meta Arthur u Mary Willis, koppja rtirata mill-​parti t’isfel tal-​punent taʼ l-​Awstralja, kienu jiġu jgħinuni għal tliet xhur kull sena fl-​istaġun iktar frisk. Ħuna Willis kien jikkonduċi l-​maġġuranza tal-​laqgħat u kien jieħu t-​tmexxija fis-​servizz taʼ l-​għalqa. Flimkien konna nivvjaġġaw lejn l-​iktar partijiet imwarrbin tal-​Pjanura Kimberley, fejn konna nżuru l-​irziezet bl-​annimali f’postijiet imbegħdin. Kull darba li ħuna u oħtna Willis kienu jitilqu, kont inħossni tassew vojta.

Finalment, lejn l-​aħħar tas-​sena 1983, irċivejt l-​aħbar mill-​isbaħ li kien hemm familja​—Danny u Denise Sturgeon u l-​erbaʼ subien tagħhom​—li kienet ġejja toqgħod Derby. Mal-​wasla tagħhom, stajna niltaqgħu regolarment għal-​laqgħat taʼ matul il-​ġimgħa u noħorġu flimkien fis-​servizz taʼ l-​għalqa. Fl-​2001 ġiet ifformata kongregazzjoni. Illum, Derby għandha kongregazzjoni b’saħħitha t’24 pubblikatur tas-​Saltna, b’żewġ anzjani u qaddej ministerjali li jieħdu ħsiebna sew spiritwalment. Kultant ikollna kważi 30 ruħ jattendu l-​laqgħat tagħna.

Meta nħares lura lejn is-​snin li għaddew, inħossni inkuraġġita meta nara kif Ġeħova għenni naqdih. Avolja żewġi għadu ma ngħaqadx miegħi fil-​fidi, hu jkompli jappoġġani b’modi oħra. Ħames membri tal-​familja immedjata tiegħi saru Xhieda mgħammdin​—iż-​żewġt ibniet tiegħi, tnejn minn ulied uliedi u neputija. Minbarra dawn, tliet qraba oħra qed jistudjaw il-​Bibbja mal-​poplu taʼ Ġeħova.

Jien verament grata li Ġeħova għenni nsibu. Jien determinata li nkun tiegħu għal dejjem.​—Salm 65:​3, 4a (65:​2, NW).

[Nota taʼ taħt]

[Mappa/Stampi f’paġna 15]

(Għall-formazzjoni sħiħa tat-test, ara pubblikazzjoni)

AWSTRALJA

Wyndham

Il-​Pjanura Kimberley

Derby

Broome

Perth

[Sorsi]

Kangarù u għasfur lira: Lydekker; koala: Meyers

[Stampa f’paġna 14]

Naħdem bħala infermiera fl-​isptar taʼ Wyndham, 1953

[Stampa f’paġna 15]

Il-​kongregazzjoni taʼ Derby, 2005