Il-​Ferħ li Nesperjenzaw Meta Nimxu bl-​Integrità

“Barket il-​Mulej hi li tagħnina, u hu ma jżid l-​ebda għali magħha.” —PROVERBJI 10:22, KŻ.

1, 2. Għala għandna noqogħdu attenti li ma nkunux imħassbin iżżejjed bil-​futur?

“META ninkwetaw iżżejjed dwar il-​futur . . . ma ngawdux dak li għandna issa,” innota filosfu Amerikan. Dan hu minnu dwar it-​tfal, li tant moħħhom f’dak li jkunu jistgħu jagħmlu meta jikbru li jinsew il-​benefiċċji tat-​tfulija sakemm ikun tard wisq.

² Saħansitra l-​aduraturi taʼ Ġeħova jistgħu jiġu effettwati minn din l-​attitudni. Ikkunsidra x’jistaʼ jiġri. Aħna tassew nixxennqu għat-​twettiq tal-​wegħda t’Alla li jġib ġenna fuq l-​art. Nistennew bil-​ħerqa ħajja bla mard, xjuħija, uġigħ, u tbatija. Għalkemm huwa tajjeb li nistennew dawn l-​affarijiet, xi ngħidu jekk tant inkunu moħħna fil-​barkiet fiżiċi tal-​futur li ma nindunawx bil-​barkiet spiritwali li għandna issa? X’ħasra tkun dik! Kieku malajr nistgħu naqtgħu qalbna u nħossu ‘l-​qalb marida minħabba t-​tama mtawla’ iktar milli nkunu immaġinajna. (Proverbji 13:12) Minħabba l-​problemi u d-​diffikultajiet tal-​ħajja nistgħu ninħakmu mill-​iskuraġġiment jew nibdew nitħassru lilna nfusna. Minflok ma nibdew inkampaw maʼ sitwazzjonijiet diffiċli, nistgħu niħduha drawwa li noqogħdu nilmentaw. Dan kollu nistgħu nevitawh jekk nimmeditaw b’apprezzament dwar il-​barkiet li għandna issa.

3. Fuqiex se niffokaw l-​attenzjoni tagħna f’dan l-​artiklu?

³ “Barket il-​Mulej hi li tagħnina, u hu ma jżid l-​ebda għali magħha,” jgħid Proverbji 10:​22, KŻ. M’hijiex il-​kundizzjoni t’għana spiritwali tal-​qaddejja taʼ Ġeħova llum barka li għandha ġġibilna l-​ferħ? Ejja nikkunsidraw ftit aspetti taʼ l-​għana spiritwali tagħna u naraw xi jfissru għalina personalment. Tabilħaqq, id-​determinazzjoni tagħna biex inkomplu naqdu lil Missierna tas-​sema bil-​ferħ se tissaħħaħ jekk nieħdu l-​ħin biex nimmeditaw dwar il-​barkiet li Ġeħova ferraʼ fuq ‘il-​ġust li jimxi bl-​integrità.’—Proverbji 20:​7, NW.

Barkiet li Jferrħuna Issa

4, 5. Int liema tagħlim tal-​Bibbja tapprezza ħafna, u għala?

⁴ Għarfien eżatt tat-​tagħlim Bibliku. Ir-​reliġjonijiet tal-​Kristjaneżmu ġeneralment jgħidu li jemmnu fil-​Bibbja. Madankollu, huma ma jaqblux maʼ dak li tgħallem. Saħansitra membri taʼ l-​istess grupp reliġjuż spiss ikollhom ħarsa differenti dwar dak li tgħallem l-​Iskrittura verament. Kemm hi differenti l-​kundizzjoni tagħhom minn dik tal-​qaddejja taʼ Ġeħova! Minkejja n-​nazzjonalità, il-​kultura, u l-​isfond etniku tagħna, aħna nqimu lill-​Alla li nafuh b’ismu. Hu m’huwiex xi Alla misterjuż maqsum fi tlieta. (Dewteronomju 6:4; Salm 83:19 [83:​18, NW]; Marku 12:29) Nafu wkoll li l-​kwistjoni primarja tas-​sovranità universali t’Alla dalwaqt se tiġi setiljata u li aħna lkoll involuti personalment f’din il-​kwistjoni minħabba li nżommu l-​integrità tagħna lejh. Aħna nafu l-​verità dwar il-​mejtin u ninsabu meħlusin mill-​biżaʼ li jwaħħax t’Alla li jingħad li jitturmenta l-​bnedmin fin-​nar taʼ l-​infern jew li jitfagħhom fil-​purgatorju.—Koħèlet 9:​5, 10.

⁵ Iktar minn hekk, kemm nifirħu minħabba li nafu li aħna m’aħniex prodott aċċidentali taʼ l-​evoluzzjoni li ma jikkontrollaha ħadd! Minflok, aħna l-​ħolqien t’Alla, maħluqin fuq ix-​xbieha tiegħu. (Ġenesi 1:26; Malakija 2:10) “Nroddlok ħajr, għax b’mod taʼ l-​għaġeb għamiltni,” kanta s-​salmista lil Alla tiegħu. “Taʼ l-​għaġeb huma l-​għemejjel tiegħek. U ’l ruħi inti tafha tajjeb.”—Salm 139:14.

6, 7. Liema bidliet f’ħajtek jew fil-​ħajja t’oħrajn taf li rriżultaw f’barka?

⁶ Ħelsien minn drawwiet u prattiki taʼ ħsara. Il-​mezzi tax-​xandir huma invażati bi twissijiet dwar il-​periklu tas-​sigaretti, ix-​xorb żejjed, u t-​taħlit sesswali. Imma l-​maġġorparti tan-​nies ma jagħtux kas dawn it-​twissijiet. Però, x’jiġri meta individwu sinċier jitgħallem li l-​Alla l-​veru jikkundanna dawn l-​affarijiet u jiddispjaċih meta jara lil min jipprattikahom? Iva, dan l-​individwu jitqanqal biex ineħħi għalkollox dawn il-​prattiki minn ħajtu! (Isaija 63:10; 1 Korintin 6:​9, 10; 2 Korintin 7:1; Efesin 4:​30) Waqt li dan jagħmlu primarjament biex jogħġob lil Alla Ġeħova, hu jkollu wkoll iktar benefiċċji—saħħa aħjar u paċi tal-​moħħ.

⁷ Għal ħafna wħud huwa tassew diffiċli li jwaqqfu l-​vizzji ħżiena. Xorta waħda, kull sena għaxriet t’eluf taʼ wħud qed jagħmlu dan. Huma jiddedikaw ruħhom lil Ġeħova u jitgħammdu fl-​ilma, u b’hekk juru lil kulħadd li eliminaw minn ħajjithom il-​prattiki li ma jogħġbux lil Alla. Kemm jinkuraġġina lkoll dan il-​fatt! Id-​determinazzjoni tagħna tissaħħaħ biex nibqgħu ħelsin mill-​jasar taʼ l-​imġiba midinba li tagħmlilna l-​ħsara.

8. Liema parir ibbażat fuq il-​Bibbja jikkontribwixxi għall-​hena fil-​familja?

⁸ Ħajja tal-​familja hienja. F’ħafna pajjiżi l-​ħajja tal-​familja qed tmur lura. Ħafna żwiġijiet jispiċċaw f’divorzju, u spiss iħallu warajhom l-​ulied b’uġigħ emozzjonali kbir. F’xi pajjiżi Ewropej, 20 fil-​mija mill-​familji għandhom ġenitur wieħed. Ġeħova kif għenna nimxu bl-​integrità f’dan ir-​rigward? Jekk jogħġbok aqra Efesin 5:22–​6:​4, u innota l-​parir mill-​aqwa li tagħti l-​Kelma t’Alla lill-​irġiel u n-​nisa miżżewġin u lit-​tfal. Ir-​rabta taż-​żwieġ żgur li tissaħħaħ jekk il-​membri japplikaw dak li hu mniżżel hawn u fi bnadi oħra fl-​Iskrittura, jgħin ukoll biex il-​ġenituri jrabbu t-​tfal sewwa, u jikkontribwixxi biex il-​ħajja tal-​familja tkun hienja. M’hijiex din barka li għandha tferraħna?

9, 10. Il-​ħarsa tagħna lejn il-​futur kif inhi differenti minn dik tad-​dinja?

⁹ Żgurati li l-​problemi tad-​dinja dalwaqt se jiġu solvuti. Minkejja l-​għarfien xjentifiku u teknoloġiku u l-​isforzi sinċieri taʼ ċerti mexxejja, il-​problemi serji tal-​ħajja llum għadhom ma ġewx solvuti. Klaus Schwab, li hu l-​fundatur tal-​Forum taʼ l-​Ekonomija Dinjija, dan l-​aħħar innota li “l-​lista taʼ sfidi li tiffaċċja d-​dinja qed tikber dejjem iktar u ż-​żmien biex nieħdu ħsiebhom qed jiqsar.” Hu tkellem dwar il-​“perikli li jistgħu jeffettwaw lill-​ġnus kollha bħat-​terroriżmu, il-​ħsara lill-​ambjent u n-​nuqqas taʼ stabbiltà finanzjarja.” Schwab ikkonkluda: “Issa, iktar minn qatt qabel, id-​dinja qed tiffaċċja r-​realtajiet li għalihom hemm bżonn azzjoni kollettiva u deċiżiva.” Hekk kif qed nidħlu iktar fis-​seklu 21, il-​futur taʼ l-​umanità in ġenerali jidher ikrah.

¹⁰ Kemm iferraħna l-​fatt li nafu li Ġeħova għamel arranġament li jistaʼ jsolvi l-​problemi kollha taʼ l-​umanità—is-​Saltna Messjanika t’Alla! Permezz tagħha, l-​Alla l-​veru se “jwaqqaf il-​gwerer sa truf l-​art” u se jġib “sliem kotran.” (Salm 46:10 [46:​9, NW]; 72:7) Is-​Sultan midluk, Ġesù Kristu, se ‘jeħles lill-​fqir, lill-​imsejken, u lid-​dgħajjef, mill-​qerq u mill-​moħqrija.’ (Salm 72:​12-14) Taħt il-​ħakma tas-​Saltna, mhux se jkun hemm nuqqas taʼ ikel. (Salm 72:16) Ġeħova se ‘jixxottalna kull demgħa minn għajnejna, u ma jkunx hemm iżjed mewt, u la niket u la għajat u lanqas uġigħ. L-​affarijiet taʼ qabel ikunu spiċċaw.’ (Rivelazzjoni 21:4) Is-​Saltna diġà ġiet stabbilita fis-​sema u dalwaqt se tieħu l-​passi meħtieġa biex issolvi l-​problemi kollha fuq l-​art.—Danjel 2:44; Rivelazzjoni 11:15.

11, 12. (a) Jirnexxilu min ifittex il-​pjaċiri jsib ferħ dejjiemi? Spjega. (b) Xi jġib ferħ veru?

¹¹ Nafu xi jġib ferħ veru. Xi jġib ferħ veru? Wieħed psikologu qal li l-​ferħ hu magħmul minn tliet affarijiet—il-​pjaċiri, l-​involviment (f’attivitajiet bħax-​xogħol u l-​familja), u s-​sodisfazzjon (ħidma lejn skop jew mira akbar għall-​benefiċċju t’oħrajn). Mit-​tlieta li huma, hu semma l-​pjaċiri bħala l-​inqas li huma importanti u osserva: “Dan hu taʼ min jinnotah għaliex ħafna nies jibnu ħajjithom madwar il-​pjaċiri.” X’inhi l-​ħarsa tal-​Bibbja dwar dan?

¹² Is-​Sultan Salamun taʼ Iżrael tal-​qedem qal: “Għedt lili nnifsi: ‘Ejja, mela, ħa nippruvak bl-​hena u ndewwqek il-​pjaċir.’ Iżda hemm hi: frugħa mill-​ġdid. ‘Dan id-​daħk,’ għedt jien, ‘hu ġenn, u l-​pjaċir x’ġid iħalli?’” (Koħèlet 2:​1, 2) Skond l-​Iskrittura, kwalunkwe ferħ li l-​pjaċiri joffru huwa biss temporanju. Xi ngħidu dwar li ninvolvu ruħna fix-​xogħol? Aħna għandna l-​iktar xogħol sinifikanti li nistgħu ninvolvu ruħna fih—l-​ippridkar tas-​Saltna u x-​xogħol taʼ li nagħmlu dixxipli. (Mattew 24:14; 28:​19, 20) Meta naqsmu m’oħrajn il-​messaġġ taʼ salvazzjoni spjegat fil-​Bibbja, aħna nkunu qed nieħdu sehem f’xogħol li jistaʼ jwassal għas-​salvazzjoni tagħna u taʼ dawk li jisimgħuna. (1 Timotju 4:16) Bħala “ħaddiema sħab m’Alla,” aħna nesperjenzaw li “hemm iktar hena meta tagħti milli meta tirċievi.” (1 Korintin 3:9; Atti 20:35) Dan ix-​xogħol jagħti sinifikat akbar lil ħajjitna u jipprovdi lill-​Ħallieq bi tweġiba għall-​wieħed li jgħajru, Satana x-​Xitan. (Proverbji 27:11) Tabilħaqq, Ġeħova wriena li d-​devozzjoni lejn Alla ġġib ferħ ġenwin u dejjiemi.—1 Timotju 4:8.

13. (a) L-Iskola tal-​Ministeru Teokratiku b’liema mod hija barka li nistgħu nifirħu biha? (b) Int kif ibbenefikajt mill-​Iskola tal-​Ministeru Teokratiku?

¹³ Programm taʼ taħriġ importanti u effettiv. Gerhard jaqdi bħala anzjan f’kongregazzjoni tax-​Xhieda taʼ Ġeħova. Meta jiftakar f’żgħożitu hu jgħid: “Bħala żagħżugħ, kelli problemi kbar biex nitkellem. Meta kont inkun taħt pressjoni, bilkemm kien jirnexxili nesprimi ruħi u kont nibda llaqlaq. Ħassejtni inferjuri u sirt imdejjaq ħafna. Il-​ġenituri tiegħi rranġawli biex nieħu taħriġ ħalli nitgħallem nitkellem imma l-​isforzi tagħhom kienu kollha għalxejn. Il-​problema tiegħi kienet psikoloġika, mhux fiżika. Però, kien hemm provvediment meraviljuż minn Ġeħova—l-​Iskola tal-​Ministeru Teokratiku. Minħabba li nktibt f’din l-​iskola l-​kuraġġ tiegħi ġie mġedded. Għamilt kulma stajt biex nipprattika dak li tgħallimt. U kienet effettiva! Sirt iktar fluwenti, ma bqajtx inħossni mdejjaq, u sirt iktar kuraġġuż fil-​ministeru. Issa saħansitra nagħti t-​taħditiet pubbliċi. Inħossni tassew grat lejn Ġeħova li tani ħajja ġdida permezz taʼ din l-​iskola.” M’huwiex il-​mod kif Ġeħova jħarriġna biex nagħmlu xogħlu raġuni biex nifirħu?

14, 15. Fi żmien taʼ inkwiet, liema għajnuna hija disponibbli mill-​ewwel? Agħti eżempju.

¹⁴ Relazzjoni persunali maʼ Ġeħova u appoġġ mill-​fratellanza magħquda globalment. Katrin, li tgħix il-​Ġermanja, kienet inkwetata ferm meta semgħet ir-​rapporti dwar it-​terremot ikrah u t-​tsunami li segwieh fix-​xlokk taʼ l-​Asja. Bintha kienet qed iżżur it-​Tajlandja meta seħħ id-​diżastru. Għal 32 siegħa din l-​omm ma kinitx taf jekk bintha kinitx għadha ħajja jew jekk kinitx fost il-​vittmi li bdew jiżdiedu kull siegħa. X’serħan esperjenzat Katrin meta finalment irċiviet telefonata li żguratha li bintha tinsab fis-​sigurtà!

¹⁵ X’għen lil Katrin matul dawk is-​sigħat t’ansjetà? Hi tikteb: “Qattajt kważi dan il-​ħin kollu nitlob lil Ġeħova. Innotajt għal darba wara l-​oħra kemm dan qawwieni u tani l-​paċi tal-​moħħ. Iktar minn hekk, aħwa spiritwali kollhom imħabba żaruni u inkuraġġewni.” (Filippin 4:​6, 7) Kemm kienet tkun agħar is-​sitwazzjoni tagħha li kieku kellha tqattaʼ dawk is-​sigħat taʼ niket kbir mingħajr il-​benefiċċju tat-​talb lil Ġeħova u l-​appoġġ tal-​fratellanza spiritwali kollha mħabba! Ir-​relazzjoni intima tagħna maʼ Ġeħova u maʼ Ibnu flimkien mas-​sħubija mill-​qrib tagħna mal-​fratellanza Kristjana hija barka unika, prezzjuża wisq biex ma napprezzawhiex.

16. Semmi esperjenza li turi l-​valur tat-​tama taʼ l-​irxoxt.

¹⁶ It-​tama li nerġgħu naraw lill-​maħbubin mejtin tagħna. (Ġwanni 5:​28, 29) Raġel żagħżugħ li jismu Matthias trabba bħala wieħed mix-​Xhieda taʼ Ġeħova. Però, minħabba li ma kienx attent għall-​barkiet tiegħu, hu tbiegħed mill-​kongregazzjoni Kristjana meta kien għadu adoloxxenti. Issa hu jikteb: “Tistaʼ tgħid li qatt ma kelli diskussjonijiet serji maʼ missieri. Tul is-​snin, kellna ħafna argumenti. Xorta waħda, missieri dejjem ried l-​aħjar għalija. Hu kien tassew iħobbni, xi ħaġa li ma rrealizzajtx dak iż-​żmien. Fl-​1996, hekk kif kont bil-​qiegħda maġenbu fuq is-​sodda, inżommlu idejh u nolfoq kemm niflaħ, għedtlu li ddispjaċieni għal dak kollu li għamilt u li kont inħobbu ħafna. Imma issa ma setax jismagħni. Hu kellu marda li ma damitx ma wasslitu għall-​mewt. Jekk nibqaʼ ħaj biex nara lil missieri fl-​irxoxt, żgur li se npattu għall-​passat. U hu żgur li se jifraħ malli jismaʼ li issa qed naqdi bħala anzjan u li jien u marti għandna l-​privileġġ li naqdu bħala pijunieri.” Kemm hi barka għalina t-​tama taʼ l-​irxoxt!

“Hu Ma Jżid l-​Ebda Għali Magħha”

17. Kif niġu megħjunin meta nimmeditaw dwar il-​barkiet taʼ Ġeħova?

¹⁷ Dwar Missieru tas-​sema, Ġesù Kristu qal: “Hu jtellaʼ x-​xemx tiegħu fuq il-​ħżiena u fuq it-​tajbin u jniżżel ix-​xita fuq in-​nies sewwa u fuq dawk li m’humiex.” (Mattew 5:45) Jekk Alla Ġeħova jsawwab il-​barkiet saħansitra fuq dawk li m’humiex sewwa u li huma ħżiena, kemm iktar se jagħmel dan fuq dawk li jimxu fit-​triq taʼ l-​integrità! “Ebda ġid ma jiċħad il-​Mulej lil min jimxi bis-​sewwa,” jgħid Salm 84:12 (84:​11, NW). Meta nimmeditaw fuq l-​attenzjoni speċjali u l-​interess li juri lejn dawk li jħobbuh, kemm ifuru qlubna bil-​gratitudni u l-​ferħ!

18. (a) B’liema mod nistgħu ngħidu li Ġeħova ma jżid l-​ebda għali mal-​barka tiegħu? (b) Ħafna mill-​uħud leali t’Alla għala jbatu?

¹⁸ “Barket il-​Mulej”—din qed tagħti l-​għana spiritwali lill-​poplu tiegħu. U aħna żgurati li “hu ma jżid l-​ebda għali magħha.” (Proverbji 10:​22, KŻ ) Imma allura għala ħafna mill-​uħud leali t’Alla jgħaddu minn dawn il-​provi u t-​tiġrib li jikkaġunawlhom ħafna wġigħ u tbatija? Aħna niffaċċjaw id-​diffikultajiet u l-​inkwiet minħabba tliet raġunijiet prinċipali. (1) L-​inklinazzjoni midinba tagħna. (Ġenesi 6:5; 8:21; Ġakbu 1:​14, 15) (2) Satana u d-​demonji tiegħu. (Efesin 6:​11, 12) (3) Id-​dinja ħażina. (Ġwanni 15:19) Waqt li Ġeħova jippermetti li jiġrulna affarijiet ħżiena, dawn ma jiġux mingħandu. Fil-​fatt, “kull għotja tajba u kull rigal perfett ġej minn fuq, għax jinżel mingħand il-​Missier tad-​dwal tas-​sema.” (Ġakbu 1:17) Il-​barkiet taʼ Ġeħova ma jġibux uġigħ magħhom.

19. X’hemm lest għal dawk li jkomplu jimxu bl-​integrità?

¹⁹ Relazzjoni qrib m’Alla hija dejjem involuta biex ikollna l-​għana spiritwali. Meta niżviluppaw relazzjoni intima miegħu, aħna ‘nqiegħdu fis-​sigurtà għalina nfusna pedament tajjeb għall-​futur, sabiex naqbdu qabda soda mal-​ħajja vera.’ (1 Timotju 6:​12, 17-19) Fid-​dinja l-​ġdida li se jġib Alla fil-​futur, ir-​rikkezzi spiritwali tagħna se jġibu magħhom barkiet fiżiċi. Il-​ħajja vera mbagħad se tkun il-​ħajja li jesperjenzaw dawk kollha li ‘jkunu semgħu l-​leħen tal-​Mulej.’ (Dewteronomju 28:2) B’determinazzjoni iktar qawwija, ejja lkoll nibqgħu ferħanin aħna u nimxu fl-​integrità.

X’Tgħallimt?

• Għala m’huwiex għaqli li nitħassbu żżejjed dwar il-​futur?

• Liema barkiet qed ingawdu issa?

• Il-​qaddejja leali t’Alla għala jbatu?