‘Tkunu Tassew Ferħanin’

‘Tagħmlu l-​festa f’ġieħ il-​Mulej u tkunu tassew ferħanin.’ —DEWTERONOMJU 16:15.

1. (a) Satana liema kwistjonijiet qajjem? (b) Ġeħova x’bassar wara l-​irvell taʼ Adam u Eva?

META Satana wassal lil Adam u Eva għall-​irvell kontra l-​Ħallieq tagħhom, hu qajjem żewġ kwistjonijiet taʼ importanza kbira. L-​ewwel, hu sfida l-​ġenwinità taʼ Ġeħova u l-​mod taʼ kif kien qiegħed jaħkem. It-​tieni, Satana insinwa li l-​bnedmin kienu se jaqdu lil Alla biss meta dan ikun jaqblilhom. Din il-​kwistjoni taʼ l-​aħħar ġiet mistqarra b’mod ċar u dirett fi żmien Ġob. (Ġenesi 3:​1-6; Ġob 1:​9, 10; 2:​4, 5) Minkejja dan, Ġeħova ħa azzjoni malajr biex jittratta s-​sitwazzjoni. Adam u Eva kienu għadhom saħansitra fil-​ġnien taʼ l-​Għeden meta Ġeħova bassar kif Hu kien se jsolvi dawn il-​kwistjonijiet. Hu bassar li kellu jiġi ‘nisel’ li, wara li kellu jinsaħaqlu għarqubu, kellu jisħaq lil Satana f’rasu għall-​mewt.​—Ġenesi 3:​15.

2. Ġeħova liema dawl xeħet fuq kif kien se jwettaq il-​profezija mniżżla f’Ġenesi 3:​15?

² Hekk kif għadda ż-​żmien, Ġeħova kompla jitfaʼ iktar dawl fuq din il-​profezija, u b’hekk kompla juri kemm it-​twettiq tagħha maż-​żmien kien se jseħħ fiċ-​ċert. Per eżempju, Alla qal lil Abraham li n-​‘nisel’ kellu jidher minn fost id-​dixxendenti tiegħu. (Ġenesi 22:​15-​18) Ġakobb, in-​neputi t’Abraham, sar il-​missier tat-​12-il tribù taʼ Iżrael. Fis-​sena 1513 Q.E.K., meta dawn it-​tribujiet saru ġens wieħed, Ġeħova tahom sistema taʼ liġijiet li kienu jinkludu diversi festi taʼ kull sena. L-​appostlu Pawlu qal li dawn il-​festi kienu “dell taʼ dak li għandu jiġi.” (Kolossin 2:​16, 17; Ebrej 10:1) Huma taw stampa bil-​quddiem taʼ kif kien se jiżvolġi l-​iskop taʼ Ġeħova għan-​Nisel. L-​osservanza taʼ dawn il-​festi kienet iġġib ferħ kbir f’Iżrael. Konsiderazzjoni tagħhom fil-​qosor se ssaħħilna l-​fidi dwar kemm il-​wegħdi taʼ Ġeħova huma taʼ min joqgħod fuqhom.

Jidher in-​Nisel

3. Min kien in-​Nisel imwiegħed, u għarqubu kif ġie misħuq?

³ In-​Nisel imwiegħed deher iktar minn 4,000 sena wara l-​profezija li Ġeħova għamel fil-​bidu. Dan kien Ġesù. (Galatin 3:​16) Bħala raġel perfett, Ġesù żamm l-​integrità tiegħu sal-​mewt, u b’hekk ta prova li l-​akkużi taʼ Satana ma kinux minnhom. Iktar minn hekk, ladarba Ġesù kien bla dnub, il-​mewt tiegħu kienet sagrifiċċju taʼ valur kbir. Permezz tagħha, Ġesù pprovda ħelsien mid-​dnub u l-​mewt għad-​dixxendenti leali taʼ Adam u Eva. Il-​mewt taʼ Ġesù fuq zokk tat-​tortura kienet ‘it-​tisħiq taʼ l-​għarqub’ tan-​Nisel imwiegħed.​—Ebrej 9:​11-​14.

4. Is-​sagrifiċċju taʼ Ġesù kif kien iffigurat bil-​quddiem?

⁴ Ġesù miet fl-​14 taʼ Nisan tas-​sena 33 E.K.a F’Iżrael, l-​14 taʼ Nisan kienet il-​ġurnata ferriħija taċ-​ċelebrazzjoni tal-​Qbiż. Kull sena f’dik il-​ġurnata, il-​familji kienu jagħmlu ikla flimkien li kienet tinkludi ħaruf żgħir bla difett. B’dan il-​mod huma kienu jiftakru l-​irwol li kellu d-​demm tal-​ħaruf fil-​ħelsien taʼ l-​ewwel imwieled taʼ l-​Iżraelin meta l-​anġlu tal-​mewt qatel lill-​ewwel imwieled taʼ l-​Eġizzjani fl-​14 taʼ Nisan tas-​sena 1513 Q.E.K. (Eżodu 12:​1-​14) Il-​ħaruf tal-​Qbiż iffigura bil-​quddiem lil Ġesù, li dwaru l-​appostlu Pawlu kien qal: “Kristu, il-​Qbiż tagħna, ġie sagrifikat.” (1 Korintin 5:7) Bħad-​demm tal-​ħaruf tal-​Qbiż, id-​demm imxerred taʼ Ġesù jipprovdi s-​salvazzjoni għal ħafna wħud.​—Ġwanni 3:​16, 36.

‘L-​Ewwel Frott Fost il-​Mejtin’

5, 6. (a) Ġesù meta ġie rxoxtat, u din il-​ġrajja kif kienet ġiet iffigurata bil-​quddiem fil-​Liġi? (b) L-​irxoxt taʼ Ġesù kif għamel it-​twettiq taʼ Ġenesi 3:​15 possibbli?

⁵ Fit-​tielet ġurnata, Ġesù ġie rxoxtat lura għall-​ħajja sabiex jippreżenta l-​valur tas-​sagrifiċċju tiegħu lil Missieru. (Ebrej 9:​24) L-​irxoxt tiegħu kien iffigurat bil-​quddiem matul festa oħra. Il-​ġurnata taʼ wara l-​14 taʼ Nisan kienet il-​bidu tal-​Festa tal-​Ħobż Ażżmu. L-​għada, fis-​16 taʼ Nisan, l-​Iżraelin kienu jġibu l-​ewwel qatta tal-​ħsad tax-​xgħir, l-​iktar ħsad bikri f’Iżrael, biex il-​qassis ixejru quddiem Ġeħova. (Levitiku 23:​6-​14) Kemm kien xieraq li fis-​sena 33 E.K., f’dik il-​ġurnata stess, Ġeħova ġab fix-​xejn l-​isforzi makabri taʼ Satana biex joqtol lix-​“xhud leali u veru” tiegħu! Fis-​16 taʼ Nisan tas-​sena 33 E.K., Ġeħova rxoxta lil Ġesù mill-​mewt għal ħajja bħala spirtu immortali.​—Rivelazzjoni 3:14; 1 Pietru 3:​18.

⁶ Ġesù sar “l-​ewwel frott fost dawk li raqdu fil-​mewt.” (1 Korintin 15:20) B’differenza minn dawk li kienu ġew irxoxtati qabel, Ġesù ma reġax miet. Minflok, hu telaʼ s-​sema fuq in-​naħa tal-​lemin taʼ Ġeħova, fejn baqaʼ jistenna sakemm kellu jinħatar bħala Sultan tas-​Saltna taʼ Ġeħova fis-​sema. (Salm 110:1; Atti 2:​32, 33; Ebrej 10:​12, 13) Mill-​ħatra tiegħu bħala Sultan, Ġesù issa qiegħed f’pożizzjoni biex jisħaq lil Satana, l-​għadu l-​kbir tiegħu, f’rasu u biex jeqred lil nislu.​—Rivelazzjoni 11:​15, 18; 20:​1-3, 10.

Iktar Membri taʼ Nisel Abraham

7. X’kienet il-​Festa tal-​Ġimgħat?

⁷ Ġesù kien in-​Nisel li kien ġie mwiegħed fl-​Għeden u l-​wieħed li permezz tiegħu Ġeħova kien se “jkisser l-​għemejjel tax-​Xitan.” (1 Ġwanni 3:8) Madankollu, meta Ġeħova kellem lil Abraham, Hu indika li ‘nisel’ Abraham kien se jkun iktar minn persuna waħda biss. Kien se jkun “bħall-​kwiekeb tas-​sema u bħar-​ramel f’xatt il-​baħar.” (Ġenesi 22:17) Il-​membri l-​oħra tan-​‘nisel’ kienu ffigurati bil-​quddiem b’festa ferriħija oħra. Ħamsin ġurnata wara s-​16 taʼ Nisan, Iżrael kien jiċċelebra l-​Festa tal-​Ġimgħat. Il-​Liġi dwar dan tiddikjara: “Tgħoddu ħamsin jum sa l-​għada tas-​sebaʼ Sibt; mbagħad iġġibu offerta ġdida tal-​qamħ lill-​Mulej. Minn kull fejn tgħammru ġġibu żewġ ħobżiet għat-​tixjir, taʼ żewġ għexur taʼ efa dqiq moħmija bil-​ħmira, bħala offerta tal-​bikri lill-​Mulej.”b​—Levitiku 23:​16, 17, 20.

8. Liema ġrajja li tispikka seħħet f’Pentekoste tas-​sena 33 E.K.?

⁸ Meta Ġesù kien fuq l-​art, il-​Festa tal-​Ġimgħat kienet magħrufa bħala Pentekoste (minn kelma Griega li tfisser “il-​ħamsin wieħed”). F’Pentekoste tas-​sena 33 E.K., il-​Qassis il-​Kbir akbar, Ġesù Kristu rxoxtat, ferraʼ l-​ispirtu qaddis fuq il-​grupp żgħir taʼ 120 dixxiplu miġburin f’Ġerusalemm. B’hekk, dawn id-​dixxipli saru wlied midlukin t’Alla u ħut Ġesù Kristu. (Rumani 8:​15-​17) Huma saru ġens ġdid, “l-​Iżrael t’Alla.” (Galatin 6:​16) Minn għadd żgħir, dak il-​ġens fl-​aħħar kien se jammonta għal 144,000.​—Rivelazzjoni 7:​1-4.

9, 10. Il-​kongregazzjoni taʼ Kristjani midlukin kif kienet iffigurata bil-​quddiem matul Pentekoste?

⁹ Il-​kongregazzjoni taʼ Kristjani midlukin kienet iffigurata bil-​quddiem minn żewġ ħobżiet bil-​ħmira li kienu jiġu mxejrin quddiem Ġeħova kull Pentekoste. Il-​fatt li l-​ħobżiet kellhom il-​ħmira kien juri li l-​Kristjani midlukin kien għad għandhom il-​ħmira tad-​dnub li wirtu. Minkejja dan, huma setgħu jersqu lejn Ġeħova fuq il-​bażi tas-​sagrifiċċju tal-​fidwa taʼ Ġesù. (Rumani 5:​1, 2) Għala żewġ ħobżiet? Dan setaʼ juri l-​fatt li l-​ulied midlukin t’Alla eventwalment kienu se jittieħdu minn żewġ gruppi​—l-​ewwel mil-​Lhud naturali u iktar tard mill-​Ġentili.​—Galatin 3:​26-​29; Efesin 2:​13-​18.

¹⁰ Iż-​żewġ ħobżiet offruti f’Pentekoste kienu jintgħamlu mill-​ewwel frott tal-​ħsad tal-​qamħ. Fi qbil maʼ dan, dawn il-​Kristjani midlukin jissejħu “l-​ewwel frott tal-​ħlejjaq tiegħu.” (Ġakbu 1:​18) Dawn huma l-​ewwel uħud li jinħafrulhom dnubiethom fuq il-​bażi tad-​demm imxerred taʼ Ġesù, u dan jagħmilha possibbli għalihom li jingħataw il-​ħajja immortali fis-​sema, fejn jaħkmu maʼ Ġesù fis-​Saltna tiegħu. (1 Korintin 15:53; Filippin 3:​20, 21; Rivelazzjoni 20:6) F’dik il-​pożizzjoni, fil-​futur qarib, huma se ‘jirgħu [lill-ġnus] b’xettru tal-​ħadid’ u jaraw ‘lil Satana mgħaffeġ taħt saqajhom.’ (Rivelazzjoni 2:​26, 27; Rumani 16:20) L-​appostlu Ġwanni qal: “Dawn huma dawk li jibqgħu mexjin wara l-​Ħaruf kulfejn imur. Dawn inxtraw minn fost il-​bnedmin bħala l-​ewwel frott għal Alla u għall-​Ħaruf.”​—Rivelazzjoni 14:4.

Jum li Jenfasizza l-​Ħelsien

11, 12. (a) X’kien jiġri f’Jum l-​Espjazzjoni? (b) Liema benefiċċji kien jirċievi Iżrael mis-​sagrifiċċji taʼ l-​għoġol u l-​bdabad?

¹¹ Fl-​għaxar jum tax-​xahar t’Etanim (iktar tard imsejjaħ Tixri),c Iżrael kien jiċċelebra festa li kienet tiffigura bil-​quddiem kif il-​benefiċċji tas-​sagrifiċċju taʼ Ġesù bħala fidwa se jiġu fis-​seħħ. F’dik il-​ġurnata l-​ġens kollu kien jiltaqaʼ għal Jum l-​Espjazzjoni (jew, Jum it-​Tpattija) biex jiġu offruti sagrifiċċji għan-​nom tagħhom bħala tpattija għal dnubiethom.​—Levitiku 16:​29, 30.

¹² F’Jum l-​Espjazzjoni, il-​qassis il-​kbir kien joqtol għoġol, u fl-​Iktar Qaddis hu kien iroxx ftit mid-​demm għal sebaʼ darbiet quddiem l-​għatu taʼ l-​Arka, u dan kien jirrappreżenta li d-​demm kien offrut quddiem Ġeħova. Din l-​offerta kienet għad-​dnubiet tal-​qassis il-​kbir u “daru,” is-​sotto-qassisin u l-​Leviti. Imbagħad il-​qassis il-​kbir kien jieħu żewġ bdabad. Wieħed minnhom kien jinqatel bħala offerta għad-​dnub tal-​“poplu.” Ftit mid-​demm tiegħu wkoll kien jitraxxax quddiem l-​għatu taʼ l-​Arka fl-​Iktar Qaddis. Wara, il-​qassis il-​kbir kien iqiegħed idejh fuq ras it-​tieni bodbod u kien jistqarr id-​dnubiet taʼ wlied Iżrael. Imbagħad hu kien jitlaq il-​bodbod fix-​xagħri biex jieħu ’l bogħod id-​dnubiet tal-​ġens, b’mod simboliku.​—Levitiku 16:​3-​16, 21, 22.

13. Dak li kien jiġri f’Jum l-​Espjazzjoni kif iffigura bil-​quddiem l-​irwol li għandu Ġesù?

¹³ Bħalma ffiguraw bil-​quddiem dawn l-​atti, Ġesù, il-​Qassis il-​Kbir, juża l-​valur tad-​demm taʼ ħajtu biex jipprovdi maħfra għad-​dnubiet. L-​ewwel, il-​valur taʼ demmu jiġi applikat lid-​“dar spiritwali” tal-​144,000 Kristjan midluk, u dan jagħmilha possibbli għalihom li jiġu dikjarati ġusti u jgawdu qagħda nadifa quddiem Ġeħova. (1 Pietru 2:5; 1 Korintin 6:​11) Dan huwa ffigurat bil-​quddiem mis-​sagrifiċċju taʼ l-​għoġol. B’hekk tinfetaħ it-​triq għalihom biex jirċievu l-​wirt tagħhom tas-​sema. It-​tieni, il-​valur tad-​demm taʼ Ġesù jiġi applikat għan-​nom taʼ miljuni oħrajn li jeżerċitaw fidi fi Kristu, kif muri bis-​sagrifiċċju tal-​bodbod. Dawn se jiġu mberkin b’ħajja taʼ dejjem hawn fuq l-​art, wirt li Adam u Eva tilfuh. (Salm 37:​10, 11) Fuq il-​bażi tad-​demm imxerred tiegħu, Ġesù jieħu d-​dnubiet taʼ l-​umanità, sewwasew bħalma l-​bodbod ħaj b’mod simboliku kien jieħu d-​dnubiet taʼ Iżrael ’il bogħod fix-​xagħri.​—Isaija 53:​4, 5.

Juru l-​Ferħ Quddiem Ġeħova

14, 15. X’kien jiġri matul il-​Festa taʼ l-​Għerejjex, u dan dwar xiex kien ifakkar lill-​Iżraelin?

¹⁴ Wara Jum l-​Espjazzjoni, l-​Iżraelin kienu jiċċelebraw il-​Festa taʼ l-​Għerejjex, l-​iktar festa ferriħija tas-​sena Lhudija. (Levitiku 23:​34-43) Dik il-​festa kienet issir mill-​15 sal-​21 t’Etanim u kienet tintemm b’assemblea solenni fit-​22 tax-​xahar. Din kienet timmarka t-​tmiem tal-​ġbir tal-​ħsad u dan kien żmien taʼ ringrazzjament għat-​tjieba abbundanti t’Alla. Għal din ir-​raġuni, Ġeħova qal lil dawk li kienu qed jiċċelebraw il-​festa: “Il-​Mulej, Alla tiegħek, ibierkek fil-​ġabra tiegħek kollha, u f’kull ma jagħmlu jdejk, u tkun tassew ferħan.” (Dewteronomju 16:15) Min jaf kemm dan kien żmien taʼ ferħ!

¹⁵ Matul din il-​festa, l-​Iżraelin kienu joqogħdu ġo l-​għerejjex għal sebat ijiem. Huma b’hekk kienu jiġu mfakkrin li darba huma kienu joqogħdu fit-​tined ġox-​xagħri. Il-​festa kienet tagħtihom opportunità kbira biex jirriflettu fuq kemm Ġeħova ħa ħsiebhom bħal missier. (Dewteronomju 8:​15, 16) U ladarba lkoll, sinjuri u fqar, kienu joqogħdu f’għerejjex li kienu bħal xulxin, l-​Iżraelin kienu jiġu mfakkrin li matul il-​festa huma kienu kollha ugwali.​—Neħemija 8:​14-​16.

16. X’kien iffigurat bil-​quddiem permezz tal-​Festa taʼ l-​Għerejjex?

¹⁶ Il-​Festa taʼ l-​Għerejjex kienet festa tal-​ħsad, ċelebrazzjoni ferriħija tal-​ġbir, u kienet tiffigura bil-​quddiem il-​ġbir taʼ ferħ taʼ dawk li jeżerċitaw fidi f’Ġesù Kristu. Il-​ġbir beda f’Pentekoste tas-​sena 33 E.K., meta l-​120 dixxiplu taʼ Ġesù ġew midlukin biex ikunu parti minn “saċerdozju qaddis.” Bħalma l-​Iżraelin kienu jgħixu fit-​tined għal xi ftit tal-​jiem, l-​uħud midlukin jafu li m’huma xejn ħlief “residenti temporanji” f’din id-​dinja li tinjora lil Alla. It-​tama tagħhom hija waħda għas-​sema. (1 Pietru 2:​5, 11) Dan il-​ġbir taʼ Kristjani midlukin jilħaq it-​tmiem tiegħu matul dawn “l-​aħħar jiem,” meta jinġabru l-​aħħar uħud mill-​144,000.​—2 Timotju 3:1.

17, 18. (a) X’jindika li oħrajn minbarra l-​Kristjani midlukin jibbenefikaw mis-​sagrifiċċju taʼ Ġesù? (b) Min illum qed jibbenefika mill-​Festa taʼ l-​Għerejjex antitipika, u din il-​festa ferriħija meta se tilħaq il-​quċċata tagħha?

¹⁷ Taʼ min jinnota li matul din il-​festa tal-​qedem kienu jiġu offruti 70 barri. (Numri 29:​12-​34) In-​numru 70 jirrappreżenta 7 għal 10 darbiet, numri li fil-​Bibbja jirrappreżentaw perfezzjoni tas-​sema u taʼ l-​art. Għaldaqstant, is-​sagrifiċċju taʼ Ġesù se jibbenefika lil uħud leali mis-​70 familja li jifformaw l-​umanità li tnisslet minn Noè. (Ġenesi 10:​1-​29) Fi qbil maʼ dan, fi żmienna l-​ġbir kiber biex jinkludi individwi mill-​ġnus kollha li jeżerċitaw fidi f’Ġesù u li għandhom it-​tama li jgħixu fuq art magħmula ġenna.

¹⁸ L-​appostlu Ġwanni ra f’viżjoni dan il-​ġbir taʼ żmienna. L-​ewwel hu semaʼ t-​tħabbira taʼ l-​immarkar bis-​siġill taʼ l-​aħħar uħud mill-​144,000. Imbagħad, hu ra “folla kbira, li ebda bniedem ma setaʼ jgħoddha,” weqfin quddiem Ġeħova, u “f’idejhom kellhom friegħi tal-​palm.” Dawn kienu “ħarġu mit-​tribulazzjoni l-​kbira” għal ġod-​dinja l-​ġdida. Issa huma wkoll m’huma xejn ħlief residenti temporanji f’din is-​sistema qadima, u huma jħarsu ’l quddiem b’fiduċja lejn iż-​żmien meta “l-​Ħaruf . . . jirgħahom, u jiggwidahom lejn għejun taʼ l-​ilmijiet tal-​ħajja.” F’dak iż-​żmien, “Alla jixxottalhom kull demgħa minn għajnejhom.” (Rivelazzjoni 7:​1-​10, 14-​17) Il-​Festa taʼ l-​Għerejjex antitipika, jew taʼ żmienna, se tilħaq il-​quċċata tagħha meta huma, wara t-​tmiem tar-​Renju t’Elf Sena taʼ Kristu, se jingħataw il-​ħajja taʼ dejjem flimkien maʼ l-​uħud leali rxoxtati.​—Rivelazzjoni 20:5.

19. Aħna kif nibbenefikaw meta nikkunsidraw il-​festi ċelebrati f’Iżrael?

¹⁹ Aħna wkoll nistgħu nkunu ‘tassew ferħanin’ hekk kif nimmeditaw dwar it-​tifsir tal-​festi Lhud tal-​qedem. Tassew nitqanqlu meta nikkunsidraw li Ġeħova pprovda stampa bil-​quddiem taʼ kif se titwettaq il-​profezija li kienet saret fl-​Għeden, u huwa eċċitanti li naraw it-​twettiq attwali jseħħ pass pass. Illum, aħna nafu li n-​Nisel diġà deher u ġie misħuq f’għarqubu. Issa huwa Sultan fis-​sema. Iktar minn hekk, il-​maġġuranza mill-​midlukin diġà taw prova tal-​lealtà tagħhom sal-​mewt. X’fadal li jsir? Kemm fadal biex il-​profezija titwettaq kompletament? Dan se jiġi diskuss fl-​artiklu li jmiss.

[Noti taʼ taħt]

Tistaʼ Tispjega?

• X’kien iffigurat bil-​quddiem mill-​ħaruf tal-​Qbiż?

• Liema ġbir kien iffigurat bil-​quddiem mill-​Festa taʼ Pentekoste?

• Liema aspetti minn Jum l-​Espjazzjoni ppontaw lejn il-​mod kif is-​sagrifiċċju bħala fidwa taʼ Ġesù jiġi applikat?

• Il-ġbir tal-​Kristjani b’liema mod huwa ffigurat bil-​quddiem mill-​Festa taʼ l-​Għerejjex?

[Tabella f’paġna 22]

(Għall-​formazzjoni sħiħa tat-​test, ara pubblikazzjoni)

Ġrajja: Dak li Tiffigura bil-​Quddiem:

50 ġurnata

▸

Il-​Festa tal-​Ġimgħat (Pentekoste) 6 taʼ Sivan Jiġu offruti żewġ ħobżiet Ġesù ppreżenta lil ħutu midlukin lil Ġeħova

Jum l-​Espjazzjoni (Jum it-​Tpattija) 10 taʼ Tixri Jiġu offruti għoġol u żewġ bdabad Ġesù offra l-​valur taʼ demmu għan-​nom tal-​bnedmin kollha

Il-​Festa taʼ l-​Għerejjex (tal-Ġbir, tat-​Tabernakli) 15-​21 taʼ Tixri L-​Iżraelin kienu joqogħdu ferħanin ġo l-​għerejjex u jifirħu bil-​ħsad, 70 barri jiġu offruti Il-​ġbir tal-​midlukin u l-​“folla kbira”

[Stampi f’paġna 21]

Bħad-​demm tal-​ħaruf tal-​Qbiż, id-​demm imxerred taʼ Ġesù jipprovdi salvazzjoni għal ħafna

[Stampi f’paġna 22]

L-​ewwel frott tal-​ħsad tax-​xgħir offrut fis-​16 taʼ Nisan iffigura bil-​quddiem l-​irxoxt taʼ Ġesù

[Stampi f’paġna 23]

Iż-​żewġ ħobżiet offruti f’Pentekoste ffiguraw bil-​quddiem il-​kongregazzjoni taʼ Kristjani midlukin

[Stampi f’paġna 24]

Il-​Festa taʼ l-​Għerejjex iffigurat bil-​quddiem il-​ġbir ferrieħi taʼ wħud midlukin u taʼ “folla kbira” mill-​ġnus kollha