Festi Bħala Plieri fl-​Istorja taʼ Iżrael

“Tliet darbiet fis-​sena kull raġel f’nofsok għandu jidher quddiem il-​Mulej, Alla tiegħek, fil-​post li jkun għażel . . . ; u m’għandux jidher quddiem il-​Mulej idu f’idu.”—DEWTERONOMJU 16:16.

1. X’jistaʼ jingħad dwar l-​okkażjonijiet taʼ festi fi żminijiet Bibliċi?

X’JIĠI f’moħħok meta taħseb dwar festa? Xi festi fi żmien il-​qedem kienu magħrufin għall-​ikel u x-​xorb żejjed u l-​immoralità. L-​istess huma xi festi fi żmienna. Imma l-​festi mniżżlin fil-​Liġi li Alla ta lil Iżrael, kienu differenti. Waqt li kienu okkażjonijiet ferriħin, setgħu wkoll jiġu deskritti bħala “laqgħat imqaddsa.”—Levitiku 23:2.

2. (a) L-​irġiel Iżraeliti x’kienu meħtiġin jagħmlu tliet darbiet fis-​sena? (b) X’inhi “festa,” skond kif inhi wżata f’​Dewteronomju 16:16?

² Irġiel Iżraeliti leali​—taʼ spiss akkumpanjati mill-​familji tagħhom—​sabu li kien pjaċevoli u rifreskanti li jivvjaġġaw lejn Ġerusalemm, ‘il-​post li jkun għażel il-​Mulej,’ u huma kkontribwew b’mod ġeneruż għal tliet festi kbar. (Dewteronomju 16:16) Il-​ktieb Old Testament Word Studies jiddefinixxi l-​kelma Ebrajka tradotta “festa” f’​Dewteronomju 16:16 bħala “okkażjoni taʼ ferħ kbir . . . li fiha ġew iċċelebrati xi mumenti straordinarji tal-​favur t’Alla permezz taʼ sagrifiċċji u festeġġjar.”a

Il-​Valur tal-​Festi l-​Kbar

3. It-​tliet festi annwali jfakkruna f’liema barkiet?

³ Ladarba s-​soċjetà tagħhom kienet waħda agrikola, l-​Iżraeliti kienu jiddependu fuq il-​barka t’Alla f’kemm jibagħtilhom xita. It-​tliet festi kbar fil-​Liġi Mosajka kienu jaħbtu mal-​ġbir tal-​ħsad tax-​xgħir kmieni fir-​rebbiegħa, tal-​ħsad tal-​qamħ fl-​aħħar tar-​rebbiegħa, u tal-​bqija tal-​ħsad fl-​aħħar tas-​sajf. Dawn kienu okkażjonijiet għal ħafna ferħ u radd il-​ħajr għas-​Sostenitur taċ-​ċiklu tax-​xita u Dak li Għamel l-​art produttiva. Imma l-​festi kienu jinvolvu ħafna iktar minn hekk.—Dewteronomju 11:11-14.

4. Liema ġrajja storika ġiet iċċelebrata permezz taʼ l-​ewwel festa?

⁴ L-​ewwel festa kienet issir fl-​ewwel xahar tal-​kalendarju Bibliku antik, mill-​15 sal-​21 taʼ Nisan, li jikkorrispondi maʼ l-​aħħar parti taʼ Marzu jew il-​parti tal-​bidu t’April tagħna. Kienet tissejjaħ il-​Festa tal-​Ħobż Ażżmu, u minħabba li din kienet tiġi immedjatament wara l-​Qbiż taʼ l-​14 taʼ Nisan, kienet tissejjaħ ukoll il-​“festa taʼ l-​Għid [“qbiż,” New World Translation].” (Luqa 2:41; Levitiku 23:5, 6) Din il-​festa kienet tfakkar lil Iżrael fil-​ħelsien tagħhom mit-​tbatijiet kbar fl-​Eġittu, u l-​ħobż ażżmu kien jissejjaħ “ħobż in-​niket.” (Dewteronomju 16:3) Dan kien ifakkarhom li l-​ħarba tagħhom mill-​Eġittu tant kienet taʼ malajr li ma kienx hemm ċans iżidu l-​ħmira maʼ l-​għaġna tagħhom u jistennewha togħla. (Eżodu 12:34) Matul din il-​festa ebda ħobż bil-​ħmira ma kellu jinstab f’dar Iżraelita. Kwalunkwe ċelebrant, inkluż xi resident barrani, li kien jiekol ħobż bil-​ħmira kellu jiġi kkastigat bil-​mewt.—Eżodu 12:19.

5. It-​tieni festa għandha mnejn fakkrithom f’liema privileġġ, u min kellu jiġi inkluż fil-​ferħ?

⁵ It-​tieni festa kienet issir sebaʼ ġimgħat (49 jum) wara s-​16 taʼ Nisan u kienet taħbat fis-​6 jum tat-​tielet xahar, Sivan, li jikkorrispondi maʼ l-​aħħar parti taʼ Mejju tagħna. (Levitiku 23:15, 16) Din kienet tissejjaħ il-​Festa tal-​Ġimgħat (fi żmien Ġesù, kienet tissejjaħ ukoll Pentekoste, li bil-​Grieg ifisser “Il-​Ħamsin Wieħed”), u din kienet issir kważi fl-​istess żmien tas-​sena li fih Iżrael kien daħal fil-​patt tal-​Liġi biswit il-​Muntanja Sinaj. (Eżodu 19:1, 2) Matul din il-​festa l-​Iżraeliti leali għandhom mnejn immeditaw fuq kemm kien privileġġ li jkunu maqtugħin apparti bħala l-​ġens qaddis t’Alla. Il-​fatt li kienu l-​poplu speċjali t’Alla kien jirrikjedi ubbidjenza lejn il-​Liġi t’Alla, bħalma kien il-​kmand li jieħdu ħsieb bl-​imħabba kollha dawk inqas ixxurtjati sabiex dawn ukoll setgħu jgawdu l-​festa.—Levitiku 23:22; Dewteronomju 16:10-12.

6. It-​tielet festa dwar liema esperjenza fakkret lin-​nies t’Alla?

⁶ L-​aħħar mit-​tliet festi kbar annwali kienet tissejjaħ il-​Festa tal-​Ġbir, jew il-​Festa taʼ l-​Għerejjex. Din kienet issir fis-​sebaʼ xahar, Tixri, jew Etanim, mill-​15 sal-​21, li jikkorrispondi mal-​bidu t’Ottubru tagħna. (Levitiku 23:34) Matul dan iż-​żmien, in-​nies t’Alla kienu jgħixu barra minn djarhom jew fuq il-​bjut tagħhom f’tined (għerejjex) temporanji magħmulin mill-​friegħi u l-​weraq tas-​siġar. Dan fakkarhom fil-​vjaġġ t’erbgħin sena mill-​Eġittu sa l-​Art Imwiegħda, meta bħala ġens kellhom jitgħallmu jistrieħu fuq Alla għall-​bżonnijiet tagħhom taʼ kuljum.—Levitiku 23:42, 43; Dewteronomju 8:15, 16.

7. Kif nibbenefikaw milli nagħtu ħarsa lejn iċ-​ċelebrazzjonijiet tal-​festi f’Iżrael tal-​qedem?

⁷ Ejjew nagħtu ħarsa lejn xi ftit mill-​festi li taw prova li kienu plieri fl-​istorja tal-​poplu tal-​qedem t’Alla. Dan għandu jkun inkuraġġanti għalina llum, ladarba aħna wkoll mistednin biex ninġabru flimkien regolarment kull ġimgħa u tliet darbiet fis-​sena f’assembleat u konvenzjonijiet kbar.—Lhud 10:24, 25.

Fi Żmien is-​Slaten Davidiċi

8. (a) Liema ċelebrazzjoni storika saret fi żmien is-​Sultan Salamun? (b) Għal liema quċċata grandjuża tal-​Festa taʼ l-​Għerejjex antitipika nistgħu aħna nħarsu ’l quddiem?

⁸ Ċelebrazzjoni storika fi żmien il-​Festa taʼ l-​Għerejjex seħħet matul ir-​renju prosperuż tas-​Sultan Salamun, bin David. “Ġemgħa kbira ħafna” nġabret minn truf l-​Art Imwiegħda għall-​Festa taʼ l-​Għerejjex u għad-​dedikazzjoni tat-​tempju. (2 Kronaki 7:8) Meta kien spiċċa kollox, is-​Sultan Salamun qal liċ-​ċelebranti li setgħu jmorru, u dawn “bierku lis-​sultan u kulħadd mar fl-​għarix tiegħu, lkoll ferħana u qalbhom hienja għall-​ġid kollu li għamel il-​Mulej maʼ David, il-​qaddej tiegħu, u maʼ Iżrael, il-​poplu tiegħu.” (1 Slaten 8:66) Dik tabilħaqq kienet festa li serviet taʼ plier. Illum, il-​qaddejja t’Alla jħarsu ’l quddiem lejn il-​quċċata grandjuża tal-​Festa antitipika taʼ l-​Għerejjex fi tmiem ir-​Renju t’Elf Sena taʼ Salamun Akbar, Ġesù Kristu. (Apokalissi 20:3, 7-10, 14, 15) F’dak iż-​żmien, in-​nies li jkunu qegħdin jgħixu f’kull rokna taʼ l-​art, inklużi dawk li jkunu ġew irxoxtati u dawk li jibqgħu ħajjin wara Armageddon, se jkunu magħqudin fil-​qima ferrieħa t’Alla Jehovah.—Żakkarija 14:16.

9-11. (a) X’kien li wassal biex il-​festa fi żmien is-​Sultan Ħeżekija tkun plier? (b) Liema eżempju ġie stabbilit minn ħafna wħud mis-​saltna taʼ l-​għaxar tribujiet tat-​Tramuntana, u dan f’liema ħaġa jfakkarna llum?

⁹ Il-​festa l-​oħra li tispikka ddokumentata fil-​Bibbja bdiet issir wara l-​ħakma tas-​Sultan mill-​agħar Aħaż, li kien għalaq it-​tempju u wassal is-​saltna taʼ Ġuda għall-​apostasija. Is-​suċċessur taʼ Aħaż kien is-​Sultan tajjeb Ħeżekija. Fl-​ewwel sena tar-​renju tiegħu, fl-​età taʼ 25 sena, Ħeżekija beda programm kbir taʼ restawr u riforma. Hu immedjatament fetaħ it-​tempju u għamel arranġamenti biex isirulu tiswijiet. Imbagħad is-​sultan bagħat ittri lill-​Iżraeliti li kienu jgħixu fis-​saltna ostili taʼ l-​għaxar tribujiet taʼ Iżrael fit-​Tramuntana, u stedinhom biex jiġu u jiċċelebraw il-​Qbiż u l-​Festa tal-​Ħobż Ażżmu. Ħafna marru, avolja sħabhom waqqgħuhom għaċ-​ċajt.—2 Kronaki 30:1, 10, 11, 18.

¹⁰ Irnexxiet il-​festa? Il-​Bibbja tirrapporta: “U wlied Iżrael, li kienu jinsabu Ġerusalemm, għamlu l-​festa tal-​ħobż ażżmu għal sebat ijiem sħaħ b’festi kbar; u kull jum il-​Leviti u l-​qassisin kienu jfaħħru lill-​Mulej b’kemm kellhom saħħa.” (2 Kronaki 30:21) X’eżempju mill-​aħjar ħallew dawk l-​Iżraeliti għan-​nies t’Alla llum, li ħafna minnhom jissaportu oppożizzjoni u jivvjaġġaw distanzi twal biex jattendu l-​konvenzjonijiet!

¹¹ Per eżempju, ikkunsidra tliet Konvenzjonijiet Distrettwali “Devozzjoni Lejn Alla” li saru fil-​Polonja fl-​1989. Fost il-​166,518 li attendew kien hemm gruppi kbar minn dik li qabel kienet l-​Unjoni Sovjetika u minn pajjiżi oħrajn taʼ l-​Ewropa tal-​Lvant fejn ix-​xogħol tax-​Xhieda taʼ Jehovah kien f’dak iż-​żmien ipprojbit. “Għal xi wħud li attendew dawn il-​konvenzjonijiet,” jirrapporta l-​ktieb Jehovah’s Witnesses​—Proclaimers of God’s Kingdom,b “din kienet l-​ewwel darba li qatt attendew laqgħa kbira fejn kien hemm iktar minn 15 jew 20 min-​nies taʼ Jehovah. Qlubhom imtlew bl-​apprezzament hekk kif bdew jaraw dawk l-​għaxriet t’eluf fl-​istedjums, li ngħaqdu magħhom fit-​talba, u għaqqdu l-​vuċijiet tagħhom f’kant taʼ tifħir lil Jehovah.”​—Paġna 279.

12. X’kien li wassal biex il-​festa fir-​renju tas-​Sultan Ġosija tkun plier?

¹² Wara l-​mewt taʼ Ħeżekija, il-​Ġudeani reġgħu waqgħu għall-​qima falza taħt is-​Slaten Manassi u Amon. Imbagħad wasal ir-​renju taʼ sultan tajjeb ieħor, iż-​żagħżugħ Ġosija, li aġixxa b’kuraġġ kbir biex jirrestawra l-​qima vera. Fl-​età taʼ 25 sena, Ġosija ordna biex isiru t-​tiswijiet fit-​tempju. (2 Kronaki 34:8) Waqt li kienu għaddejjin dawn it-​tiswijiet, il-​Liġi li kienet miktuba minn Mosè nstabet fit-​tempju. Is-​Sultan Ġosija kien imqanqal profondament minn dak li qara fil-​Liġi t’Alla u għamel arranġamenti biex din tinqara lill-​poplu kollu. (2 Kronaki 34:14, 30) Imbagħad, skond ma kien hemm miktub, hu organizza ċelebrazzjoni tal-​Qbiż. Is-​sultan ta wkoll eżempju mill-​aħjar billi kkontribwixxa b’mod ġeneruż għal din l-​okkażjoni. Bħala riżultat, il-​Bibbja tirrapporta: “Qatt ma saret f’Iżrael festa taʼ l-​Għid [“qbiż,” NW] bħal dik sa minn żmien il-​profeta Samwel.”—2 Kronaki 35:7, 17, 18.

13. Iċ-​ċelebrazzjonijiet tal-​festi fi żmien Ħeżekija u Ġosija fiex ifakkruna llum?

¹³ Ir-​riformi taʼ Ħeżekija u Ġosija huma parallel tar-​restawr meraviljuż tal-​qima vera li seħħ fost il-​Kristjani veri mindu Ġesù tpoġġa fuq it-​tron fl-​1914. Bħalma seħħ speċjalment fir-​riforma li għamel Ġosija, dan ir-​restawr taʼ żmienna huwa bbażat fuq dak li hemm miktub fil-​Kelma t’Alla. U, b’parallel maʼ żmien Ħeżekija u Ġosija, ir-​restawr taʼ żmienna ġie mmarkat minn assembleat u konvenzjonijiet li fihom ġew mogħtijin spjegazzjonijiet eċċitanti taʼ profeziji tal-​Bibbja u l-​applikar f’waqtu taʼ prinċipji tal-​Bibbja. In-​numru kbir taʼ dawk li tgħammdu kompla jżid mal-​ferħ taʼ dawn l-​okkażjonijiet istruttivi. Bħall-​Iżraeliti nedmin taʼ żmien Ħeżekija u Ġosija, dawk li għadhom kif tgħammdu abbandunaw il-​prattiċi mill-​agħar tal-​Kristjaneżmu u l-​bqija tad-​dinja taʼ Satana. Fis-​sena 1997 tgħammdu iktar minn 375,000 b’simbolu tad-​dedikazzjoni tagħhom lil dak Alla qaddis, Jehovah​—medja taʼ iktar minn 1,000 kull ġurnata.

Wara l-​Eżilju

14. X’kien li wassal biex il-​festa fis-​sena 537 Q.E.K. tkun plier?

¹⁴ Wara l-​mewt taʼ Ġosija, il-​ġens reġaʼ lura għall-​qima falza degradanti. Eventwalment, fis-​sena 607 Q.E.K., Jehovah kkastiga lin-​nies tiegħu billi ġab l-​armati Babilonjani kontra Ġerusalemm. Il-​belt u t-​tempju tagħha ġew meqrudin, u l-​art saret ħerba. Wara dan ġie l-​jasar tal-​Lhud għal 70 sena ġewwa Babilonja. Imbagħad Alla reġaʼ ta l-​ħajja lil fdal Lhudi niedem, li rritornaw lejn l-​Art Imwiegħda biex jirrestawraw il-​qima vera. Dawn waslu fil-​belt imħarbta taʼ Ġerusalemm fis-​sebaʼ xahar tas-​sena 537 Q.E.K. L-​ewwel ħaġa li għamlu kienet li bnew artal biex joffru sagrifiċċji taʼ kuljum regulari bħalma kien imniżżel fil-​patt tal-​Liġi. Dan kien preċiż fil-​waqt għal ċelebrazzjoni storika oħra. “U għamlu l-​festa taʼ l-​Għerejjex skond kif inhu miktub.”—Esdra 3:1-4.

15. Liema xogħol kien hemm lest għall-​fdal irrestawrat fis-​sena 537 Q.E.K., u kif eżistiet sitwazzjoni parallela fl-​1919?

¹⁵ Kien hemm xogħol kbir lest għal dawk l-​eżiljati li rritornaw lura​—il-​bini mill-​ġdid tat-​tempju t’Alla u taʼ Ġerusalemm bis-​swar tagħha. Kien hemm ħafna oppożizzjoni minn ġirien għajjurin. Waqt li kien qed jinbena t-​tempju, kien “jum tal-​ħwejjeġ taʼ xejn.” (Żakkarija 4:10) Is-​sitwazzjoni kienet parallel mal-​kundizzjoni taʼ Kristjani midlukin leali fl-​1919. F’dik is-​sena memorabbli, huma ġew meħlusin mill-​jasar spiritwali taʼ Babilonja l-​Kbira, l-​imperu dinji taʼ reliġjon falza. Dawn kienu jgħoddu biss ftit eluf u ffaċċjaw dinja ostili. Kienu l-​għedewwa t’Alla se jirnexxilhom iwaqqfu l-​avvanz tal-​qima vera? It-​tweġiba għal dik il-​mistoqsija tfakkarna fl-​aħħar żewġ ċelebrazzjonijiet taʼ festi ddokumentati fl-​Iskrittura Ebrajka.

16. X’kien sinjifikanti dwar festa fis-​sena 515 Q.E.K.?

¹⁶ Eventwalment, it-​tempju ġie mibni mill-​ġdid fix-​xahar taʼ Adar tas-​sena 515 Q.E.K., preċiż fil-​waqt għall-​festa tar-​Rebbiegħa f’Nisan taʼ l-​istess sena. Il-​Bibbja tirrapporta: “Kollhom ferħana għamlu l-​festa taʼ l-​Ażżmi għal sebat ijiem, għax il-​Mulej kien imliehom bil-​ferħ u dawwar lejhom qalb is-​sultan taʼ l-​Assirja, li għenhom fil-​bini tat-​tempju taʼ Alla, Alla taʼ Iżrael.”—Esdra 6:22.

17, 18. (a) Liema plier ġie stabbilit minn festa fis-​sena 455 Q.E.K.? (b) Kif qegħdin f’sitwazzjoni simili llum?

¹⁷ Sittin sena wara, fis-​sena 455 Q.E.K., ġie stabbilit plier ieħor. Il-​Festa taʼ l-​Għerejjex taʼ dik is-​sena mmarkat it-​tlestija tal-​bini mill-​ġdid tas-​swar taʼ Ġerusalemm. Il-​Bibbja tirrapporta: “Il-​ġemgħa kollha li kienet reġgħet lura mill-​eżilju bniet għerejjex, u għammret fihom; ulied Iżrael ma kinux għamlu dan sa minn żmien Ġożwè bin Nun sa dakinhar. U kien hemm ferħ kbir.”—Neħemija 8:17.

¹⁸ X’restawr memorabbli tal-​qima vera t’Alla avolja kien hemm oppożizzjoni ħarxa! Is-​sitwazzjoni llum hija simili. Minkejja l-​mewġ taʼ persekuzzjoni u oppożizzjoni, ix-​xogħol grandjuż taʼ l-​ippridkar taʼ l-​aħbar tajba tas-​Saltna t’Alla laħaq sa truf l-​art, u l-​messaġġi taʼ ġudizzju minn Alla dwew maʼ kullimkien. (Mattew 24:14) L-​issiġillar finali taʼ dawk li baqaʼ mill-​144,000 midlukin qiegħed joqrob. Iktar minn ħames miljuni minn sħabhom in-​“nagħaġ oħra,” ġew miġburin mill-​ġnus kollha f’“merħla waħda” mal-​fdal midluk. (Ġwann 10:16; Apokalissi 7:3, 9, 10) Xi twettiq meraviljuż taʼ l-​istampa profetika tal-​Festa taʼ l-​Għerejjex! U dan ix-​xogħol grandjuż tal-​ġbir se jkompli għal ġod-​dinja l-​ġdida fejn biljuni minn dawk irxoxtati se jiġu mistednin biex jingħaqdu f’li jiċċelebraw il-​Festa antitipika taʼ l-​Għerejjex.—Żakkarija 14:16-19.

Fl-​Ewwel Seklu E.K.

19. X’kien li ġiegħel il-​Festa taʼ l-​Għerejjex fis-​sena 32 E.K. tispikka?

¹⁹ Fost l-​iktar ċelebrazzjonijiet taʼ festi li jispikkaw iddokumentati fil-​Bibbja kien hemm bla dubju dawk li attenda għalihom l-​Iben t’Alla, Ġesù Kristu. Per eżempju, ikkunsidra l-​attendenza taʼ Ġesù għall-​Festa taʼ l-​Għerejjex (jew, tat-​Tabernakli) fis-​sena 32 E.K. Dik l-​okkażjoni wżaha biex jgħallem veritajiet importanti u appoġġja dak li għallem billi kkwota mill-​Iskrittura Ebrajka. (Ġwann 7:2, 14, 37-39) Karatteristika regulari taʼ din il-​festa kienet id-​drawwa li jixegħlu erbaʼ kandelabri kbar f’bitħa interna tat-​tempju. Dan ikkontribwixxa biex ikomplu jgawdu l-​attivitajiet tal-​festa wara li jkun dalam sew. Milli jidher, Ġesù alluda għal dawn id-​dwal meta qal: “Jiena d-​dawl tad-​dinja. Min jiġi warajja ma jimxix fid-​dlam, iżda jkollu d-​dawl tal-​ħajja.”—Ġwann 8:12.

20. Il-​Qbiż fis-​sena 33 E.K. għala kien jispikka?

²⁰ Imbagħad waslu l-​Qbiż u l-​Festa tal-​Ħobż Ażżmu tas-​sena sinjifikanti 33 E.K. F’dak il-​Jum tal-​Qbiż, Ġesù ġie maqtul mill-​għedewwa tiegħu u sar il-​Ħaruf antitipiku tal-​Qbiż, li miet biex ineħħi “d-​dnub tad-​dinja.” (Ġwann 1:29; 1 Korintin 5:7) Tlett ijiem wara, fis-​16 taʼ Nisan, Alla rxoxta lil Ġesù b’ġisem spirtu immortali. Dan seħħ fl-​istess żmien taʼ l-​offerta taʼ l-​ewwel frott tal-​ħsad tax-​xgħir bħalma kien preskritt bil-​Liġi. B’hekk, il-​Mulej Ġesù Kristu rxoxtat sar “l-​ewwel frott fost dawk li raqdu [“fil-​mewt,” NW].”—1 Korintin 15:20.

21. X’ġara f’Pentekoste tas-​sena 33 E.K.?

²¹ Pentekoste tas-​sena 33 E.K. kien verament festa li spikkat. F’dan il-​jum ħafna Lhud u proseliti kienu miġburin ġewwa Ġerusalemm, inklużi madwar 120 dixxiplu taʼ Ġesù. Waqt il-​festa, il-​Mulej Ġesù Kristu rxoxtat ferraʼ l-​ispirtu qaddis t’Alla fuq il-​120. (Atti 1:15; 2:1-4, 33) Huma b’hekk ġew midlukin u saru l-​ġens ġdid magħżul t’Alla permezz tal-​patt il-​ġdid li l-​medjatur tiegħu kien Ġesù Kristu. Matul dik il-​festa l-​qassis il-​kbir Lhudi offra lil Alla żewġ ħobżiet bil-​ħmira magħmulin mill-​ewwel frott tal-​ħsad tal-​qamħ. (Levitiku 23:15-17) Dawn il-​ħobżiet bil-​ħmira jagħtu stampa tal-​144,000 bniedem imperfett li Ġesù ‘kiseb għal Alla’ biex jaqdu bħala “Saltna u Qassisin, li għad isaltnu fuq l-​art.” (Apokalissi 5:9, 10; 14:1, 3) Il-​fatt li dawn il-​ħakkiema tas-​sema ġejjin minn żewġ fergħat taʼ l-​ispeċi umana midinba, Lhud u Ġentili, jistaʼ jiġi wkoll irrappreżentat miż-​żewġ ħobżiet bil-​ħmira.

22. (a) Il-​Kristjani għala ma jiċċelebrawx il-​festi tal-​patt tal-​Liġi? (b) X’se nikkunsidraw fl-​artiklu li jmiss?

²² Meta l-​patt il-​ġdid beda jopera f’Pentekoste tas-​sena 33 E.K., dan kien ifisser li l-​patt il-​qadim tal-​Liġi kien spiċċa milli jkun taʼ valur f’għajnejn Alla. (2 Korintin 3:14; Lhud 9:15; 10:16) Dan ma jfissirx li l-​Kristjani midlukin huma mingħajr liġi. Dawn qegħdin taħt il-​liġi divina mgħallma minn Ġesù Kristu u miktuba fi qlubhom. (Galatin 6:2) Għalhekk, it-​tliet festi annwali, billi huma parti mill-​patt il-​qadim tal-​Liġi, ma jiġux iċċelebrati mill-​Kristjani. (Kolossin 2:16, 17) Minkejja dan, nistgħu nitgħallmu ħafna mill-​attitudni li l-​qaddejja t’Alla taʼ qabel Kristu kellhom lejn il-​festi u l-​laqgħat l-​oħrajn għall-​qima. Fl-​artiklu li jmiss, se nikkunsidraw xi eżempji li bla dubju se jqanqlu lilna lkoll biex napprezzaw il-​ħtieġa li nkunu regulari fl-​attendenza tagħna għal-​laqgħat Kristjani.

[Noti taʼ taħt]

Mistoqsijiet bħala Reviżjoni

◻ Liema skop kellhom it-​tliet festi kbar taʼ Iżrael?

◻ Liema ħaġa kkaratterizzat il-​festi taʼ żmien Ħeżekija u Ġosija?

◻ Liema plier ġie ċċelebrat fis-​sena 455 Q.E.K., u għala huwa inkuraġġanti għalina?

◻ X’kien sinjifikanti dwar il-​Qbiż u Pentekoste tas-​sena 33 E.K.?

[Kaxxa f’paġna 12]

Tagħlima mill-​Festi Għalina Llum

Dawk kollha li jridu jibbenefikaw b’mod dejjiemi mis-​sagrifiċċju taʼ Ġesù li jpatti għad-​dnubiet iridu jgħixu f’armonija maʼ dak li huwa ffigurat mill-​Festa tal-​Ħobż Ażżmu. Din il-​festa antitipika hija ċ-​ċelebrazzjoni ferrieħa li Kristjani midlukin jagħmlu minħabba li ġew illiberati minn din id-​dinja mill-​agħar u nħelsu mill-​kundanna tad-​dnub permezz tar-​rahan taʼ Ġesù. (Galatin 1:4; Kolossin 1:13, 14) Il-​festa litterali kienet iddum sebat ijiem​—numru wżat fil-​Bibbja biex jissimbolizza kompletezza spiritwali. Il-​festa antitipika ddum għall-​perijodu komplet li l-​kongregazzjoni midluka Kristjana ddum fuq l-​art u trid tiġi ċċelebrata bis-​‘safa u s-​sewwa.’ Dan ifisser li nkunu għassa l-​ħin kollu għall-​ħmira figurattiva. Fil-​Bibbja l-​ħmira hija wżata biex tagħti stampa taʼ tagħlim korrott, ipokresija, u ħażen. L-​adoraturi veri taʼ Jehovah jridu juru mibegħda għal ħmira bħal din, billi ma jħalluhiex tikkorrompilhom l-​istess ħajjithom u ma jħalluhiex tħassar il-​purità tal-​kongregazzjoni Kristjana.—1 Korintin 5:6-8; Mattew 16:6, 12.

[Stampa f’paġna 9]

Qatta mill-​ħsad ġdid tax-​xgħir kienet tiġi offruta kull sena fis-​16 taʼ Nisan, il-​jum li fih Ġesù ġie rxoxtat

[Stampa f’paġna 10]

Ġesù setaʼ alluda għad-​dwal tal-​festa meta sejjaħ lilu nnifsu “d-​dawl tad-​dinja”