Dan Għala Jagħmluh?

KULL sena x-​Xhieda taʼ Jehovah madwar id-​dinja jinġabru bl-​eluf f’konvenzjonijiet. Hemmhekk, huma jgawdu sħubija u jisimgħu programm eċċellenti taʼ istruzzjoni mill-​Bibbja. Xi wħud jagħmlu sforzi kbar biex jattendu dawn il-​konvenzjonijiet. Is-​sena l-​oħra, per eżempju, fil-​Malawi koppja li kellhom madwar ħamsa u sittin sena, flimkien maʼ binhom, martu, u t-​tarbija, ivvjaġġaw 50 mil bir-​rota biex jattendu konvenzjoni. Huma telqu mill-​villaġġ tagħhom fis-​sitta taʼ fil-​għodu u waslu fil-​post tal-​konvenzjoni 15-il siegħa wara.

Fil-Możambik, grupp ivvjaġġaw tlett ijiem bir-​rota biex jaslu għal konvenzjoni. Lejl wieħed, waqt li kienu kkampjati fil-​beraħ, semgħu xi ljuni jgħajtu fil-​qrib. Għalkemm tefgħu ħatab imqabbad bin-​nar fid-​direzzjoni taʼ l-​annimali, l-​iljuni baqgħu fil-​viċinanzi sas-​sebħ. Xhud ieħor li kien qiegħed jivvjaġġa lejn l-​istess konvenzjoni ġie wiċċ imbwiċċ maʼ ljun fit-​triq. Hu qagħad kwiet mingħajr ma ċċaqlaq sakemm l-​iljun telaq ’l hemm. Fil-​konvenzjoni dawn ix-​Xhieda b’mod hieni qalu kif huma kienu ġew ‘meħlusin minn ħalq l-​iljun.’—2 Timotju 4:17.

Ħafna mix-​Xhieda taʼ Jehovah jagħmlu sforzi kbar biex jattendu l-​konvenzjonijiet jew saħansitra l-​laqgħat taʼ kull ġimgħa tal-​kongregazzjoni għall-​qima. Għala? L-​artikli li ġejjin se jgħinuk biex tifhem għala li ninġabru flimkien hu daqstant importanti.