Ieqfu Sħaħ u b’Konvinzjoni Soda

Konvenzjonijiet Ferriħin—Prova tal-​Fratellanza Tagħna

MINKEJJA li għandu ħamsin sena u saħħtu hija dgħajfa, wara li qattaʼ kważi sena l-​ħabs inġustament, Joseph F. Rutherford irid itir bil-​ferħ. Mimli enerġija, hu jġorr il-​bagalji u jgħin lill-​aħwa Kristjani jsibu l-​kmamar tagħhom fil-​lukanda. Tnejn minn sħabu li kienu l-​ħabs miegħu—Studenti tal-​Bibbja bħalu—qed jagħtu ċ-​ċwievet tal-​kmamar lill-​folla enormi li qed tistenna akkomodazzjoni. Dan jibqaʼ sejjer sa tard wara nofsillejl. Kulħadd jittieħed mill-​ispirtu t’entużjażmu li hemm. X’inhi l-​okkażjoni?

Is-sena hija l-​1919, u l-​Istudenti tal-​Bibbja (illum magħrufin bħala x-​Xhieda taʼ Jehovah) qed jirkupraw wara perijodu taʼ persekuzzjoni ħarxa. Sabiex jerġgħu jqumu fuq saqajhom, huma jagħmlu konvenzjoni f’Cedar Point, Ohio, fl-​Istati Uniti taʼ l-​Amerika, mill-​1 sat-​8 taʼ Settembru, 1919. Fl-​aħħar ġurnata tal-​konvenzjoni, il-​ġemgħa taʼ 7,000 ruħ tismaʼ b’ħeġġa u b’attenzjoni hekk kif Ħuna Rutherford jinkuraġġixxi lil kulmin hu preżenti bil-​kliem: “Int ambaxxatur tas-​Sultan tas-​slaten u taʼ Sid is-​sidien, li tħabbar lin-​nies . . . is-​saltna glorjuża taʼ Sidna.”

Il-konvenzjonijiet ilhom isiru sa minn żmien Iżrael tal-​qedem fost in-​nies taʼ Jehovah. (Eżodu 23:​14-17; Luqa 2:​41-43) Dawn il-​laqgħat kienu jkunu okkażjonijiet taʼ ferħ, li kienu jgħinu lil kulmin kien ikun preżenti biex iżomm il-​Kelma t’Alla f’moħħu. Bl-​istess mod, il-​konvenzjonijiet tax-​Xhieda taʼ Jehovah fi żmienna jiffokaw fuq miri spiritwali. Għal osservaturi sinċieri, dawn il-​laqgħat taʼ ferħ huma prova ċara li x-​Xhieda huma magħqudin b’rabta soda taʼ fratellanza Kristjana.

Sforz biex Jattendu

Il-​Kristjani taʼ żmienna jirrikonoxxu li l-​konvenzjonijiet huma okkażjonijiet fejn huma jiġu msaħħin spiritwalment u mgħallmin mill-​Kelma t’Alla. Għalihom dawn il-​laqgħat kbar huma essenzjali biex jgħinuhom ‘jieqfu sħaħ u b’konvinzjoni soda fir-​rieda kollha t’Alla.’ (Kolossin 4:​12, NW) Għaldaqstant, ix-​Xhieda jappoġġaw dawn il-​laqgħat b’qalbhom kollha, u jagħmlu sforzi kbar biex jattendu għalihom.

Xi wħud jeħtieġ juru fidi u jegħlbu ostakli kbar biex sempliċement ikunu preżenti għal dawn il-​konvenzjonijiet. Per eżempju, ikkunsidra waħda Xhud imdaħħla fiż-​żmien fl-​Awstrija. Għalkemm għandha d-​dijabete u trid tittaqqab kuljum bl-​insulina, hi kienet deċiża li tattendi l-​ġranet kollha tal-​konvenzjoni distrettwali f’pajjiżha. Fl-​Indja, għal ċertu familja kbira taʼ Xhieda kien diffiċli ħafna li jattendu għall-​konvenzjoni minħabba l-​faqar estrem tagħhom. Waħda mill-​membri tal-​familja rat kif għamlet biex tgħin. Hi qalet: “Billi ma ridtx li nitilfu din l-​okkażjoni, begħt l-​imsielet tad-​deheb tiegħi biex ikollna l-​flus għall-​vjaġġ. M’għandi l-​ebda ndiema għas-​sagrifiċċju li għamilt, għax l-​assoċjazzjoni u l-​esperjenzi qawwewlna l-​fidi tagħna.”

F’Papwa-Ginea l-​Ġdida, grupp taʼ persuni interessati u mhux mgħammdin kienu determinati li jattendu għall-​konvenzjoni distrettwali fil-​belt kapitali. Huma marru fuq wieħed raġel fir-​raħal tagħhom li kellu karozza għat-​trasport pubbliku, u staqsewh kemm kienet tiġihom biex jiħodhom għall-​konvenzjoni. L-​ammont li talabhom kien iktar milli setgħu jħallsu, u għalhekk huma ftehmu miegħu biex jagħmlulu xi xogħol fid-​dar u jirranġawlu l-​kċina. B’hekk huma setgħu jmorru għall-​konvenzjoni distrettwali u jibbenefikaw mill-​programm kollu.

Id-distanza m’hijiex xi problema diffiċli ħafna għal dawk ix-​Xhieda taʼ Jehovah li jkunu determinati li jattendu għall-​konvenzjoni. Fl-​1978, delegat żagħżugħ mill-​Polonja għamel vjaġġ taʼ 1,200 kilometru bir-​rota f’sitt ijiem sabiex jattendi għall-​konvenzjoni f’Lille, fi Franza. Matul is-​sajf taʼ l-​1997, żewġ Xhieda mill-​Mongolja vvjaġġaw 1,200 kilometru biex jattendu laqgħa Kristjana f’Irkutsk, ir-​Russja.

Il-​Fratellanza Vera fl-​Azzjoni

L-​unità u l-​fratellanza murijin mix-​Xhieda fil-​konvenzjonijiet tagħhom jidhru ċar daqs il-​kristall għal dawk l-​uħud li jħarsu lejn ix-​Xhieda mingħajr preġudizzju. Ħafna baqgħu impressjonati bil-​fatt li fost dawk li jattendu l-​konvenzjoni m’hemm l-​ebda favoritiżmu u li saħansitra fost dawk li għandu mnejn qed jiltaqgħu għall-​ewwel darba teżisti affezzjoni ġenwina.

Waqt konvenzjoni internazzjonali li saret dan l-​aħħar fl-​Awstralja, wieħed mill-​gwidi turistiċi li għamel ġimgħa jdawwar id-​delegati li ġew għall-​konvenzjoni ried jibqaʼ magħhom ftit ieħor, għax kien qed jieħu gost bil-​kumpanija tagħhom. Hu baqaʼ mistagħġeb bl-​imħabba u bl-​unità bejniethom. Ma setax jemmen kif marru daqshekk tajjeb flimkien, minkejja li ħafna minnhom ma kinux jafu lil xulxin. Meta wasallu ż-​żmien biex jitlaqhom, hu talab l-​attenzjoni tagħhom. Filwaqt li indirizzahom bħala “ħuti,” hu beda jirringrazzjahom imma ma setax ikompli, għaliex telgħetlu għoqla fi griżmejh u beda jibki.

Fl-​1997, fi Sri Lanka saret l-​ewwel konvenzjoni distrettwali bi tliet lingwi differenti fi stejdjum kbir. Il-​programm kollu ġie preżentat fl-​istess ħin bl-​Ingliż, bis-​Singaliż, u bit-​Tamil. F’dinja fejn l-​inkwiet etniku qiegħed kulma jmur dejjem jiżdied, laqgħa bħal din bejn tliet gruppi taʼ lingwi differenti ma setgħetx ma tiġix notata. Pulizija staqsa lil wieħed mill-​aħwa: “Min organizzaha din il-​konvenzjoni—is-​Singaliżi, it-​Tamili, jew l-​Ingliżi?” “L-​ebda grupp,” wieġeb il-​ħu. “Dan qegħdin nagħmluh ilkoll flimkien.” Il-​pulizija ma riedx jemmen. Meta t-​tliet gruppi ngħaqdu flimkien għat-​talba taʼ l-​għeluq u b’leħen wieħed, li dewa maʼ l-​istejdjum kollu, qalu “Amen,” dawk preżenti għall-​konvenzjoni nfexxew iċapċpu. Ma kienx hemm persuna li ma qabżitilhiex xi demgħa. Iva, il-​konvenzjonijiet huma tabilħaqq okkażjonijiet taʼ ferħ li jagħtu prova tal-​fratellanza tagħna.—Salm 133:1.a

[Nota taʼ taħt]