Il-​Gradwati taʼ Gilgħad Jirċievu Istruzzjonijiet li Jmissu l-​Qalb

FID-​9 TAʼ SETTEMBRU, 2006, saret il-​gradwazzjoni tal-​121 klassi taʼ l-​Iskola taʼ Gilgħad (Watchtower Bible School of Gilead) fiċ-​Ċentru Edukattiv tal-​Watchtower f’Patterson, New York. Il-​programm kien wieħed li jqawwi l-​qalb.

Geoffrey Jackson, membru tal-​Ġemgħa li Tiggverna tax-​Xhieda taʼ Ġeħova, fetaħ il-​programm billi ta merħba lis-​56 gradwat u lill-​udjenza internazzjonali taʼ 6,366 ruħ. Hu kkunsidra Salm 86:​11, li jgħid: “Urini, Mulej, triqatek, biex nimxi fis-​sewwa tiegħek; agħtini qalb waħda, biex ikolli l-​biżaʼ taʼ ismek.” Ħuna Jackson semma tliet affarijiet li huma enfasizzati f’dan il-​vers. Hu qal: “Fl-​ewwel parti, naraw l-​istruzzjoni; fit-​tieni parti, naraw kif għandna napplikawha; u fit-​tielet parti, naraw il-​motivazzjoni. Dawn it-​tliet affarijiet huma speċjalment importanti għalikom il-​missjunarji hekk kif tmorru fl-​inkarigi tagħkom.” Imbagħad hu introduċa serje taʼ taħditiet u intervisti li enfasizzaw it-​tliet affarijiet.

Kliem taʼ Istruzzjoni li Jqawwi l-​Qalb

William Malenfant, membru taʼ l-​istaff tal-​kwartieri ġenerali, ikkunsidra t-​tema “L-​Aqwa Ħajja Possibbli.” Hu ġibed l-​attenzjoni lejn l-​eżempju taʼ Marija, oħt Marta. Darba minnhom, meta Ġesù kien qed iżurhom f’darhom, Marija għażlet li tpoġġi ħdejn saqajh ħalli toqgħod tisimgħu, u din għamlitha l-​prijorità tagħha. Ġesù qal lil Marta: “Marija għażlet l-​aħjar sehem, u mhux se jittiħdilha.” (Luqa 10:​38-​42) “Aħsbu ftit dwar dan,” qal il-​kelliem. “Għall-​eternità kollha Marija se tiftakar li hi poġġiet ħdejn saqajn Ġesù u tat widen f’diskussjoni ras imbras miegħu għal veritajiet spiritwali meraviljużi​—dan kollu minħabba li għamlet għażla tajba.” Wara li faħħar lill-​gradwati għall-​għażliet spiritwali tajbin li għamlu, hu qal: “L-​għażliet tagħkom wasslukom għall-​aqwa ħajja possibbli.”

Imbagħad, Anthony Morris, membru tal-​Ġemgħa li Tiggverna, żviluppa t-​tema “Ilbsu l-​Mulej Ġesù Kristu,” ibbażata fuq Rumani 13:14. Kif nistgħu nagħmluh dan? Ħuna Morris ipponta lejn in-​nota taʼ taħt taʼ dan il-​vers fil-​Bibbja bir-​Referenzi li tgħid: “Imita l-​manjieri tal-​Mulej.” Allura dan ifisser li nimitaw l-​eżempju u l-​attitudni taʼ Ġesù. “Ġesù għen lis-​semmiegħa tiegħu jħossuhom komdi,” qal il-​kelliem, “għaliex hu kellu interess sinċier fihom, u huma setgħu jħossuh dan.” Imbagħad, il-​kelliem ikkunsidra kif l-​istudenti kisbu ħafna għarfien fil-​korsijiet tagħhom taʼ Gilgħad, “sabiex tkunu tistgħu tifhmu bis-​sħiħ . . . il-​wisaʼ u t-​tul u l-​għoli u l-​fond” tal-​verità, bħalma jgħid Efesin 3:​18. Imma hu fakkarhom dwar vers 19, li jkompli jgħid: “U tkunu tafu l-​imħabba tal-​Kristu li tisboq l-​għarfien.” Ħuna Morris ħeġġeġ lill-​istudenti: “Hekk kif tkomplu tagħmlu l-​istudju persunali tagħkom, immeditaw dwar kif tistgħu timitaw il-​mogħdrija kollha mħabba taʼ Kristu u ‘ilbsu’ tassew il-​‘Mulej Ġesù Kristu.’”

Parir taʼ l-​Aħħar mill-​Għalliema taʼ l-​Iskola

It-​taħdita taʼ wara ngħatat minn Wallace Liverance, għalliem fl-​Iskola taʼ Gilgħad, li kellu t-​tema bbażata fuq Proverbji 4:7. Hu qal li waqt li l-​għerf t’Alla huwa l-​iktar ħaġa importanti, aħna rridu wkoll ‘niksbu d-​dehen,’ jew il-​fehma, li jinvolvi li ngħaqqdu flimkien fatti iżolati u mbagħad, naraw kif inhuma marbutin flimkien sabiex niksbu t-​tifsira tal-​kwistjoni. Il-​kelliem wera li l-​fatt li niksbu d-​dehen iġibilna l-​ferħ. Per eżempju, fi żmien Neħemija, il-​Leviti ‘fiehmu l-​liġi’ (Saydon) u “spjegaw il-​qari.” Wara dan, il-​poplu kompla “jagħmel festa b’ferħ kbir, għax kien fehem dak kollu li kienu għallmuh.” (Neħemija 8:​7, 8, 12, korsiv tagħna.) Ħuna Liverance kkonkluda: “Il-​ferħ jirriżulta mill-​fehma tal-​Kelma t’Alla li hija ispirata mill-​ispirtu.”

“Min Tassew Hu l-​Għadu Tiegħek?” kienet it-​tema li kkunsidra Mark Noumair, għalliem ieħor fl-​Iskola taʼ Gilgħad. Fi gwerra, għadd mhux ħażin taʼ suldati jinqatlu minn sparar taʼ l-​armata tagħhom stess, jintlaqtu mill-​istess forzi li jkunu qed jaqdu magħhom. “Xi ngħidu għall-​gwerra spiritwali li ninsabu fiha aħna?” staqsa hu. “Jekk ma noqogħdux attenti, se nitfixklu dwar min hu tassew l-​għadu tagħna u nweġġgħu lit-​truppi tagħna stess.” L-​għira tistaʼ tħawwad lil xi wħud. Din ġagħlet lis-​Sultan Sawl jipprova joqtol lil David, aduratur taʼ l-​istess twemmin, meta fir-​realtà l-​Filistin kienu l-​għedewwa. (1 Samwel 18:​7-9; 23:​27, 28) Imbagħad, il-​kelliem kompla: “Xi ngħidu jekk taqdu maʼ missjunarju li jispikka f’ħafna affarijiet? Se tweġġgħu lis-​suldat imsieħeb magħkom bi kliem kritiku, jew se taċċettaw il-​fatt li oħrajn se jkunu aqwa minnkom f’diversi aspetti? Jekk niffokaw fuq l-​imperfezzjonijiet taʼ l-​oħrajn nistgħu biss inħawdu lilna nfusna dwar min hu tassew l-​għadu tagħna. Iġġieldu lil dak li hu tassew l-​għadu, Satana.”

Esperjenzi Sbieħ u Intervisti Informattivi

Il-​parti li jmiss, “Agħmel ix-​Xogħol t’Evanġelizzatur,” ngħatat minn Lawrence Bowen, għalliem fl-​iskola taʼ Gilgħad, u kien fiha wkoll xi intervisti u esperjenzi. Hu spjega li nota taʼ taħt tat-​2 Timotju 4:5 fil-​Bibbja bir-​Referenzi għall-​iskrittura tgħid, agħmel ix-​xogħol “taʼ missjunarju.” Il-​kelliem żied: “Dan hu tassew xieraq, għaliex ix-​xogħol prinċipali taʼ missjunarju mħarreġ f’Gilgħad hu li jxerred l-​aħbar tajba, u din il-​klassi għamlet dan kulfejn setgħet issib in-​nies.” Imbagħad, ġew reċtati xi esperjenzi sbieħ.

Imbagħad, fil-​programm kien hemm żewġ partijiet wara xulxin li saru minn Michael Burnett u Scott Shoffner, it-​tnejn membri tal-​familja taʼ Betel. Huma intervistaw lil xi membri mill-​Kumitat tal-​Fergħa taʼ l-​Awstralja, il-​Barbados, il-​Korea, u l-​Uganda. Il-​kummenti tal-​membri tal-​kumitat urew kemm isir sforz kbir biex jintlaħqu l-​bżonnijiet tal-​missjunarji, inkluż li jiġi provdut post adegwat fejn jgħixu u li tingħata attenzjoni lil saħħithom. Il-​membri tal-​kumitat enfasizzaw li l-​missjunarji li jirnexxu huma lesti li jadattaw ruħhom għaċ-​ċirkustanzi lokali.

Konklużjoni li Tqanqal u Timmotiva

It-​taħdita prinċipali tal-​programm kienet it-​taħdita “Ibżgħu minn Alla u Agħtuh Glorja,” preżentata minn John E. Barr, li ilu żmien twil jaqdi bħala membru tal-​Ġemgħa li Tiggverna. Hu kkunsidra Rivelazzjoni 14:​6, 7, li jgħid: “Rajt anġlu ieħor itir f’nofs is-​sema, u kellu aħbar tajba taʼ dejjem biex ixandarha bħala bxara taʼ ferħ lil dawk li jgħammru fuq l-​art, u lil kull ġens u tribù u lsien u poplu, u qal b’leħen għoli: ‘Ibżgħu minn Alla u agħtuh glorja, għax waslet is-​siegħa biex jagħmel il-​ġudizzju.’”

Ħuna Barr ħeġġeġ lill-​istudenti biex jiftakru tliet affarijiet dwar dak l-​anġlu. L-​ewwel, hu kellu jxandar l-​aħbar tajba taʼ dejjem, li Kristu issa qed jaħkem bl-​awtorità sħiħa tas-​Saltna. Il-​kelliem qal: “Aħna konvinti għalkollox li hu ngħata t-​tron fl-​1914. Allura din il-​bxara taʼ ferħ trid tiġi proklamata maʼ l-​art kollha.” It-​tieni, l-​anġlu qal: “Ibżgħu minn Alla.” Il-​kelliem spjega li l-​gradwati għandhom bżonn jgħallmu lill-​istudenti tal-​Bibbja tagħhom biex jiżviluppaw riverenza lejn Alla ħalli ma jagħmlu xejn li ma jogħġbux. It-​tielet, l-​anġlu kkmanda: ‘Agħtu glorja lil Alla.’ Il-​kelliem ħeġġeġ lill-​istudenti: “Tinsew qatt li aħna naqdu għall-​glorja t’Alla, mhux tagħna stess.” Imbagħad meta kien qed jiddiskuti dwar “is-​siegħa biex jagħmel il-​ġudizzju,” Ħuna Barr qal: “Baqaʼ biss ftit żmien sakemm jitlissen l-​aħħar ġudizzju. Hemm il-​ħajjiet involuti. Ħafna wħud fit-​territorji tagħna għad għandhom bżonn jisimgħu l-​messaġġ taʼ l-​aħbar tajba qabel ma jkun tard wisq.”

B’dan il-​kliem jidwi f’widnejhom, is-​56 gradwat ngħataw id-​diplomi tagħhom u ntbagħtu sa truf l-​art. Il-​qlub tal-​gradwati u taʼ dawk kollha li attendew tassew intlaqtu mill-​pariri li jmissu l-​qalb li rċivew f’dan il-​jum pjaċevoli.

[Kaxxa f’paġna 17]

STATISTIKI TAL-​KLASSI

Numru taʼ pajjiżi rappreżentati: 6

Numru taʼ pajjiżi li ġew assenjati fihom: 25

Numru taʼ studenti: 56

Età medja: 35.1

Medja taʼ snin fil-​verità: 18.3

Medja taʼ snin fil-​ministeru full-time: 13.9

[Stampa f’paġna 18]

Il-​121 Klassi li Ggradwat mill-​Iskola taʼ Gilgħad

Fil-​lista t’hawn taħt, ir-​ringieli huma nnumerati minn quddiem għal wara, u l-​ismijiet f’kull ringiela huma mniżżlin mix-​xellug għal-​lemin.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.