Kif Tidentifika l-Qima Vera
ĦAFNA mir-reliġjonijiet jistqarru li dak li jgħallmu ġej minn Alla. Għaldaqstant, nagħmlu tajjeb jekk nisimgħu mill-kliem taʼ Ġwanni, l-appostlu taʼ Ġesù, li kiteb: “Maħbubin, temmnux kull espressjoni mnebbħa, imma għarblu l-espressjonijiet imnebbħin biex taraw jekk joriġinawx minn Alla, għax dehru ħafna profeti foloz fid-dinja.” (1 Ġwanni 4:1) Aħna kif nistgħu neżaminaw xi ħaġa biex naraw jekk hijiex ġejja minn Alla?
Dak kollu li jiġi minn Alla jirrifletti l-personalità tiegħu, speċjalment l-imħabba, il-kwalità predominanti tiegħu. Per eżempju, is-sens tax-xamm tagħna, li jippermettilna li nieħdu pjaċir bir-riħa tal-ħwawar, tal-fjuri, jew tal-ħobż li jkun għadu ħiereġ mill-forn, huwa espressjoni taʼ l-imħabba t’Alla. L-abbiltà tagħna li naraw inżul ix-xemx, xi farfett, jew it-tbissima taʼ xi tifel ċkejken, tirrifletti l-imħabba t’Alla għalina. L-istess jistaʼ jingħad dwar l-abbiltà tagħna li nisimgħu xi mużika ħelwa, xi għasfur jgħanni, jew il-leħen taʼ xi ħadd għażiż għalina. Anki n-natura umana tagħna, għalkemm imperfetta, tirrifletti l-imħabba t’Alla. Għal din ir-raġuni aħna spiss nesperjenzaw kemm hu veru kliem Ġesù: “Hemm iktar hena meta tagħti milli meta tirċievi.” (Atti 20:35) Aħna nieħdu pjaċir nesprimu l-imħabba għax aħna magħmulin “fuq xbihat Alla.” (Ġenesi 1:27) Għalkemm Ġeħova għandu ħafna iktar kwalitajiet, l-imħabba hija l-iktar aspett li jispikka tal-personalità tiegħu.
Kitbiet li jiġu minn Alla għandhom jirriflettu l-imħabba tiegħu. Ir-reliġjonijiet tad-dinja għandhom ħafna kitbiet antiki. Kitbiet bħal dawn kemm jirnexxilhom jirriflettu l-imħabba t’Alla?
Il-verità hi li ħafna kitbiet reliġjużi tal-qedem ftit jispjegaw dwar kif Alla jħobbna jew kif aħna nistgħu nħobbu lil Alla. Għalhekk, miljuni taʼ nies ma jirċievu l-ebda tweġiba meta huma jistaqsu, “Għala għad hawn it-tbatija u l-ħażen minkejja li naraw evidenza taʼ l-imħabba t’Alla fil-ħolqien?” Il-Bibbja, mill-banda l-oħra, hija l-unika kitba reliġjuża antika li tispjega bis-sħiħ l-imħabba t’Alla. Din tgħallimna wkoll kif nipprattikaw l-imħabba.
Il-Ktieb dwar l-Imħabba
Il-Kelma t’Alla, il-Bibbja, tirrivela lil Ġeħova bħala “l-Alla taʼ l-imħabba.” (2 Korintin 13:11) Il-Bibbja tiddeskrivi kif l-imħabba qanqlet lil Ġeħova biex jagħti ħajja ħielsa mill-mard u mill-mewt lill-ewwel bnedmin. Iżda r-ribelljoni kontra l-awtorità t’Alla ġabet it-tbatija fuq l-umanità. (Dewteronomju 32:4, 5; Rumani 5:12) Ġeħova aġixxa biex jirrestawra dak li ntilef. Il-Kelma t’Alla tgħid: “Alla tant ħabb lid-dinja li ta l-Iben uniġenitu tiegħu, biex kulmin jeżerċita l-fidi fih ma jinqeridx imma jkollu l-ħajja taʼ dejjem.” (Ġwanni 3:16) L-Iskrittura Mqaddsa turina l-imħabba t’Alla saħansitra iżjed meta din tiddeskrivi kif Alla pprovda gvern perfett b’Ġesù bħala l-ħakkiem biex jirrestawra l-paċi lill-umanità ubbidjenti.—Danjel 7:13, 14; 2 Pietru 3:13.
Il-Bibbja tiġbor fil-qosor l-obbligu tal-bniedem f’dan il-kliem: “‘Ħobb lil Ġeħova Alla tiegħek b’qalbek kollha u b’ruħek kollha u b’moħħok kollu.’ Dan hu l-akbar u l-ewwel kmandament. It-tieni jixbhu u hu dan, ‘Ħobb lill-proxxmu tiegħek bħalek innifsek.’ Fuq dawn iż-żewġ kmandamenti żżomm il-Liġi kollha.” (Mattew 22:37-40) Il-Bibbja tistqarr li hija ispirata minn Alla. Minħabba li b’mod ċar tirrifletti l-personalità tiegħu, aħna nistgħu nkunu ċerti li din ġejja mill-“Alla taʼ l-imħabba.”—2 Timotju 3:16.
Billi napplikaw dan il-prinċipju, aħna nistgħu nidentifikaw liema kitbiet antiki huma verament minn Alla. L-imħabba tidentifika wkoll lill-aduraturi veri, għax huma jimitaw lil Alla meta juru mħabba.
Kif Tagħraf lin-Nies li Jħobbu lil Alla
Dawk li verament iħobbu lil Alla jispikkaw, partikolarment issa li qed ngħixu f’dawk li l-Bibbja ssejħilhom l-“aħħar jiem.” In-nies qed isiru iktar u iktar “iħobbu lilhom infushom, iħobbu l-flus, . . . iħobbu l-pjaċiri minflok ma jħobbu lil Alla.”—2 Timotju 3:1-4.
Kif tistaʼ tagħrafhom lin-nies li jħobbu lil Alla? Il-Bibbja tgħid: “L-imħabba t’Alla tfisser dan: li nosservaw il-kmandamenti tiegħu.” (1 Ġwanni 5:3) L-imħabba għal Alla tqanqal lin-nies biex jirrispettaw il-livelli morali tal-Bibbja. Per eżempju, il-Kelma t’Alla għandha liġijiet dwar is-sess u ż-żwieġ. Ir-relazzjonijiet sesswali huma permessi biss fiż-żwieġ, u ż-żwieġ għandu jkun wieħed permanenti. (Mattew 19:9; Ebrej 13:4) Meta mara fi Spanja li studjat it-teoloġija attendiet laqgħa fejn ix-Xhieda taʼ Ġeħova kienu qed jistudjaw bil-ħerqa l-liġijiet morali tal-Bibbja, hi kkummentat: “Wara l-laqgħa ħassejtni msaħħa, mhux biss bit-tagħlim tat-taħditiet Skritturali iżda anki bl-għaqda li teżisti fost dawn in-nies, bil-morali għoljin li għandhom, u bil-kondotta mill-aqwa tagħhom.”
Minbarra l-imħabba li għandhom għal Alla, il-Kristjani veri huma faċilment identifikati mill-mod kif juru l-imħabba għall-proxxmu. L-iktar xogħol importanti li għandhom hu li jitkellmu m’oħrajn dwar l-unika tama li għandhom il-bnedmin, is-Saltna t’Alla. (Mattew 24:14) Xejn ma jistaʼ jġib iktar benefiċċji dejjiema lill-proxxmu tagħhom mill-għajnuna li jingħataw biex jiksbu għarfien dwar Alla. (Ġwanni 17:3) Ukoll, il-Kristjani veri juru mħabbithom b’modi oħrajn. Huma jagħtu għajnuna prattika lil dawk li jkunu qed ibatu. Per eżempju, meta terremot ikkaġuna diżastru fl-Italja, gazzetta lokali rrapportat li x-Xhieda taʼ Ġeħova “jaħdmu b’mod prattiku billi jagħtu daqqa t’id lil dawk li jkunu qed ibatu, mingħajr ma jinkwetaw dwar liema reliġjon iħaddnu.”
Minbarra li jħobbu lil Alla u lill-proxxmu, il-Kristjani veri jħobbu lil xulxin. Ġesù qal: “Qed nagħtikom kmandament ġdid, li tħobbu lil xulxin; bħalma ħabbejtkom jien, ħobbu intom ukoll lil xulxin. B’dan ikun jaf kulħadd li intom dixxipli tiegħi, jekk ikollkom l-imħabba bejnietkom.”—Ġwanni 13:34, 35.
Hija l-imħabba li l-Kristjani veri għandhom għal xulxin differenti b’mod li jispikka? Ema, mara li xogħolha hu fit-tindif tad-djar, hekk taħseb. Hi taħdem f’La Paz, il-Bolivja, fejn id-differenzi etniċi spiss jifirdu s-sinjuri mill-fqar. Hi qalet: “L-ewwel darba li mort laqgħa tax-Xhieda taʼ Ġeħova, rajt raġel liebes pulit bil-qiegħda jitkellem maʼ mara Indjana. Qatt ma kont rajt ħaġa bħal din qabel. F’dak il-mument, indunajt li dawn żgur li huma l-poplu t’Alla.” B’mod simili, mara żagħżugħa mill-Brażil jisimha Miriam qalet: “Ma kontx naf kif inkun ferħana, lanqas fil-familja tiegħi. L-ewwel darba li rajt l-imħabba fl-azzjoni kienet fost ix-Xhieda taʼ Ġeħova.” Fl-Istati Uniti, wieħed direttur taʼ l-aħbarijiet fuq stazzjon televiżiv kiteb: “Jekk iżjed nies jgħixu bil-mod taʼ kif timxi r-reliġjon tagħkom, dan in-nazzjon ma jkunx fis-sitwazzjoni li jinsab fiha bħalissa. Jien wieħed li naqra l-aħbarijiet u bħala tali naf li l-organizzazzjoni tagħkom hija bbażata fuq l-imħabba u l-fidi qawwija fil-Ħallieq.”
Fittex il-Qima Vera
L-imħabba hija karatteristika li tispikka tal-qima vera. Ġesù xebbah is-sejba tal-qima vera mas-sejba tat-triq it-tajba u l-għażla biex timxi fiha. Hija l-unika triq li twassal għall-ħajja taʼ dejjem. Ġesù qal: “Idħlu mill-bieb id-dejjaq; għax wiesgħa u spazjuża hi t-triq li tieħu għall-qerda, u ħafna jgħaddu minnha; filwaqt li dejjaq hu l-bieb u mħarbta hi t-triq li tieħu għall-ħajja, u ftit huma dawk li jsibuha.” (Mattew 7:13, 14) Grupp wieħed biss taʼ Kristjani veri jimxi f’unjoni m’Alla fit-triq tal-qima vera. Għalhekk, huwa importanti liema reliġjon tagħżel. Jekk issib din it-triq u tagħżel li timxi fiha, int se tkun sibt l-aqwa mod taʼ ħajja għaliex din hija t-triq taʼ l-imħabba.—Efesin 4:1-4.
Immaġina x’ferħ jistaʼ jkollok meta timxi fit-triq tal-qima vera! Huwa bħallikieku tkun qed timxi m’Alla. Mingħand Alla tistaʼ titgħallem l-għerf u l-imħabba sabiex tgawdi relazzjonijiet tajbin m’oħrajn. Mingħandu tistaʼ titgħallem dwar l-iskop tal-ħajja u tkun tistaʼ tifhem il-wegħdi t’Alla u jkollok tama għall-futur. Int qatt ma se jiddispjaċik li tkun fittixt il-qima vera.
[Stampa f’paġna 5]
Fost il-kitbiet reliġjużi antiki, il-Bibbja biss tirrivela l-imħabba t’Alla
[Stampi f’paġna 7]
Il-Kristjani veri jintgħarfu għaliex jipprattikaw l-imħabba