Id-Dinja Krudila taʼ Llum
MARÍA kellha 64 sena u kienet tgħix waħedha. Hi nstabet mejta f’darha, imsawta u fgata b’wajer tal-ħadid.
Grupp taʼ nies irrabjati ħebbew għal tliet pulizija, u akkużawhom li kienu ħatfu u serqu żewġ żgħażagħ. Dawn ferrgħu l-pitrolju fuq tnejn mill-pulizija u tawhom in-nar, u nħarqu ħajjin. It-tielet pulizija rnexxielu jiżgiċċa.
Telefonata anonima wasslet għal skoperta xokkanti. Midfunin fil-ħamrija ġo ġnien kien hemm il-fdalijiet t’erbat irġiel li kienu marru fuq btala. Kienu għattewlhom għajnejhom u rabtulhom idejhom. Mill-awtopsja sar magħruf li huma kienu ġew midfunin ħajjin.
Dawn l-atroċitajiet m’humiex xi xeni minn films tal-biżaʼ kollhom krudeltà u vjolenza. Dawn ir-rapporti huma kollha ġrajjiet veri li seħħew reċentement u li kienu l-aħbarijiet ewlenin f’pajjiż fl-Amerika Latina. Madankollu, dan il-pajjiż bl-ebda mod m’hu xi eċċezzjoni fid-dinja taʼ llum.
Atti krudili saru ġrajjiet taʼ kuljum. Bombi, attakki terroristiċi, qtil, ġlied, sparar, u stupri huma biss frazzjoni żgħira t’atti krudili. Ħafna drabi, il-mezzi tax-xandir jippreżentaw rapporti dettaljati t’atroċitajiet, u ħafna nies m’għadhomx jixxokkjaw ruħhom meta jaraw jew jisimgħu bi krudeltajiet bħal dawn.
Għandek mnejn taħseb: ‘X’qed jiġrilha d-dinja taʼ llum? X’sar minnhom il-konsiderazzjoni għas-sentimenti t’oħrajn u r-rispett għall-ħajja?’ Għala għandna ngħixu f’dinja bħal din?
Issa kkunsidra lil Harry, raġel taʼ 69 sena li kellu l-kanċer. Martu tbati bil-marda taʼ l-isklerożi multipla, iżda l-ġirien u l-ħbieb tiegħu jgħinuh minn jeddhom. “Ma nafx x’nagħmlu mingħajr dawn in-nies kollha li jgħinuna,” jgħid Harry. Fil-Kanada, fejn jgħix hu, studju rrivela li iktar minn 50 fil-mija minn dawk li jieħdu ħsieb l-anzjani qed jgħinu lil xi ħadd li ma jiġix minnhom. Bla dubju, int taf b’xi nies ordinarji li minn jum għall-ieħor juru qalb tajba u mħabba għall-proxxmu. Iva, il-bnedmin għandhom il-potenzjal li jagħdru u juru qalb tajba minflok ma jkunu krudili.
Mela allura għala hawn daqshekk atroċitajiet? Xi jġiegħel lin-nies jaġixxu bi krudeltà? Dawk li jittrattaw lil oħrajn bi krudeltà jistgħu jinbidlu? Il-krudeltà qatt se tintemm? Jekk iva, kif u meta?
[Sors tal-Istampa f’paġna 3]
Ferrovija: CORDON PRESS