Mistoqsijiet mill-Qarrejja
Għandu Kristjan jevita xorb u ikel li jkun fihom il-kafeina?
Il-Bibbja ma tagħmilx projbizzjoni dwar jekk Kristjan għandux jieħu kafè, te, ċikkulata, maté, u luminati li jkun fihom il-kafeina. Madankollu, l-Iskrittura tipprovdi prinċipji li jistgħu jgħinuna nieħdu deċiżjonijiet għaqlin. L-ewwel ejja nikkunsidraw għala xi nies jevitaw ix-xorb u l-ikel li jkun fihom il-kafeina.
Raġuni ewlenija hi li l-kafeina tistaʼ tiġi kunsidrata bħala li hi droga li teffettwa l-burdata, billi għandha effett stimulanti fuq il-moħħ. Tistaʼ wkoll iġġagħlek tiddependi minnha. Ktieb taʼ referenza popolari għall-ispiżjara jgħid: “Li tieħu ammont kbir taʼ kafeina fuq tul taʼ żmien jistaʼ jipproduċi tolleranza, drawwa, u dipendenza psikoloġika. Meta dak li jkun jieqaf milli jieħu l-kafeina f’daqqa jistaʼ jesperjenza wġigħ taʼ ras, irritazzjoni, nervożiżmu, ansjetà, u stordament.” L-effett taʼ meta tieqaf milli tieħu l-kafeina ġie kunsidrat biex jiġi inkluż fid-Diagnostic and Statistical Manual of Mental Disorders (Manwâl taʼ l-Istatistika u tad-Dijanjosi tad-Diżordni Mentali), flimkien maʼ l-effetti taʼ meta twaqqaf drogi oħrajn. Għaldaqstant, huwa raġunevoli li xi Kristjani jkunu konċernati minħabba li huma jridu jevitaw kwalunkwe dipendenza u jixtiequ wkoll li juru r-rażna.—Galatin 5:23.
Xi wħud jemmnu li l-kafeina tistaʼ teffetwa s-saħħa taʼ persuna jew taʼ tarbija li tkun għadha ma twilditx. Il-Kristjani għandhom iħobbu ’l Alla ‘b’ruħhom kollha,’ u għalhekk huma ma jipprattikawx xi ħaġa li tqassrilhom il-ħajja. U ladarba huma wkoll kmandati biex iħobbu lill-proxxmu tagħhom, huma jżommu lura minn affarijiet li jistgħu jagħmlu l-ħsara lil tarbija li tkun għadha ma twilditx.—Luqa 10:25-27.
Huwa tħassib bħal dan għas-saħħa neċessarju? Hemm kontroversja dwar ir-rabta bejn diversi mardiet u l-konsum tal-kafeina. Xi riċerkaturi saħansitra jirrapportaw li l-kafè huwa tajjeb għas-saħħa. Fl-2006, ir-rivista Time rrapportat: “Studji inizjali ssuġġerew [li l-kafeina] tistaʼ twassal għall-kanċer fil-bużżieqa taʼ l-awrina, pressjoni għolja u mard ieħor. Studji iktar reċenti mhux biss irrifjutaw dawn l-istqarrijiet imma sabu li hemm benefiċċji sinifikanti. Jidher li l-kafeina tipproteġi xi ftit mill-ħsara fil-kliewi, il-marda taʼ Parkinson, id-dijabete, l-Alzheimer, il-kalklu (ġebla fil-fwied), id-dipressjoni, u possibbilment xi forom oħra tal-kanċer.” Rigward l-użu tal-kafeina, ġurnal irrapporta: “Iċ-ċavetta—mhix sorpriża—hija l-moderazzjoni.”
Kull Kristjan għandu jieħu deċiżjoni persunali bbażata fuq l-fehma tiegħu taʼ l-informazzjoni kurrenti li hija disponibbli dwar il-kafeina u fuq il-prinċipji tal-Bibbja li mid-dehra huma involuti. Per eżempju, mara Kristjana li tkun qed tistenna tarbija għandha mnejn tagħżel li tieqaf milli tieħu l-kafeina matul it-tqala jekk hi tikkonkludi li dan jistaʼ jkollu xi effett fuq it-tarbija li għadha ma twilditx. Jekk Kristjan jinduna li jekk ma jiħux il-kafeina fuq bażi regulari jsir irritabbli jew kemxejn ma jiflaħx, hu għandu mnejn jingħata l-parir biex jastjeni mill-kafeina, għallinqas temporanjament. (2 Pietru 1:5, 6) Kristjani oħrajn għandhom jirrispettaw deċiżjonijiet simili, u ma jinsistux fuq l-opinjoni tagħhom.
Hi x’inhi d-deċiżjoni li tieħu rigward ix-xorb u l-ikel li jkun fihom il-kafeina, żomm f’moħħok it-twissija taʼ Pawlu: “Jekk tieklu jew tixorbu jew tagħmlu xi ħaġa oħra, agħmlu kollox għall-glorja t’Alla.”—1 Korintin 10:31.