Disinn Mingħajr Disinjatur?

GĦADDEW kważi 150 sena minn meta Charles Darwin ippropona l-​idea li s-​selezzjoni naturali tispjega l-​komplessità u d-​diversità tal-​ħajja. Madankollu, it-​teorija tiegħu taʼ l-​evoluzzjoni u t-​teoriji moderni simili tagħha dan l-​aħħar ġew attakkati minn dawk li jemmnu li l-​mod meraviljuż u perfett kif inhuma magħmulin l-​organiżmi ħajjin jindika disinn bi skop. Hemm anki għadd taʼ xjenzati rispettati li ma jaċċettawx l-​idea li l-​evoluzzjoni hija responsabbli għall-​varjazzjoni taʼ l-​ispeċi li naraw fuq l-​art.

Xi xjenzati bħal dawn jgħidu li hemm raġuni oħra għala hawn varjetà taʼ l-​ispeċi—magħrufa bħala disinn intelliġenti—u jirraġunaw li d-​disinn fil-​ħolqien huwa appoġġat sew mill-​bijoloġija, il-​matematika, u s-​sens komun. Huma jfittxu li jinkludu diskussjoni dwar din l-​idea fl-​istudju tax-​xjenza fil-​kurrikulu taʼ l-​iskola. L-​hekk imsejħin gwerer taʼ l-​evoluzzjoni jseħħu l-​iktar fl-​Istati Uniti, imma hemm xejriet simili rapportati fl-​Ingilterra, l-​Olanda, il-​Pakistan, is-​Serbja, u t-​Turkija.

Nuqqas li Jikkonfondi

Madankollu, ġeneralment hemm nuqqas evidenti fil-​kliem magħżul bir-​reqqa li jiddefendi d-​disinn intelliġenti. Dan hu n-​nuqqas taʼ referenza għal disinjatur. Temmen int li jistaʼ jkun hemm disinn mingħajr disinjatur? Dawk li jinkuraġġixxu l-​idea taʼ disinn intelliġenti “ma jagħmlu l-​ebda stqarrija dwar min jistaʼ jew x’jistaʼ jkun id-​disinjatur,” jirrapporta The New York Times Magazine. L-​awtriċi Claudia Wallis qalet li dawk li huma favur id-​disinn intelliġenti “joqogħdu attenti li ma jdaħħlux lil Alla fid-​diskussjoni.” U r-​rivista Newsweek qalet li “d-​disinn intelliġenti ma jgħid xejn dwar l-​eżistenza u l-​identità tad-​disinjatur.”

Imma tistaʼ tifhem li għalxejn tipprova taħrab il-​mistoqsija dwar min hu u jekk hemmx disinjatur. Kif jistaʼ jiġi spjegat għalkollox id-​disinn taʼ l-​univers u l-​ħajja nfisha jekk l-​eżistenza u l-​identità tad-​disinjatur ikunu misturin jew saħansitra lanqas biss jiġu kunsidrati?

Sa ċertu punt, id-​diskussjoni dwar jekk jiġix rikonoxxut disinjatur jew le tiddependi minn dawn it-​tliet mistoqsijiet li ġejjin: Il-​fatt li tiġi aċċettata l-​eżistenza taʼ disinjatur sovruman se jfixkel il-​progress xjentifiku u intelletwali? Għandna naċċettaw li hemm disinjatur intelliġenti biss meta ma tingħata l-​ebda spjegazzjoni? U jagħmel sens verament li mid-​disinn tikkonkludi li hemm disinjatur? L-​artiklu li jmiss se jiddiskuti dawn il-​mistoqsijiet u oħrajn li huma relatati magħhom.

[Stampi f’paġna 3]

Charles Darwin kien jemmen li s-​selezzjoni naturali tispjega l-​komplessità tal-​ħajja

[Sors]

Darwin: From a photograph by Mrs. J. M. Cameron/U.S. National Archives photo