Int Tistaʼ Tkampa maʼ l-​Inġustizzja!

MIN m’esperjenzax xi tip taʼ inġustizzja matul ħajtu? Waqt li xi inġustizzji jistgħu jkunu biss immaġinarji jew f’moħħ l-​individwu, oħrajn huma tabilħaqq reali.

Kulmeta nesperjenzaw l-​inġustizzja, aħna nħossu xi tip taʼ wġigħ emozzjonali u nistgħu nġarrbu ħsara spiritwali. Għandu mnejn ikollna xewqa qawwija li nirranġaw is-​sitwazzjoni. Għala? Raġuni waħda hi li l-​Ħallieq tagħna, Alla Ġeħova, li “ma jqarraqx,” poġġa fil-​bnedmin sens qawwi taʼ ġustizzja. (Dewteronomju 32:4; Ġenesi 1:26) Madankollu, jistaʼ jkun li niffaċċjaw sitwazzjonijiet li fihom inħossu li ma tkunx saret ġustizzja. Raġel għaqli darba osserva: “Dort biex nara l-​moħqrijiet kollha li jsiru taħt ix-​xemx. Rajt il-​maħqurin jibku bla ma għandhom min ifarraġhom; rajt il-​qawwa li biha jaħqruhom u li ma hemmx min ifarraġhom.” (Koħèlet 4:1) Allura, kif nistgħu nkampaw maʼ l-​inġustizzja?

X’Inhi Tassew l-​Inġustizzja?

L-​inġustizzja hija l-​kundizzjoni jew il-​prattika li tikser il-​livelli taʼ dak li hu ġust. X’inhu l-​livell taʼ ġustizzja għall-​bnedmin? Jidher ċar li l-​Ħallieq tagħna li hu ġust u li ma jinbidilx għandu d-​dritt li jpoġġi l-​livell taʼ dak li hu ġust u dak li m’huwiex ġust. Mill-​ħarsa tiegħu, li ‘nimxu fuq il-​preċetti li jagħtu l-​ħajja’ jinvolvi li ‘ma nagħmlux il-​ħażen,’ jew “l-​inġustizzja” (NW). (Eżekjel 33:15) Għalhekk, meta Ġeħova ħalaq lill-​ewwel bniedem, Hu ħolqu b’kuxjenza—vuċi ġewwinija li setgħet tgħinu jagħżel it-​tajjeb mill-​ħażin. (Rumani 2:​14, 15) Barra minn hekk, fil-​Kelma tiegħu l-​Bibbja, Ġeħova niżżel espressjonijiet dwar dak li hu ġust u dak li m’huwiex.

X’għandna nagħmlu jekk inħossu li saret xi inġustizzja magħna? Nagħmlu tajjeb li neżaminaw il-​kwistjoni b’mod realistiku biex naraw jekk hux tassew seħħet l-​inġustizzja. Per eżempju, ikkunsidra s-​sitwazzjoni li sab ruħu fiha l-​profeta Lhudi Ġona nnifsu. Ġeħova inkarigah biex jgħid lin-​Ninwin dwar id-​diżastru li kien riesaq. Għall-​ewwel, Ġona ħarab mingħajr ma wettaq l-​inkarigu. Madankollu, maż-​żmien hu mar Ninwè u wissa lill-​abitanti dwar il-​qerda li kienet riesqa. Minħabba li wieġbu tajjeb, Ġeħova għażel li jippreserva l-​belt u jsalva lill-​abitanti tagħha. Kif ħassu Ġona? “Dan xejn li xejn m’għoġbu lil Ġona, u inkorla.” (Ġona 4:1) Hu ħass li din kienet inġustizzja kbira min-​naħa taʼ Ġeħova.

M’għandniex xi ngħidu, Ġeħova, li jistaʼ jaqra l-​qlub u li “jħobb id-​dritt u s-​sewwa,” ma kienx żbaljat. (Salm 33:5) Ġona sempliċement kellu jitgħallem li l-​mod kif iddeċieda Ġeħova kien fi qbil mal-​ġustizzja perfetta. Meta nħossu li qed inġarrbu inġustizzja, nistgħu nistaqsu lilna nfusna, ‘Jistaʼ jkun li Ġeħova qed jara l-​kwistjoni b’mod differenti?’

Niffaċċjaw l-​Inġustizzja

Il-​Bibbja tirrapporta ħafna ġrajjiet li fihom xi individwi ġarrbu l-​inġustizzja. Nistgħu nitgħallmu ħafna jekk neżaminaw kif iffaċċjaw il-​problemi diffiċli tagħhom. Ikkunsidra lil Ġużeppi, li ġie mibjugħ fil-​jasar fl-​Eġittu minn ħutu li kienu jgħiru għalih. Fl-​Eġittu, mart sidu pprovat tisseduċi lil Ġużeppi, u meta ċaħadha, hi gidbet billi akkużatu li ttantaha sesswalment. Minħabba f’hekk, Ġużeppi spiċċa l-​ħabs. Madankollu, il-​fidi tiegħu kienet iktar b’saħħitha mill-​ktajjen li kien marbut bihom. Hu ma ħalliex li din l-​inġustizzja tnaqqas l-​ispiritwalità tiegħu u lanqas ma ħallieha ddgħajjiflu l-​fidi tiegħu f’Ġeħova.​—Ġenesi 37:​18-​28; 39:​4-​20; Salm 105:​17-​19.

Raġel ieħor li ffaċċja l-​inġustizzja kien Nabot. Hu sar vittma taʼ ingann kattiv u sfaċċat minn Ġeżabel, mart is-​Sultan Aħab taʼ Iżrael. Is-​sultan ixxennaq għal biċċa art li wiret Nabot ħdejn il-​palazz tas-​sultan. Wieħed Iżraeli ma setax jagħti b’mod permanenti l-​art li jkun wiret, allura Nabot m’aċċettax l-​offerta tas-​sultan biex jixtri l-​art. (Levitiku 25:23) Minħabba f’hekk, il-​mara kiefra t’Aħab qabbdet xhieda foloz biex jakkużaw lil Nabot li żeblaħ lil Alla u lis-​sultan. Minħabba f’hekk, Nabot u wliedu ġew maqtulin. Immaġina kif setaʼ ħassu Nabot meta n-​nies kienu qed jaħtfu l-​ġebel biex joqtluh!—1 Slaten 21:​1-14; 2 Slaten 9:26.

Madankollu, dan kollu m’hu xejn meta tqabblu maʼ l-​inġustizzji li ffaċċja Ġesù Kristu. Is-​sentenza tal-​mewt li ġarrab hu involviet gideb u prova illegali. Il-​gvernatur Ruman li kellu jiġġudika l-​każ ma kellux biżżejjed saħħa morali biex iżomm maʼ dak li hu ra li kien sewwa. (Ġwanni 18:​38-40) Iva, Satana wettaq fuq Kristu Ġesù l-​akbar inġustizzja li qatt seħħet!

Jindikaw dawn il-​ġrajjiet li Ġeħova ma jagħtix kas l-​inġustizzja? Le! Ġeħova ma ħarisx lejn dawn is-​sitwazzjonijiet sempliċement minn ħarsa umana. (Isaija 55:​8, 9) Minħabba li Ġużeppi ġie mibjugħ fil-​jasar, hu setaʼ jsalva lill-​familja tiegħu. Hu sar il-​wieħed li jqassam l-​ikel fl-​Eġittu qabel ma beda ġuħ kbir li laqat lill-​familja tiegħu. Aħseb ftit, li kieku Ġeħova ma ppermettiex l-​inġustizzja kieku Ġużeppi ma kienx se jkun il-​ħabs. Kien hemmhekk li hu interpreta l-​ħolm taʼ żewġ priġunieri, li wieħed minnhom iktar tard qal lill-​Fargħun dwar Ġużeppi, u dan wassal biex Ġużeppi sar il-​wieħed li jqassam l-​ikel.—Ġenesi 40:1; 41:​9-14; 45:​4-8.

Xi ngħidu għal Nabot? Għal darb’oħra, ipprova ħares lejn il-​kwistjoni mill-​ħarsa taʼ Ġeħova. Għal Ġeħova, li jistaʼ jqajjem lill-​mejtin, Nabot kien għadu ħaj fil-​memorja Tiegħu, anki meta l-​katavru tiegħu kien fl-​art. (1 Slaten 21:19; Luqa 20:​37, 38) Nabot irid jistenna sakemm Ġeħova jsejjaħlu lura għall-​ħajja, imma ż-​żmien li se jkun għadda se jkun biss mumentanju, għaliex il-​mejtin ma jafu xejn. (Koħèlet 9:5) Barra minn hekk, Ġeħova tħallas għal demm Nabot billi wettaq ġudizzju fuq Aħab u daru.—2 Slaten 9:​21, 24, 26, 35, 36; 10:​1-11; Ġwanni 5:​28, 29.

Fil-każ taʼ Ġesù, hu miet. Però, Alla rxoxtah u eżaltah f’pożizzjoni “ħafna iżjed ’il fuq minn kull gvern u awtorità u qawwa u ħakma u kull isem li jissemma.” (Efesin 1:​20, 21) L-​inġustizzja li ġab Satana fuq Kristu Ġesù ma setgħetx iżżomm lura lil Ġeħova milli jippremja lil Ibnu. Ġesù kien jaf li Ġeħova setaʼ jreġġaʼ lura minnufih l-​inġustizzja taʼ l-​arrest illegali li kieku din kienet ir-​rieda Tiegħu. Madankollu, Kristu kien jaf ukoll li Ġeħova għandu żmien meta se jara li l-​Iskrittura titwettaq u meta se jreġġaʼ lura kwalunkwe inġustizzji.

Huwa minnu li Satana u l-​aġenti tiegħu għamlu ħafna inġustizzji fuq uħud li huma ġusti, imma maż-​żmien Ġeħova rranġa l-​kwistjoni u neħħa jew se jneħħi b’mod permanenti l-​inġustizzja. Għalhekk, biex inġustizzja tiġi rranġata, aħna rridu nistennew lil Alla ħalli jaġixxi.—Dewteronomju 25:16; Rumani 12:​17-19.

Għala Ġeħova Għandu Mnejn Jippermetti l-​Inġustizzja

Ġeħova jistaʼ saħansitra jkollu raġunijiet għala ma jikkoreġix ċerta sitwazzjoni. Bħala parti mit-​taħriġ Kristjan tagħna, hu għandu mnejn jippermetti li nesperjenzaw l-​inġustizzja. M’għandniex xi ngħidu, ‘Alla ma jġarrab lil ħadd b’affarijiet ħżiena.’ (Ġakbu 1:13) Xorta waħda, hu għandu mnejn jippermetti li tiżviluppa sitwazzjoni mingħajr ma jindaħal, u dan jistaʼ jsaħħaħ lil dawk li jwieġbu għal dan it-​taħriġ. Il-​Bibbja tiżgurana: “Wara li tkunu sofrejtu għal ftit, l-​Alla taʼ kull qalb tajba mhix mistħoqqa . . . itemm hu stess it-​taħriġ tagħkom, jissodakom, u jsaħħaħkom.”—1 Pietru 5:10.

Barra minn hekk, il-​fatt li Ġeħova jippermetti ċerta inġustizzja għandu mnejn jagħti ċans lil dawk li jagħmlu l-​inġustizzja biex jindmu. Ftit ġimgħat biss wara li ġie maqtul Ġesù, xi Lhud li semgħu t-​twissija taʼ Pietru ħassew li “nifdilhom qalbhom.” Huma ħaddnu l-​Kelma t’Alla minn qalbhom u tgħammdu.—Atti 2:​36-42.

Huwa minnu li mhux kulmin jagħmel l-​inġustizzja se jindem. Xi wħud saħansitra jistgħu tant ikunu sfaċċati li jwettqu għemejjel taʼ inġustizzja kbira. Madankollu, Proverbji 29:1 jgħid: “Min ikun imwiddeb u jibqaʼ jwebbes rasu, malajr jiġġarraf u ma jkollux fejqan.” Tabilħaqq, Ġeħova maż-​żmien se jaġixxi u se jelimina lil dawk li jippersistu fi mġiba li m’hijiex xierqa.—Koħèlet 8:​11-13.

Jieħu kemm jieħu żmien biex dak li jkun jirkupra mill-​inġustizzja, nistgħu nkunu ċerti li Ġeħova jaf kif jgħinna nirkupraw. U hu żgur li se jneħħi kwalunkwe inġustizzja li għandna mnejn esperjenzajna f’din is-​sistema mill-​agħar. Barra minn hekk, hu wiegħed l-​aħħar premju, ħajja taʼ dejjem f’dinja ġdida fejn se “tgħammar il-​ġustizzja.”—2 Pietru 3:13.

[Stampa f’paġna 16, 17]

Kif setaʼ ħassu Nabot meta ffaċċja inġustizzja kbira?