MISTOQSIJIET DWAR IL-​BIBBJA MWEĠBIN

X’tip taʼ persuna hu Alla?

Alla hu persuna spirtu inviżibbli. Hu ħalaq is-​smewwiet, l-​art, u l-​ħlejjaq ħajjin kollha. Ħadd ma ħalaq lil Alla—hu ma kellux bidu. (Salm 90:2) Alla jrid li n-​nies ifittxuh u jsiru jafu l-​verità dwaru.—Aqra Atti 17:24-​27.

Alla hu persuna li nistgħu nsiru nafuh b’ismu. Nistgħu nagħrfu ftit mill-​kwalitajiet tiegħu billi nikkunsidraw l-​affarijiet li għamel. (Rumani 1:20) Imma biex insiru nafu sew lil Alla, jeħtieġ li nistudjaw il-​Kelma tiegħu, il-​Bibbja. Din turina kemm għandu mħabba Alla.—Aqra Salm 103:7-​10.

Alla kif iħossu dwar l-​inġustizzja?

Il-​Ħallieq tagħna, Ġeħova, jobgħodha l-​inġustizzja. Hu ħalaq lill-​bnedmin fix-​xbieha tiegħu. (Dewteronomju 25:16) Huwa għalhekk li l-​biċċa l-​kbira minna nobogħdu l-​inġustizzja. Alla mhuwiex il-​kaġun tal-​inġustizzji taʼ madwarna. Alla ta lill-​bniedem ir-​rieda ħielsa. B’dispjaċir, ħafna nies jużaw ħażin ir-​rieda ħielsa tagħhom u jwettqu l-​inġustizzji. Ġeħova jħossu mweġġaʼ f’qalbu.—Aqra Ġenesi 6:5, 6; Dewteronomju 32:4, 5.

Ġeħova jħobb il-​ġustizzja, u mhux se jittollera l-​inġustizzja għal dejjem. (Salm 37:28, 29) Il-​Bibbja twiegħed li Alla dalwaqt se jtemm l-​inġustizzja kollha.—Aqra t-​2 Pietru 3:7-​9, 13.