Għandek Tgħix Biss għal-​Lum?

“QATT ma naħseb dwar il-​futur. Dan malajr jasal.” Dan il-​kliem li spiss jiġi kwotat intqal mix-​xjenzat famuż Albert Einstein. Ħafna nies iħossuhom l-​istess. Xi wħud għandhom mnejn jistaqsu: “Għala għandek tinkwieta dwar il-​futur?” Jew għandek mnejn smajt lil min jgħid stqarrijiet bħal: “Kompli għix ħajtek.” “Għix għal-​lum.” “Insieh il-​futur.”

M’għandniex xi ngħidu, din l-​attitudni komuni m’hijiex ġdida. “Kul, ixrob, gawdi. Il-​kumplament mhux importanti.” Dan kien il-​motto taʼ l-​Epikurin tal-​qedem. Xi wħud li kienu jgħixu fi żmien l-​appostlu Pawlu kellhom ħarsa simili. Huma kienu jgħidu: “Ħa nieklu u nixorbu, għax għada mmutu.” (1 Korintin 15:32) Huma kienu jemmnu li din il-​ħajja qasira hi dak kollu li għandna, u għalhekk kienu jippromwovu l-​idea li għandna nieħdu kull vantaġġ mill-​ħajja.

Għal miljuni t’abitanti taʼ l-​art, li tieħu vantaġġ mill-​ħajja żgur li ma jfissirx li tiġri b’mod sfrenat wara l-​pjaċiri. Iċ-​ċirkustanzi diffiċli li ħafna jsibu ruħhom fihom jagħmlulhom ħajjithom illum xejn ħlief ġlieda kontinwa u taʼ niket biex jibqgħu għaddejjin. Għala għandhom jaħsbu dwar il-​futur, li ħafna drabi jidher tant ikrah u bla tama?

Għandna Nippjanaw għall-​Futur?

Anki nies f’ċirkustanzi inqas diffiċli spiss ma jarawx għalfejn għandhom jagħmlu pjanijiet għall-​futur. Huma jistaqsu: “Għala għandek tħabbel moħħok?” Xi wħud forsi jirraġunaw li dawk li jippjanaw fl-​aħħar jispiċċaw imqarrqin u diżappuntati. Anki l-​patrijarka Ġob taż-​żminijiet tal-​qedem esperjenza disperazzjoni kbira meta ra l-​pjanijiet tiegħu sempliċement ‘jgħosfru,’ meta tħassar dak kollu li kien għamel biex hu u l-​familja tiegħu jkollhom futur hieni.—Ġob 17:11; Koħèlet 9:11.

Il-poeta Skoċċiż Robert Burns qabbel is-​sitwazzjoni diffiċli tagħna maʼ dik taʼ ġurdien li jgħix fl-​għelieqi u li l-​bejta tiegħu, mingħajr ma ried, Burns qeridha bix-​xafra tal-​moħriet tiegħu. Il-​ġurdien ġera biex isalva ħajtu wara li d-​dinja tiegħu kienet tfarrket għalkollox. Il-​poeta ħaseb: ‘Iva, kemm-il darba nsibu lilna nfusna bla saħħa meta niffaċċjaw ġrajjiet li ma jkollna l-​ebda kontroll fuqhom meta saħansitra anki l-​iktar proġetti maħsubin sew ħafna drabi jiġu fix-​xejn.’

Għalhekk, jagħmel sens li tippjana għall-​futur? Il-​fatt hu li nuqqas taʼ ppjanar tajjeb jistaʼ jkollu riżultati diżastrużi meta jseħħu xi uragani jew diżastri naturali oħrajn. Veru, ħadd ma setaʼ jwaqqaf lill-​Uragan Katrina, biex nieħdu eżempju. Imma li kieku kien hemm iktar ħsieb minn qabel u ppjanar ma kinux jitnaqqsu ħafna iktar l-​effetti fuq il-​belt u l-​abitanti tagħha?

X’taħseb? Jagħmel verament sens li tgħix biss għal-​lum u tinjora l-​futur? Ikkunsidra x’għandu x’jgħid l-​artiklu li jmiss fuq dan is-​suġġett.

[Stampi f’paġna 3]

“Kul, ixrob, gawdi. Il-​kumplament mhux importanti”

[Stampa f’paġna 4]

Ma setgħux ħsieb minn qabel u ppjanar inaqqsu l-​effetti taʼ l-​Uragan Katrina?

[Sors]

U.S. Coast Guard Digital