Ersaq Lejn id-​Dawl

IL-​FANALI tal-​port salvaw għadd kbir taʼ ħajjiet. Però, għal vjaġġatur għajjien, xi dawl li jidher fil-​bogħod huwa iktar minn sempliċi twissija li hemm sikek perikolużi. Jurih ukoll li d-​destinazzjoni tiegħu hija fil-​qrib. B’mod simili, il-​Kristjani llum qed joqorbu lejn it-​tmiem taʼ vjaġġ twil, wieħed li għaddiehom minn dinja mudlama u perikoluża spiritwalment. Fil-​Bibbja, l-​umanità in ġenerali​—l-​għadd taʼ wħud imbegħdin minn Alla—huma mqabblin maʼ “baħar imqanqal, li ma jistaʼ jsib kwiet b’xejn, u ilmijietu jqanqlu ħama u tajn.” (Isaija 57:20) Il-​poplu t’Alla hu mdawwar minn ambjent bħal dan. Madankollu, għandu prospett sabiħ taʼ salvazzjoni, li għalih huwa dawl figurattiv taʼ min joqgħod fuqu. (Mikea 7:8) Grazzi għal Ġeħova u l-​Kelma miktuba tiegħu, “[feġġ] id-​dawl fuq il-​ġust, u l-​hena għal qalb in-​nies sewwa.”​—Salm 97:11.a

Però, xi Kristjani ħallew ċerti aljenazzjonijiet jiġbduhom ’il bogħod mid-​dawl taʼ Ġeħova tant li l-​fidi tagħhom ġarrbet nawfraġju fuq dak li nistgħu nqabbluh maʼ blat perikoluż​—il-​materjaliżmu, l-​immoralità, jew saħansitra l-​apostasija. Iva, bħal fl-​ewwel seklu, xi wħud illum “ġarrbu nawfraġju fil-​fidi tagħhom.” (1 Timotju 1:​19; 2 Pietru 2:​13-​15, 20-​22) Id-​dinja l-​ġdida tistaʼ titqabbel mal-​port li lejh sejrin. Peress li hija tant viċin issa, xi traġedja tkun li xi ħadd jitlef il-​favur taʼ Ġeħova!

Evita ‘Nawfraġju fil-​Fidi Tiegħek’

Fis-​sekli li għaddew, bastiment setaʼ jbaħħar f’baħar miftuħ mingħajr perikli imma mbagħad iġarrab nawfraġju hekk kif javviċina l-​port. Spiss l-​iktar parti perikoluża tal-​vjaġġ kienet tkun hekk kif il-​bastiment ikun riesaq lejn l-​art. B’mod simili, għal ħafna l-​iktar perijodu perikoluż fl-​istorja tal-​bniedem hu “l-​aħħar jiem” taʼ din is-​sistema dinjija. Il-​Bibbja tiddeskrivi tajjeb dawn il-​jiem bħala li huma “diffiċli biex issib tarfhom,” speċjalment għal Kristjani dedikati.​—2 Timotju 3:​1-5.

Għala huma daqstant diffiċli dawn l-​aħħar jiem? Għaliex Satana jaf li “żmien qasir baqagħlu” li fih jistaʼ jiggwerra kontra l-​poplu t’Alla. Għalhekk, hu intensifika l-​kampanja kiefra tiegħu biex jeqred il-​fidi tagħhom. (Rivelazzjoni 12:​12, 17) Madankollu, aħna m’aħniex bla għajnuna u gwida. Ġeħova jkompli jkun taʼ kenn għal dawk li jagħtu widen għall-​pariri tiegħu. (2 Samwel 22:31) Hu forniena b’eżempji taʼ twissija li jikxfu l-​pjanijiet makakki imma mill-​agħar taʼ Satana. Issa ejja nikkunsidraw tnejn minn dawn l-​eżempji li jinvolvu l-​ġens taʼ Iżrael hekk kif avviċina l-​Art Imwiegħda.​—1 Korintin 10:11; 2 Korintin 2:11.

Qrib l-​Art Imwiegħda

B’Mosè bħala l-​mexxej tagħhom, il-​poplu taʼ Iżrael irnexxielu jaħrab mill-​Eġittu. Il-​poplu ma damx ma qorob lejn il-​fruntiera tan-​nofsinhar taʼ l-​Art Imwiegħda. Mosè mbagħad bagħat 12-il raġel biex jispijaw l-​art. Għaxar spiji żleali ġabu lura rapport negattiv, billi qalu li Iżrael ma kienx se jirnexxilu jegħleb il-​Kangħanin minħabba li kienu “nies twal” u b’saħħithom militarment. Dan kif effettwa lill-​Iżraelin? Ir-​rakkont jgħidilna li bdew igergru kontra Mosè u Aron, billi qalu: “Għalfejn se jdaħħalna l-​Mulej f’dan il-​pajjiż, biex ninqerdu bix-​xabla? In-​nisa tagħna u wliedna se jeħduhomlna bi priża. . . . nagħżlu mexxej, u nerġgħu lura lejn l-​Eġittu”!​—Numri 13:​1, 2, 28-32; 14:​1-4.

Immaġina! Dawn l-​istess nies kienu raw lil Ġeħova jumilja lill-​Eġittu setgħan​—il-​qawwa dinjija taʼ dak iż-​żmien​—permezz t’għaxar kastigi qerrieda u miraklu taʼ l-​għaġeb fil-​Baħar l-​Aħmar. U l-​Art Imwiegħda kienet eżatt quddiemhom, allura kellhom biss jersqu lejha sewwasew bħalma bastiment jersaq lejn id-​dawl li jimmarka d-​destinazzjoni tiegħu. Madankollu, huma kienu jemmnu li Ġeħova ma kienx kapaċi jegħleb is-​saltniet tal-​bliet mifrudin taʼ Kangħan li kienu insinifikanti meta mqabblin maʼ l-​Eġittu. Min jaf kemm din ir-​reazzjoni bla fidi ddiżappuntat lil Alla u lil Ġożwè u Kaleb, iż-​żewġ spiji kuraġġużi, li ħassew li Kangħan kienet “bħall-​ħobż” għal Iżrael! Dawn it-​tnejn kellhom informazzjoni li kisbu huma stess minħabba li mxew madwar Kangħan. Meta n-​nies ma daħlux fl-​Art Imwiegħda, Ġożwè u Kaleb ukoll kellhom ikomplu fix-​xagħri għal għaxriet taʼ snin, imma ma mitux hemm maʼ dawk taʼ bla fidi. Tabilħaqq, Ġożwè u Kaleb għenu biex imexxu l-​ġenerazzjoni li ġiet wara ’l barra mix-​xagħri u lejn l-​Art Imwiegħda. (Numri 14:​9, 30) Meta avviċina l-​Art Imwiegħda għat-​tieni darba, Iżrael kellu prova differenti x’jiffaċċja. X’kien se jagħmel?

Is-​Sultan Balak taʼ Mowab ipprova jisħet lil Iżrael permezz tal-​profeta falz Balgħam. Madankollu, Ġeħova fixkel il-​pjan tiegħu billi ġiegħel lil Bagħlam ilissen barkiet minflok saħtiet. (Numri 22:​1-7; 24:10) Mingħajr ma qataʼ qalbu, Bagħlam ippjana komplott mill-​agħar ieħor, wieħed disinjat biex il-​poplu t’Alla ma jkunx jistaʼ jingħata l-​art. Kif? Billi ħajjarhom jieħdu sehem fl-​immoralità u l-​qima taʼ Bagħal. Filwaqt li meta tqis kollox din l-​istrateġija falliet, però, ir-​riżultat kien li 24,000 Iżraeli waqgħu fin-​nassa. Huma kellhom relazzjonijiet immorali maʼ nisa Mowabin u ntrabtu maʼ Bagħal taʼ Pegħor.​—Numri 25:​1-9.

Aħseb dwar dan! Ħafna minn dawn l-​Iżraelin stess kienu raw lil Ġeħova jmexxihom fis-​sigurtà mid-​“deżert kbir iwaħħxek.” (Dewteronomju 1:19) Imma, fuq l-​għatba tal-​wirt tagħhom, 24,000 mill-​poplu t’Alla waqgħu għax-​xewqat tal-​laħam u mietu taħt id Ġeħova. Xi twissija din għall-​qaddejja t’Alla llum hekk kif javviċinaw wirt li huwa ħafna iktar superjuri!

Fl-aħħar attentat tiegħu biex iwaqqaf lill-​qaddejja taʼ Ġeħova taʼ llum milli jiksbu l-​premju tagħhom, Satana m’għandux bżonn strateġiji ġodda. Bi strateġija li tfakkarna f’dak li ġara l-​ewwel darba li Iżrael avviċina l-​Art Imwiegħda, Satana spiss jipprova jqanqal il-​biżaʼ u d-​dubju, permezz taʼ theddid, persekuzzjoni, jew twaqqigħ għaċ-​ċajt. Xi Kristjani ċedew għal intimidazzjoni bħal din. (Mattew 13:​20, 21) Komplott ieħor li ġie provat tul iż-​żmien huwa dak taʼ li jikkorrompi lil individwi moralment. Kultant, uħud li daħlu fin fin fil-​kongregazzjoni Kristjana pprovaw jikkorrompu lil dawk li huma dgħajfin spiritwalment u li m’humiex mexjin fi qbil mad-​dawl minn Alla.​—Ġuda 8, 12-16.

Għal individwi maturi u għassa spiritwalment, it-​taħsir morali li qed jiżdied b’rata mgħaġġla fid-​dinja huwa evidenza qawwija tad-​disperazzjoni taʼ Satana. Iva, Satana jaf li dalwaqt m’hu se jkun jistaʼ jagħmlilhom xejn lill-​qaddejja leali t’Alla. Għalhekk, dan żgur huwa żmien biex nibqgħu għassa spiritwalment għall-​isforzi taʼ Satana.

Għajnuniet biex Nibqgħu Mqajmin Spiritwalment

L-​appostlu Pietru ddeskriva l-​kelma profetika t’Alla bħala “fanal jiddi f’post mudlam,” għax din tgħin lill-​Kristjani jaraw u jifhmu t-​twettiq taʼ l-​iskop divin. (2 Pietru 1:​19-21) Dawk li jiżviluppaw imħabba għall-​Kelma t’Alla u jkomplu jiġu gwidati minnha jsibu li Ġeħova se jagħmel it-​triqat tagħhom dritti. (Proverbji 3:​5, 6) Mimlijin tama, dawn l-​uħud grati “jgħannu bl-​hena taʼ qalbhom,” filwaqt li dawk li ma jafux lil Ġeħova jew li jitilqu mit-​triq tiegħu fl-​aħħar mill-​aħħar iħossu ‘niket f’qalbhom’ u ‘diqa f’ruħhom.’ (Isaija 65:​13, 14) Għalhekk, permezz taʼ studju tal-​Bibbja diliġenti u applikazzjoni taʼ dak li nitgħallmu, aħna nistgħu nżommu għajnejna ffokati fuq it-​tama ċerta tagħna minflok fuq il-​pjaċiri temporanji taʼ din is-​sistema dinjija.

It-talb ukoll huwa vitali biex nibqgħu mqajmin spiritwalment. Meta tkellem dwar it-​tmiem taʼ din is-​sistema dinjija, Ġesù qal: “Ibqgħu mqajmin u itolbu bil-​ħerqa l-​ħin kollu biex jirnexxilkom taħarbu minn dak kollu li għandu jseħħ u tieqfu quddiem Bin il-​bniedem.” (Luqa 21:​34-36) Innota li Ġesù uża l-​frażi “itolbu bil-​ħerqa.” Ġesù kien jaf li kien hemm ir-​riskju li l-​ħajja eterna tintilef f’dan iż-​żmien kritiku. Jirrifletti t-​talb tiegħek ix-​xewqa kbira li għandek biex tibqaʼ mqajjem għalkollox spiritwalment?

Ejja ma ninsewx li l-​iktar parti perikoluża mill-​vjaġġ lejn il-​wirt tagħna tistaʼ tkun l-​aħħar parti. B’hekk, kemm hu importanti li ma niżvijawx mid-​dawl li jistaʼ jwassalna għas-​salvazzjoni tagħna.

Oqgħod Attent mid-​Dwal Foloz

Lura fiż-​żmien tat-​tbaħħir tal-​bastimenti, kien hemm periklu partikulari minħabba rġiel ħżiena li kienu jippreferu ljieli li fihom il-​qamar ma jkunx jidher u meta l-​baħħara kienu jsibuha diffiċli biex jaraw ix-​xatt. Dawn l-​irġiel kienu jqiegħdu dwal tul kosta perikoluża sabiex iqarrqu bil-​kaptan tal-​bastiment ħalli jbiddel ir-​rotta. Dawk li kienu jiġu mqarrqin kienu jsibu l-​bastiment tagħhom imkisser, it-​tagħbija li kienu qed iġorru misruqa, u kienu jitilfu ħajjithom.

B’mod simili, Satana, l-​“anġlu tad-​dawl” qarrieq, irid jisraq lill-​poplu t’Alla mir-​relazzjoni li għandu Miegħu. Ix-​Xitan jistaʼ juża “appostli foloz” u “ministri tal-​ġustizzja” apostati biex iqarraq b’dawk li m’humiex attenti. (2 Korintin 11:​13-15) Sewwasew bħalma kaptan u ekwipaġġ attenti u taʼ l-​esperjenza x’aktarx li kellhom inqas ċans li jiġu mqarrqin minn dwal foloz, Kristjani “li bl-​użu għandhom is-​sensi tagħhom imħarrġin biex jagħrfu jagħżlu kemm it-​tajjeb u kemm il-​ħażin” ma jiġux żvijati minn dawk li jippromwovu tagħlim falz u filosofiji li jagħmlu l-​ħsara.​—Ebrej 5:14; Rivelazzjoni 2:2.

Il-baħrin kienu jġorru lista tal-​fanali tal-​port li kienu se jiltaqgħu magħhom fir-​rotta li kienu jkunu fuqha. Il-​lista kien ikun fiha l-​karatteristiki taʼ kull fanal tal-​port, inkluż is-​sinjal uniku tiegħu. The World Book Encyclopedia tinnota: “Il-​baħrin jiddeterminaw liema fanal tal-​port qed jaraw​—u b’hekk il-​post fejn qegħdin​—billi josservaw il-​karatteristiki taʼ fanal tal-​port u billi jużaw lista tal-​fanali tal-​port.” B’mod simili, il-​Kelma t’Alla tgħin lil uħud taʼ qalb onesta biex jagħrfu l-​qima vera u lil dawk li qed isegwuha, speċjalment matul dawn l-​aħħar jiem meta Ġeħova għollieha ’l fuq mir-​reliġjon falza. (Isaija 2:​2, 3; Malakija 3:18) Biex juri l-​kuntrast kbir bejn il-​qima vera u dik falza, Isaija 60:​2, 3 jgħid: “Id-​dlamijiet jiksu l-​art, u sħab iswed il-​popli: iżda fuqek jiddi l-​Mulej, u sebħu jfiġġ fuqek. Il-​ġnus għad jimxu fid-​dawl tiegħek, u s-​slaten fid-​dija taʼ sbiħek.”

Hekk kif miljuni minn kull ġens ikomplu jiġu gwidati mid-​dawl taʼ Ġeħova, huma m’humiex se jitilfu l-​fidi tagħhom matul din l-​aħħar parti tal-​vjaġġ tagħhom. Minflok, huma se jbaħħru fis-​sigurtà fl-​aħħar ftit jiem taʼ din is-​sistema dinjija u se jibqgħu deħlin fil-​port kollu paċi tad-​dinja l-​ġdida.

[Nota taʼ taħt]

[Stampa f’paġna 15]

Bħall-​baħrin, il-​Kristjani joqogħdu attenti li ma jiġux imqarrqin minn dwal foloz