X’Inhu l-​Iskop taʼ Ħajtek?

KENNY kellu xogħol maʼ kumpanija tas-​sensarija li kienet sejra tajjeb ħafna, kellu karozza lussuża, u appartament lussuż fi nħawi għonja taʼ belt prinċipali. Bħala wieħed taʼ l-​esperjenza f’li jaqbeż mill-​ajruplani bla ma jiftaħ il-​paraxut mill-​ewwel (skydiving), hu kien iħobb l-​eċċitament li kien iħoss hu u nieżel minn għoli t’eluf taʼ piedi. Ġablu dan sodisfazzjon f’ħajtu? Skond il-​ġurnal The Wall Street, hu jgħid: “Hawn jien, għandi 45 sena, u m’għandix futur taʼ veru . . . Ħajti m’għandha ebda valur.”

Elyn ħadmet iebes biex ikollha suċċess fil-​qasam taʼ l-​iskejzjar fuq is-​silġ. Fl-​aħħar hi rnexxielha ssir popolari. Elyn kellha l-​fama li xtaqet. “Imma fejnu dak il-​ferħ kollu li suppost kelli nħoss?” hi lmentat. “Ħassejtni tassew waħdi. Ix-​xjuħija se tilħaqni, u għalkemm kelli ħafna flus, il-​ħajja se tidher tassew vojta jekk dan hu l-​uniku skop li qatt se jkolli f’ħajti.”

Magħruf sew għas-​sengħa li kellu f’li juża l-​kuluri, Hideo għex għall-​kisbiet artistiċi tiegħu. Hu ma biegħx ix-​xogħol artistiku tiegħu; hu ħass li jekk jagħmel hekk kien se jkun qed jagħmel kompromess fl-​integrità artistika tiegħu. Fl-​età taʼ 98 sena, lejn tmiem ħajtu, Hideo ta bħala donazzjoni l-​maġġorparti mix-​xogħlijiet artistiċi tiegħu lil mużew. Hu ddedika ħajtu għall-​interessi artistiċi. Madankollu, ma kienx sodisfatt, billi ħaseb li qatt ma se jkun kapaċi jipperfezzjona l-​arti tiegħu.

Xi nies iqattgħu ħafna ħin u jużaw riżorsi biex jgħinu lil ħaddieħor. Per eżempju, ikkunsidra wieħed raġel li kellu awtorità kbira fil-​qasam tal-​films f’Hollywood. Bħala viċi president taʼ waħda mill-​akbar kumpaniji tal-​films fl-​Istati Uniti, hu kien jissieħeb maʼ ċelebritajiet u kien jgħix fi nħawi residenzjali lussużi. Meta żar il-​Kambodja fuq vaganza, kien hemm tifla li talbitu l-​flus waqt li kien qed jiekol f’kafetterija ġo Phnom Penh. Hu taha dollaru u flixkun luminata. It-​tifla kienet ferħana. Madankollu, il-​lejl taʼ wara hi reġgħet kienet hemmhekk, qed tittallab. Hu għaraf li kien hemm bżonn iktar minn għajnuna superfiċjali.

Sena wara, dan il-​viċi president iddeċieda li jagħmel bidla fil-​karriera tiegħu​—minn xogħol industrijali tad-​divertiment għal xogħol li jgħin il-​foqra fil-​Kambodja. Hu stabbilixxa skola li tipprovdi akkomodazzjoni, ikel, u edukazzjoni. Madankollu, hu qed jissara kontinwament maʼ l-​emozzjonijiet tiegħu​—ferħ u sodisfazzjon minħabba dak li qed iwettaq, flimkien maʼ disperazzjoni u frustrazzjoni minħabba li jrid jittratta maʼ diversi problemi li l-​ħin kollu jiżdiedu.

L-erbaʼ individwi li semmejna ħasbu li kienu jafu għala kienu qed jgħixu. Xorta waħda, huma ħassew li ħajjithom kienet vojta meta finalment laħqu l-​miri tagħhom li ħadmu iebes għalihom. Int għal xiex qed tgħix? X’jiġi l-​ewwel f’ħajtek? Ċert int li iktar ’il quddiem mhux se jiddispjaċik għall-​mod kif qed tgħix ħajtek illum?