Imita lill-​Iktar Wieħed li Jaf Jagħmel Dixxipli

“Oqogħdu attenti kif tisimgħu.”​—LUQA 8:18.

1, 2. Għala għandek tagħti kas il-​mod kif Ġesù ttratta lin-​nies matul il-​ministeru tiegħu?

ĠESÙ KRISTU kien qed iwettaq l-​irwol tiegħu bħala l-​Għalliem il-​Kbir u l-​iktar wieħed li jaf jagħmel dixxipli meta qal lis-​segwaċi tiegħu: “Oqogħdu attenti kif tisimgħu.” (Luqa 8:​16-18) Dan il-​prinċipju japplika għall-​ministeru tiegħek bħala Kristjan. Jekk tagħti widen għall-​istruzzjoni spiritwali, int se tapplikaha u se tkun proklamatur tas-​Saltna effettiv. M’għandniex xi ngħidu, ma tistax tismaʼ l-​leħen taʼ Ġesù llum, imma tistaʼ taqra dwar dak li qal u għamel, bħalma turina l-​Iskrittura. Din x’turina dwar il-​mod kif Ġesù ttratta lin-​nies matul il-​ministeru tiegħu?

² Ġesù kien predikatur eċċellenti taʼ l-​aħbar tajba u għalliem li jispikka tal-​verità Skritturali. (Luqa 8:1; Ġwanni 8:28) Ix-​xogħol taʼ li nagħmlu dixxipli jinvolvi kemm l-​ippridkar u kemm it-​tagħlim, però xi Kristjani li huma predikaturi taʼ min ifaħħarhom isibuha diffiċli biex jgħallmu lin-​nies b’mod effettiv. Filwaqt li l-​ippridkar jinvolvi x-​xandir taʼ messaġġ, biex wieħed li jagħmel dixxipli jgħallem lin-​nies dwar Ġeħova u l-​iskopijiet tiegħu spiss jirrikjedi li jkollu relazzjoni maʼ l-​individwu. (Mattew 28:​19, 20) Dan jistaʼ jsir billi nimitaw lil Ġesù Kristu, l-​Għalliem il-​Kbir u l-​iktar wieħed li jaf jagħmel dixxipli.​—Ġwanni 13:13.

3. Il-​fatt li timita lil Ġesù jistaʼ jkollu liema effett fuq l-​isforzi tiegħek biex tagħmel dixxipli?

³ Jekk timita l-​metodi taʼ tagħlim taʼ Ġesù, tkun qed issegwi t-​twissija taʼ l-​appostlu Pawlu: “Ibqgħu mexjin bl-​għerf maʼ dawk li huma barra, u użaw il-​ħin bl-​aħjar mod. Ħa jkun kliemkom dejjem kollu ħlewwa, imħawwar bil-​melħ, sabiex tkunu tafu kif għandkom twieġbu lil kulħadd.” (Kolossin 4:​5, 6) Sabiex nimitaw lil Ġesù fix-​xogħol taʼ li nagħmlu dixxipli jirrikjedi sforz, imma dan se jagħmel it-​tagħlim tiegħek effettiv għax se jgħinek ‘twieġeb lil kulħadd’ skond il-​bżonn persunali tiegħu.

Ġesù Inkuraġġixxa lil Oħrajn biex Jitkellmu

4. Għala jistaʼ jingħad li Ġesù kien semmiegħ tajjeb?

⁴ Minn mindu kien tfajjel, Ġesù kellu d-​drawwa li jagħti widen lin-​nies u jinkuraġġihom biex jesprimu l-​opinjonijiet tagħhom. Per eżempju, meta kellu 12-il sena, il-​ġenituri tiegħu sabuh fit-​tempju f’nofs l-​għalliema, “jismagħhom u jistaqsihom.” (Luqa 2:46) Ġesù ma marx it-​tempju biex jimbarazza lill-​għalliema bl-​għarfien tiegħu. Hu mar hemm biex jagħti widen, għalkemm hu staqsa mistoqsijiet ukoll. Kwalità waħda li għamlitu approvat minn Alla u mill-​bnedmin kienet il-​fatt li kien semmiegħ tajjeb.​—Luqa 2:52.

5, 6. Kif nafu li Ġesù ta widen għall-​espressjonijiet taʼ dawk li hu għallem?

⁵ Wara li tgħammed u ġie midluk bħala l-​Messija, Ġesù baqaʼ interessat f’li jagħti widen lin-​nies. Ma ntilifx f’dak li kien qed jgħallem tant li nesa lil dawk li marru jisimgħuh jitkellem. Spiss, hu kien jieqaf, jistaqsi l-​opinjoni tagħhom, u jismaʼ t-​tweġiba tagħhom. (Mattew 16:​13-15) Per eżempju, wara li miet Lazzru, ħu Marta, Ġesù qalilha: “Kulmin qed jgħix u jeżerċita l-​fidi fija ma jmut qatt.” Imbagħad staqsieha: “Temmnu dan?” U Ġesù verament ta widen hekk kif Marta wieġbet: “Iva, Mulej; jien nemmen li int il-​Kristu, l-​Iben t’Alla.” (Ġwanni 11:​26, 27) Min jaf kemm kien sodisfaċenti li jismaʼ lil Marta tesprimi l-​fidi tagħha b’dan il-​mod!

⁶ Meta ħafna dixxipli abbandunaw lil Ġesù, hu kien interessat f’li jismaʼ l-​opinjonijiet taʼ l-​appostli tiegħu. Għalhekk hu staqsa: “Ma tridux tmorru intom ukoll, hux?” Xmun Pietru wieġeb: “Mulej, għand min tridna mmorru? Int għandek il-​kliem tal-​ħajja taʼ dejjem; u aħna emminna u sirna nafu li int il-​Qaddis t’Alla.” (Ġwanni 6:​66-69) Min jaf kemm dan il-​kliem ferraħ lil Ġesù! Espressjoni taʼ fidi simili minn student tal-​Bibbja żgur li se tferrħek.

Ġesù Ta Widen b’Rispett

7. Ħafna Samaritani għala poġġew il-​fidi f’Ġesù?

⁷ Raġuni oħra għala Ġesù kien effettiv f’li jagħmel dixxipli hi li hu kien jimpurtah min-​nies u semagħhom b’rispett. Per eżempju, f’okkażjoni minnhom, Ġesù ta xiehda lil waħda mara Samaritana ħdejn l-​għajn taʼ Ġakobb f’Sikar. Matul din il-​konversazzjoni, Ġesù ma tkellimx hu biss; hu ta widen għal dak li riedet tgħid. Filwaqt li kien qed jismagħha, Ġesù nnota l-​interess tagħha fil-​qima u qalilha li Alla kien qed ifittex lil dawk li kienu se jaqdu Lilu bl-​ispirtu u bil-​verità. Ġesù wera rispett għal din il-​mara u kien interessat fiha, u minħabba f’hekk hi qalet lil oħrajn dwaru, u “ħafna mis-​Samaritani minn dik il-​belt poġġew il-​fidi fih minħabba l-​kelma li xehdet il-​mara.”​—Ġwanni 4:​5-29, 39-42.

8. Il-​fatt li n-​nies in ġenerali jħobbu jagħtu l-​opinjonijiet tagħhom kif jistaʼ jgħinek tibda konversazzjonijiet fil-​ministeru?

⁸ In-​nies ġeneralment jieħdu pjaċir jesprimu l-​opinjonijiet tagħhom. Per eżempju, dawk li kienu jgħixu f’Ateni tal-​qedem kienu jieħdu pjaċir jagħtu l-​opinjoni tagħhom u jisimgħu xi ħaġa ġdida. Dan wassal għall-​priedka effettiva taʼ l-​appostlu Pawlu fl-​Arjopagu f’din il-​belt. (Atti 17:​18-34) Biex tibda konversazzjoni maʼ inkwilin fil-​ministeru tiegħek illum, forsi tistaʼ tgħid, “Qed inżurek għax jien interessat fl-​opinjoni tiegħek dwar [ċertu suġġett].” Agħti widen għall-​ħarsa taʼ l-​individwu, u kkummenta dwarha, jew staqsi mistoqsija dwarha. Imbagħad, b’qalb tajba uri dak li tgħid il-​Bibbja fuq is-​suġġett.

Ġesù Kien Jaf X’Għandu Jgħid

9. Ġesù x’għamel qabel ma ‘fissrilhom dak li kien hemm miktub fuqu fl-​Iskrittura’ lil Kleofa u lil sieħbu?

⁹ Ġesù dejjem kien jaf x’għandu jgħid. Minbarra li kien semmiegħ tajjeb, hu spiss kien konxju taʼ dak li kienu qed jaħsbu n-​nies, u kien jaf eżattament x’għandu jgħid. (Mattew 9:4; 12:​22-30; Luqa 9:​46, 47) Biex nagħtu eżempju: Ftit wara l-​irxoxt taʼ Ġesù, tnejn mid-​dixxipli tiegħu kienu qed jimxu minn Ġerusalemm sa Għemmaws. Ir-​rakkont taʼ l-​Evanġelju jgħid: “Huma u jitkellmu u jiddiskutu, Ġesù nnifsu resaq lejhom u beda miexi magħhom; imma għajnejhom kienu miżmumin biex ma jagħrfuhx. Qalilhom: ‘Fuqiex qed tiddiskutu bejnietkom intom u mexjin?’ U waqfu b’wiċċhom imnikket. Wieħed minnhom, jismu Kleofa, wieġeb u qallu: ‘Int xi barrani li qed tgħix għalik waħdek f’Ġerusalemm, u b’hekk ma tafx x’ġara fiha f’dawn il-​jiem?’ U qalilhom: ‘X’ġara?’” L-​Għalliem il-​Kbir ta widen hekk kif spjegaw li Ġesù n-​Nazzarenu għallem lin-​nies, wettaq mirakli, u ngħata l-​mewt. Issa xi wħud kienu qed jgħidu li kien ġie mqajjem mill-​imwiet. Ġesù ħalla lil Kleofa u lil sieħbu jesprimu lilhom infushom. Imbagħad, spjega dak li riedu jkunu jafu u beda “jfissrilhom dak li kien hemm miktub fuqu fl-​Iskrittura.”​—Luqa 24:​13-27, 32.

10. Kif tistaʼ ssir taf il-​ħarsa reliġjuża taʼ individwu li tiltaqaʼ miegħu fil-​ministeru tiegħek?

¹⁰ Għandek mnejn ma tkun taf xejn dwar il-​ħarsa reliġjuża taʼ xi inkwilin. Sabiex issir taf x’inhi, forsi tistaʼ tgħid li tieħu gost tismaʼ x’jaħsbu n-​nies dwar it-​talb. Imbagħad forsi tistaʼ tistaqsi, “Taħseb li xi ħadd verament jismaʼ t-​talb?” It-​tweġiba tistaʼ tikxef ħafna dwar il-​ħarsa u l-​isfond reliġjuż taʼ l-​individwu. Jekk hu interessat f’affarijiet reliġjużi, forsi tkun tistaʼ ssir taf iktar dwar il-​ħarsa tiegħu billi tistaqsih, “Taħseb li Alla jismaʼ t-​talb kollu, jew forsi hemm xi talb li ma japprovahx?” Mistoqsijiet bħal dawn jistgħu jwasslu għal konversazzjoni informali. Meta jkun xieraq li taqsam ħsieb Skritturali, għandek tagħmel dan bit-​tattika, billi ma tattakkax dak li jemmen l-​individwu. Jekk jieħu pjaċir jismaʼ dak li qed tgħid, għandu mnejn jieħu pjaċir li terġaʼ żżuru. Imma xi ngħidu jekk jistaqsi xi ħaġa li ma tistax twieġeb? Tistaʼ tagħmel ftit riċerka u terġaʼ tmur lura preparat biex tipprovdi ‘raġuni għat-​tama tiegħek, bil-​ħlewwa u b’rispett profond.’​—1 Pietru 3:15.

Ġesù Għallem lil Dawk li Jistħoqqilhom

11. X’se jgħinek issib lil dawk li jistħoqqilhom jiġu mgħallmin?

¹¹ Ir-​raġel perfett Ġesù kellu d-​dixxerniment li għenu jidentifika lil dawk li kien jistħoqqilhom jiġu mgħallmin. Aħna nsibuh ħafna iktar taʼ sfida biex insibu lil dawk ‘li għandhom attitudni xierqa lejn il-​ħajja taʼ dejjem.’ (Atti 13:48) Anki l-​appostli kellhom l-​istess sfida, u Ġesù qalilhom: “F’kull belt jew raħal li tidħlu, fittxu lil min jistħoqqlu.” (Mattew 10:11) Bħall-​appostli taʼ Ġesù, int għandek tfittex lin-​nies li huma lesti li jagħtu widen u jiġu mgħallmin il-​verità tal-​Bibbja. Int tistaʼ ssib lil dawk li jistħoqqilhom billi tismaʼ bir-​reqqa lil dawk kollha li tkellem, billi tinnota l-​attitudni taʼ kull individwu.

12. Kif tistaʼ tkompli tgħin lil persuna interessata?

¹² Wara li titlaq individwu li jkun wera xi interess fil-​messaġġ tas-​Saltna, tagħmel tajjeb jekk tkompli taħseb dwar il-​bżonnijiet spiritwali tiegħu. Jekk tikteb dak li tkun sirt taf wara li tkellimt maʼ xi ħadd dwar l-​aħbar tajba, dan se jgħinek tkompli tgħin lil dak l-​individwu spiritwalment. Matul iż-​żjajjar lura, trid tismaʼ bir-​reqqa biex issir taf iktar dwar it-​twemmin, l-​attitudni, jew iċ-​ċirkustanzi taʼ l-​individwu.

13. X’jistaʼ jgħinek issir taf kif individwu jħossu dwar il-​Bibbja?

¹³ Kif tistaʼ tinkuraġġixxi lin-​nies biex jgħidulek kif iħossuhom dwar il-​Kelma t’Alla? F’xi nħawi, ikun effettiv jekk tistaqsi, “Sibt int li hu diffiċli li tifhem il-​Bibbja?” It-​tweġiba għal din il-​mistoqsija spiss tikxef l-​attitudni taʼ l-​individwu lejn l-​affarijiet spiritwali. Mod ieħor hu li taqra skrittura u tistaqsi, “X’taħseb dwar din?” Bħal Ġesù, int tistaʼ twettaq ħafna fil-​ministeru tiegħek billi tuża mistoqsijiet tajbin. Madankollu, hemm bżonn taʼ twissija.

Ġesù Uża Mistoqsijiet b’Mod Effettiv

14. Mingħajr ma tinterroga lin-​nies, kif tistaʼ turi interess fl-​opinjoni tagħhom?

¹⁴ Uri interess fl-​opinjoni t’oħrajn mingħajr ma ġġegħelhom iħossuhom skomdi. Segwi l-​metodu taʼ Ġesù. Hu ma interrogax lil dak li jkun bla tattika, imma uża mistoqsijiet li jqanqlu l-​ħsieb. Ġesù kien ukoll semmiegħ taʼ qalb tajba li serraħ lil nies sinċieri u ġegħelhom iħossuhom komdi. (Mattew 11:28) Nies taʼ kull xorta ħassewhom komdi biex javviċinawh b’dak li kien qed jinkwetahom. (Marku 1:40; 5:​35, 36; 10:​13, 17, 46, 47) Jekk trid lil individwi jħossuhom komdi jgħidulek dak li jaħsbu dwar il-​Bibbja u dak li tgħallem, trid tevita li tinterrogahom.

15, 16. Kif tistaʼ tinkuraġġixxi lin-​nies jieħdu sehem f’konversazzjonijiet dwar suġġetti reliġjużi?

¹⁵ Minbarra li tuża mistoqsijiet b’mod effettiv, tistaʼ tinkuraġġixxi konversazzjoni billi tgħid xi ħaġa interessanti, u mbagħad tagħti widen għat-​tweġiba tagħhom. Per eżempju, Ġesù qal lil Nikodemu: “Jekk wieħed ma jitwilidx mill-​ġdid, ma jistax jara s-​saltna t’Alla.” (Ġwanni 3:3) Dan il-​kliem tant kien interessanti li Nikodemu ma setax iżomm lura milli jwieġeb u jagħti widen lil Ġesù. (Ġwanni 3:​4-20) Għandek mnejn tkun tistaʼ tibda konversazzjonijiet man-​nies b’mod simili.

¹⁶ Illum, il-​fatt li qed ifiġġu ħafna reliġjonijiet ġodda huwa taʼ interess f’postijiet bħall-​Afrika, l-​Ewropa tal-​Lvant, u l-​Amerika Latina. F’postijiet bħal dawn, spiss tistaʼ tibda konversazzjoni billi tgħid: “Jien spiss naħseb dwar il-​fatt li hawn ħafna reliġjonijiet. Imma nittama li dalwaqt nara nies minn kull ġens magħqudin fil-​qima vera. Tixtieq li tara dan iseħħ?” Billi tgħid xi ħaġa li ma jkunux qed jistennew li jisimgħu dwar it-​tama tiegħek, forsi tkun tistaʼ tinkuraġġixxi lin-​nies jesprimu l-​ħarsa tagħhom. U huwa iktar faċli twieġeb mistoqsija meta jkun hemm il-​possibbiltà taʼ żewġ tweġibiet. (Mattew 17:25) Wara li inkwilin ikun ikkummenta dwar il-​mistoqsija tiegħek, wiġibha int stess bi skrittura jew tnejn. (Isaija 11:9; Sofonija 3:9) Billi tismaʼ bir-​reqqa u tinnota kif l-​individwu jwieġbek, forsi tkun tistaʼ tiddetermina x’għandek tiddiskuti meta tagħmel iż-​żjara lura.

Ġesù Ta Widen lit-​Tfal

17. X’jurina li Ġesù kien interessat fit-​tfal?

¹⁷ Ġesù kien interessat mhux biss fil-​kbar, imma wkoll fiż-​żgħar. Hu kien jaf dwar il-​logħob li kienu jilagħbu t-​tfal u l-​affarijiet li kienu jgħidu. Kultant kien jistieden lit-​tfal biex imorru għandu. (Luqa 7:​31, 32; 18:​15-17) Ħafna tfal kienu jkunu fost il-​folol li kienu jisimgħu lil Ġesù. Meta xi subien żgħar bdew jgħajtu u jfaħħru lill-​Messija, Ġesù nnota dan u wera li l-​Iskrittura kienet bassritu. (Mattew 14:21; 15:38; 21:​15, 16) Illum, ħafna tfal qed isiru dixxipli taʼ Ġesù. Allura kif tistaʼ tgħinhom?

18, 19. Kif tistaʼ tgħin lil uliedek spiritwalment?

¹⁸ Sabiex tgħin lil uliedek spiritwalment, trid tagħtihom widen. Trid tifhem x’ideat forsi għandhom li m’humiex fi qbil mal-​ħsieb taʼ Ġeħova. Ikun għaqli li, jgħid x’jgħid it-​tifel jew it-​tifla tiegħek, l-​ewwel twieġeb b’kumment pożittiv. Imbagħad tistaʼ tuża skritturi adattati biex tgħin lit-​tifel jew it-​tifla tiegħek tifhem kif Ġeħova jqis l-​affarijiet.

¹⁹ Il-​mistoqsijiet jistgħu jgħinuk tikseb il-​ħarsa tat-​tfal. Imma bħall-​kbar, it-​tfal ma jħobbux jiġu interrogati. Minflok ma tgħabbi lil uliedek b’għadd taʼ mistoqsijiet diffiċli, għala ma tagħmilx stqarrija qasira dwarek innifsek? Skond is-​suġġett li tkunu qed tiddiskutu, forsi tistaʼ tgħid li qabel kont tħossok b’ċertu mod u tispjega għala. Imbagħad forsi tistaʼ tistaqsi, “Int tħossok hekk ukoll?” It-​tweġiba tat-​tifel jew it-​tifla tiegħek għandha mnejn twassal għal diskussjoni t’għajnuna u inkuraġġanti mill-​Iskrittura.

Kompli Imita lill-​Iktar Wieħed li Jaf Jagħmel Dixxipli

20, 21. Għala għandek tkun semmiegħ tajjeb fix-​xogħol tiegħek taʼ li tagħmel dixxipli?

²⁰ Jekk qed tiddiskuti xi suġġett maʼ wliedek jew maʼ xi ħadd ieħor, huwa vitali li tkun semmiegħ tajjeb. Tabilħaqq, hija espressjoni taʼ mħabba. Billi tagħti widen, tkun qed turi l-​umiltà, u dak li jkun qed jitkellem ikun qed jintwera rispett u konsiderazzjoni bl-​imħabba. M’għandniex xi ngħidu, li tismaʼ jirrikjedi li toqgħod attent għall-​espressjonijiet tal-​persuna.

²¹ Hekk kif tieħu sehem fil-​ministeru Kristjan, ibqaʼ ismaʼ bir-​reqqa lill-​inkwilini. Jekk tagħti attenzjoni sħiħa għal dak li jgħidu, x’aktarx li se ssir taf liema aspetti tal-​verità tal-​Bibbja se jinteressawhom l-​iktar. Imbagħad stinka biex tgħinhom billi tuża d-​diversi metodi taʼ tagħlim li uża Ġesù. Hekk kif tagħmel dan, se tiġi premjat bil-​ferħ u s-​sodisfazzjon minħabba li tkun qed timita lill-​iktar wieħed li jaf jagħmel dixxipli.

Int Kif Twieġeb?

• Ġesù kif inkuraġġixxa lil oħrajn biex jesprimu l-​ħsibijiet tagħhom?

• Ġesù għala ta widen lil dawk li kien jgħallem?

• Kif tistaʼ tuża l-​mistoqsijiet fil-​ministeru tiegħek?

• X’tistaʼ tagħmel biex tgħin lit-​tfal spiritwalment?

[Stampa f’paġna 28]

Meta tkun qed tippriedka, kun żgur li tagħti widen

[Stampa f’paġna 30]

Aħna nkunu qed nimitaw lil Ġesù meta ngħinu lit-​tfal spiritwalment