L-​Edizzjoni l-​Ġdida għall-​Istudju tat-​Torri taʼ l-​Għassa

IR-​RIVISTA li qed taqra hija l-​ewwel ħarġa taʼ l-​edizzjoni għall-​istudju tat-​Torri taʼ l-​Għassa. Nixtiequ nispjegawlek xi aspetti tad-​dehra l-​ġdida taʼ din ir-​rivista.

L-edizzjoni għall-​istudju hija pubblikata għax-​Xhieda taʼ Ġeħova u għal studenti tal-​Bibbja li qed jagħmlu progress. Se toħroġ darba fix-​xahar u se jkun fiha erbaʼ jew ħames artikli għall-​istudju. L-​iskeda għall-​konsiderazzjoni taʼ dawn l-​artikli għall-​istudju hija stampata fuq il-​qoxra taʼ din ir-​rivista. Kuntrarju għall-​edizzjoni għall-​pubbliku tat-​Torri taʼ l-​Għassa, l-​edizzjoni għall-​istudju mhux se jkollha stampa differenti fuq il-​qoxra taʼ quddiem għal kull ħarġa, ladarba din m’hijiex se tiġi offruta fil-​ministeru taʼ l-​għalqa.

F’paġna 2 taʼ din ir-​rivista se ssib sommarju qasir u tassew utli dwar l-​iskop taʼ kull artiklu għall-​istudju jew serje t’artikli kif ukoll lista taʼ l-​artikli sekondarji. Dawk li jikkonduċu l-​Istudju tat-​Torri taʼ l-​Għassa se jsibu li dan l-​aspett se jkun tassew t’għajnuna huma u jippreparaw għal diskussjoni siewja taʼ l-​artikli fil-​laqgħa tal-​kongregazzjoni.

Se tinnota li l-​artikli għall-​istudju huma ftit iqsar milli kienu qabel. Għalhekk, hemm iktar ħin biex jiġu kunsidrati l-​iskritturi prinċipali matul l-​Istudju tat-​Torri taʼ l-​Għassa. Aħna ninkuraġġuk minn qalbna biex tfittex l-​iskritturi ċitati kollha kull ġimgħa. Qabel xi skritturi ċitati se jkun hemm miktub “Aqra” u għandhom jinqraw u jiġu diskussi matul l-​Istudju tat-​Torri taʼ l-​Għassa. Jistgħu jinqraw xi skritturi oħrajn skond ma jippermetti l-​ħin. F’xi artikli, tistaʼ ssib xi skritturi li qabilhom se jkun hemm miktub “Qabbel.” Ladarba skritturi bħal dawn ma jipprovdux prova diretta għall-​punti prinċipali fil-​paragrafu, ġeneralment m’humiex se jinqraw fil-​laqgħa tal-​kongregazzjoni. Xorta waħda, l-​iskritturi li trid tqabbel fihom iżjed informazzjoni interessanti, jew jistgħu jappoġġaw indirettament il-​punti li jkunu qed jiġu diskussi. Ninkuraġġuk tiċċekkjahom waqt li tkun qed tipprepara għall-​Istudju tat-​Torri taʼ l-​Għassa. Forsi se tkun tistaʼ tirreferi għalihom fil-​kummenti tiegħek.

Ir-rapport taʼ kull sena mhux se jibqaʼ jidher fit-​Torri taʼ l-​Għassa. B’seħħ mill-​2008, se jibda jidher bħala insert fil-​Ministeru tas-​Saltna kif ukoll fil-​Yearbook. Madankollu, bħalma semmejna diġà, l-​edizzjoni għall-​istudju fiha artikli sekondarji. Għalkemm ħafna minn dawn mhux se jiġu diskussi f’laqgħa tal-​kongregazzjoni, int imħeġġeġ li taqrahom bir-​reqqa. Dawn ukoll fihom ikel spiritwali mill-​“ilsir leali u għaqli.”—Mt. 24:45-47.

Finalment, l-​edizzjonijiet għall-​istudju u għall-​pubbliku tat-​Torri taʼ l-​Għassa m’humiex żewġ rivisti differenti. Huma t-​tnejn It-​Torri taʼ l-​Għassa li Jħabbar is-​Saltna taʼ Ġeħova. It-​tnejn li huma għandhom l-​istess paragrafu f’paġna 2 li jispjega l-​iskop tat-​Torri taʼ l-​Għassa. It-​tnejn li huma se jkunu inklużi fil-​volum illegat li joħroġ kull sena. U fl-​artiklu “X’Tiftakar?” se jkun hemm materjal miż-​żewġ edizzjonijiet, u dan se jiġi pubblikat fl-​edizzjoni għall-​istudju.

Mill-1879 ’l hawn, matul żminijiet taʼ gwerra, diffikultajiet ekonomiċi, u persekuzzjoni, It-​Torri taʼ l-​Għassa pproklama lealment veritajiet dwar is-​Saltna t’Alla. Aħna nitolbu li bil-​barka taʼ Ġeħova, se jkompli jwettaq dan l-​iskop bid-​dehra l-​ġdida tiegħu. U nitolbu li Ġeħova jbierek lilek, il-​qarrej, hekk kif tagħmel użu tajjeb mill-​edizzjoni l-​ġdida għall-​istudju tat-​Torri taʼ l-​Għassa.