“Ħu Ħsieb il-​Ministeru li Aċċettajt fil-​Mulej”

“Ħu ħsieb il-​ministeru li aċċettajt fil-​Mulej, u qis li twettqu.”—KOL. 4:17.

1, 2. Liema responsabbiltà għandhom il-​Kristjani lejn l-​umanità?

AĦNA għandna responsabbiltà serja lejn in-​nies li jgħixu madwarna. Id-​deċiżjonijiet li jieħdu issa jiddeterminaw jekk hux se jgħixu jew imutu matul “it-​tribulazzjoni l-​kbira.” (Riv. 7:14) Il-​kittieb imnebbaħ tal-​ktieb tal-​Proverbji qal: “Lil min hu meħud għall-​mewt eħilsu, lil min hu mkaxkar għall-​qatla salvah.” Tabilħaqq kliem sinifikanti! Aħna nistgħu nkunu ħatjin tad-​demm jekk nonqsu milli nerfgħu r-​responsabbiltà taʼ li nwissu lin-​nies dwar l-​għażla li hemm quddiemhom. Fil-​fatt, l-​istess silta tkompli tgħid: “Jekk int tgħid: ‘Ma kontx naf b’dan’; taħseb li Dak, li jiżen il-​qlub, ma jindunax? Dak li jgħasses fuqek, kollox jaf; Hu jrodd lil kulħadd skond għemilu.” Jidher ċar li l-​qaddejja taʼ Ġeħova ma jistgħux jgħidu li ‘ma jafux’ bil-​periklu li qed jiffaċċjaw in-​nies.—Prov. 24:11, 12.

² Ġeħova jqis il-​ħajja bħala li hi taʼ valur. Hu jħeġġeġ lill-​qaddejja tiegħu biex jagħmlu kull sforz ħalli jsalvaw kemm jistaʼ jkun nies. Kull ministru t’Alla għandu jgħid lil oħrajn bil-​messaġġ li jsalva l-​ħajjiet u li jinsab fil-​Kelma t’Alla. L-​inkarigu tagħna hu simili għal dak t’għassies li jxandar twissija meta jara li ġej xi periklu. Aħna ma rridux li d-​demm taʼ dawk fil-​periklu tal-​mewt ikun fuq rasna. (Eżek. 33:1-7) Għalhekk, kemm hu vitali li aħna nipperseveraw fl-​isforzi tagħna biex ‘nippridkaw il-​kelma’!—Aqra t-​2 Timotju 4:1, 2, 5.

3. Liema suġġetti se jiġu diskussi f’dan l-​artiklu u fit-​tnejn taʼ warajh?

³ Dan l-​artiklu se jikkunsidra kif tistaʼ tegħleb ostakli li jistgħu jfixklu l-​ministeru tiegħek li jsalva l-​ħajjiet u kif tistaʼ tgħin numru akbar taʼ nies. L-​artiklu taʼ wara se jeżamina kif tistaʼ tikkultiva l-​arti tat-​tagħlim taʼ veritajiet vitali. It-​tielet artiklu taʼ l-​istudju se jirrapporta ftit mir-​riżultati inkuraġġanti li qed jinkisbu minn proklamaturi tas-​Saltna madwar id-​dinja. Madankollu, qabel ma niddiskutu dawn is-​suġġetti jkun tajjeb li nirrivedu għala ż-​żminijiet tagħna huma tant kritiċi.

Għala Ħafna Huma bla Tama

4, 5. X’qed iġġarrab l-​umanità, u ħafna nies kif jirreaġixxu?

⁴ Il-​ġrajjiet dinjin juru li qed ngħixu fi “tmiem is-​sistema” u li t-​tmiem hu qrib ħafna. L-​umanità qed iġġarrab il-​ġrajjiet u l-​kundizzjonijiet li Ġesù u d-​dixxipli tiegħu qalu li kienu se jikkaratterizzaw “l-​aħħar jiem.” “Uġigħ tal-​ħlas,” inkluż gwerer, nuqqas taʼ ikel, terremoti, u għawġ ieħor, inikket lill-​umanità. Attitudnijiet taʼ wħud li ma jħarsux il-​liġi, li huma egoisti, u li jiċħdu lil Alla jinsabu kullimkien. Anki għal dawk li jistinkaw biex jgħixu fi qbil mal-​livelli tal-​Bibbja, dawn huma “żminijiet kritiċi li diffiċli biex issib tarfhom.”—Mt. 24:3, 6-8, 12; 2 Tim. 3:1-5.

⁵ Madankollu, il-​maġġuranza taʼ l-​umanità m’hijiex konxja tas-​sinifikat veru tal-​ġrajjiet dinjin. B’riżultat taʼ dan, ħafna huma ansjużi dwar is-​sigurtà tagħhom u dik tal-​familja tagħhom. It-​telfa taʼ xi maħbubin fil-​mewt jew traġedji persunali oħrajn iħallu lil ħafna nies imnikktin. Mingħajr għarfien eżatt dwar għala jseħħu affarijiet bħal dawn u fejn tistaʼ tinstab is-​soluzzjoni, dawn in-​nies huma bla tama.—Efes. 2:12.

6. “Babilonja l-​Kbira” għala ma kinitx kapaċi tgħin lis-​segwaċi tagħha?

⁶ “Babilonja l-​Kbira,” l-​imperu dinji tar-​reliġjon falza, ftit li xejn ġabet faraġ lill-​umanità. Għall-​kuntrarju, permezz taʼ “l-​inbid taż-​żína tagħha,” hi ħawdet lil ħafna nies dwar kif jistaʼ jkollhom relazzjoni m’Alla. Iktar minn hekk, minħabba li taġixxi bħal mara żienja, ir-​reliġjon falza qarrqet u kkontrollat lis-​“slaten taʼ l-​art” permezz taʼ duttrini foloz u prattiki spiritistiċi biex iżżomm il-​maġġuranza taʼ l-​umanità jaqdu lill-​gvernijiet tagħhom mingħajr ebda reżistenza. B’hekk, ir-​reliġjon falza kisbet kontroll u influwenza, imma fl-​istess ħin abbandunat kompletament il-​verità reliġjuża.—Riv. 17:1, 2, 5; 18:23.

7. Liema prospett hemm quddiem il-​maġġuranza tal-​bnedmin, imma xi wħud kif jistgħu jiġu megħjunin?

⁷ Ġesù għallem li l-​maġġuranza tal-​bnedmin qed jivvjaġġaw f’dik li hu sejħilha t-​triq spazjuża li tieħu għall-​qerda. (Mt. 7:13, 14) Xi individwi jinsabu f’din it-​triq għax minn jeddhom għażlu li jiċħdu dak li tgħallem il-​Bibbja, imma ħafna oħrajn jinsabu fiha għaliex ġew imqarrqin, jew tħallew fid-​dlam, dwar dak li Ġeħova verament jirrikjedi minnhom. Forsi xi wħud ikunu lesti li jbiddlu ħajjithom li kieku jingħataw raġunijiet Skritturali ċari għala għandhom jagħmlu dan. Imma dawk li jibqgħu f’Babilonja l-​Kbira u li jkomplu jiċħdu l-​livelli tal-​Bibbja m’humiex se jiġu salvati “mit-​tribulazzjoni l-​kbira.”—Riv. 7:14.

Ibqaʼ Ppriedka “bla Heda”

8, 9. Il-​Kristjani taʼ l-​ewwel seklu kif irreaġixxew meta ffaċċjaw l-​oppożizzjoni, u għala?

⁸ Ġesù qal li d-​dixxipli tiegħu kienu se jippridkaw l-​aħbar tajba tas-​Saltna u jagħmlu dixxipli. (Mt. 28:19, 20) Għalhekk, il-​Kristjani veri dejjem qiesu sehemhom fix-​xogħol taʼ l-​ippridkar bħala kwistjoni taʼ lealtà lejn Alla u ħtieġa fundamentali għall-​fidi tagħhom. Minħabba f’hekk, is-​segwaċi tal-​bidu taʼ Ġesù pperseveraw anki meta ffaċċjaw l-​oppożizzjoni. Huma straħu fuq Ġeħova għas-​saħħa, billi talbu li hu jgħinhom ikomplu “jitkellmu l-​kelma [tiegħu] bil-​qlubija kollha.” Ġeħova wiġibhom billi mliehom bl-​ispirtu qaddis, u huma tkellmu l-​kelma t’Alla bil-​qlubija.—Atti 4:18, 29.

⁹ Meta l-​oppożizzjoni saret vjolenti, waqfu s-​segwaċi taʼ Ġesù milli jippridkaw? Lanqas xejn. Irrabjati minħabba l-​ippridkar taʼ l-​appostli, il-​mexxejja reliġjużi Lhud arrestaw lill-​appostli, heddewhom, u sawtuhom. Madankollu, huma “baqgħu jgħallmu u jxandru bla heda l-​aħbar tajba dwar il-​Kristu, Ġesù.” Huma raw biċ-​ċar li kellhom ‘jobdu lil Alla bħala ħakkiem u mhux lill-​bnedmin.’—Atti 5:28, 29, 40-42.

10. Il-​Kristjani llum liema sfidi jiffaċċjaw, però x’jistaʼ jirriżulta mill-​kondotta tajba tagħhom?

¹⁰ Il-​biċċa l-​kbira mill-​qaddejja t’Alla llum ma kellhomx jissaportu swat jew ħabs minħabba l-​attivitajiet tagħhom taʼ l-​ippridkar. Madankollu, il-​Kristjani veri kollha jiffaċċjaw diversi provi. Per eżempju, il-​kuxjenza tiegħek imħarrġa minn fuq il-​Bibbja forsi tirrikjedi minnek li tmur kontra l-​kurrent jew li ġġiegħlek tispikka bħala li int differenti. Il-​kollegi, il-​ħbieb taʼ l-​iskola, jew il-​ġirien, forsi jaħsbu li int stramb għax tibbaża d-​deċiżjonijiet tiegħek fuq prinċipji Bibliċi. Minkejja dan, ir-​reazzjoni negattiva tagħhom m’għandhiex tiskuraġġik. Id-​dinja tinsab fi dlam spiritwali, imma l-​Kristjani għandhom “[jiddu] bħala dawwala.” (Flp. 2:15) Forsi xi osservaturi sinċieri jaraw u japprezzaw l-​għemejjel mill-​aqwa tiegħek u minħabba f’hekk jagħtu glorja lil Ġeħova.—Aqra Mattew 5:16.

11. (a) Xi wħud kif għandhom mnejn jirreaġixxu għax-​xogħol taʼ l-​ippridkar? (b) Liema tip t’oppożizzjoni ffaċċja l-​appostlu Pawlu, u kif irreaġixxa għaliha?

¹¹ Hemm bżonn il-​kuraġġ biex il-​messaġġ tas-​Saltna jibqaʼ jiġi pridkat. Xi wħud, saħansitra qraba, għandhom mnejn iwaqqgħuk għaċ-​ċajt jew b’xi mod ieħor jipprovaw jiskuraġġuk. (Mt. 10:36) L-​appostlu Pawlu ġie msawwat fiżikament iktar minn darba minħabba li wettaq il-​ministeru tiegħu lealment. Innota kif irreaġixxa għal din l-​oppożizzjoni: “Wara li sofrejna u konna mżebilħin,” hu kiteb, “għamilna l-​qalb permezz t’Alla tagħna biex ngħidulkom l-​aħbar tajba t’Alla b’taħbit kbir.” (1 Tess. 2:2) Żgur li kien taʼ sfida għal Pawlu li jibqaʼ jitkellem l-​aħbar tajba wara li kien ġie maħtuf, imneżżaʼ, imsawwat bil-​bsaten, u mitfugħ il-​ħabs. (Atti 16:19-24) X’tah il-​kuraġġ biex ikompli? Ix-​xewqa kbira li kellu biex iwettaq l-​inkarigu tiegħu taʼ ppridkar mogħti minn Alla.—1 Kor. 9:16.

12, 13. Liema sfidi jiffaċċjaw xi wħud, u kif ipprovaw jegħlbuhom?

¹² Jistaʼ jkun taʼ sfida wkoll li nżommu ż-​żelu tagħna f’territorji fejn in-​nies rari jkunu d-​dar jew fejn ftit li xejn hemm interess fil-​messaġġ tas-​Saltna. X’nistgħu nagħmlu f’ċirkustanzi bħal dawn? Forsi jkun neċessarju li nagħmlu iktar kuraġġ u nitkellmu man-​nies f’sitwazzjonijiet iktar informali. Forsi jkollna wkoll naġġustaw l-​iskeda tagħna jew niffokaw l-​isforzi tagħna fuq l-​ippridkar f’postijiet fejn nistgħu nilħqu iktar nies.—Qabbel Ġwanni 4:7-15; Atti 16:13; 17:17.

¹³ Diffikultajiet oħrajn li ħafna jkollhom jiffaċċjaw huma l-​età avanzata u s-​saħħa batuta li jistgħu jillimitaw dak li dawn l-​uħud jistgħu jagħmlu b’mod raġunevoli fix-​xogħol taʼ l-​ippridkar. Jekk dan hu minnu fil-​każ tiegħek, taqtax qalbek. Ġeħova jaf sew il-​limitazzjonijiet tiegħek u japprezza dak li tistaʼ tagħmel. (Aqra t-​2 Korintin 8:12.) Minkejja t-​tip t’avversità li forsi qed tiffaċċja—l-​oppożizzjoni, l-​apatija, jew is-​saħħa batuta—agħmel dak kollu li tistaʼ sakemm jippermettu ċ-​ċirkustanzi tiegħek sabiex taqsam l-​aħbar tajba m’oħrajn.—Prov. 3:27; qabbel Marku 12:41-44.

‘Ħu Ħsieb il-​Ministeru Tiegħek’

14. Liema eżempju ħalla l-​appostlu Pawlu għal Kristjani sħabu, u liema parir ta?

¹⁴ L-​appostlu Pawlu wettaq il-​ministeru tiegħu bis-​serjetà, u hu inkuraġġixxa lil sħabu fit-​twemmin biex jagħmlu l-​istess. (Atti 20:20, 21; 1 Kor. 11:1) Individwu wieħed li Pawlu għażel għal inkuraġġiment speċjali kien Kristjan fl-​ewwel seklu jismu Arkippu. Fl-​ittra tiegħu lill-​Kolossin, Pawlu kiteb: “Għidu lil Arkippu: ‘Ħu ħsieb il-​ministeru li aċċettajt fil-​Mulej, u qis li twettqu.’” (Kol. 4:17) Aħna ma nafux min kien Arkippu jew x’kienu ċ-​ċirkustanzi tiegħu, imma milli jidher hu kien aċċetta xi tip taʼ ministeru. Jekk int Kristjan dedikat, int ukoll aċċettajt ministeru. Qiegħed int tħares il-​ministeru tiegħek sabiex twettqu?

15. Id-​dedikazzjoni Kristjana x’tinvolvi, u dan iwassal għal liema mistoqsijiet?

¹⁵ Qabel il-​magħmudija tagħna, aħna ddedikajna ħajjitna lil Ġeħova permezz taʼ talb mill-​qalb. Dan kien ifisser li aħna konna determinati li nagħmlu r-​rieda tiegħu. Allura nagħmlu tajjeb jekk issa nistaqsu lilna nfusna, ‘Huwa l-​fatt li nagħmel ir-​rieda t’Alla verament l-​iktar ħaġa importanti f’ħajti?’ Jistaʼ jkollna diversi responsabbiltajiet li Ġeħova jistenna li nieħdu ħsiebhom—bħal per eżempju li nipprovdu għall-​familja tagħna. (1 Tim. 5:8) Imma kif nużaw il-​kumplament tal-​ħin u l-​enerġija tagħna? X’inhi l-​prijorità f’ħajjitna?—Aqra t-​2 Korintin 5:14, 15.

16, 17. Liema possibbiltajiet jistgħu jikkunsidraw Kristjani żgħażagħ jew dawk li għandhom ftit responsabbiltajiet?

¹⁶ Int żagħżugħ Kristjan dedikat li spiċċajt jew li dalwaqt se tispiċċa l-​edukazzjoni skolastika meħtieġa? X’aktarx li għad m’għandekx responsabbiltajiet kbar tal-​familja. Allura, x’bi ħsiebek tagħmel b’ħajtek? Liema deċiżjonijiet se jgħinuk l-​aħjar biex twettaq il-​wegħda tiegħek li tagħmel ir-​rieda taʼ Ġeħova? Ħafna rranġaw l-​affarijiet tagħhom sabiex ikunu jistgħu jagħmlu x-​xogħol taʼ pijunier, u huma kisbu ferħ u sodisfazzjon kbir minħabba dan.—Salm 110:3, Saydon; Koħ. 12:1.

¹⁷ Forsi int adult żagħżugħ b’xogħol sekulari full-time u bi ftit responsabbiltajiet ħlief li tieħu ħsieb tiegħek innifsek. Mingħajr dubju int tieħu pjaċir tieħu sehem f’attivitajiet tal-​kongregazzjoni sakemm tippermetti l-​iskeda tiegħek. Tistaʼ forsi tgawdi ferħ saħansitra akbar? Ħsibt dwar jekk tistax tkabbar is-​sehem tiegħek fil-​ministeru? (Salm 34:9 [34:8, NW]; Prov. 10:22) F’xi territorji, għad hemm ħafna xogħol xi jsir biex jintlaħaq kulħadd bil-​messaġġ tal-​verità li jsalva l-​ħajjiet. Tistaʼ tagħmel aġġustamenti f’ħajtek, biex forsi tkun tistaʼ taqdi f’post fejn il-​bżonn taʼ proklamaturi tas-​Saltna huwa akbar?—Aqra l-​1 Timotju 6:6-8.

18. Liema aġġustamenti għamlet koppja waħda, u x’riżultati kellhom?

¹⁸ Ikkunsidra l-​eżempju taʼ Kevin u Elena, mill-​Istati Uniti.a Bħal miżżewġin friski oħrajn fl-​inħawi tagħhom, huma ħassew li kellhom jixtru dar. It-​tnejn kienu jaħdmu full-time, u għalhekk setgħu jgħixu ħajja komda. Madankollu, ix-​xogħol sekulari tagħhom u x-​xogħol tad-​dar ma tantx ħallielhom ħin għas-​servizz taʼ l-​għalqa. Huma rrealizzaw li kienu qed jiddedikaw kważi l-​ħin u l-​enerġija kollha tagħhom għall-​affarijiet materjali. Madankollu, meta osservaw il-​ħajja sempliċi taʼ koppja ferħana li kienu qed jaqdu bħala pijunieri, Kevin u Elena kienu jafu li kien possibbli għalihom li jbiddlu l-​prijorità taʼ ħajjithom. Wara li talbu għad-​direzzjoni taʼ Ġeħova, huma biegħu d-​dar tagħhom u marru jgħixu f’appartament. Elena naqqset is-​sigħat li kienet tqattaʼ fix-​xogħol sekulari u saret pijuniera. Inkuraġġit mill-​esperjenzi li bdiet tgawdi martu, Kevin telaq mix-​xogħol full-time tiegħu u beda jaqdi bħala pijunier. Xi żmien wara, marru jgħixu f’pajjiż fl-​Amerika t’Isfel biex jaqdu fejn il-​bżonn taʼ predikaturi tas-​Saltna huwa kbir. “Minn dejjem kellna żwieġ hieni,” jgħid Kevin, “imma meta ħdimna biex nilħqu miri spiritwali, l-​hena tagħna kien taʼ sodisfazzjon akbar.”—Aqra Mattew 6:19-22.

19, 20. L-​ippridkar taʼ l-​aħbar tajba għala huwa l-​iktar xogħol importanti llum?

¹⁹ Illum l-​ippridkar taʼ l-​aħbar tajba huwa l-​iktar xogħol importanti li qed iseħħ fuq l-​art. (Riv. 14:6, 7) Dan jikkontribwixxi għat-​taqdis taʼ l-​isem taʼ Ġeħova. (Mt. 6:9) Il-​messaġġ tal-​Bibbja jtejjeb il-​ħajjiet tal-​ħafna eluf li jħaddnuh kull sena, u dan jistaʼ jwassal għas-​salvazzjoni tagħhom. Madankollu, “kif se jisimgħu jekk xi ħadd ma jippridkax?” staqsa l-​appostlu Pawlu. (Rum. 10:14, 15) Tabilħaqq, kif? Għala ma tkunx determinat li tagħmel dak kollu li tistaʼ biex twettaq il-​ministeru tiegħek?

²⁰ Mod ieħor kif tistaʼ tgħin lin-​nies jifhmu l-​importanza taʼ dawn iż-​żminijiet kritiċi u l-​konsegwenzi tad-​deċiżjonijiet li jieħdu hu billi ttejjeb l-​abbiltà tiegħek tat-​tagħlim. L-​artiklu li jmiss se jiddiskuti kif tistaʼ tagħmel dan.

[Nota taʼ taħt]

Int Kif Twieġeb?

• Liema responsabbiltà għandhom il-​Kristjani lejn l-​umanità?

• Kif għandna nkampaw m’ostakli fix-​xogħol taʼ l-​ippridkar tagħna?

• Kif nistgħu nwettqu l-​ministeru li aċċettajna?

[Stampa f’paġna 5]

Il-​kuraġġ huwa bżonnjuż sabiex nippridkaw meta niffaċċjaw l-​oppożizzjoni

[Stampa f’paġna 7]

X’tistaʼ tagħmel jekk tippriedka f’territorji fejn in-​nies rari jkunu d-​dar?