Negħlbu l-​Isfidi tal-​Ministeru Minn Dar Għal Dar

“Għamilna l-​qalb permezz t’Alla tagħna biex ngħidulkom l-​aħbar tajba t’Alla b’taħbit kbir.”—1 TESS. 2:2.

1. Ġeremija liema sfidi ffaċċja, u kif irnexxielu jegħlibhom?

ĠEREMIJA kien bniedem b’sentimenti bħal tagħna. Meta Ġeħova qallu dwar l-​inkarigu biex ikun “profeta fuq il-​ġnus,” hu għajjat: “Ah, Sidi Mulej, ma nafx nitkellem, għadni żgħir.” Minkejja dan, billi kellu fiduċja f’Ġeħova, hu aċċetta l-​inkarigu. (Ġer. 1:4-10) Għal iktar minn 40 sena, Ġeremija tqabad kontra li jiġi mwarrab, l-​apatija, it-​twaqqigħ għaċ-​ċajt, u saħansitra l-​vjolenza fiżika. (Ġer. 20:1, 2) Kultant, ħassu qalbu maqtugħa. Madankollu, hu baqaʼ jiddikjara messaġġ li ma kienx popolari lil nies li l-​biċċa l-​kbira minnhom ma tawx kas. Bis-​saħħa t’Alla, Ġeremija wettaq dak li qatt ma setaʼ jwettaq waħdu.—Aqra Ġeremija 20:7-9.

2, 3. Il-​qaddejja t’Alla llum kif jiffaċċjaw sfidi bħal dawk taʼ Ġeremija?

² Ħafna mill-​qaddejja t’Alla llum jistgħu jifhmu għala Ġeremija ħassu hekk. Meta ħsibna dwar il-​prospett li nippridkaw minn dar għal dar, uħud minna konna nirraġunaw, ‘Din hi xi ħaġa li qatt m’hu se jirnexxili nagħmilha.’ Però, meta rrealizzajna li kienet ir-​rieda taʼ Ġeħova li nipproklamaw l-​aħbar tajba, għelibna l-​biżaʼ tagħna u ħabrikna fl-​ippridkar. Minkejja dan, ħafna minna ffaċċjajna ċirkustanzi f’ħajjitna li għamluha diffiċli, minn taʼ l-​inqas għal xi żmien, biex inkomplu nippridkaw. Bla dubju huwa taʼ sfida li nibdew nippridkaw minn dar għal dar u li nibqgħu nippridkaw sa l-​aħħarnett.—Mt. 24:13.

³ Xi ngħidu jekk ilek ftit tistudja l-​Bibbja max-​Xhieda taʼ Ġeħova u tattendi l-​laqgħat tal-​kongregazzjoni imma qed iżżomm lura milli tibda tippriedka minn dar għal dar? Jew xi ngħidu jekk int Xhud mgħammed li ssibha diffiċli biex tieħu sehem fix-​xogħol minn bieb għal bieb, avolja int tistaʼ tagħmel dan fiżikament? Kun ċert li nies minn kull qasam tal-​ħajja qed jirnexxilhom jegħlbu l-​istess sfidi fil-​ministeru minn dar għal dar. Bl-​għajnuna taʼ Ġeħova, int ukoll tistaʼ tegħlibhom.

Nagħmlu l-​Qalb

4. X’għen lill-​appostlu Pawlu jxandar l-​aħbar tajba bil-​qlubija?

⁴ Int bla dubju tirrikonoxxi li x-​xogħol taʼ l-​ippridkar madwar id-​dinja qed jitwettaq bl-​ispirtu t’Alla u mhux bil-​qawwa jew l-​għerf uman. (Żak. 4:6) Dan huwa minnu wkoll fil-​każ tal-​ministeru taʼ Kristjani individwali. (2 Kor. 4:7) Ikkunsidra l-​appostlu Pawlu. Hekk kif ftakar fi żmien meta hu u l-​missjunarji sħabu ġew trattati ħażin minn xi opponenti, hu kiteb: “Wara li sofrejna u konna mżebilħin f’Filippi, . . . għamilna l-​qalb permezz t’Alla tagħna biex ngħidulkom l-​aħbar tajba t’Alla b’taħbit kbir.” (1 Tess. 2:2; Atti 16:22-24) Nistgħu nsibuha diffiċli biex nimmaġinaw li predikatur żeluż bħal Pawlu xi drabi sabha diffiċli biex jippriedka. Madankollu, bħalna lkoll, Pawlu kellu jistrieħ fuq Ġeħova sabiex ixandar l-​aħbar tajba bil-​qlubija. (Aqra Efesin 6:18-20.) Kif nistgħu nimitaw l-​eżempju taʼ Pawlu?

5. Liema hu mod wieħed kif nistgħu nagħmlu l-​qalb biex nippridkaw?

⁵ Mod wieħed kif nagħmlu l-​qalb biex nippridkaw huwa permezz tat-​talb. Waħda pijuniera qalet: “Jien nitlob biex inkun kunfidenti meta nitkellem, nilħaq qalb in-​nies, u nsib il-​ferħ fil-​ministeru. Wara kollox, dan hu x-​xogħol taʼ Ġeħova, mhux tagħna, allura ma nistgħu nagħmlu xejn mingħajr l-​għajnuna tiegħu.” (1 Tess. 5:17) Ilkoll kemm aħna rridu nitolbu kontinwament għall-​għajnuna taʼ l-​ispirtu qaddis t’Alla biex nippridkaw bil-​qlubija.—Lq. 11:9-13.

6, 7. (a) Liema viżjoni rċieva Eżekjel, u x’kienet tfisser? (b) Liema lezzjoni tipprovdi l-​viżjoni t’Eżekjel għall-​qaddejja t’Alla llum?

⁶ Il-​ktieb t’Eżekjel jikxef xi ħaġa oħra li tistaʼ tgħinna nitkellmu bil-​qlubija. F’viżjoni, Ġeħova ta romblu lil Eżekjel, u fuq iż-​żewġ naħat tiegħu kellu miktub “tnehid u biki u ħsara” u qallu biex jieklu, billi qal: “Bniedem, ħa jibilgħu l-​istonku tiegħek, u jimtela l-​ġewwieni tiegħek b’dan il-​ktieb li qiegħed nagħtik.” X’kienet tfisser din il-​viżjoni? Eżekjel kellu jassorbi bis-​sħiħ il-​messaġġ li kien se jwassal. Dan kellu jsir parti minnu, biex ngħidu hekk, billi jeffettwa l-​iktar sentimenti ġewwinin tiegħu. Il-​profeta jkompli jirrakkonta: “Jien kiltu, u f’ħalqi ħassejtu ħelu għasel.” Għal Eżekjel, li jiddikjara l-​messaġġ t’Alla fil-​pubbliku kien taʼ pjaċir—bħallikieku qed jiekol l-​għasel. Hu ħassu privileġġat bil-​kbir li jirrappreżenta lil Ġeħova u jwettaq dan l-​inkarigu mogħti minn Alla, avolja dan kien ifisser li jagħti messaġġ qawwi lil nies li ma ridux jagħtu kas.—Aqra Eżekjel 2:8–3:4, 7-9.

⁷ Din il-​viżjoni fiha lezzjoni imprezzabbli għall-​qaddejja t’Alla llum. Aħna wkoll għandna messaġġ qawwi x’nagħtu lil nies li mhux dejjem japprezzaw l-​isforzi tagħna. Sabiex aħna nkomplu nikkunsidraw il-​ministeru Kristjan bħala privileġġ mogħti minn Alla, irridu nkunu mitmugħin sew spiritwalment. Drawwiet taʼ studju superfiċjali jew irregulari m’humiex biżżejjed biex jgħinuna nassorbu bis-​sħiħ il-​Kelma t’Alla. Tistaʼ int ittejjeb il-​kwalità jew ir-​regolarità tal-​qari u l-​istudju persunali tiegħek tal-​Bibbja? Tistaʼ timmedita iktar spiss dwar dak li taqra?—Salm 1:2, 3.

Nibdew Diskussjonijiet Minn fuq il-​Bibbja

8. Liema metodu għen lil xi pubblikaturi tas-​Saltna biex jibdew diskussjonijiet minn fuq il-​Bibbja fil-​ministeru minn dar għal dar?

⁸ Għal ħafna pubblikaturi, l-​iktar ħaġa diffiċli mill-​ministeru minn dar għal dar hija kif se jibdew il-​konversazzjoni maʼ l-​inkwilin. M’għandniex xi ngħidu, f’xi territorji hija sfida biex tibda konversazzjonijiet. Xi pubblikaturi jħossuhom iktar komdi meta jitkellmu man-​nies fil-​bieb jekk jibdew il-​preżentazzjoni tagħhom bi ftit kliem magħżul bl-​għaqal u mbagħad joffru xi fuljett lill-​inkwilin, kif inhu indikat fil-​kaxxa. It-​titlu tal-​fuljett jew l-​istampa kulurita tiegħu tistaʼ tiġbed l-​attenzjoni taʼ l-​inkwilin, u b’hekk inkunu nistgħu nsemmu fil-​qosor l-​iskop taż-​żjara tagħna u nqajmu xi mistoqsija. Mod ieħor kif nistgħu nibdew il-​konversazzjoni hu billi nuru lill-​inkwilin xi tlieta jew erbaʼ fuljetti differenti u ngħidulu jagħżel wieħed li jinteressa lilu. M’għandniex xi ngħidu, il-​mira tagħna mhix li sempliċement inħallu l-​fuljetti jew li nużawhom f’kull bieb, imma li nibdew diskussjonijiet minn fuq il-​Bibbja li jwasslu għal studji tal-​Bibbja.

9. Għala hu importanti li nippreparaw sew?

⁹ Tuża liema metodu tuża, preparazzjoni tajba se tgħinek tkun kunfidenti u żeluż fil-​ministeru minn dar għal dar. Wieħed pijunier osserva: “Nesperjenza iktar ferħ jekk inkun preparat tajjeb. Jgħinni nkun irrid nuża l-​preżentazzjoni li nkun ippreparajt.” Pijunier ieħor qal, “Meta nkun familjari mal-​pubblikazzjonijiet li nkun se noffri, ikolli iktar żelu biex nużahom.” Filwaqt li hu taʼ benefiċċju li tirrivedi dak li tkun se tgħid f’qalbek, ħafna jsibuha iktar t’għajnuna li jipprattikaw il-​preżentazzjoni tagħhom b’leħen għoli. Il-​fatt li jagħmlu hekk jgħinhom jagħtu l-​aħjar tagħhom lil Ġeħova.—Kol. 3:23; 2 Tim. 2:15.

10. X’jistaʼ jsir biex il-​laqgħat għas-​servizz taʼ l-​għalqa jkunu prattiċi u taʼ benefiċċju?

¹⁰ Laqgħat prattiċi għas-​servizz taʼ l-​għalqa jgħinuna biex inkunu iktar effettivi u nsibu ferħ akbar fil-​ministeru minn dar għal dar. Jekk l-​iskrittura tal-​jum għandha x’taqsam direttament maʼ l-​attività taʼ l-​ippridkar, tistaʼ tinqara u tiġi diskussa fil-​qosor. Madankollu, il-​ħu li jikkonduċi l-​laqgħa għas-​servizz taʼ l-​għalqa għandu jieħu biżżejjed ħin biex jiddiskuti jew iħejji turija taʼ preżentazzjoni sempliċi li hija adattata għat-​territorju jew jikkunsidra informazzjoni oħra li hija prattika u li tistaʼ tintuża fil-​ministeru dakinhar. Dan se jkompli jgħin lil dawk li huma preżenti biex jagħtu xiehda effettiva. Bi preparazzjoni tajba minn qabel, anzjani u oħrajn li jikkonduċu dawn il-​laqgħat jistgħu jwettqu dan u xorta jikkonkludu fil-​ħin.—Rum. 12:8.

Il-​Qawwa taʼ li Nisimgħu

11, 12. Il-​fatt li nisimgħu b’mogħdrija kif jistaʼ jgħinna nilħqu qalb in-​nies bl-​aħbar tajba? Agħti xi eżempji.

¹¹ M’hijiex biss il-​preparazzjoni tajba imma l-​interess persunali profond f’oħrajn li jgħinna nibdew diskussjonijiet minn fuq il-​Bibbja u nilħqu qalb in-​nies fil-​ministeru. Mod wieħed kif nuru dan l-​interess hu bil-​mod kif nisimgħu. Indokratur li jivvjaġġa osserva: “Il-​paċenzja u l-​fatt li turi li int lest tismaʼ għandhom qawwa taʼ l-​għaġeb biex jiġbdu lin-​nies lejn il-​verità, u dan huwa mod kif turi interess persunali ġenwin fihom.” Li nisimgħu b’mogħdrija jistaʼ jkun il-​muftieħ biex l-​inkwilin jiftaħ qalbu, bħalma se turi l-​esperjenza li se nikkunsidraw.

¹² F’ittra pubblikata fil-​gazzetta Le Progrès, taʼ Saint-Étienne, fi Franza, waħda mara ddeskriviet iż-​żjara taʼ żewġ persuni li ħabbtulha l-​bieb ftit wara li mititilha t-​tifla tagħha li kellha tliet xhur. “Mill-​ewwel indunajt li kienu x-​Xhieda taʼ Ġeħova,” kitbet hi. “Kont lesta biex bl-​edukazzjoni kollha ngħidilhom li m’iniex interessata, imma mbagħad innotajt il-​browxer li kienu qed joffru. Kien dwar għala Alla jippermetti s-​sofferenza. Għalhekk, stidinthom ġewwa bl-​iskop li nwaqqaʼ l-​argumenti tagħhom. . . . Ix-​Xhieda damu ftit iktar minn siegħa. Semgħuni b’mogħdrija kbira, u x’ħin kienu se jitilqu, tant ħassejtni aħjar li aċċettajt li jerġgħu jiġu jżuruni.” (Rum. 12:15) Maż-​żmien, din il-​mara aċċettat studju tal-​Bibbja. Huwa interessanti li dak li tiftakar dwar l-​ewwel żjara kien il-​mod kif l-​aħwa nisa semgħuha u mhux dak li qalu.

13. Kif nistgħu nadattaw il-​preżentazzjoni tagħna taʼ l-​aħbar tajba għall-​individwi li niltaqgħu magħhom?

¹³ Meta nisimgħu b’mogħdrija, inkunu fil-​fatt qed inħallu lin-​nies jgħidulna għala għandhom bżonn is-​Saltna. B’hekk, inkunu f’pożizzjoni ħafna aħjar biex naqsmu l-​aħbar tajba magħhom. X’aktarx li int osservajt li evanġelizzaturi effettivi ġeneralment huma semmiegħa tas-​sengħa. (Prov. 20:5) Huma juru interess ġenwin fin-​nies li jiltaqgħu magħhom fil-​ministeru. Huma jieħdu nota mhux biss taʼ isimhom u l-​indirizz tagħhom imma wkoll taʼ l-​interessi u l-​bżonnijiet tagħhom. Meta xi ħadd jesprimi li qed tinkwetah xi ħaġa partikulari, huma jagħmlu riċerka u ma jdumux ma jirritornaw u jaqsmu magħhom dak li jkunu sabu. Bħall-​appostlu Pawlu, huma jadattaw il-​preżentazzjoni tagħhom tal-​messaġġ tas-​Saltna għall-​individwi li jiltaqgħu magħhom. (Aqra l-​1 Korintin 9:19-23.) Interess sinċier bħal dan jiġbed lin-​nies lejn l-​aħbar tajba u jirrifletti b’mod taʼ l-​għaġeb “il-​mogħdrija tenera t’Alla tagħna.”—Lq. 1:78.

Żomm Attitudni Pożittiva

14. Hekk kif inwettqu l-​ministeru tagħna, kif nistgħu nirriflettu l-​kwalitajiet taʼ Ġeħova?

¹⁴ Ġeħova wera li jistmana meta tana l-​libertà taʼ l-​għażla. Għalkemm hu Alla li Jistaʼ Kollox, hu ma jisforza lil ħadd biex jaqdih imma jappella lin-​nies fuq il-​bażi taʼ l-​imħabba, billi jbierek lil dawk li jwieġbu b’apprezzament għall-​provvedimenti meraviljużi tiegħu. (Rum. 2:4) Bħala l-​ministri tiegħu, kull darba li nagħtu xiehda aħna għandna nkunu lesti biex nippreżentaw l-​aħbar tajba b’mod li jistħoqqlu l-​Alla tagħna mimli ħniena. (2 Kor. 5:20, 21; 6:3-6) Għaldaqstant, irridu nżommu attitudni pożittiva lejn in-​nies fit-​territorju tagħna. X’jistaʼ jgħinna negħlbu din l-​isfida?

15. (a) Ġesù x’istruwixxa lill-​appostli tiegħu biex jagħmlu jekk in-​nies ma jaċċettawx il-​messaġġ? (b) X’jistaʼ jgħinna niffokaw fuq li nsibu lil dawk li jistħoqqilhom?

¹⁵ Ġesù istruwixxa lis-​segwaċi tiegħu biex ma joqogħdux jinkwetaw bla bżonn jekk xi wħud ma jaċċettawx il-​messaġġ imma minflok biex jiffokaw fuq li jsibu lil dawk li jistħoqqilhom. (Aqra Mattew 10:11-15.) Miri żgħar u li jistgħu jintlaħqu jgħinuna nagħmlu dan. Wieħed ħu jqabbel lilu nnifsu maʼ wieħed li jfittex affarijiet prezzjużi. Il-​motto tiegħu hu, “Qed inħares ’il quddiem biex insib id-​deheb illum.” Ħu ieħor għandu l-​mira ‘li jiltaqaʼ maʼ individwu wieħed li juri interess kull ġimgħa u jirritorna wara ftit jiem biex jikkultiva l-​interess.’ Xi pubblikaturi jistinkaw biex jekk inhu possibbli jaqsmu minn taʼ l-​inqas skrittura waħda maʼ kull inkwilin. Liema mira realistika tistaʼ tagħmel għalik innifsek?

16. Liema raġunijiet għandna biex inkomplu nippridkaw?

¹⁶ Is-​suċċess tal-​ministeru minn dar għal dar ma jiddependix biss minn kif iwieġbu n-​nies fit-​territorju. Veru, ix-​xogħol taʼ l-​ippridkar għandu rwol vitali fis-​salvazzjoni taʼ wħud taʼ qalb onesta, imma jservi wkoll skopijiet oħrajn li huma importanti. Il-​ministeru Kristjan jagħtina opportunità biex nuru l-​imħabba tagħna lejn Ġeħova. (1 Ġw. 5:3) Jgħinna nevitaw il-​ħtija tad-​demm. (Atti 20:26, 27) Iwissi lil dawk li ċaħdu lil Alla li “waslet is-​siegħa biex [Alla] jagħmel il-​ġudizzju.” (Riv. 14:6, 7) Fuq kollox, permezz taʼ l-​ippridkar taʼ l-​aħbar tajba, l-​isem taʼ Ġeħova qed jiġi mfaħħar madwar id-​dinja kollha. (Salm 113:3) Għalhekk, sew jekk in-​nies jisimgħu u sew jekk le, aħna rridu nkomplu nipproklamaw il-​messaġġ tas-​Saltna. Tabilħaqq, l-​isforzi tagħna kollha biex nipproklamaw l-​aħbar tajba huma sbieħ f’għajnejn Ġeħova.—Rum. 10:13-15.

17. In-​nies dalwaqt x’se jkollhom jirrikonoxxu?

¹⁷ Għalkemm ħafna llum jinjoraw ix-​xogħol tagħna taʼ l-​ippridkar, dalwaqt se jibdew iqisuh b’lenti differenti. (Mt. 24:37-39) Ġeħova aċċerta lil Eżekjel li meta l-​ġudizzji li hu pproklama kienu se jseħħu, il-​poplu ribelluż taʼ Iżrael kien ‘ħa jkun jaf li kien hemm profeta f’nofsu.’ (Eżek. 2:5) B’mod simili, meta Alla jwettaq il-​ġudizzji tiegħu kontra din is-​sistema dinjija, in-​nies se jkollhom jirrikonoxxu li l-​messaġġ li x-​Xhieda taʼ Ġeħova ppridkaw pubblikament u minn dar għal dar fil-​fatt oriġina mill-​Alla l-​veru, Ġeħova, u li x-​Xhieda verament qdew bħala r-​rappreżentanti tiegħu. Xi privileġġ għandna li nġorru ismu u niddikjaraw il-​messaġġ tiegħu f’dawn iż-​żminijiet kruċjali! Bis-​saħħa tiegħu, jalla nkomplu negħlbu l-​isfidi tal-​ministeru minn dar għal dar.

Int Kif Twieġeb?

• Kif nistgħu nagħmlu l-​qalb biex nippridkaw?

• X’jistaʼ jgħinna nibdew diskussjonijiet minn fuq il-​Bibbja fil-​ministeru minn dar għal dar?

• Kif nistgħu nuru interess sinċier f’oħrajn?

• X’jistaʼ jgħinna nżommu attitudni pożittiva lejn in-​nies fit-​territorju tagħna?

[Kaxxa/Stampa f’paġna 9]

Mod Wieħed Kif Tibda Diskussjonijiet Minn fuq il-​Bibbja

Biex tibda:

◼ Wara li ssellem lill-​inkwilin, tistaʼ turih fuljett u tgħid, “L-​iskop taż-​żjara tiegħi llum hu li naqsam ħsieb inkuraġġanti fuq dan is-​suġġett importanti.”

◼ Jew forsi tistaʼ toffri fuljett u tgħid, “Illum ġejt inżurek ftit għaliex nixtieq inkun naf x’taħseb dwar dan is-​suġġett.”

Jekk il-​fuljett jiġi aċċettat:

◼ Mingħajr ma ddum, staqsi mistoqsija sempliċi li titlob l-​opinjoni taʼ l-​inkwilin ibbażata fuq it-​titlu tal-​fuljett.

◼ Ismaʼ b’attenzjoni, billi tipprova tifhem l-​opinjoni taʼ l-​inkwilin. Irringrazzjah tal-​kummenti tiegħu u żommhom f’moħħok matul il-​konversazzjoni.

Biex tkompli d-​diskussjoni:

◼ Aqra u ddiskuti skrittura jew tnejn, billi tadatta l-​preżentazzjoni tiegħek għall-​interessi u l-​bżonnijiet taʼ l-​individwu.

◼ Fejn jintwera l-​interess, offri xi letteratura u jekk inhu possibbli uri kif isir studju tal-​Bibbja. Ftiehem biex tmur lura.