Tippriedka Int bil-Kuraġġ?
1 Pietru u Ġwanni baqgħu jiddikjaraw il-messaġġ tas-Saltna bil-kuraġġ minkejja li dawk li kienu jopponu arrestawhom u heddewhom. (Atti 4:17, 21, 31) X’ifisser għalina llum li nippridkaw bil-kuraġġ?
2 Kif Nagħtu Xiehda bil-Kuraġġ: Kelma oħra għal “kuraġġuż” hi “taʼ ħila,” li tfisser li “ma tibżax akkost taʼ kollox, tkun qalbieni, u tissaporti.” Għall-Kristjani veri, li jippridkaw bil-kuraġġ ifisser li ma jibżgħux jesprimu ruħhom kulmeta tiġihom okkażjoni xierqa biex jaqsmu l-aħbar tajba m’oħrajn. (Atti 4:20; 1 Pt. 3:15) Dan ifisser li aħna ma nistħux nitkellmu dwar l-aħbar tajba. (Salm 119:46; Rum. 1:16; 2 Tim. 1:8) B’hekk, il-kuraġġ huwa kwalità meħtieġa sabiex inwettqu l-inkarigu tagħna li nippridkaw l-aħbar tajba tas-Saltna f’dan iż-żmien tat-tmiem. Dan iqanqalna biex naqsmu l-aħbar tajba kulfejn insibu n-nies.—Atti 4:29; 1 Kor. 9:23.
3 Il-Kuraġġ fl-Iskola: Huwa diffiċli li tippriedka lil sħabek taʼ l-iskola jekk tkun kemxejn beżżiegħ jew mistħi? Xi drabi dan ma jkunx faċli; fil-fatt jistaʼ jkun tassew taʼ sfida. Madankollu, Jehovah se jsaħħek jekk int titolbu biex jimliek bil-kuraġġ ħalli tippriedka lil oħrajn. (Salm 138:3) Il-kuraġġ se jgħinek tidentifika lilek innifsek bħala wieħed mix-Xhieda taʼ Jehovah u tissaporti t-twaqqigħ għaċ-ċajt. Bħala riżultat, li tippriedka fl-iskola jistaʼ jkun taʼ salvazzjoni għal dawk li jisimgħuk.—1 Tim. 4:16.
4 Il-Kuraġġ fuq ix-Xogħol: Magħruf int bħala wieħed mix-Xhieda taʼ Jehovah fuq ix-xogħol? L-uniku mod li bih sħabek tax-xogħol jistgħu jintlaħqu bl-aħbar tajba jistaʼ jkun billi tippridkalhom int. Il-kuraġġ tiegħek se jgħinek ukoll f’li tkun ċert li ma tħallix ix-xogħol itellfek milli tattendi għal-laqgħat Kristjani tiegħek u l-konvenzjonijiet.
5 Il-Kuraġġ Meta Nkunu taħt Prova: Huwa importanti ferm li meta niffaċċjaw l-oppożizzjoni nagħmlu kuraġġ. (1 Tess. 2:1, 2) Dan se jgħinna nżommu sod mal-fidi tagħna meta niġu ffaċċjati minn theddid, twaqqigħ għaċ-ċajt, jew persekuzzjoni diretta. (Fil. 1:27, 28) Se jgħinna nibqgħu sodi wkoll meta nkunu taħt pressjoni biex inċedu milli nżommu mill-qrib mal-livelli t’Alla tagħna, Jehovah. Se jsaħħaħna biex inżommu l-paċi meta oħrajn jaqilgħu l-ġlied.—Rum. 12:18.
6 Huma x’inhuma d-diffikultajiet li niffaċċjaw personalment, jalla nipperseveraw f’li nippridkaw l-aħbar tajba bil-kuraġġ.—Efes. 6:18-20.