Ersaq Qrib Lejn Alla

Ragħaj li Jimpurtah

Mattew 18:12-14

‘ALLA jimpurtah minni?’ Jekk xi darba staqsejt din il-​mistoqsija, m’intix l-​ewwel wieħed. Ħafna minna għaddew minn tbatija u problemi, u kultant għandna mnejn nitħassbu dwar jekk il-​Ħallieq taʼ l-​univers vast jagħtix kas tagħna. Aħna għandna bżonn inkun nafu jekk Ġeħova jimpurtahx minna bħala individwi. Meta kien fuq l-​art, Ġesù, l-​iktar wieħed li jaf lil Ġeħova, ta tixbiha li tikxef it-​tweġiba li tqawwilek qalbek.

Billi uża r-​realtajiet tal-​ħajja taʼ ragħaj li jieħu ħsieb il-​merħla, Ġesù qal: “Jekk raġel ikollu mitt nagħġa u tintilef waħda minnhom, ma jħallix hu lid-​disgħa u disgħin fuq il-​muntanji u jitlaq ifittex lil dik li ntilfitlu? U jekk jirnexxilu jsibha, tassew ngħidilkom li jifraħ biha iktar milli bid-​disgħa u disgħin li ma ntilfux. Bl-​istess mod, Missieri li hu fis-​sema ma jridx li jinqered wieħed minn dawn iċ-​ċkejknin.” (Mattew 18:12-14) Ejjew naraw kif Ġesù hawnhekk jiddeskrivi kemm Ġeħova tassew jikkonċernah minn kull aduratur Tiegħu.

Ir-ragħaj ħassu responsabbli għal kull nagħġa li kellu. Jekk xi nagħġa kienet tintilef, hu kien ikun jaf liema waħda kienet nieqsa. Hu jaf lil kull nagħġa bl-​isem li jkun taha. (Ġwanni 10:3) Ir-​ragħaj li jimpurtah ma kienx jistrieħ qabel ma jkun ġab lura n-​nagħġa l-​mitlufa. Għalkemm kien se jmur ifittex lil dik mitlufa, hu ma kienx se jqiegħed fil-​periklu lid-​99 li jkun ħalla warajh. Taʼ spiss, ir-​rgħajja kienu joqogħdu flimkien, waqt li jħallu l-​imrieħel tagħhom jitħalltu.a B’hekk, ir-​ragħaj li kien jitlaq ifittex lil dik mitlufa kien jistaʼ jħalli temporanjament lin-​nagħaġ l-​oħra biex jieħdu ħsiebhom ir-​rgħajja l-​oħrajn. Hekk kif kien isib lin-​nagħġa l-​mitlufa qawwija u sħiħa, ir-​ragħaj kien ikollu raġun jifraħ. Hu kien jerfaʼ n-​nagħġa beżgħana fuq spallejh, u kien jiħodha lura f’post taʼ sigurtà fost il-​merħla.—Luqa 15:5, 6.

Billi applika din it-​tixbiha, Ġesù qal li Alla ma jridx “li jinqered wieħed minn dawn iċ-​ċkejknin.” Iktar qabel, Ġesù wissa lid-​dixxipli tiegħu dwar li wieħed ifixkel “lil wieħed minn dawn iċ-​ċkejknin li jpoġġu l-​fidi [fih].” (Mattew 18:6) Għalhekk, it-​tixbiha taʼ Ġesù x’tgħallimna dwar Ġeħova? Tgħallimna li hu Ragħaj li verament jimpurtah minn kull waħda min-​nagħaġ tiegħu, inkluż “iċ-​ċkejknin”—dawk li jistgħu jidhru taʼ ftit importanza mill-​ħarsa tad-​dinja. Iva, fil-​ħarsa t’Alla, kull aduratur tiegħu huwa individwu uniku u prezzjuż.

Jekk int tixtieq tkun assigurat li int prezzjuż għal Alla, għala ma titgħallimx iktar dwar ir-​Ragħaj il-​Kbir, Alla Ġeħova, u dwar kif tistaʼ tersaq eqreb lejh? Billi tagħmel hekk, int jistaʼ jkollok fiduċja bħal dik taʼ l-​appostlu Pietru, li bla dubju semaʼ b’widnejh stess lil Ġesù jirrakkonta dik it-​tixbiha dwar in-​nagħġa l-​mitlufa. Iktar tard Pietru kiteb: ‘Itfgħu l-​ansjetà kollha tagħkom [fuq Alla], għax hu jimpurtah minnkom.’—1 Pietru 5:7.

[Nota taʼ taħt]