Ġeħova Ma Jitlaqhomx lil-​Leali Tiegħu

“[Ġeħova] lil-​leali tiegħu ma jitlaqhomx. Għal dejjem se jkunu mħarsin.”—SALM 37:28.

1, 2. (a) Liema żviluppi li seħħew fl-​għaxar seklu Q.E.K. ġarrbu l-​lealtà tal-​qaddejja t’Alla? (b) Ġeħova f’liema tliet sitwazzjonijiet ħarishom lil-​leali tiegħu?

NINSABU fl-​għaxar seklu Q.E.K. u huwa żmien taʼ deċiżjoni. Għadha kif ġiet evitata gwerra ċivili għax it-​tribujiet taʼ Israel tat-​tramuntana, li huma bla sabar, ngħataw ċertu ammont taʼ indipendenza. Ġerobogħam, is-​sultan tagħhom li għadu kif inħatar, malajr jieħu azzjoni biex isaħħaħ il-​qawwa tiegħu billi jistabbilixxi reliġjon ġdida taʼ l-​Istat. Hu jesiġi lealtà sħiħa mis-​sudditi tiegħu. X’se jagħmlu l-​qaddejja leali taʼ Ġeħova? Se jibqgħu huma leali lejn l-​Alla li jaqdu? Eluf jibqgħu leali, u Ġeħova jħarishom hekk kif huma jżommu l-​integrità tagħhom lejh.—1 Slat. 12:1-33; 2 Kron. 11:13, 14.

² Il-​lealtà tal-​qaddejja t’Alla qed tiġi mġarrba fi żmienna wkoll. “Ibqgħu f’sensikom, oqogħdu għassa,” twissi l-​Bibbja. “L-​avversarju tagħkom, ix-​Xitan, iħuf bħal iljun jgħajjat, jipprova jiblaʼ lil xi ħadd.” Nistgħu aħna b’suċċess ‘niqfulu, sodi fil-​fidi’? (1 Pt. 5:8, 9) Ejja neżaminaw xi ġrajjiet li seħħew fi żmien il-​ħatra tas-​Sultan Ġerobogħam fis-​sena 997 Q.E.K. u naraw x’nistgħu nitgħallmu minnhom. Matul dawk iż-​żminijiet kritiċi, il-​qaddejja leali taʼ Ġeħova kienu maħqurin. Kienu wkoll esposti għal influwenzi apostati waqt li kienu qed iwettqu inkarigi diffiċli. F’kull waħda minn dawn is-​sitwazzjonijiet, Ġeħova ma telaqx lil-​leali tiegħu dakinhar, u mhux se jitlaqhom illum.—Salm 37:28.

Meta Nkunu Maħqurin

3. Taħt il-​ħakma tas-​Sultan David għala ma kienx hemm moħqrija?

³ L-​ewwel ejja neżaminaw x’kienu ċ-​ċirkustanzi meta Ġerobogħam sar sultan. Proverbji 29:2 jgħid: “Meta jaħkem xi ħadd mill-​agħar, in-​nies jitniehdu.” Taħt il-​ħakma tas-​Sultan David taʼ Israel tal-​qedem, il-​poplu ma tnihedx. David ma kienx perfett, imma kien leali lejn Alla u kien jafda fih. Taħt il-​ħakma taʼ David ma kienx hemm moħqrija. Ġeħova għamel patt maʼ David billi qallu: “Darek u saltnatek ikunu sodi għal żmien indefinit; it-​tron tiegħek ikun stabbilit fis-​sod għal żmien indefinit.”—2 Sam. 7:16.

4. Il-​barkiet li tgawdew matul il-​ħakma taʼ Salamun minn xiex kienu jiddependu?

⁴ Il-​ħakma taʼ Salamun, bin David, għall-​ewwel tant kienet mimlija paċi u prosperità li setgħet bix-​xieraq tiffigura bil-​quddiem ir-​Renju Millennjali futur taʼ Kristu Ġesù. (Salm 72:1, 17) L-​ebda wieħed mit-​12-il tribù taʼ Israel f’dak iż-​żmien ma kellu raġuni biex jirribella. Madankollu, Salamun u s-​sudditi tiegħu kienu se jibqgħu jgawdu dawn il-​barkiet biss b’ċerti kundizzjonijiet. Ġeħova qal lil Salamun: “Jekk timxi maʼ l-​istatuti tiegħi u twettaq id-​deċiżjonijiet ġudizzjarji tiegħi u tħares il-​kmandamenti kollha tiegħi billi timxi magħhom, jien ukoll inwettaq miegħek il-​kelma tiegħi li għedt lil David missierek; u ngħammar f’nofs ulied Israel, u ma nitlaqx lill-​poplu tiegħi Israel.”—1 Slat. 6:11-13.

5, 6. X’ġara minħabba n-​nuqqas taʼ lealtà taʼ Salamun lejn Alla?

⁵ Fi xjuħitu, Salamun ma baqax leali lejn Ġeħova u beda jieħu sehem fil-​qima falza. (1 Slat. 11:4-6) Bil-​mod il-​mod, Salamun ma baqax jobdi l-​liġijiet taʼ Ġeħova u beda jaħqar lill-​poplu iktar u iktar. Il-​moħqrija tant kienet kbira li wara mewtu n-​nies gergru dwaru maʼ Reħobogħam, ibnu u s-​suċċessur tiegħu, u talbuh itaffilhom il-​piż. (1 Slat. 12:4) Ġeħova kif irreaġixxa meta Salamun ma baqax leali?

⁶ Il-​Bibbja tgħidilna: “Ġeħova għadab għal Salamun, għax qalbu kienet daret minn . . . Alla taʼ Israel, dak li deherlu darbtejn.” Ġeħova qal lil Salamun: “Talli . . . ma żammejtx il-​patt tiegħi u l-​istatuti tiegħi li tajtek bi kmand, jien żgur inċarrat is-​saltna minn fuqek, u nagħtiha lill-​qaddej tiegħek.”—1 Slat. 11:9-11.

7. Għalkemm warrab lil Salamun, Ġeħova kif ħa ħsieb il-​leali Tiegħu?

⁷ Imbagħad Ġeħova bagħat lill-​profeta Aħija sabiex jaħtar ħellies. Dak il-​ħellies kien Ġerobogħam, raġel kapaċi li kien jaħdem għal Salamun meta dan kien sultan. Għalkemm Ġeħova baqaʼ leali lejn il-​patt tas-​Saltna li kien għamel maʼ David, Hu approva li t-​12-il tribù jinqasmu f’żewġ saltniet. Għaxar tribujiet kellhom jingħataw lil Ġerobogħam; tnejn kellhom jitħallew lil-​linja tal-​familja taʼ David, li issa kienet rappreżentata mis-​Sultan Reħobogħam. (1 Slat. 11:29-37; 12:16, 17, 21) Ġeħova qal lil Ġerobogħam: “Jiġri li, jekk tobdi kulma nikkmandak, u timxi fi triqati u tagħmel dak li hu sewwa f’għajnejja billi tħares l-​istatuti u l-​kmandamenti tiegħi, bħalma għamel David il-​qaddej tiegħi, jien inkun miegħek u nibnilek dar dejjiema, bħalma bnejt għal David, u nagħtik lil Israel.” (1 Slat. 11:38) Ġeħova aġixxa għan-​nom tal-​poplu tiegħu u pprovda mod biex iġibilhom serħan mill-​moħqrija.

8. Liema provi jgħakksu lill-​poplu t’Alla llum?

⁸ Illum hawn ħafna moħqrija u inġustizzji. “Il-​bniedem iddomina lill-​bniedem bi ħsara għalih,” jgħid Ekkleżjasti 8:9. Kummerċ rgħib u ħakma korrotta jistgħu jirriżultaw f’kundizzjonijiet ekonomiċi ħorox. Dawk li jmexxu fil-​gvern, fin-​negozju, u fir-​reliġjon spiss ma jagħtux eżempju morali tajjeb. Għalhekk, bħal Lot li kien raġel sewwa, illum il-​leali t’Alla huma ‘mnikktin ferm bil-​kondotta laxka u bla rażan taʼ nies li jisfidaw il-​liġi.’ (2 Pt. 2:7) Iktar minn hekk, hekk kif aħna nistinkaw biex ngħixu skond il-​livelli t’Alla mingħajr ma ndejqu lil ħadd, ħafna drabi nsiru l-​mira tal-​persekuzzjoni minn ħakkiema arroganti.—2 Tim. 3:1-5, 12.

9. (a) Ġeħova x’diġà għamel biex jeħles lill-​poplu tiegħu? (b) Għala nistgħu nkunu ċerti li Ġesù se jibqaʼ dejjem leali lejn Alla?

⁹ Madankollu, nistgħu nkunu ċerti minn din il-​verità fundamentali: Ġeħova ma jitlaqhomx lil-​leali tiegħu! Aħseb ftit dwar il-​passi li diġà ħa sabiex jissostitwixxi l-​ħakkiema korrotti tad-​dinja. Is-​Saltna Messjanika t’Alla li qiegħda f’idejn Kristu Ġesù diġà ġiet stabbilita. Ġesù Kristu ilu jsaltan fis-​sema għal kważi mitt sena. Dalwaqt hu se jġib serħan sħiħ għal dawk kollha li jibżgħu minn isem Alla. (Aqra Rivelazzjoni 11:15-18.) Ġesù diġà ta prova li kien leali lejn Alla saħansitra sal-​mewt. Hu qatt ma se jiddiżappunta lis-​sudditi tiegħu, bħalma għamel Salamun.—Ebr. 7:26; 1 Pt. 2:6.

10. (a) Kif nistgħu nuru li napprezzaw is-​Saltna t’Alla? (b) Dwar liema ħaġa nistgħu nkunu fiduċjużi meta nkunu għaddejjin minn provi?

¹⁰ Is-​Saltna t’Alla hija gvern reali li se jtemm il-​moħqrija kollha. Il-​lealtà tagħna tappartjeni lil Alla Ġeħova u l-​arranġament tiegħu. B’fiduċja sħiħa fis-​Saltna, aħna nwarrbu dak kollu li jmur kontra r-​rieda t’Alla u b’żelu nwettqu għemejjel tajbin. (Titu 2:12-14) Nistinkaw biex nibqgħu bla tebgħa minn din id-​dinja. (2 Pt. 3:14) Minkejja l-​provi li nistgħu niffaċċjaw bħalissa, nistgħu nkunu fiduċjużi li Ġeħova se jipproteġina minn ħsara spiritwali. (Aqra Salm 97:10.) Iktar minn hekk, Salm 116:15 jassigurana: “Prezzjuża f’għajnejn Ġeħova hi l-​mewt taʼ dawk leali lejh.” Il-​qaddejja taʼ Ġeħova tant huma prezzjużi għalih li mhux se jħallihom jgħibu bħala grupp.

Meta Nkunu Esposti għal Influwenzi Apostati

11. Ġerobogħam kif ma baqax leali?

¹¹ Il-​ħakma tas-​Sultan Ġerobogħam setgħet ġabet xi ftit tas-​serħan lill-​poplu t’Alla. Minflok, l-​azzjonijiet tiegħu komplew iġarrbu l-​lealtà tal-​poplu lejn Alla. Peress li ma kienx kuntent bl-​unur u l-​privileġġ li kienu diġà ngħatawlu, Ġerobogħam beda jfittex modi kif isaħħaħ il-​pożizzjoni tiegħu. Hu rraġuna: “Jekk dan il-​poplu jibqaʼ jmur joffri sagrifiċċji fid-​dar taʼ Ġeħova f’Ġerusalemm, qalb dan il-​poplu żgur terġaʼ lura lejn sidhom Reħobogħam is-​sultan taʼ Ġuda; u lili joqtluni u jerġgħu lura għand Reħobogħam is-​sultan taʼ Ġuda.” Għalhekk, Ġerobogħam stabbilixxa reliġjon ġdida li kienet iffokata fuq żewġ għoġiela tad-​deheb. “Poġġa wieħed f’Betel, u l-​ieħor f’Dan. U din il-​ħaġa kkaġunat id-​dnub, u n-​nies kienu jmorru ’l bogħod sa Dan biex iqimu l-​għoġol. U beda jagħmel santwarju fil-​postijiet għall-​qima u ħatar qassisin minn fost il-​poplu kollu, li ma kinux minn ulied Levi.” Ġerobogħam saħansitra stabbilixxa ġurnata hu stess bħala “festa għal ulied Israel,” u ssokta “joffri fuq l-​artal id-​duħħan tas-​sagrifiċċji.”—1 Slat. 12:26-33.

12. Il-​leali t’Alla fis-​saltna tat-​tramuntana x’għamlu meta Ġerobogħam stabbilixxa l-​qima taʼ l-​għoġol f’Israel?

¹² X’kienu se jagħmlu issa l-​leali t’Alla fis-​saltna tat-​tramuntana? Bħal missirijiethom leali tal-​qedem, il-​Leviti li kienu jgħixu fil-​bliet li ngħatawlhom fit-​territorju tas-​saltna tat-​tramuntana aġixxew mill-​ewwel. (Eżo. 32:26-28; Num. 35:6-8; Dt. 33:8, 9) Huma ħallew il-​wirt tagħhom warajhom u ħadu lill-​familji tagħhom lejn in-​nofsinhar taʼ Ġuda fejn setgħu jkomplu jqimu lil Ġeħova mingħajr tfixkil. (2 Kron. 11:13, 14) Israelin oħrajn li kienu qed jgħixu għal xi żmien f’Ġuda għażlu li jibqgħu hemmhekk għalkollox minflok ma jmorru lura d-​dar. (2 Kron. 10:17) Ġeħova ħa ħsieb li t-​triq lura lejn il-​qima vera titħalla miftuħa sabiex oħrajn mill-​ġenerazzjonijiet taʼ wara mis-​saltna tat-​tramuntana setgħu jabbandunaw il-​qima taʼ l-​għoġol u jerġgħu lura lejn Ġuda.—2 Kron. 15:9-15.

13. Fi żmienna, l-​influwenzi apostati kif ġarrbu l-​fidi tal-​poplu t’Alla?

¹³ Illum l-​apostati u l-​influwenzi tagħhom jheddu lill-​poplu t’Alla llum. Xi ħakkiema wkoll ipprovaw jistabbilixxu huma stess xi tip taʼ reliġjon taʼ l-​Istat, u għamlu pressjoni fuq is-​sudditi tagħhom biex jaċċettawha. Il-​kleru tal-​Kristjaneżmu u xi prużuntużi oħrajn ipprovaw isostnu li huma stess jifformaw is-​saċerdozju spiritwali. Madankollu, fost il-​Kristjani veri biss insibu wħud li huma midlukin ġenwinament u li jifformaw is-​“saċerdozju rjali.”—1 Pt. 2:9; Riv. 14:1-5.

14. Kif għandna nirreaġixxu għall-​irraġunar taʼ l-​apostati?

¹⁴ Bħal-​Leviti leali lura fil-​għaxar seklu Q.E.K., illum il-​leali t’Alla ma jiġux imqarrqin mill-​ideat taʼ l-​apostati. Il-​midlukin u l-​Kristjani sħabhom ikunu pronti biex iwarrbu u jiċħdu l-​ideat apostati. (Aqra Rumani 16:17.) Filwaqt li minn qalbna aħna nissottomettu ruħna lejn l-​awtoritajiet governattivi fi kwistjonijiet sekulari u nibqgħu newtrali fil-​konflitti tad-​dinja, il-​lealtà tagħna hi lejn is-​Saltna t’Alla. (Ġw. 18:36; Rum. 13:1-8) Aħna niċħdu l-​istqarrijiet foloz taʼ dawk li jgħidu li jaqdu lil Alla u li fl-​istess ħin jiddiżonorawh bil-​kondotta tagħhom.—Titu 1:16.

15. “L-​ilsir leali u għaqli” għala jistħoqqlu l-​lealtà tagħna?

¹⁵ Aħseb ukoll dwar il-​fatt li Ġeħova għamilha possibbli għal dawk taʼ qalb onesta biex b’mod figurattiv joħorġu mid-​dinja mill-​agħar u jidħlu ġol-​ġenna spiritwali li ħalaq hu. (2 Kor. 12:1-4) Bi qlub mimlijin gratitudni, aħna nibqgħu qrib “l-​ilsir leali u għaqli li sidu ħatru fuq il-​qaddejja taʼ daru, biex jagħtihom l-​ikel fiż-​żmien xieraq.” Kristu ħatar lil dan l-​ilsir “fuq kulma għandu.” (Mt. 24:45-47) Għalhekk, anki jekk aħna bħala individwi ma nifhmux għalkollox xi deċiżjoni li tieħu l-​klassi taʼ l-​ilsir, m’hemm l-​ebda raġuni biex niċħduha jew immorru lura fid-​dinja taʼ Satana. Minflok, il-​lealtà se tqanqalna naġixxu b’umiltà u nistennew lil Ġeħova biex jiċċara l-​affarijiet.

Waqt li Nwettqu Inkarigi Mogħtijin Minn Alla

16. Liema inkarigu rċieva profeta minn Ġuda?

¹⁶ Ġeħova kkundanna lil Ġerobogħam minħabba l-​apostasija tiegħu. Hu inkariga lil profeta minn Ġuda biex jivvjaġġa lejn it-​tramuntana sa Betel u jidher quddiem Ġerobogħam waqt li dan kien qed jaħraq l-​inċens fuq l-​artal. Il-​profeta kellu jagħti messaġġ devastanti taʼ ġudizzju lil Ġerobogħam. Bla dubju, dan kien inkarigu diffiċli.—1 Slat. 13:1-3.

17. Ġeħova kif ipproteġa lill-​messaġġier tiegħu?

¹⁷ Ġerobogħam irrabja ħafna malli semaʼ l-​kundanna taʼ Ġeħova. Hu medd idu kontra r-​rappreżentant t’Alla, u għajjat lill-​irġiel li kienu viċin u qalilhom: “Aqbduh!” Imma minnufih, qabel ma xi ħadd setaʼ jaġixxi, “l-​id li ħareġ kontrih nixfitlu, u ma setax jiġbidha lura lejh. U l-​artal inqasam min-​nofs u l-​irmied bix-​xaħam ixxerred minn fuq l-​artal.” Ġerobogħam kellu bilfors jitlob lill-​profeta biex itaffi l-​korla taʼ Ġeħova u jitlob biex l-​id li kienet nixfet tintradd lura. Il-​profeta hekk għamel, u l-​id ġiet imfejqa. Għalhekk, Ġeħova pproteġa lill-​messaġġier tiegħu mill-​ħsara.—1 Slat. 13:4-6.

18. Ġeħova kif iħarisna hekk kif nagħtuh servizz sagru bla biżaʼ?

¹⁸ Hekk kif b’lealtà nieħdu sehem fix-​xogħol taʼ l-​ippridkar tas-​Saltna u x-​xogħol taʼ li nagħmlu dixxipli, xi drabi niltaqgħu maʼ wħud li m’humiex dħulin, jew li huma saħansitra ostili. (Mt. 24:14; 28:19, 20) Imma aħna qatt m’għandna nħallu l-​biżaʼ li ma niġux aċċettati jnaqqas iż-​żelu tagħna għall-​ministeru. Bħall-​profeta li ma nafux x’jismu fi żmien Ġerobogħam, għandna “l-​privileġġ li bla biżaʼ [nagħtu lil Ġeħova] servizz sagru bil-​lealtà.”a (Lq. 1:74, 75) Għalkemm illum ma nistennewx li jseħħ xi miraklu, Ġeħova għadu qed iħarisna u jappoġġana bħala x-​Xhieda tiegħu permezz taʼ l-​ispirtu qaddis tiegħu u l-​anġli. (Aqra Ġwanni 14:15-17; Rivelazzjoni 14:6.) Alla qatt ma se jabbanduna lil dawk li jibqgħu jitkellmu l-​kelma tiegħu bla biżaʼ.—Flp. 1:14, 28.

Ġeħova Se Jħares lil-​Leali Tiegħu

19, 20. (a) Għala nistgħu nkunu ċerti li Ġeħova qatt ma se jitlaqna? (b) Liema mistoqsijiet se niddiskutu fl-​artiklu li jmiss?

¹⁹ Ġeħova huwa l-​Alla leali tagħna. (Riv. 15:4; 16:5) Hu “leali fl-​għemejjel kollha tiegħu.” (Salm 145:17) U l-​Bibbja tassigurana li hu “jgħasses it-​triq tal-​leali tiegħu.” (Prov. 2:8) Meta jiffaċċjaw provi jew ideat apostati jew meta jkollhom xi inkarigu diffiċli, dawk leali lejn Alla jistgħu jkunu fiduċjużi li Ġeħova se jiggwidahom u jappoġġahom.

²⁰ Dak li b’mod individwali għandna bżonn nirriflettu fuqu hu dan: X’se jgħinni nżomm il-​lealtà tiegħi lejn Ġeħova minkejja l-​provi jew it-​tentazzjonijiet li niltaqaʼ magħhom? Fi kliem ieħor, kif nistaʼ nsaħħaħ il-​lealtà tiegħi lejn Alla?

[Nota taʼ taħt]

Int Kif Twieġeb?

• Ġeħova kif wera li hu ma jitlaqhomx lil-​leali tiegħu meta jesperjenzaw il-​moħqrija?

• Kif għandna nirreaġixxu lejn l-​apostati u l-​ideat tagħhom?

• Ġeħova kif iħares lil-​leali tiegħu hekk kif jieħdu sehem fil-​ministeru Kristjan?

[Mappa/​Stampa f’paġna 5]

(Għall-formazzjoni sħiħa tat-​test, ara l-​pubblikazzjoni)

IS-​SALTNA TAT-​TRAMUNTANA (Ġerobogħam)

Dan

SIKEM

Betel

IS-​SALTNA TAN-​NOFSINHAR (Reħobogħam)

ĠERUSALEMM

[Stampa]

Ġeħova m’abbandunax lil-​leali tiegħu meta Ġerobogħam introduċa l-​qima taʼ l-​għoġol

[Stampa f’paġna 3]

Salamun u s-​sudditi tiegħu kienu se jibqgħu jgawdu dawn il-​barkiet biss b’ċerti kundizzjonijiet