Ġeħogħas Telaq lil Ġeħova Minħabba Kumpanija Ħażina

KIEN żmien terribbli f’Ġerusalemm, il-​belt fejn kien hemm it-​tempju t’Alla. Kien għadu kif inqatel is-​Sultan Aħażija. Huwa diffiċli li saħansitra nimmaġinaw x’għamlet wara Għatalija, omm Aħażija. Hi ġiegħlet li jinqatlu t-​tfal t’Aħażija—in-​neputijiet tagħha stess! Taf għala?—a Sabiex issaltan hi minflok xi ħadd minnhom.

Madankollu, wieħed min-​neputijiet t’Għatalija, it-​tarbija Ġeħogħas, ġie salvat, u nanntu lanqas biss kienet taf b’dan. Tixtieq tkun taf kif?— Fil-​fatt, it-​tarbija Ġeħogħas kellu zija jisimha Ġeħoseba li ħbietu fit-​tempju t’Alla. Hi setgħet tagħmel dan għax żewġha kien il-​Qassis il-​Kbir Ġeħojada. Flimkien aċċertaw ruħhom li Ġeħogħas jinżamm fis-​sigurtà.

Għal sitt snin, Ġeħogħas inżamm sigriet fit-​tempju. Hemmhekk, ġie mgħallem kollox dwar Alla Ġeħova u l-​liġijiet tiegħu. Fl-​aħħar, meta Ġeħogħas kellu sebaʼ snin, Ġeħojada ħa azzjoni biex jagħmel lil Ġeħogħas sultan. Tixtieq tismaʼ kif Ġeħojada għamel dan u x’ġara lin-​nanna taʼ Ġeħogħas, ir-​reġina ħażina Għatalija?—

Tajjeb, Ġeħojada sejjaħ flimkien bil-​moħbi lill-​gwardji persunali speċjali li s-​slaten f’Ġerusalemm kien ikollhom dak iż-​żmien. Hu qalilhom kif hu u martu salvaw it-​tarbija tifel tas-​Sultan Aħażija. Imbagħad, Ġeħojada wera lil Ġeħogħas lill-​gwardji persunali li rrealizzaw li hu kien il-​ħakkiem bi dritt. Għalhekk, iddeċidew x’se jagħmlu.

Ġeħojada ħareġ lil Ġeħogħas u inkurunah. Għal dan, in-​nies “bdew iċapċpu idejhom u jgħidu: ‘Ħa jgħix is-​sultan!’” Il-​gwardji persunali dawru dawramejt lil Ġeħogħas biex jipproteġuh. Imbagħad, meta Għatalija semgħet dan il-​ferħ kollu, hi ħarġet tiġri barra u bdiet toġġezzjona. Imma mal-​kmand taʼ Ġeħojada, il-​gwardji persunali qatlu lil Għatalija.—2 Slaten 11:1-16.

Taħseb li Ġeħogħas kompla jismaʼ minn Ġeħojada u jagħmel dak li hu sewwa?— Hu għamel hekk sakemm Ġeħojada kien għadu ħaj. Ġeħogħas saħansitra aċċerta ruħu li n-​nies jagħtu l-​flus biex jissewwa t-​tempju t’Alla, li kien ġie traskurat minn Aħażija, missieru, u minn nannuh Ġeħoram. Imma ejja naraw x’ġara meta l-​Qassis il-​Kbir Ġeħojada miet.—2 Slaten 12:1-16.

Sa dak iż-​żmien, Ġeħogħas kellu madwar 40 sena. Minflok ma kompla jissieħeb maʼ dawk li jaqdu lil Ġeħova, Ġeħogħas għamel ħbieb maʼ dawk li kienu jqimu allat foloz. Żakkarija, bin Ġeħojada, kien il-​qassis taʼ Ġeħova sa dak iż-​żmien. X’taħseb li għamel Żakkarija meta sar jaf dwar l-​affarijiet ħżiena li Ġeħogħas kien qed jagħmel issa?—

Żakkarija qal lil Ġeħogħas u lill-​poplu: “Talli tlaqtu lil Ġeħova, hu, mill-​banda l-​oħra, se jitlaq lilkom.” Dan il-​kliem tant irrabjah lil Ġeħogħas li ordna biex Żakkarija jiġi mħaġġar għall-​mewt. Immaġina—Ġeħogħas ġie salvat minn qattiela, imma issa hu nnifsu ġiegħel li jinqatel Żakkarija!—2 Kronaki 24:1-3, 15-22.

Tistaʼ tara x’lezzjonijiet nistgħu nitgħallmu minn dan ir-​rakkont?—Tajjeb, aħna qatt ma rridu nkunu bħal Għatalija, li kienet tobgħod u kattiva. Minflok, għandna nħobbu lill-​aduraturi sħabna u saħansitra lill-​għedewwa tagħna, sewwasew bħalma għallimna Ġesù biex nagħmlu. (Mattew 5:44; Ġwanni 13:34, 35) U ftakar, mhux biss irridu nibdew nagħmlu dak li hu tajjeb bħalma għamel Ġeħogħas, imma wkoll għandna bżonn inkomplu nagħmlu ħbieb maʼ dawk li jħobbu lil Ġeħova u li jinkuraġġuna biex naqduh.