Il-​Qarrejja Tagħna Jistaqsu

M’hemm ebda dubju li Alla Ġeħova għandu l-​qawwa li jfejjaq. Ukoll, m’hemm ebda dubju li hu jistaʼ jagħti din il-​qawwa lill-​aduraturi tiegħu. Per eżempju, matul iż-​żmien taʼ l-​appostli, il-​fejqan mirakoluż kien fost l-​għotjiet speċjali taʼ l-​ispirtu qaddis tiegħu. L-​appostlu Pawlu jikteb: “Il-​manifestazzjoni taʼ l-​ispirtu tingħata lil kull wieħed għal skop siewi. Per eżempju, wieħed jingħata kliem t’għerf permezz taʼ l-​ispirtu, . . . ieħor għotjiet taʼ fejqan permezz taʼ dan l-​ispirtu wieħed, . . . ieħor ipprofetizzar, . . . ieħor ilsna differenti.”—1 Korintin 12:4-11.

Madankollu, Pawlu kiteb ukoll f’din l-​istess ittra lill-​Korintin li l-​għotjiet mirakolużi taʼ l-​ispirtu qaddis t’Alla kienu se jispiċċaw. Hu qal: “Jekk hemm l-​għotjiet taʼ l-​ipprofetizzar, dawn se jinġiebu fix-​xejn; jekk hemm l-​ilsna, dawn se jieqfu; jekk hemm l-​għarfien, dan se jinġieb fix-​xejn.”—1 Korintin 13:8.

Matul l-​ewwel seklu, Ġesù Kristu u l-​appostli tiegħu wettqu fejqan mirakoluż. F’dan iż-​żmien taʼ l-​istorja Kristjana, l-​għotjiet taʼ l-​ispirtu, inkluż l-​abbiltà li jfejqu, kienu għall-​glorja t’Alla u kienu sinjal taʼ l-​approvazzjoni u l-​barka taʼ Ġeħova fuq il-​kongregazzjoni Kristjana li kienet għadha kif ġiet stabbilita. Imma ladarba l-​kongregazzjoni Kristjana immaturat jew saret stabbilita għalkollox, minflok ma ffokat fuq għotjiet speċjali bħala evidenza taʼ l-​approvazzjoni t’Alla, hi kienet se tiffoka fuq it-​turija taʼ fidi, tama, u mħabba li ma jitħarrkux. (Ġwanni 13:35; 1 Korintin 13:13) Għalhekk, madwar is-​sena 100 E.K., il-​fejqan mirakoluż ma baqax isir bħala sinjal taʼ l-​approvazzjoni t’Alla.a

Madankollu, għandek mnejn tistaqsi, ‘Għala għadni nismaʼ rapporti dwar fejqan mirakoluż?’ Per eżempju, rapport f’gazzetta waħda kien jitkellem dwar raġel li kien jingħad li kellu l-​kanċer. Hu kellu tumuri f’rasu, fil-​kliewi, u saħansitra ’l ġewwa ħafna f’għadmu. Il-​futur tiegħu deher ikrah sakemm wasal il-​jum li fih Alla “kellmu.” Ir-​rapport qal li ftit jiem wara l-​kanċer tiegħu sparixxa.

Meta tiġi ffaċċjat bi storja bħal din, għala ma tistaqsix lilek innifsek: ‘Huwa r-​rapport ibbażat fuq il-​fatti? Hemm evidenza klinika dokumentata biex tappoġġa din l-​istqarrija? U anki jekk jidher li kien hemm fejqan, tgħallem il-​Bibbja li Alla huwa responsabbli għal kull ġrajja li fiha jidher li seħħ fejqan mirakoluż?’

It-tweġiba għal din l-​aħħar mistoqsija hija importanti b’mod partikulari. Ġesù wissa lis-​segwaċi tiegħu: “Ħarsu ruħkom mill-​profeti foloz . . . Ħafna jgħiduli f’dak il-​jum, ‘Mulej, Mulej, mhux f’ismek ipprofetizzajna, u mhux f’ismek keċċejna d-​demonji, u mhux f’ismek wettaqna ħafna għemejjel setgħanin [mirakli]?’ Imbagħad nistqarrilhom: Jien qatt ma kont nafkom! Itilqu minn quddiemi, intom li tiksru l-​liġi.”—Mattew 7:15, 21-23.

Jidher ċar li l-​hekk imsejjaħ fejqan mirakoluż jistaʼ ma jiġix minn Alla imma minn sors ieħor. Biex nevitaw li niġu mqarrqin minn dawk li jisħqu li jagħmlu l-​mirakli f’isem Alla, għandna bżonn niksbu għarfien eżatt dwar Alla, nużaw l-​abbiltà li tana Alla biex nirraġunaw, u nitgħallmu kif nidentifikaw lil dawk li qed jagħmlu r-​rieda tiegħu.—Mattew 7:16-19; Ġwanni 17:3; Rumani 12:1, 2.

[Nota taʼ taħt]