Sebaʼ Passi Biex Tibbenefika mill-​Qari tal-​Bibbja

“Il-​Bibbja mhux biss hi l-​iktar ktieb li qatt inbiegħ fl-​istorja, imma wkoll iktar kopji tagħha jibqgħu jinbiegħu kull sena minn kwalunkwe ktieb ieħor.”—IR-​RIVISTA TIME.

“Kultant naqraha l-​Bibbja, imma vera ma nsibhiex interessanti.”—KEITH, MUŻIĊIST POPOLARI MILL-​INGILTERRA.

HUWA ironiku li ħafna nies għandhom Bibbja imma jidher li jibbenefikaw ftit li xejn meta jaqrawha. Iżda oħrajn jgħożżu dak li jaqraw fil-​Bibbja. Pereżempju, mara jisimha Nancy tgħid: “Mindu bdejt naqra u nimmedita fuq il-​Bibbja kmieni kull filgħodu, qed inħossni lesta biex niffaċċja kwalunkwe problema li taf tqum matul il-​ġurnata. Din ir-​rutina għenitni bil-​wisq iktar minn dak kollu li pprovajt matul dawn l-​aħħar 35 sena biex intaffi l-​attakki tad-​dipressjoni li jkolli.”

Anki jekk qatt ma qrajt il-​Bibbja, jinteressak il-​fatt li xi nies ġew megħjunin minħabba li qrawha? Jekk int diġà qarrej tal-​Bibbja, tixtieq tibbenefika iktar mill-​qari tiegħek? Jekk iva, ipprova s-​sebaʼ passi li se jiġu diskussi f’dan l-​artiklu.

L-​1 Pass—Aqra bil-​Motiv it-​Tajjeb

◼ Int tistaʼ taqra l-​Bibbja sempliċement għax hi biċċa letteratura mill-​isbaħ, jew għax tħossok obbligat li taqraha, jew bil-​ħsieb li fiha se ssib x’jiggwidak f’din id-​dinja kollha inkwiet. Iżda se tikseb l-​iktar benefiċċju jekk il-​mira tiegħek hi li ssir taf il-​verità dwar Alla. Minbarra dan, se taħsad barkiet abbundanti jekk il-​motiv tiegħek hu li tara kif il-​messaġġ tal-​Bibbja jistaʼ jeffettwa ’l ħajtek.

L-​Iskrittura tenfasizza l-​importanza taʼ li taqra bil-​motiv it-​tajjeb billi tqabbel il-​Bibbja maʼ mera: “Jekk xi ħadd jismaʼ l-​kelma u ma jagħmilhiex, ikun bħal bniedem li jara f’mera l-​wiċċ li bih twieled: jara lilu nnifsu, jitlaq, u malajr jinsa kif kien. Imma dak li jgħarbel sewwa l-​liġi perfetta tal-​ħelsien, u jżomm sħiħ magħha, ma jkunx wieħed li jismaʼ biss u jinsa, iżda jkun wieħed li jagħmilha; hieni dan fl-​għemil tiegħu.”—Ġakbu 1:23-​25.

Ir-​raġel f’dan l-​eżempju ħares lejn wiċċu fil-​mera imma naqas milli jirranġa d-​dehra tiegħu. Forsi sempliċement ta daqqa t’għajn ħafifa lejh innifsu, jew forsi ma kellux ix-​xewqa li jagħmel kwalunkwe tibdil. Bl-​istess mod, ma tantx se nibbenefikaw jekk naqraw il-​Bibbja kif ġie ġie jew jekk nonqsu milli napplikaw dak li nkunu qrajna. B’kuntrast, nistgħu niksbu l-​hena veru jekk inħarsu fil-​Bibbja bil-​ħsieb li ‘nagħmluha,’ jiġifieri li nħallu l-​ħsibijiet t’Alla jsawru l-​ħsibijiet u l-​azzjonijiet tagħna.

It-​2 Pass—Agħżel Ttraduzzjoni taʼ Min Joqgħod Fuqha

◼ Jistaʼ jkun li għandek ħafna traduzzjonijiet tal-​Bibbja bil-​lingwa tiegħek minn fejn tagħżel. Waqt li hu minnu li kwalunkwe traduzzjoni tal-​Kelma t’Alla tistaʼ tkun taʼ benefiċċju għalik, xi wħud minnhom jużaw lingwaġġ antikwat jew tal-​istudjużi li jistaʼ jkun diffiċli biex tifhmu. (Atti 4:13) Xi traduzzjonijiet saħansitra jbiddlu l-​messaġġ pur tal-​Bibbja billi jistrieħu fuq tradizzjonijiet. Pereżempju, xi ftit minnhom użaw titli bħal “Alla” jew “Mulej” minflok l-​isem t’Alla, Ġeħova. Għalhekk, meta tiġi biex tagħżel traduzzjoni fittex waħda li tittraduċi bl-​eżatt il-​Bibbja b’lingwaġġ li faċli jinftiehem u li jħeġġek tibqaʼ taqraha.

Miljuni taʼ qarrejja madwar id-​dinja sabu li t-​Traduzzjoni tad-​Dinja l-​Ġdida tilħaq dawn il-​ħtiġijiet.a Ikkunsidra x’qal raġel avanzat fl-​età fil-​Bulgarija. Hu attenda laqgħa tax-​Xhieda taʼ Ġeħova u ngħata kopja tat-​Traduzzjoni tad-​Dinja l-​Ġdida. Wara qal, “Ili naqra l-​Bibbja għal bosta snin, imma qatt ma qrajt traduzzjoni li hi daqshekk faċli biex tinftiehem u li tant tmiss il-​qalb.”

It-​3 Pass—Itlob

◼ Tistaʼ tifhem il-​Bibbja iktar billi tistaqsi lill-​Awtur għall-​għajnuna tiegħu, kif għamel is-​salmista li qal: “Ikxifli għajnejja, biex inkun nistaʼ nara l-​affarijiet taʼ l-​għaġeb fil-​liġi tiegħek.” (Salm 119:18) Itlob lil Alla kull darba li taqra l-​Iskrittura, u itolbu jgħinek tifhem il-​Kelma tiegħu. Ukoll, tistaʼ tesprimi r-​ringrazzjament tiegħek għall-​Bibbja, għax mingħajrha ma konniex inkunu nafu lil Alla.—Salm 119:62.

Jismaʼ Alla talb għall-​għajnuna bħal dan? Ikkunsidra dak li ġara lil żewġ aħwa taħt l-​għoxrin sena fl-​Urugwaj. Kienu mħawdin minħabba dak li tgħid il-​Bibbja f’Danjel 2:44 u talbu lil Alla biex jibgħat lil xi ħadd ħalli jgħinhom jifhmuh. Waqt li l-​Bibbja tat-​tfajliet kienet għadha miftuħa, tnejn mix-​Xhieda taʼ Ġeħova ħabbtulhom il-​bieb, qraw dak l-​istess vers li kienu talbu dwaru, u spjegaw li dan jiddeskrivi kif il-​gvern t’Alla kellu jieħu post il-​gvernijiet tal-​bnedmin.b L-​aħwa żgħażagħ kienu konvinti li Alla kien wieġeb it-​talba tagħhom għall-​għajnuna.

Ir-​4 Pass—Aqraha Kuljum

◼ Pubblikatur tal-​kotba nnota li “n-​nies f’daqqa waħda bdew jixtru iktar Bibbji” wara l-​attakki terroristiċi fl-​Istati Uniti fil-​11 taʼ Settembru, 2001. Ħafna jduru lejn il-​Kelma t’Alla biss fi żminijiet t’hemm kbir. Madankollu, il-​Bibbja tħeġġiġna biex naqrawha kuljum għax tgħid: “Dan il-​ktieb tal-​liġi m’għandux jitbiegħed minn fommok, u trid taqrah u timmedita fuqu lejl u nhar, sabiex tkun tistaʼ tieħu ħsieb tagħmel skond kulma hemm miktub fih; għax imbagħad se tirnexxi fi triqtek u mbagħad se taġixxi bl-​għerf.”—Ġożwè 1:8.

Il-​valur taʼ qari regulari tal-​Bibbja jistaʼ jiġi spjegat b’eżempju taʼ raġel li kellu attakk tal-​qalb u li jiddeċiedi jiekol ikel li hu iktar sustanzjuż. Se tgħinu din id-​dieta jekk iżommha biss meta jħoss weġgħa qawwija f’sidru? Le. B’mod konsistenti jrid iżomm maʼ din id-​dieta sustanzjuża biex jikseb l-​iktar ġid. Bl-​istess mod, qari tal-​Bibbja kuljum se jgħinek “tirnexxi fi triqtek.”

Il-​5 Pass—Uża Metodi Differenti

◼ Jistaʼ jkun tajjeb li taqra l-​Bibbja minn Ġenesi sa Rivelazzjoni, imma forsi tieħu pjaċir tipprova metodi oħrajn. Hawn se ssib xi suġġerimenti.

Aqra dwar karattru partikulari. Aqra l-​kapitli jew il-​kotba kollha li jiddiskutu aduratur partikulari t’Alla, bħal dawn li ġejjin:

• Ġużeppi: Ġenesi 37-​50.

• Rut: Rut 1-​3.

• Ġesù: Mattew 1-​28; Marku 1-​16; Luqa 1-​24; Ġwanni 1-​21.c

Iffoka fuq suġġett. Aqra l-​iskritturi li għandhom x’jaqsmu mas-​suġġett. Pereżempju, agħmel riċerka fuq is-​suġġett tat-​talb u mbagħad aqra l-​parir tal-​Bibbja fuq it-​talb, kif ukoll xi ftit mill-​ħafna talb imniżżel fil-​Bibbja.d

Aqra b’leħen għoli. Tistaʼ tibbenefika bil-​kbir jekk taqra l-​Bibbja b’leħen għoli. (Rivelazzjoni 1:3) Tistgħu saħansitra taqrawha b’leħen għoli bħala familja, billi taqraw paragrafu kull wieħed jew billi membri differenti tal-​familja jagħmluha tal-​karattri. Xi wħud jieħdu pjaċir jisimgħu rekording tal-​Bibbja. Waħda mara qalet: “Sibtha diffiċli biex nibda naqra l-​Bibbja, allura bdejt billi qgħadt nismaʼ l-​qari tal-​Bibbja rekordjat. Issa nsib li l-​Bibbja hija iktar eċċitanti minn rumanz tajjeb.”

Is-​6 Pass—Immedita

◼ Il-​ħajja mgħaġġla tal-​lum u d-​distrazzjonijiet tagħha jagħmluha diffiċli li timmedita. Madankollu, sewwasew bħalma rridu niddiġerixxu l-​ikel sabiex inkunu sostnuti, irridu nimmeditaw fuq dak li naqraw mill-​Bibbja sabiex nibbenefikaw. Nagħmlu dan billi nirrivedu f’moħħna dak li naqraw u billi nistaqsu lilna nfusna mistoqsijiet bħal: ‘X’tgħallimt dwar Alla Ġeħova? Kif tapplika għalija l-​informazzjoni? Kif nistaʼ nużaha biex ngħin lil ħaddieħor?’

Ħsieb bħal dan iħalli l-​messaġġ tal-​Bibbja jmissilna qalbna u jkabbar il-​ferħ li niksbu meta naqraw il-​Kelma t’Alla. Salm 119:97 jgħid: “Kemm inħobbha l-​liġi tiegħek! Il-​jum kollu moħħni fiha.” Permezz tal-​meditazzjoni, is-​salmista kien moħħu fl-​Iskrittura l-​jum kollu. Billi għamel hekk, ġie megħjun jiżviluppa mħabba profonda għal dak li tgħallem.

Is-​7 Pass—Fittex l-​Għajnuna Biex Tifhem

◼ Alla ma jistenniex li nifhmu bis-​sħiħ il-​Kelma tiegħu waħedna. Anki l-​Bibbja tirrikonoxxi li fiha “xi affarijiet tqal biex tifhimhom.” (2 Pietru 3:16) Il-​ktieb tal-​Atti jiddeskrivi uffiċjal Etjopjan li ħassu konfuż minħabba silta tal-​Bibbja li qara. Alla bagħat wieħed mill-​qaddejja Tiegħu biex jgħinu, u dan wassal biex ir-​raġel Etjopjan “baqaʼ sejjer ferħan fi triqtu.”—Atti 8:26-​39.

Int ukoll tistaʼ tibbenefika iktar mill-​qari tal-​Bibbja billi tfittex l-​għajnuna ħalli tifhem dak li taqra. Ikkuntattja x-​Xhieda taʼ Ġeħova fl-​inħawi tiegħek, jew ikteb fl-​indirizz f’paġna 4 taʼ din ir-​rivista għal studju tal-​Bibbja fid-​dar bla ħlas.

[Noti taʼ taħt]