Ibqaʼ Mqajjem, Kif Għamel Ġeremija
“Jien [Ġeħova] qed nibqaʼ mqajjem minħabba kelmti sabiex inwettaqha.”—ĠER. 1:12.
1, 2. Il-fatt li Ġeħova ‘baqaʼ mqajjem’ x’għandu x’jaqsam mas-siġra tal-lewż?
FUQ l-għoljiet tal-Libanu u Iżrael, waħda mill-ewwel siġar li tibda twarrad hi s-siġra tal-lewż. Il-fjuri sbieħ roża jew bojod tagħha jibdew jidhru saħansitra mill-aħħar taʼ Jannar jew il-bidu taʼ Frar. L-isem Ebrajk letteralment ifisser “dak li jistenbaħ.”
2 Meta Ġeħova ħatar lil Ġeremija bħala l-profeta tiegħu, din il-karatteristika tas-siġra tal-lewż intużat b’mod xieraq biex tispjega realtà importanti. Fil-bidu tal-ministeru tiegħu, il-profeta ġie muri f’viżjoni rimja taʼ din is-siġra. X’kienet tfisser? Ġeħova spjega: “Jien qed nibqaʼ mqajjem minħabba kelmti sabiex inwettaqha.” (Ġer. 1:11, 12) Sewwasew bħalma s-siġra tal-lewż ‘stenbħet’ kmieni, Ġeħova b’mod figurattiv kien qed ‘ibakkar’ biex jibgħat lill-profeti tiegħu jwissu lil niesu dwar il-konsegwenzi tad-diżubbidjenza. (Ġer. 7:25) U ma kienx se jistrieħ—kien se ‘jibqaʼ mqajjem’—sakemm titwettaq il-kelma profetika tiegħu. Fis-sena 607 Q.E.K., eżatt fil-ħin imwaqqat, il-ġudizzju taʼ Ġeħova ġie fuq il-ġens apostata taʼ Ġuda.
3. Dwar xiex nistgħu nkunu ċerti rigward Ġeħova?
3 Bl-istess mod illum, Ġeħova hu mqajjem, lest biex iwettaq ir-rieda tiegħu. Huwa impossibbli għalih li jittraskura t-twettiq taʼ kelmtu. Il-fatt li Ġeħova hu attent kif jeffettwak? Temmen li f’din is-sena 2011 Ġeħova hu “mqajjem” biex iwettaq il-wegħdi tiegħu? Jekk għandna kwalunkwe dubju dwar il-wegħdi ċerti taʼ Ġeħova, issa hu ż-żmien biex inqumu minn kwalunkwe nagħsa spiritwali. (Rum. 13:11) Bħala l-profeta taʼ Ġeħova, Ġeremija żamm ruħu mqajjem. Aħna se niġu megħjunin naraw kif nistgħu nipperseveraw fix-xogħol li tana Ġeħova jekk neżaminaw kif u għala Ġeremija baqaʼ mqajjem għall-inkarigu li kellu mingħand Alla.
Messaġġ Urġenti
4. Liema sfidi ffaċċja Ġeremija biex iwassal il-messaġġ tiegħu, u x’għamlu urġenti?
4 Jistaʼ jkun li Ġeremija kellu xi 25 sena meta rċieva l-inkarigu mingħand Ġeħova biex ikun għassies. (Ġer. 1:1, 2) Imma hu ħassu li ma kienx ħlief naqra taʼ tifel, mhux kwalifikat għall-aħħar biex ikellem lill-anzjani tal-ġens, irġiel avanzati fl-età u li kellhom pożizzjonijiet t’awtorità. (Ġer. 1:6) Hu kellu kundanni ħorox u ġudizzji tal-biżaʼ x’jipproklama, speċjalment lill-qassisin, lill-profeti foloz, u lill-ħakkiema, kif ukoll lil dawk li għażlu “t-triq l-iktar popolari” u li qatt ma wrew fedeltà. (Ġer. 6:13; 8:5, 6) It-tempju glorjuż tas-Sultan Salamun, li kien iċ-ċentru għall-qima vera għal kważi erbaʼ sekli, kien se jiġi mġarraf. Ġerusalemm u Ġuda kienu se jsiru ħerba, u l-abitanti tagħhom kienu se jsiru priġunieri. Jidher ċar li l-messaġġ li Ġeremija ġie inkarigat iwassal kien urġenti!
5, 6. (a) Ġeħova kif qed juża l-klassi taʼ Ġeremija llum? (b) Fuqiex se jiffoka l-istudju tagħna?
5 Fi żminijiet moderni, Ġeħova bi mħabba pprovda lill-umanità bi grupp taʼ Kristjani midlukin li jaġixxu t’għassiesa figurattivi u li jwissu dwar il-ġudizzju t’Alla kontra din id-dinja. Għal għaxriet taʼ snin, din il-klassi taʼ Ġeremija ħeġġet lin-nies biex jagħtu kas iż-żminijiet li qed ngħixu fihom. (Ġer. 6:17) Il-Bibbja tenfasizza li Ġeħova, il-Wieħed il-Kbir li Jistabbilixxi ż-Żmien, mhux qed idum. Il-jum tiegħu se jasal eżatt fil-ħin, f’siegħa li l-bnedmin ma jistennewhiex.—Sof. 3:8; Mk. 13:33; 2 Pt. 3:9, 10.
6 Żomm f’moħħok li Ġeħova hu mqajjem u se jġib id-dinja ġdida taʼ ġustizzja tiegħu eżatt fil-ħin. Peress li l-klassi taʼ Ġeremija u sħabhom dedikati jafu dan, huma għandhom jitqanqlu biex jibqgħu mqajmin għall-urġenza li dejjem tiżdied tal-messaġġ tagħhom. Dan kif jeffettwak? Ġesù indika li lkoll kemm aħna għandna bżonn nieħdu waqfa għas-Saltna t’Alla. Ejja neżaminaw tliet kwalitajiet li għenu lil Ġeremija jibqaʼ mqajjem għall-inkarigu tiegħu u li se jgħinuna nagħmlu l-istess.
Imħabba għan-Nies
7. Spjega kif l-imħabba qanqlet lil Ġeremija jipprietka minkejja ċ-ċirkustanzi diffiċli.
7 X’qanqal lil Ġeremija jipprietka minkejja ċ-ċirkustanzi diffiċli? Kellu mħabba għan-nies. Ġeremija kien jaf li rgħajja foloz kienu qed jikkaġunaw ħafna mill-inkwiet li n-nies iffaċċjaw. (Ġer. 23:1, 2) Dan l-għarfien għenu jwettaq xogħlu bi mħabba u mogħdrija. Hu ried li n-nies taʼ pajjiżu jisimgħu kliem Alla u jgħixu. Tant kien inkwetat li beka minħabba l-gwaj li kienu se jgħaddu minnu. (Aqra Ġeremija 8:21; 9:1.) Il-ktieb tal-Lamentazzjonijiet juri b’mod ħaj l-imħabba u t-tħassib profond li Ġeremija kellu għall-isem t’Alla u għan-nies. (Lam. 4:6, 9) Meta tara n-nies “maltrattati u mferrxin bħal nagħaġ mingħajr ragħaj” illum, ma tħossx ix-xewqa li ġġibilhom l-aħbar tajba li tfarraġ tas-Saltna t’Alla?—Mt. 9:36.
8. X’juri li s-sofferenza taʼ Ġeremija ma mlitux bl-imrar?
8 Ġeremija sofra taħt idejn l-istess nies li hu ried jgħin, madankollu ma qagħadx ipatti u ma mteliex bl-imrar. Hu wera s-sabar fit-tul u l-qalb tajba, anki mas-sultan korrott Sedekija! Wara li Sedekija tah f’idejn xi nies biex joqtluh, Ġeremija xorta talbu bil-ħrara biex jobdi minn leħen Ġeħova. (Ġer. 38:4, 5, 19, 20) Hija mħabbitna għan-nies b’saħħitha daqs kemm kienet taʼ Ġeremija?
Kuraġġ Mogħti Minn Alla
9. Kif nafu li l-kuraġġ taʼ Ġeremija kien ġej mingħand Alla?
9 Meta Ġeħova għall-ewwel kellmu, Ġeremija pprova jġib l-iskużi. Minn dan naraw li l-qlubija u s-sodizza li mbagħad wera ma kinux parti min-natura tiegħu. Le, il-qawwa straordinarja li wera Ġeremija matul il-karriera tiegħu bħala profeta fil-fatt ġiet minħabba li straħ għalkollox fuq Alla. Ġeħova tassew kien mal-profeta “bħal wieħed setgħan u tal-biżaʼ,” fis-sens li appoġġa lil Ġeremija u tah is-saħħa biex jagħmel l-inkarigu. (Ġer. 20:11) Ġeremija tant kien magħruf għall-qlubija u l-kuraġġ li matul il-ministeru taʼ Ġesù fuq l-art, xi wħud ħasbu li Ġesù kien Ġeremija rxoxtat!—Mt. 16:13, 14.
10. Għala jistaʼ jingħad li l-fdal midluk hu ‘fuq ġnus u saltniet’?
10 Bħala s-“Sultan tal-ġnus,” Ġeħova inkariga lil Ġeremija biex iwassal messaġġ taʼ ġudizzju lil ġnus u saltniet. (Ġer. 10:6, 7) Imma l-fdal midluk f’liema sens hu “fuq il-ġnus u fuq is-saltniet”? (Ġer. 1:10) Bħall-profeta tal-qedem, il-klassi taʼ Ġeremija ġiet inkarigata mis-Sovran tal-univers. Għalhekk, il-qaddejja midlukin t’Alla b’mod xieraq ġew awtorizzati jagħmlu dikjarazzjonijiet madwar id-dinja kontra ġnus u saltniet. Il-klassi taʼ Ġeremija ngħatat l-awtorità minn Alla l-Iktar Għoli u għandha l-lingwaġġ ċar tal-Kelma ispirata tiegħu. Tuża dawn biex tiddikjara li l-ġnus u s-saltniet tal-lum se jiġu maqlugħin u meqrudin fiż-żmien imwaqqat t’Alla u bil-mezz li jagħżel hu. (Ġer. 18:7-10; Riv. 11:18) Il-klassi taʼ Ġeremija hija determinata li ma ċċedix fl-inkarigu mogħti minn Alla biex tipproklama l-messaġġi taʼ ġudizzju taʼ Ġeħova madwar l-art kollha.
11. X’se jgħinna nippritkaw bla heda meta niffaċċjaw ċirkustanzi diffiċli?
11 Mhijiex xi ħaġa taʼ barra minn hawn li xi kultant inħossuna skuraġġiti meta niffaċċjaw l-oppożizzjoni, l-indifferenza, jew iċ-ċirkustanzi diffiċli. (2 Kor. 1:8) Imma bħal Ġeremija, ejja nkomplu nħabirku. Taqtax qalbek. Jalla kull wieħed u waħda minna jibqaʼ jitlob lil Alla bil-ħeġġa, jistrieħ fuqu, u ‘jagħmel il-qalb’ hekk kif idur lejh għall-għajnuna. (1 Tess. 2:2) Peress li aħna aduraturi veri, għandna nibqgħu mqajmin għar-responsabbiltajiet li għandna mingħand Alla. Irridu nkunu determinati li nibqgħu nippritkaw bla heda dwar il-qerda tal-Kristjaneżmu, li ġiet iffigurata bil-quddiem mill-qerda taʼ Ġerusalemm żleali. Il-klassi taʼ Ġeremija mhux biss se tiddikjara “s-sena t’approvazzjoni min-naħa taʼ Ġeħova” imma wkoll “jum il-vendetta min-naħa t’Alla tagħna.”—Is. 61:1, 2; 2 Kor. 6:2.
Ferħ li Jiġi mill-Qalb
12. Għala nistgħu nikkonkludu li Ġeremija żamm il-ferħ tiegħu, u x’kien fattur ewlieni biex jagħmel dan?
12 Ġeremija sab il-ferħ f’xogħlu. Hu qal lil Ġeħova: “Kliemek ġie għandi, u jien kiltu; u kelmtek saret għalija l-ferħ u l-hena taʼ qalbi; għax ismek issejjaħ fuqi, O Ġeħova.” (Ġer. 15:16) Għal Ġeremija, kien privileġġ li jirrappreżenta lill-Alla l-veru u li jipprietka kelmtu. Huwa interessanti li meta Ġeremija ffoka fuq it-twaqqigħ għaċ-ċajt min-nies, hu tilef il-ferħ li kellu. Meta ħaseb fuq kemm il-messaġġ tiegħu kien sabiħ u importanti, il-ferħ tiegħu reġaʼ tkebbes.—Ġer. 20:8, 9.
13. Għala hu importanti li nitimgħu lilna nfusna b’veritajiet spiritwali profondi biex inżommu l-ferħ tagħna?
13 Sabiex inżommu l-ferħ fix-xogħol tal-ippritkar fi żmienna, hemm bżonn li nitimgħu lilna nfusna b’“ikel solidu,” il-veritajiet profondi tal-Kelma t’Alla. (Ebr. 5:14) Studju iktar fil-fond jibni l-fidi. (Kol. 2:6, 7) Iġegħelna nifhmu kemm l-azzjonijiet tagħna tassew imissu qalb Ġeħova. Jekk qed nissieltu biex insibu l-ħin ħalli naqraw u nistudjaw il-Bibbja, għandna nerġgħu neżaminaw l-iskeda tagħna. Saħansitra ftit minuti taʼ studju u meditazzjoni kuljum se jressquna eqreb taʼ Ġeħova u jikkontribwixxu għall-‘ferħ u l-hena taʼ qalbna,’ kif ġara fil-każ taʼ Ġeremija.
14, 15. (a) Liema frott ħareġ mill-fatt li Ġeremija lealment żamm mal-inkarigu tiegħu? (b) Il-poplu t’Alla llum x’jifhem dwar ix-xogħol tal-ippritkar?
14 Ġeremija veru ddikjara t-twissijiet u l-messaġġ taʼ ġudizzju taʼ Ġeħova bla heda, però f’qalbu kellu l-inkarigu ‘biex jibni u jħawwel.’ (Ġer. 1:10) Ix-xogħol tiegħu biex jibni u jħawwel kellu l-frott. Xi Lhud, kif ukoll uħud li ma kinux Iżraelin, salvaw mill-qerda taʼ Ġerusalemm fis-sena 607 Q.E.K. Aħna nafu dwar ir-Rekabin, Għebed-melek, u Baruk. (Ġer. 35:19; 39:15-18; 43:5-7) Dawn il-ħbieb taʼ Ġeremija li kienu leali u li kellhom il-biżaʼ t’Alla jagħtu stampa tajba bil-quddiem taʼ dawk li llum għandhom it-tama għall-art u li jissieħbu mal-klassi taʼ Ġeremija. Il-klassi taʼ Ġeremija hija ferħana ħafna li tistaʼ tibni spiritwalment lil din il-“folla kbira.” (Riv. 7:9) Bl-istess mod, dawn l-imseħbin leali tal-midlukin jiksbu sodisfazzjon kbir f’li jgħinu lill-uħud taʼ qalb onesta jaslu għall-għarfien tal-verità.
15 Il-poplu t’Alla jifhem li l-ippritkar tal-aħbar tajba mhuwiex biss servizz pubbliku għal dawk li jisimgħu imma huwa wkoll att taʼ qima lil Alla tagħna. Kemm jekk insibu min jismagħna u kemm jekk le, aħna niksbu ferħ kbir f’li nagħtu servizz sagru lil Ġeħova permezz tal-ippritkar tagħna.—Salm 71:23; aqra Rumani 1:9.
‘Ibqaʼ Mqajjem’ għall-Inkarigu Tiegħek!
16, 17. Rivelazzjoni 17:10 u Ħabakkuk 2:3 x’juru dwar l-urġenza taż-żminijiet tagħna?
16 L-urġenza taż-żminijiet li ngħixu fihom hi enfasizzata meta nikkunsidraw il-profezija ispirata f’Rivelazzjoni 17:10. Is-sebaʼ sultan, il-Qawwa Dinjija Anglo-Amerikana, tfaċċa. Dwaru naqraw: ‘Meta s-sebaʼ qawwa dinjija tasal trid tibqaʼ għal żmien qasir.’ S’issa dak iż-“żmien qasir” bilfors li wasal qrib tmiemu. Il-profeta Ħabakkuk jagħtina din l-assiguranza dwar it-tmiem taʼ din is-sistema mill-agħar: “Il-viżjoni qed tistenna ż-żmien stabbilit tagħha . . . Ibqaʼ stennieha; għax se sseħħ żgur. Mhix se tkun tard.”—Ħab. 2:3.
17 Staqsi lilek innifsek: ‘Il-mod kif ngħix ħajti tassew juri li nifhem l-urġenza taż-żminijiet tagħna? Ħajti turi li qed nistenna li ġej it-tmiem dalwaqt? Jew inkella d-deċiżjonijiet u l-prijoritajiet tiegħi jindikaw li ma nistenniex li ġej it-tmiem dalwaqt jew li saħansitra m’iniex ċert jekk hux qatt se jiġi?’
18, 19. Għala issa mhuwiex iż-żmien li nnaqqsu l-pass?
18 Ix-xogħol tal-klassi tal-għassies għadu mhux lest. (Aqra Ġeremija 1:17-19.) Kemm hu sors taʼ ferħ li l-fdal midluk hu wieqaf bla ma jitħarrek, bħal “pilastru tal-ħadid” u “belt fortifikata”! Għandhom ‘ġenbejhom imħażżmin bil-verità’ fis-sens li jħallu l-Kelma t’Alla ssaħħaħhom sakemm jitlesta x-xogħol li ġew inkarigati bih. (Efes. 6:14) B’determinazzjoni simili, dawk tal-folla l-kbira jappoġġaw b’mod attiv lill-klassi taʼ Ġeremija f’li twettaq l-inkarigu divin tagħha.
19 Issa mhuwiex iż-żmien biex innaqqsu l-attività tas-Saltna imma biex nikkunsidraw l-importanza tal-kliem f’Ġeremija 12:5. (Aqra.) Ilkoll kemm aħna niffaċċjaw sfidi li jkollna nissaportu. Dawn il-provi tal-fidi jistgħu jitqabblu maʼ ġerrejja li bilfors ikollna niġru magħhom. Minkejja dan, hekk kif toqrob it-“tribulazzjoni kbira,” nistgħu nistennew li t-tbatijiet se jiżdiedu. (Mt. 24:21) It-taqbid li se jkollna mad-diffikultajiet iktar diffiċli u futuri nistgħu nxebbhuh maʼ li “ttellaq maż-żwiemel.” Hemm bżonn taʼ ħafna sabar min-naħa tal-bniedem biex ilaħħaq maʼ żwiemel jiġru. Għalhekk, hu tajjeb li nissaportu l-provi li niffaċċjaw issa għax jistgħu jippreparawna biex nissaportu fil-provi li ġejjin.
20. X’int determinat li tagħmel?
20 Ilkoll kemm aħna nistgħu nimitaw lil Ġeremija u nwettqu b’suċċess l-inkarigu tagħna biex nippritkaw! Kwalitajiet bħall-imħabba, il-kuraġġ, u l-ferħ qanqlu lil Ġeremija biex iwettaq b’lealtà l-ministeru tiegħu li dam 67 sena. Il-fjura mill-isbaħ tal-lewż tfakkarna li Ġeħova se ‘jibqaʼ mqajjem’ għal kelmtu sabiex iwettaqha. Mela, għandna raġuni tajba biex nagħmlu l-istess. Ġeremija baqaʼ ‘mqajjem,’ u aħna nistgħu wkoll.
Tiftakar Int?
• L-imħabba kif għenet lil Ġeremija ‘jibqaʼ mqajjem’ għall-inkarigu tiegħu?
• Għaliex għandna bżonn il-kuraġġ mogħti minn Alla?
• X’għen lil Ġeremija jżomm il-ferħ tiegħu?
• Int għala trid ‘tibqaʼ mqajjem’?
[Stampi f’paġna 31]
Se tibqaʼ tipprietka minkejja l-oppożizzjoni?