Għala Din il-​Mistoqsija?

“Għaddej tajjeb mingħajr Alla? Miljuni huma.” Hekk qal messaġġ li dan l-​aħħar deher fuq kartelluni u li tħallas minn grupp taʼ atei. Biċ-​ċar, dawn iħossu li m’għandhomx bżonnu lil Alla.

Mill-​banda l-​oħra, ħafna li jsostnu li jemmnu f’Alla jieħdu deċiżjonijiet bħallikieku ma jeżistix. Dwar il-​membri tal-​knisja tiegħu stess, Salvatore Fisichella, arċisqof Kattoliku, qal: “Meta n-​nies iħarsu lejna, x’aktarx li ħadd ma jagħraf li aħna Kristjani llum għax l-​istil taʼ ħajja tagħna hu l-​istess bħal taʼ dawk li ma jemmnux.”

Xi wħud għandhom wisq x’jagħmlu biex joqogħdu jħabblu rashom dwar Alla. Huma jqisuh inaċċessibbli jew ’il bogħod wisq biex jagħmel differenza f’ħajjithom. L-​iktar l-​iktar, individwi bħal dawn iduru lejn Alla meta jinqalgħalhom l-​inkwiet jew meta jkollhom bżonn xi ħaġa—kważi kważi bħallikieku hu xi seftur dejjem lest biex jaqdihom.

Oħrajn jaraw ftit valur f’tagħlim reliġjuż, jew inkella ma jagħmlux dak li r-​reliġjon tagħhom tgħallem. Biex insemmu eżempju wieħed, 76 fil-​mija tal-​Kattoliċi fil-​Ġermanja jemmnu li hu aċċettabbli għal raġel u mara li jgħixu flimkien qabel iż-​żwieġ—ħarsa kuntrarja kemm għat-​tagħlim tal-​knisja tagħhom kif ukoll għal dak tal-​Bibbja. (1 Korintin 6:18; Ebrej 13:4) M’għandniex xi ngħidu, il-​Kattoliċi mhumiex waħedhom f’li jagħrfu li hemm differenza bejn l-​istil taʼ ħajja tagħhom u dak li tgħallem il-​knisja tagħhom. Il-​kleru taʼ ħafna reliġjonijiet jgħidu li l-​membri tagħhom jaġixxu “prattikament taʼ atei.”

Dawn l-​eżempji loġikament iwassluna għall-​mistoqsija: Għandna verament bżonnu lil Alla? Din il-​kwistjoni bla dubju mhix waħda ġdida. Tqajmet għall-​ewwel darba fl-​ewwel ftit paġni tal-​Bibbja. Sabiex insibu t-​tweġiba għal din il-​mistoqsija, ejja niffokaw fuq xi kwistjonijiet li tqajmu fil-​ktieb Bibliku tal-​Ġenesi.