Kieku Int x’Tgħidlu lil Wieħed Ateu?

¹ “Jien atea,” qalet professoressa mill-​Polonja lil waħda missjunarja fl-​Afrika. Madankollu, l-​oħt irnexxielha taqbad diskussjoni maʼ din il-​mara u tatha l-​ktieb Life​—How Did It Get Here? By Evolution or by Creation? Meta l-​missjunarja rritornat il-​ġimgħa taʼ wara, il-​professoressa qaltilha: “M’għadnix iktar atea!” Hi kienet qrat il-​ktieb Creation kollu u issa staqsiet għal studju tal-​Bibbja. X’tistaʼ tagħmel biex ikollok suċċess f’li tagħti xiehda lil dawk li jgħidu li ma jemmnux f’Alla? L-​ewwelnett, ikkunsidra d-​diversi raġunijiet għala n-​nies jgħidu li ma jemmnux.

² Fatturi li Jikkontribwixxu għax-​Xettiċiżmu: Mhux l-​atei kollha trabbew hekk. Ħafna minnhom kienu esposti għal xi forma taʼ reliġjon u xi darba kienu jemmnu f’Alla. Madankollu, xi problemi serji taʼ saħħa jew fil-​familja, jew ċerti nġustizzji li jkunu esperjenzaw dgħajfulhom il-​fidi tagħhom. Għal oħrajn, il-​korsijiet li ġew mgħallmin fl-​iskejjel t’edukazzjoni għolja kellhom impatt negattiv fuq il-​konċett tagħhom dwar Alla. Innota l-​eżempji li ġejjin taʼ atei li eventwalment żviluppaw twemmin qawwi f’Alla Jehovah u saru Xhieda tiegħu.

³ Waħda mara f’Pariġi twieldet b’marda fl-​għadam li kienet iddgħajjifha. Għalkemm kienet ġiet mgħammda bħala Kattolika, hi ddikjarat lilha nfisha bħala atea. Meta staqsiet lis-​sorijiet għala Alla ppermetta li hi titwieled b’diżabilità bħal din, it-​tweġiba tagħhom kienet: “Għax iħobbok.” Hi rrifjutat li taċċetta din l-​idea assurda. Ukoll, ikkunsidra lil wieħed żagħżugħ fil-​Finlandja li sabu li kellu marda inkurabbli fil-​muskoli u spiċċa f’siġġu tar-​roti. Ommu ħaditu għand wieħed Pentekostali li kien jgħid li jfejjaq lin-​nies morda. Imma ma seħħ l-​ebda fejqan mirakoluż. Bħala riżultat, iż-​żagħżugħ tilef l-​interess f’Alla u sar ateu.

⁴ Raġel fil-​Ħonduras trabba bħala Kattoliku imma studja l-​filosofija Soċjalista u l-​ateiżmu. Konvint mit-​tagħlim taʼ l-​università li l-​umanità hija r-​riżultat taʼ l-​evoluzzjoni, hu ma baqax jemmen iktar f’Alla. B’mod simili, waħda mara fl-​Istati Uniti trabbiet bħala Metodista. Fil-​kulleġġ kienet tieħu l-​lezzjonijiet tal-​psikoloġija. It-​twemmin tagħha kif ġie effettwat? Hi qalet: “F’sajf wieħed qerduli l-​fidi kollha li kelli fir-​reliġjon.” Studju tal-​Bibbja bnielha l-​fidi tagħha f’Alla u taha skop fil-​ħajja.

⁵ Nilħqu l-​Qlub taʼ Wħud Sinċieri: Ħafna individwi li jgħidu li ma jemmnux f’Alla jixtiequ jkunu jafu jekk hemmx xi soluzzjoni għall-​problemi taʼ nuqqas taʼ saħħa, ġlied fil-​familja, inġustizzja, u affarijiet bħal dawn. Huma interessati sinċerament f’li jsibu t-​tweġibiet għall-​mistoqsijiet bħal: ‘Għala jeżisti l-​ħażen?’ ‘Għala l-​affarijiet ħżiena jiġru lin-​nies tajbin?’ u ‘X’inhu s-​sinjifikat tal-​ħajja?’

⁶ Raġel u mara miżżewġin li jgħixu fl-​Isvizzera trabbew it-​tnejn li huma bħala atei. Meta saru jafu għall-​ewwel darba bil-​verità, ir-​reazzjoni tagħhom kienet negattiva. Imma dawn kellhom problemi serji fil-​familja u kienu qed jikkunsidraw id-​divorzju. Meta x-​Xhud reġgħet marret iżżurhom, uriet lil din il-​koppja kif jistgħu jegħlbu l-​problemi tagħhom permezz tal-​Bibbja. Il-​koppja baqgħet mistagħġba bil-​pariri prattiċi li hemm fl-​Iskrittura, u qablu li jibdew studju tal-​Bibbja. Iż-​żwieġ tagħhom issaħħaħ, għamlu progress spiritwali, u tgħammdu.

⁷ X’Tistaʼ Tgħidlu lil Wieħed Ateu: Meta xi ħadd jgħidlek li hu ateu, ipprova sib ir-​raġuni għala qed jgħid hekk. Huwa dan minħabba l-​edukazzjoni li rċieva, il-​problemi li esperjenza, jew l-​ipokresija reliġjuża u t-​tagħlim falz? Int tistaʼ tistaqsih: “Minn dejjem ħassejtek hekk?” jew “X’inhi r-​raġuni għall-​konklużjoni tiegħek?” It-​tweġiba tiegħu se tgħinek tiddetermina x’tistaʼ tgħidlu. Fejn ikun hemm bżonn t’argumenti qawwijin, il-​ktieb Is There a Creator Who Cares About You? jistaʼ jkun proprju dak li hu meħtieġ.

⁸ Int tistaʼ tkompli konversazzjoni maʼ wieħed ateu billi tistaqsih:

◼ “Ġieli jgħaddilek minn moħħok: ‘Jekk hemm Alla, għala hawn tant sofferenza u inġustizzja fid-​dinja?’ [Agħti ċans għal tweġiba.] Tippermettili nurik x’inhi l-​ħarsa tal-​Bibbja dwar dan is-​suġġett?” Aqra Ġeremija 10:23. Wara li taqrah, staqsih x’inhi l-​opinjoni tiegħu dwar il-​vers. Imbagħad urih paġni 15 u 16 tal-​browxer “Ħares! Qed Nagħmel l-​Affarijiet Kollha Ġodda” jew, minflok, tistaʼ tuża kapitlu 10 tal-​ktieb Creator. Stiednu biex jaċċetta l-​pubblikazzjoni u jaqra l-​materjal.—Għal iktar suġġerimenti, ara l-​ktieb Reasoning, paġni 150-1.

⁹ Nammettu li mhux l-​atei kollha se jaċċettaw il-​verità. Imma hemm ħafna li huma lesti li jikkunsidraw ħarsa oħra. Uża l-​loġika, il-​persważjoni u, fuq kollox, il-​qawwa tal-​Kelma t’Alla biex tgħinhom jaraw il-​verità.—Atti 28:​23, 24; Lhud 4:12.