Hu possibbli li anki issa tkun ferħan!
XI DARBA l-ħajja se tkun mingħajr l-effetti koroh tal-mard, ix-xjuħija, u l-mewt. Dan il-futur mill-isbaħ jistaʼ jkun tiegħek! Imma l-ħajja llum għadha mimlija b’ħafna problemi u diffikultajiet. X’jistaʼ jgħinek biex xorta tkun ferħan? Il-Bibbja toffri gwida li tistaʼ tgħinek biex tkun ferħan u sodisfatt anki issa. Ikkunsidra xi ftit mill-isfidi tal-ħajja u kif il-Bibbja tistaʼ tgħinek.
ISSIB IL-KUNTENTIZZA
Il-parir mill-Bibbja: “Ħa jkun il-mod kif tgħixu ħieles mill-imħabba għall-flus, waqt li tkunu kuntenti b’dak li għandkom fil-preżent.”—Ebrej 13:5.
Illum, hemm ħafna affarijiet li n-nies jgħidu li għandu jkollna. Iżda l-Bibbja tgħid li nistgħu ‘nkunu kuntenti b’dak li għandna fil-preżent.’ Kif?
Evita “l-imħabba għall-flus.” In-nies jissagrifikaw is-saħħa, il-familja, il-ħbieb, il-valuri, u anke d-dinjità tagħhom. Dan kollu għax għandhom “imħabba għall-flus.” (1 Timotju 6:10) Xi prezz għoli qed iħallsu! Fl-aħħar mill-aħħar, xi ħadd li jħobb il-flus qatt mhu se jkun sodisfatt b’dak li għandu.—Ekkleżjasti 5:10.
Għożż in-nies u mhux l-affarijiet. Veru li xi affarijiet jistgħu jkunu utli. Imma l-affarijiet la jistgħu jħobbuna u lanqas jistgħu japprezzawna; in-nies biss jistgħu jagħmlu dan. Li jkollok “ħabib veru” se jgħinek biex tkun ferħan.—Proverbji 17:17.
AĦNA NISTGĦU NKUNU FERĦANIN ANKI ISSA BILLI NIMXU FUQ IL-GWIDA TAL-BIBBJA
TKAMPA MAʼ SAĦĦA BATUTA
Il-parir mill-Bibbja: “Qalb ferriħija tajba biex tfejjaq.”—Proverbji 17:22.
Il-ferħ jistaʼ jgħinna nissaportu l-mard. Imma kif nistgħu nkunu ferħanin meta jkollna saħħa batuta?
Uri apprezzament. Jekk naħsbu biss fuq il-problemi tagħna, ‘il-jiem kollha’ se jidhru ħżiena. (Proverbji 15:15) Minflok, “uru li intom grati,” tgħid il-Bibbja. (Kolossin 3:15) Tgħallem apprezza l-affarijiet sbieħ tal-ħajja, anke jekk ikunu żgħar. Inżul ix-xemx, żiffa ħelwa, u t-tbissima taʼ xi ħadd li tħobb jistgħu jagħmlu l-ħajja ħafna iktar pjaċevoli.
Agħmel affarijiet għal oħrajn. Anke jekk m’għandekx saħħa tajba, “hemm iktar hena meta tagħti milli meta tirċievi.” (Atti 20:35) Meta oħrajn japprezzaw l-isforzi tagħna, inħossu sodisfazzjon, u dan jgħinna biex naljenaw rasna mill-problemi tagħna. Aħna nistgħu ntejbu ħajjitna stess billi ngħinu lil oħrajn itejbu ħajjithom.
ISSAĦĦAĦ IŻ-ŻWIEĠ
Il-parir mill-Bibbja: ‘Aċċertaw ruħkom minn dak li hu iktar importanti.’—Filippin 1:10.
Koppji li ma tantx iqattgħu ħin flimkien jistgħu jagħmlu ħsara lir-relazzjoni tagħhom billi jitbiegħdu minn xulxin. Għalhekk, l-irġiel u n-nisa miżżewġin ikunu għaqlin jekk jagħtu prijorità liż-żwieġ tagħhom, li hu wieħed mill-iktar affarijiet importanti f’ħajjithom.
Agħmlu affarijiet flimkien. Agħmlu pjanijiet biex tagħmlu affarijiet flimkien. Il-Bibbja tgħid: “Tnejn aħjar minn wieħed.” (Ekkleżjasti 4:9) Flimkien tistgħu ssajru xi ikla, tagħmlu l-eżerċizzju, tieħdu xi drink waqt li tirrilassaw, jew tagħmlu xi ħaġ’oħra.
Esprimi mħabbtek. Il-Bibbja tinkuraġġixxi lil raġel u mara miżżewġin biex iħobbu u jirrispettaw lil xulxin. (Efesin 5:28, 33) Tbissima ħelwa, tgħanniqa mill-qalb, jew rigal żgħir jistgħu jgħinu ħafna biex isaħħu ż-żwieġ. Ovvjament, il-miżżewġin għandhom iżommu l-intimità sesswali bejniethom biss.—Ebrej 13:4.