Kompli qim lil Ġeħova meta l-attivitajiet kollha tagħna jkunu projbiti

1-2. (a) Projbizzjoni fuq il-​qima tagħna għala m’għandhiex tkun taʼ sorpriża għalina? (b) X’se nikkunsidraw f’dan l-​artiklu?

FL-​2018, iktar minn 223,000 pubblikatur tal-​aħbar tajba għexu f’pajjiżi fejn l-​attivitajiet spiritwali kollha tagħna kienu projbiti jew kien hemm restrizzjonijiet ħorox fuq xi ftit minnhom. Dan mhux taʼ sorpriża. Kif tgħallimna mill-​artiklu taʼ qabel, il-​Kristjani veri jistennew li jiġu persegwitati. (2 Tim. 3:12) Ngħixu fejn ngħixu, il-​gvernijiet jistgħu f’daqqa waħda u mingħajr twissija jipprojbixxu l-​qima lil Alla tagħna kollu mħabba, Ġeħova.

² Jekk il-​gvern tal-​pajjiż fejn toqgħod jiddeċiedi li jipprojbixxi l-​qima taʼ Ġeħova, int tistaʼ tistaqsi lilek innifsek: ‘Il-​persekuzzjoni tfisser li tlifna l-​approvazzjoni t’Alla? Se twaqqafna projbizzjoni milli nqimu lil Ġeħova? Għandi mmur noqgħod pajjiż ieħor fejn nistaʼ nqim lil Alla bil-​libertà?’ F’dan l-​artiklu se niddiskutu dawn il-​mistoqsijiet. Ukoll se nikkunsidraw kif nistgħu nkomplu nqimu lil Ġeħova meta nkunu taħt projbizzjoni u liema nases għandna nevitaw.

IL-​PERSEKUZZJONI TFISSER LI TLIFNA L-​APPROVAZZJONI T’ALLA?

3. Skont it-​2 Korintin 11:23-27, x’persekuzzjoni għadda minnha l-​appostlu leali Pawlu, u x’nitgħallmu mill-​eżempju tiegħu?

³ Jekk gvern jipprojbixxi l-​qima tagħna, aħna forsi naslu għall-​konklużjoni żbaljata li m’għandniex il-​barka t’Alla. Imma ftakar, il-​persekuzzjoni ma tfissirx li Ġeħova mhux kuntent bina. Ejja nieħdu l-​eżempju tal-​appostlu Pawlu. Hu żgur li kellu l-​approvazzjoni t’Alla. Hu kellu l-​privileġġ li jikteb 14-​il ittra tal-​Iskrittura Griega Kristjana, u kien appostlu tal-​ġnus. Madankollu, hu għadda minn persekuzzjoni ħarxa. (Aqra t-​2 Korintin 11:23-27.) Mill-​esperjenza tiegħu nitgħallmu li Ġeħova jippermetti li l-​qaddejja leali tiegħu jkunu persegwitati.

4. Id-​dinja għala tobgħodna?

⁴ Ġesù spjega għala għandna nistennew l-​oppożizzjoni. Hu qal li se nkunu mibgħudin għax m’aħniex parti mid-​dinja. (Ġw. 15:18, 19) Il-​persekuzzjoni ma tfissirx li m’għandniex il-​barka taʼ Ġeħova. Minflok, din turi li qed nagħmlu dak li hu sew!

SE TWAQQAFNA L-​PROJBIZZJONI MILLI NQIMU LIL ĠEĦOVA?

5. Jistgħu sempliċi bnedmin iwaqqfu kompletament il-​qima lil Ġeħova? Spjega.

⁵ Sempliċi bnedmin li jopponuna ma jistgħux iwaqqfu kompletament il-​qima lil Alla li jistaʼ kollox, Ġeħova. Ħafna provaw imma ma rnexxilhomx. Ikkunsidra x’ġara matul it-​Tieni Gwerra Dinjija. F’dak iż-​żmien, gvernijiet f’ħafna pajjiżi ppersegwitaw bl-​aħrax lill-​poplu t’Alla. Xogħolna kien projbit mhux biss mill-​partit Nazista fil-​Ġermanja imma wkoll mill-​gvernijiet fl-​Awstralja, il-​Kanada, u pajjiżi oħra. Madankollu, innota x’ġara. Meta bdiet il-​gwerra, fl-​1939, kien hemm 72,475 pubblikatur madwar id-​dinja. Sa ma spiċċat il-​gwerra fl-​1945, bil-​barka taʼ Ġeħova kien hemm 156,299 pubblikatur. In-​numru taʼ pubblikaturi kien kiber iktar mid-​doppju!

6. Liema effetti pożittivi jistaʼ jkun hemm meta nkunu persegwitati? Agħti eżempju.

⁶ Meta tinqalaʼ l-​persekuzzjoni, huwa naturali li nħossuna xi ftit beżgħanin. Imma l-​persekuzzjoni għandha wkoll effetti pożittivi. Din tistaʼ timmotivana nkunu iktar determinati fis-​servizz taʼ Ġeħova. Pereżempju, koppja b’tifel żgħir kienet toqgħod f’pajjiż fejn il-​gvern iddeċieda li jipprojbixxi l-​qima tagħna. Minflok ma beżgħu u għamlu inqas għal Ġeħova, huma bdew jaqdu bħala pijunieri regolari. Il-​mara saħansitra telqet mix-​xogħol li kellha b’paga għolja biex tagħmel dan. Ir-​raġel qal li l-​projbizzjoni qajmet il-​kurżità taʼ ħafna nies dwar ix-​Xhieda taʼ Ġeħova. B’hekk, hu sabha eħfef li jibda studji tal-​Bibbja. Il-​projbizzjoni kellha effett pożittiv ieħor. Anzjan fl-​istess pajjiż ikkummenta li ħafna li kienu waqfu jaqdu lil Ġeħova bdew jattendu l-​laqgħat u reġgħu bdew jippritkaw.

7. (a) X’nitgħallmu minn Levitiku 26:36, 37? (b) Int x’se tagħmel jekk inkunu taħt projbizzjoni?

⁷ Meta l-​għedewwa tagħna jipprojbixxu l-​qima tagħna, huma jittamaw li jġegħluna nibżgħu naqdu lil Ġeħova. Flimkien mal-​projbizzjoni, huma forsi jgħidu gideb dwarna, jibagħtu uffiċjali biex ifittxulna fi djarna, jiħduna l-​qorti b’forza, jew saħansitra jitfgħu l-​ħabs lil xi ftit minna. Huma jittamaw li nitwerwru għax irnexxielhom jitfgħu numru żgħir minna l-​ħabs. Jekk nibdew nibżgħu minnhom u minn dak li forsi jagħmlulna, aħna nistgħu nnaqqsu jew saħansitra nwaqqfu s-​servizz tagħna lil Ġeħova. Aħna ma rridux insiru bħal dawk deskritti f’​Levitiku 26:36, 37. (Aqra.) Aħna mhux se nħallu l-​biżaʼ ġġegħelna nnaqqsu jew inwaqqfu l-​attivitajiet spiritwali tagħna. Aħna nafdaw kompletament f’Ġeħova u mhux se nippanikkjaw. (Is. 28:16) Aħna nfittxu għall-​gwida taʼ Ġeħova permezz tat-​talb. Peress li Alla tagħna qed jgħinna, aħna nafu li lanqas l-​iktar gvern uman b’saħħtu ma jistaʼ jwaqqafna milli nqimu lil Alla tagħna lealment.—Ebr. 13:6.

GĦANDI MMUR NOQGĦOD PAJJIŻ IEĦOR?

8-9. (a) Liema deċiżjoni personali għandu bżonn jieħu kull kap taʼ familja jew kull individwu? (b) X’se jgħinek tieħu deċiżjoni għaqlija?

⁸ Jekk il-​gvern fejn toqgħod jipprojbixxi l-​qima tagħna, int forsi taħseb jekk għandekx tmur toqgħod f’pajjiż fejn tistaʼ taqdi lil Ġeħova bil-​libertà. Din hi deċiżjoni personali li ħadd ma jistaʼ jieħu għalik. Qabel ma tiddeċiedi x’tagħmel, tistaʼ tistudja dak li għamlu l-​Kristjani fl-​ewwel seklu meta kienu persegwitati. Wara li l-​għedewwa ħaġġru lil Stiefnu għall-​mewt, id-​dixxipli f’Ġerusalemm xterdu mal-​Lhudija u s-​Samarija u baqgħu sejrin sal-​Feniċja, Ċipru, u Antjokja. (Mt. 10:23; Atti 8:1; 11:19) Ukoll tistaʼ tistudja dak li għamel Pawlu meta kien hemm perjodu ieħor taʼ persekuzzjoni. Hu ddeċieda li jibqaʼ fil-​postijiet fejn in-​nies opponew ix-​xogħol tal-​ippritkar avolja dan setaʼ kien perikoluż għalih. Dan għamlu għax ried jipprietka l-​aħbar tajba u jsaħħaħ lil ħutu fi bliet li kienu għaddejjin minn persekuzzjoni ħarxa.—Atti 14:19-23.

⁹ X’nitgħallmu minn dawn ir-​rakkonti? Kull kap taʼ familja għandu jieħu deċiżjoni personali dwar li jmur joqgħod pajjiż ieħor. Qabel ma jiddeċiedi, hu għandu jitlob u jaħseb bir-​reqqa dwar iċ-​ċirkustanzi taʼ familtu u l-​effetti pożittivi u negattivi li jistaʼ jkun hemm fuqhom. F’dan l-​aspett, kull Kristjan irid “iġorr it-​tagħbija tiegħu.” (Gal. 6:5) M’għandniex niġġudikaw lil oħrajn għad-​deċiżjoni li jieħdu.

KIF SE NQIMU LIL ĠEĦOVA META NKUNU TAĦT PROJBIZZJONI?

10. L-​uffiċċju tal-​fergħa u l-​anzjani liema struzzjonijiet se jagħtuna?

¹⁰ Int kif tistaʼ tkompli tqim lil Ġeħova waqt li nkunu taħt projbizzjoni? L-​uffiċċju tal-​fergħa se jagħti lill-​anzjani tal-​kongregazzjoni tiegħek struzzjonijiet u suġġerimenti prattiċi dwar kif nirċievu ikel spiritwali, kif niltaqgħu flimkien għal-​laqgħat, u kif nippritkaw. Jekk l-​uffiċċju tal-​fergħa ma jkunx jistaʼ jikkuntattja lill-​anzjani, l-​anzjani min-​naħa tagħhom se jgħinu lilek u lil dawk kollha fil-​kongregazzjoni biex tibqgħu tqimu lil Ġeħova. Huma se jiggwidawna fi qbil mad-​direzzjoni li hemm fil-​Bibbja u fil-​pubblikazzjonijiet tagħna.—Mt. 28:19, 20; Atti 5:29; Ebr. 10:24, 25.

11. (a) Għala tistaʼ tkun ċert li dejjem se jkollok dak kollu li teħtieġ biex iżżomm il-​fidi tiegħek b’saħħitha? (b) X’tistaʼ tagħmel biex tipproteġi l-​Bibbja u l-​pubblikazzjonijiet tiegħek?

¹¹ Ġeħova wiegħed li l-​qaddejja tiegħu se jkollhom dak kollu li jeħtieġu biex iżommu l-​fidi tagħhom b’saħħitha. (Is. 65:13, 14; Lq. 12:42-​44) Allura tistaʼ tkun ċert li l-​organizzazzjoni tiegħu se tagħmel kulma tistaʼ biex tipprovdi l-​inkuraġġiment spiritwali li teħtieġ. Imma hemm xi ħaġa li tistaʼ tagħmel int ukoll. Meta jkun hemm projbizzjoni, sib post tajjeb biex taħbi l-​Bibbja u pubblikazzjonijiet oħrajn li jistaʼ jkollok. Ara li ma tħallix materjal prezzjuż bħal dan—printjat u elettroniku—f’post fejn jistaʼ jinstab faċilment. Kull wieħed minna għandu jagħmel kulma jistaʼ biex iżomm il-​fidi tiegħu b’saħħitha.

12. L-​anzjani kif jistgħu jorganizzaw laqgħat b’mod li ma jiġix innotat?

¹² X’se jiġri mil-​laqgħat tagħna? L-​anzjani se jorganizzawhom b’mod li ma jiġix innotat minn dawk li jopponuna. Huma forsi jagħtuk struzzjoni biex tiltaqaʼ fi gruppi żgħar, u x’aktarx ibiddlu taʼ spiss il-​ħinijiet tal-​laqgħa u l-​post fejn tiltaqgħu. Int tistaʼ tgħin biex tipproteġi lil ħutek billi titkellem b’leħen baxx meta tkun sejjer għal-​laqgħat jew ħiereġ minnhom. Forsi jkun hemm bżonn ukoll li tilbes b’mod iktar każwali biex ma tiġbidx attenzjoni.

13. X’nistgħu nitgħallmu minn ħutna fl-​Eks Unjoni Sovjetika?

¹³ Dwar ix-​xogħol tal-​ippritkar, iċ-​ċirkustanzi se jvarjaw minn post għall-​ieħor. Imma aħna nħobbu lil Ġeħova u nieħdu gost ngħidu lil oħrajn dwar Saltnatu, allura se nsibu mod kif nippritkaw. (Lq. 8:1; Atti 4:29) Meta kkummentat fuq l-​ippritkar tax-​Xhieda taʼ Ġeħova fl-​Eks Unjoni Sovjetika, il-​kittieba tal-​istorja Emily B. Baran qalet: “Meta l-​gvern ordna lix-​Xhieda taʼ Ġeħova biex ma jippritkawx, huma bdew jitkellmu mal-​ġirien, il-​kollegi, u l-​ħbieb tagħhom. Meta ntbagħtu l-​ħabs minħabba dan, ix-​Xhieda ppritkaw lil ħabsin oħrajn.” Minkejja l-​projbizzjoni, ħutna ma waqfux jippritkaw. Jalla jkollok l-​istess determinazzjoni jekk xi darba l-​ippritkar ikun projbit f’pajjiżek!

NASES LI GĦANDNA NEVITAW

14. Liema nassa se jgħinna nevitaw Salm 39:1?

¹⁴ Oqgħod attent x’tgħid lil oħrajn. Meta nkunu taħt projbizzjoni, għandna nirrikonoxxu meta hu ‘ż-​żmien li noqogħdu kwieti.’ (Ekk. 3:7) Aħna għandna nipproteġu informazzjoni li għandha tibqaʼ sigrieta, bħall-​ismijiet taʼ ħutna, il-​postijiet fejn niltaqgħu, kif isir l-​ippritkar, u kif nirċievu l-​ikel spiritwali. Aħna mhux se nikxfu dawn l-​affarijiet maʼ nies li jaħdmu għall-​gvern jew maʼ ħbieb u qraba li  jgħixu fl-​istess pajjiż jew pajjiżi oħrajn. Jekk naqgħu f’din in-​nassa, inkunu qed nitfgħu lil ħutna fil-​periklu.—Aqra Salm 39:1.

15. Satana x’se jipprova jagħmlilna, u kif nistgħu nevitaw in-​nassa tiegħu?

¹⁵ Tħallix problemi żgħar jifirduna. Satana jaf li jekk ikun hemm firda f’dar, din ma tkunx tistaʼ tibqaʼ wieqfa. (Mk. 3:24, 25) Hu kontinwament se jipprova joħloq firdiet fostna. B’dal-​mod, jittama li nibdew niġġieldu bejnietna minflok kontrih.

16. Oħtna Gertrud Poetzinger x’eżempju tajjeb ħallitilna?

¹⁶ Anke Kristjani maturi għandhom bżonn joqogħdu attenti li ma jaqgħux f’din in-​nassa. Ikkunsidra l-​eżempju taʼ żewġ aħwa nisa midlukin, Gertrud Poetzinger u Elfriede Löhr. Huma kienu ġew mitfugħin il-​ħabs m’aħwa nisa Kristjani oħrajn f’kamp tal-​konċentrament tan-​Nazi. Gertrud bdiet tgħir meta Elfriede tat taħditiet inkuraġġanti lill-​aħwa nisa oħrajn fil-​kamp. Iktar tard, Gertrud stħat bil-​mod taʼ kif aġixxiet u talbet mill-​qalb lil Ġeħova biex jgħinha. Hi kitbet, “Għandna nitgħallmu naċċettaw il-​fatt li oħrajn għandhom abbiltajiet aħjar minn tagħna jew għandhom iktar responsabbiltajiet minna.” Hi kif għelbet l-​għira tagħha? Gertrud iffokat fuq il-​kwalitajiet tajbin u l-​personalità dħulija taʼ Elfriede. B’dal-​mod, reġgħet kisbet ir-​relazzjoni tajba tagħha maʼ Elfriede. It-​tnejn salvaw mill-​kamp tal-​konċentrament u qdew lil Ġeħova lealment sa tmiem ħajjithom fuq l-​art. Jekk naħdmu iebes biex negħlbu d-​differenzi li jkollna maʼ ħutna, mhu se nħallu xejn jifridna.—Kol. 3:13, 14.

17. Għala m’għandniex inkunu prużuntużi?

¹⁷ Tkunx prużuntuż. Jekk insegwu d-​direzzjoni li nirċievu minn aħwa responsabbli u fdati, aħna se nevitaw il-​problemi. (1 Pt. 5:5) Pereżempju, f’pajjiż fejn ix-​xogħol hu projbit, l-​aħwa rġiel responsabbli kienu taw direzzjoni biex il-​pubblikaturi ma jqassmux letteratura pprintjata fil-​ministeru. Minkejja dan, ħu pijunier f’dak il-​pajjiż ħass li kien jaf aħjar minn hekk u xorta qassam il-​letteratura. B’liema riżultat? Ftit wara li hu u xi oħrajn spiċċaw mix-​xhieda informali, huma ġew interrogati mill-​pulizija. Milli jidher, uffiċjali tal-​gvern kienu segwewhom u rnexxielhom isibu l-​letteratura li kienu qassmu l-​aħwa. X’nitgħallmu minn din l-​esperjenza? Jeħtieġ li nsegwu d-​direzzjoni li ningħataw anke jekk inħossu li nafu aħjar minn hekk. Ġeħova dejjem iberikna meta nikkoperaw mal-​aħwa rġiel li hu ħatar biex imexxu fostna.—Ebr. 13:7, 17.

18. Għala m’għandniex nagħmlu regoli bla bżonn?

¹⁸ Tagħmilx regoli bla bżonn. Jekk l-​anzjani jagħmlu regoli bla bżonn, dan se jagħmel l-​affarijiet diffiċli għal oħrajn. Ħuna Juraj Kaminský ftakar x’ġara matul il-​projbizzjoni fl-​Eks Ċekoslovakkja: “Wara li ħafna anzjani ġew arrestati, xi wħud minn dawk li kien għad fadal biex jieħdu t-​tmexxija fil-​kongregazzjonijiet u s-​circuits bdew jagħmlu r-​regoli tagħhom stess għall-​pubblikaturi u jgħidulhom x’għandhom u x’m’għandhomx jagħmlu.” Ġeħova ma taniex l-​awtorità biex nieħdu deċiżjonijiet personali għal oħrajn. Min jagħmel regoli bla bżonn ma jkunx qed jipproteġi s-​sigurtà taʼ ħutu imma jkun qed jipprova jsir is-​sid tal-​fidi taʼ ħutu.—2 Kor. 1:24.

QATT TIEQAF TQIM LIL ĠEĦOVA

19. Skont it-​2 Kronaki 32:7, 8, għala nistgħu nkunu kuraġġużi minkejja dak li jistaʼ jagħmel Satana?

¹⁹ L-​avversarju prinċipali tagħna, Satana x-​Xitan, mhux se jieqaf jipprova jippersegwita lill-​qaddejja leali taʼ Ġeħova. (1 Pt. 5:8; Riv. 2:10) Satana u dawk li jappoġġjawh se jipprovaw jipprojbixxu l-​qima tagħna lil Ġeħova. Imma aħna qatt mhu se nieqfu naqdu lil Ġeħova, avolja nkunu qed nibżgħu. (Dt. 7:21) Ġeħova qiegħed magħna, u hu se jkompli jappoġġjana anke jekk xogħolna jkun projbit.—Aqra t-​2 Kronaki 32:7, 8.

20. X’int determinat li tagħmel?

²⁰ Jalla nkunu determinati bħal ħutna fl-​ewwel seklu, li qalu lill-​mexxejja taʼ żmienhom: “Jekk hux sewwa f’għajnejn Alla li nisimgħu minnkom iktar milli minn Alla, iġġudikaw intom. Imma aħna ma nistgħux nieqfu nitkellmu dwar dak li rajna u smajna.”—Atti 4:19, 20.