Nikkonduċu Studji tal-​Bibbja Sinifikanti mal-​Familja

¹ Waħda mill-​iktar attivitajiet importanti li jwettqu l-​ġenituri hi li jgħallmu l-​verità lil uliedhom. Dan huwa obbligu mingħand Ġeħova. (Dt. 6:​6, 7) It-​tfal għandhom bżonn id-​direzzjoni u l-​gwida biex jimxu b’mod rett f’dinja li tiċħad lil Alla. Għandhom bżonn jitgħallmu jħobbu lil Ġeħova u l-​verità u jkunu determinati li jżommu magħha. It-​Torri taʼ l-​Għassa taʼ l-​1 taʼ Novembru, 1988, f’paġna 6 qal: “Minkejja kwalunkwe obbligi oħra li għandek jew inkwiet li tiffaċċja, li tqattaʼ ħin maʼ wliedek jinħtieġ li jingħata prijorità. Il-​ħin li tqattgħu flimkien se jippermettilek li tnaqqax fihom il-​valuri spiritwali li jissalvagwardjaw qlub uliedek u jqegħduhom fil-​korsa t-​tajba.”

² Jekk il-​familji jridu jsegwu l-​gwida li tingħata fil-​Kelma t’Alla, allura huma għandhom iwarrbu l-​ħin regolarment għal studju tal-​familja. Il-​kapijiet tal-​familja għandhom bżonn jieħdu ħsieb l-​ispiritwalità tal-​familja u din għandha tkun prijorità. Jekk ma jagħtux l-​attenzjoni xierqa minn issa għall-​bżonnijiet spiritwali tal-​familja tagħhom, x’aktarx li l-​ġenituri se jkollhom jissieltu maʼ problemi serji fil-​futur.

MATERJAL U METODI TAʼ STUDJU

³ X’għandu jiġi studjat? Il-​kap tal-​familja jinsab fl-​aqwa pożizzjoni biex ikun jaf x’għandha bżonn il-​familja tiegħu. Hu jistaʼ jistaqsi dwar x’jaħsbu l-​oħrajn li jistaʼ jkun taʼ benefiċċju u jikkunsidra s-​suġġerimenti tagħhom. Il-​flessibiltà se tagħmel l-​istudju tal-​familja wieħed prattiku u li jqanqalhom jaġixxu. Ħafna familji jagħżlu li jippreparaw flimkien il-​lezzjoni tat-​Torri taʼ l-​Għassa taʼ kull ġimgħa. Madankollu, jistaʼ jkun neċessarju li kultant jiġu diskussi suġġetti speċifiċi li jitkellmu dwar problemi li ż-​żgħażagħ jiffaċċjaw fl-​iskola. Informazzjoni pubblikata li titkellem dwar in-​namur, l-​attivitajiet wara l-​ħin taʼ l-​iskola, l-​isports, u t-​tendenzi immorali tistaʼ tiġi kunsidrata b’mod inkuraġġanti u li jibni. Huwa importanti li l-​kap tal-​familja kontinwament jeżamina liema informazzjoni għandhom bżonn il-​membri tal-​familja u kif l-​aħjar li jilħqilhom qalbhom biha.—Ara It-​Torri taʼ l-​Għassa taʼ l-​1 taʼ Lulju, 1999, paġna 16, pari. 12-16.

⁴ Kif għandek tikkonduċi l-​istudju? Oħloq atmosfera rilassata imma dinjituża. Evita li l-​istudju jsir proċedura mekkanika jew formali żżejjed. Staqsi mistoqsijiet supplimentarji, u uża t-​tixbihat biex tqanqal il-​ħsieb taʼ kulħadd u żżommhom involuti. Jistgħu jintużaw il-​mapep u t-​tabelli fil-​browxer “See the Good Land” biex l-​istudju jkun iktar interessanti. Jistgħu jingħataw inkarigi li fihom ikollhom isibu l-​materjal fl-​Index jew fil-​volumi taʼ l-​Insight, skond l-​età u l-​abbiltajiet tat-​tfal. Għala ma tużax id-​diversi vidjos disponibbli li huma mħejjijin għaż-​żgħar? Involvi lit-​tfal li jkunu iżgħar fid-​diskussjoni malli jsiru kapaċi jwieġbu. Tistaʼ tistaqsihom mistoqsijiet sempliċi li jeħtieġu tweġibiet taʼ ftit kliem biss. Tużax il-​ħin taʼ studju biex iċċanfar lit-​tfal. Minflok, faħħarhom u wrihom apprezzament għall-​isforzi tagħhom, u bl-​entużjażmu aqsam magħhom punti spiritwali.

⁵ Kif tistaʼ tkun ċert li qed tilħqilhom qalbhom? Ħeġġeġ lil kulħadd biex jikkummenta fi kliemu. Bit-​tattika uża mistoqsijiet li jġagħluhom jesprimu l-​ħarsa tagħhom sabiex tiddetermina dak li għandhom f’qalbhom. Tistaʼ tistaqsi: “It-​tfal taʼ l-​iskola kif iħossuhom dwar din il-​kwistjoni? Qatt ikollok xi dubji dwar dan il-​punt?” Oqgħod attent li ma tagħmilhiex bi kbira meta t-​tfal jesprimu l-​ħarsa tagħhom, inkella wliedek jistgħu jħossuhom li ma jistgħux jesprimu ruħhom bl-​onestà. Agħtihom ċans jitkellmu. Se jkun iktar faċli għalik biex tgħallimhom jekk huma jkunu jafu li int interessat fihom u fil-​problemi tagħhom.—Ara It-​Torri taʼ l-​Għassa taʼ l-​1 taʼ Frar, 1987, paġni 13-15.

⁶ Żomm f’moħħok li l-​mira prinċipali taʼ l-​istudju tal-​familja tiegħek hi li tnaqqax fihom il-​ħsibijiet taʼ Ġeħova u mhux biss li ssib tweġiba li jkunu jistgħu jaqraw fil-​laqgħa tal-​kongregazzjoni. (Efes. 3:​17-19) Dan ifisser li taħdem iebes biex l-​informazzjoni tidħol f’qalbhom. Ipprovdi raġunijiet għala l-​familja għandha tkun trid tagħmel ir-​rieda t’Alla u għala dan hu l-​aħjar mod taʼ ħajja.

⁷ Studju tal-​Bibbja mal-​familja li jkun regulari hu essenzjali biex tinbena l-​ispiritwalità tagħha. Dan iħarreġ u jħejji sew lit-​tfal biex ikampaw mal-​problemi tal-​ħajja. Intom il-​ġenituri tinsabu fl-​aħjar pożizzjoni biex tgħinu lil uliedkom. Ħudu f’idejkom din ir-​responsabbiltà li takom Alla. Żgur li Ġeħova se jberikkom jekk tagħmlu kull sforz biex tkunu konsistenti meta tikkonduċu studju tal-​Bibbja sinifikanti mal-​familja.