L-​Uħud Iżgħar Għandhom Bżonn Eżempju Tajjeb

¹ Aħna ferħanin li għandna numru li dejjem jiżdied taʼ żgħażagħ li qegħdin “ifaħħru isem il-​Mulej.” (Salm 148:​12, 13) Ħafna minnhom għadhom pjuttost żgħar. Il-​progress tagħhom huwa determinat ħafna mit-​taħriġ u l-​eżempju li jipprovdulhom il-​ġenituri tagħhom u oħrajn kbar ġewwa l-​kongregazzjoni. Madankollu, m’għandniex ninsew ukoll l-​influwenza li għandhom fuqhom żgħażagħ oħra, speċjalment minn adolexxenti akbar u minn adulti żgħażagħ. Jekk int għandek din l-​età, dawn il-​kummenti jistgħu jkunu taʼ ġid għalik.

² It-​tfal mhux adolexxenti għandhom it-​tendenza li jimitaw lil adolexxenti akbar minnhom. Għandhom ix-​xewqa naturali li jkunu bħall-​ħbieb tagħhom li jammiraw. Taʼ spiss ikollhom ċertu stima għal żgħażagħ oħrajn li huma ftit akbar minnhom u li jagħtu l-​impressjoni li mimlijin għerf u li huma aħjar minnhom. Minħabba dan, għandhom mnejn jimitaw il-​mod kif titkellem u ġġib ruħek, kif ukoll jimitaw l-​apprezzament li għandek għall-​valuri spiritwali u l-​parteċipazzjoni tiegħek fl-​attivitajiet tal-​kongregazzjoni.

³ Bħala adolexxent akbar, għandek privileġġ kif ukoll responsabbiltà kbira. Bħalissa, wisq probabbli l-​eżempju tiegħek qiegħed jinfluwenza lil sħabek li huma iżgħar minnek. Staqsi lilek innifsek, ‘X’tip taʼ influwenza għandi fuq uħud iżgħar? Jien serju, billi nevita l-​bluha u dawk “il-​ġibdiet taż-​żgħożija” li huma ħżiena? Nuri jien ubbidjenza u rispett lejn il-​ġenituri tiegħi, l-​anzjani, u lejn persuni akbar minni?’ (2 Tim. 2:22; Kol. 3:20) Dak li tgħid u tagħmel jistaʼ jkun fattur kbir għall-​progress spiritwali taʼ wħud oħrajn iżgħar li joqogħdu attenti għall-​azzjonijiet tiegħek.

⁴ L-​ippridkar tal-​messaġġ tas-​Saltna huwa x-​xogħol primarju tal-​kongregazzjoni. Il-​parteċipazzjoni mill-​qalb u regulari tiegħek tistaʼ tinkuraġġixxi lil sħabek biex ikunu iktar attivi. Jekk tistaʼ tidħol fis-​servizz taʼ pijunier, ħbiebek se jitqanqlu jagħmlu l-​istess. Billi tikkummenta fil-​laqgħat u toffri l-​għajnuna tiegħek f’xogħlijiet li jkun hemm bżonn isiru fis-​Sala tas-​Saltna tistaʼ wkoll tagħti eżempju tajjeb.

⁵ Għalkemm Timotju ma kienx għadu adolexxent meta Pawlu tah il-​parir li ġej, intom l-​adolexxenti tistgħu tapplikawh: “Kun taʼ eżempju għal dawk li jemmnu, fi kliemek u fl-​imġiba tiegħek, fl-​imħabba, fil-​fidi, fis-​safa.” (1 Tim. 4:12) Il-​parteċipazzjoni tiegħek bil-​ħeġġa u b’ruħek kollha fis-​servizz taʼ Jehovah jistaʼ jeffettwa fil-​pożittiv lil sħabek u oħrajn iżgħar li jkunu qegħdin josservaw, u dan jgħinhom biex jagħmlu progress ħalli jsiru nies maturi spiritwalment. (Efes. 4:13) Adolexxenti li huma parti minn familji li għadhom kif bdew jistudjaw jistgħu jinġibdu lejn il-​verità b’dak li jaraw fik.

⁶ Saħansitra iktar importanti minn hekk, l-​isforz persistenti tiegħek biex turi kwalitajiet bħal t’Alla jirrifletti tajjeb fuq Jehovah u l-​organizzazzjoni tiegħu. (Prov. 27:11) Dawk l-​uħud sinċieri li josservaw se jiskantaw bil-​kuntrast kbir li hemm bejnek u bejn żgħażagħ oħra fid-​dinja. Għalhekk, għandek opportunità unika biex tgħin lil uħud iżgħar, u b’hekk tkun qed tagħmel kontribuzzjoni prezzjuża taʼ tifħir għal Jehovah.—Salm 71:17. (km-E 7/94)