Ġeħova Jieħu Ħsieb b’Mod Teneru l-​Qaddejja Tiegħu Mdaħħlin fiż-​Żmien

“Alla mhux inġust biex jinsa għemilkom u l-​imħabba li wrejtu għal ismu.”—EBR. 6:10.

1, 2. (a) Jekk tara lil xi ħadd xagħru abjad fiex jistaʼ jfakkrek? (b) Ġeħova kif iqishom lill-​Kristjani mdaħħlin fiż-​żmien?

META fil-​kongregazzjoni tara wħud imdaħħlin fiż-​żmien li għandhom xagħarhom abjad, ma tiftakarx int fir-​rakkont fil-​ktieb Bibliku taʼ Danjel? Fil-​viżjoni li Alla Ġeħova ta lil Danjel, Hu ta stampa tiegħu nnifsu bħala li għandu xagħru abjad. Danjel kiteb: “Bqajt inħares sakemm tqiegħdu tronijiet u x-​Xiħ fil-​Jiem qagħad bil-​qiegħda. Ħwejġu kienu bojod bħas-​silġ, u xagħar rasu kien bħas-​suf nadif.”—Dan. 7:9.

² Fl-​istat naturali tiegħu, is-​suf hu ġeneralment abjad. Għalhekk, ix-​xagħar abjad u t-​titlu “Xiħ fil-​Jiem” jiġbdulna l-​attenzjoni tagħna lejn l-​età u l-​għerf kbir t’Alla, li t-​tnejn li huma jistħoqqilhom ir-​rispett profond tagħna. Allura, Ġeħova, ix-​Xiħ fil-​Jiem, kif iqishom lill-​irġiel u n-​nisa leali li huma mdaħħlin fiż-​żmien? Il-​Kelma t’Alla tgħid li “x-​xagħar griż hu kuruna taʼ sbuħija meta jkun fit-​triq tas-​sewwa.” (Prov. 16:31) Iva, id-​dehra taʼ Kristjan leali li jkun bjadlu xagħru hija sabiħa f’għajnejn Alla. Tħossok int l-​istess bħalma jħossu Ġeħova dwar ħutek li huma mdaħħlin fiż-​żmien?

Għala Huma Daqstant Prezzjużi?

3. Sħabna fit-​twemmin li huma ixjeħ fl-​età għala huma tant prezzjużi għalina?

³ Fost dawn il-​qaddejja għeżież t’Alla mdaħħlin fiż-​żmien insibu l-​membri tal-​Ġemgħa li Tiggverna tax-​Xhieda taʼ Ġeħova, uħud li kienu jew għadhom jaqdu bħala indokraturi li jivvjaġġaw, pijunieri żelużi, u pubblikaturi maturi tas-​Saltna—aħwa rġiel u nisa li jaqdu lealment fil-​kongregazzjonijiet tagħna. Għandek mnejn taf lil uħud li ppridkaw b’mod żeluż l-​aħbar tajba għal għaxriet taʼ snin u li l-​eżempji tajbin tagħhom għenu biex jimmotivaw lil uħud iżgħar u jsawrulhom ħajjithom. Xi wħud minn sħabna fit-​twemmin li huma ixjeħ fl-​età kellhom responsabbiltajiet kbar u ssaportew persekuzzjonijiet minħabba l-​aħbar tajba. Ġeħova u “l-​ilsir leali u għaqli” japprezzaw profondament il-​kontribut kollu li taw u li għadhom qed jagħtu fix-​xogħol tas-​Saltna.—Mt. 24:45.

4. Għala għandna nirrispettaw lill-​Kristjani li huma mdaħħlin fiż-​żmien u nitolbu għalihom?

⁴ Uħud anzjani leali bħal dawn jistħoqqilhom il-​gratitudni u r-​rispett taʼ qaddejja oħrajn t’Alla Ġeħova. Fil-​fatt, il-​Liġi t’Alla li ngħatat permezz taʼ Mosè turi li hemm konnessjoni bejn il-​konsiderazzjoni u r-​rispett lejn l-​anzjani u l-​biżaʼ taʼ Ġeħova. (Lev. 19:32) Għandna nitolbu regolarment għal dawn l-​uħud leali u nirringrazzjaw lil Alla għax-​xogħlijiet kollhom imħabba li għamlu. L-​appostlu Pawlu talab għall-​għeżież ħaddiema sħabu, żgħar u kbar.—Aqra l-​1 Tessalonikin 1:2, 3.

5. Kif nistgħu nibbenefikaw mis-​sħubija m’aduraturi taʼ Ġeħova mdaħħlin fiż-​żmien?

⁵ Barra minn hekk, kulħadd fil-​kongregazzjoni jistaʼ jibbenefika mis-​sħubija maʼ Kristjani li huma mdaħħlin fiż-​żmien. Permezz taʼ l-​istudju, l-​osservazzjoni, u l-​esperjenza, l-​aduraturi leali taʼ Ġeħova li huma mdaħħlin fiż-​żmien kisbu għarfien prezzjuż. Huma tgħallmu jkunu paċenzjużi u juru empatija, u jħossu ferħ u sodisfazzjon kbir meta jgħallmu lill-​ġenerazzjoni taʼ warajhom dak li tgħallmu huma. (Salm 71:18) Żgħażagħ, kunu għaqlin u bbenefikaw minn dan is-​sors t’għarfien bħalma kieku tibbenefikaw mill-​ilma li ttellgħu minn xi bir fond.—Prov. 20:5.

6. Kif tistaʼ turi lil uħud li huma mdaħħlin fiż-​żmien li tapprezzahom verament?

⁶ Turihom int lil dawk li huma mdaħħlin fiż-​żmien li tgħożżhom bħalma jgħożżhom Ġeħova? Mod wieħed kif tistaʼ tagħmel dan huwa billi tgħidilhom kemm tħobbhom għal-​lealtà tagħhom u kemm tapprezza l-​opinjonijiet tagħhom. Iktar minn hekk, billi taġixxi fuq dak li titgħallem minnhom, int tkun qed turihom li r-​rispett tiegħek lejhom huwa sinċier. Ħafna Kristjani mdaħħlin fiż-​żmien jistgħu jiftakru l-​pariri għaqlin li rċivew mingħand uħud ixjeħ leali u kif il-​fatt li aġixxew fuqhom għenhom matul ħajjithom.a

Uri b’Modi Prattiċi li Jimpurtak b’Mod Teneru

7. Ġeħova fuq min ipoġġi r-​responsabbiltà primarja sabiex jieħdu ħsieb dawk li huma mdaħħlin fiż-​żmien?

⁷ Il-​familji taʼ dawk li huma mdaħħlin fiż-​żmien huma responsabbli primarjament quddiem Alla biex jipprovdu għalihom. (Aqra l-​1 Timotju 5:4, 8.) Ġeħova jieħu pjaċir meta l-​familji jwettqu l-​obbligi tagħhom lejn qrabathom li huma mdaħħlin fiż-​żmien, u b’hekk juru li huma jimpurtahom minnhom bħalma jimpurtah hu. Alla jappoġġa lil dawn il-​familji u jberikhom għall-​isforzi u s-​sagrifiċċji kollha tagħhom.b

8. Il-​kongregazzjonijiet għala għandhom juru li huma konċernati dwar il-​Kristjani li huma mdaħħlin fiż-​żmien?

⁸ B’mod simili, Ġeħova jieħu pjaċir meta l-​kongregazzjonijiet lokali jgħinu lill-​uħud leali mdaħħlin fiż-​żmien li huma fil-​bżonn imma li m’għandhomx qraba li jemmnu bħalhom jew li m’humiex lesti li jieħdu ħsiebhom. (1 Tim. 5:3, 5, 9, 10) B’hekk, il-​kongregazzjonijiet juru li ‘jħossu għalihom, juru affezzjoni lejhom, u jagħdruhom b’tenerezza’ lil dawk imdaħħlin fiż-​żmien. (1 Pt. 3:8) It-​tħassib għal dawk li fil-​kongregazzjoni huma mdaħħlin fiż-​żmien jintwera sew minn Pawlu meta jgħid li jekk membru wieħed mill-​ġisem isofri, “il-​membri l-​oħra kollha jsofru miegħu.” (1 Kor. 12:26) Jekk naġixxu b’mod prattiku u b’mogħdrija għan-​nom taʼ wħud imdaħħlin fiż-​żmien inkunu qed nuru l-​prinċipju tal-​parir taʼ Pawlu: “Komplu ġorru t-​toqol taʼ xulxin, u b’hekk twettqu l-​liġi tal-​Kristu.”—Gal. 6:2.

9. L-​età avanzata liema tagħbija tistaʼ ġġib magħha?

⁹ Liema tagħbija għandhom xi jġorru dawk imdaħħlin fiż-​żmien? Ħafna jegħjew malajr. Huma għandhom mnejn iħossu li ma jifilħux jagħmlu anki l-​iktar affarijiet bażiċi, bħal li jmorru għand it-​tabib, iħallsu l-​kontijiet, inaddfu d-​dar, u jippreparaw l-​ikel. Ladarba l-​aptit u l-​għatx jonqsu minħabba l-​età, huma għandhom mnejn jaħsbu li m’għandhomx bżonn jieklu jew jixorbu daqskemm għandhom bżonn fir-​realtà. L-​istess jistaʼ jiġri bl-​ikel spiritwali. Biż-​żmien, għajnejn u widnejn l-​anzjani ma jibqgħux l-​istess, u dan jagħmilha diffiċli għalihom biex jaqraw u jisimgħu l-​programmi spiritwali, u biex sempliċement ilestu għal-​laqgħat Kristjani jistgħu jħossuhom eżawriti. Mela, oħrajn x’jistgħu jagħmlu għal uħud imdaħħlin fiż-​żmien bħal dawn?

Kif Int Tistaʼ Tgħin

10. X’jistgħu jagħmlu l-​anzjani sabiex jaċċertaw ruħhom li dawk imdaħħlin fiż-​żmien jirċievu għajnuna prattika?

¹⁰ F’ħafna kongregazzjonijiet, dawk imdaħħlin fiż-​żmien b’mod eżemplari qed jingħataw l-​attenzjoni li għandhom bżonn. Aħwa kollhom imħabba jgħinuhom fil-​qadi, fit-​tisjir, u fit-​tindif. Huma jgħinu lil dawk li huma avanzati biex jistudjaw, ilestu għal-​laqgħat, u biex jibqgħu regulari fil-​ministeru. Xhieda żgħażagħ jakkumpanjawhom u jipprovdulhom trasport. Jekk l-​anzjani ma jkunux jistgħu joħorġu mid-​dar, huma jkunu jistgħu jisimgħu l-​laqgħat permezz tat-​telefon, jew permezz taʼ rikordings li jsiru għalihom. Kulmeta jkun possibbli, l-​anzjani għandhom jaċċertaw ruħhom li l-​arranġamenti prattiċi li jkunu saru jitwettqu sabiex jintlaħqu l-​bżonnijiet taʼ dawk imdaħħlin fiż-​żmien fil-​kongregazzjoni.c

11. Irrakkonta kif familja għenet lil wieħed ħu mdaħħal fiż-​żmien.

¹¹ Kristjani individwali wkoll jistgħu jestendu l-​ospitalità u juru l-​ġenerożità. Wara li mietet il-​mara taʼ ħu mdaħħal fiż-​żmien, hu ma setax jibqaʼ jħallas il-​kera mingħajr il-​pensjoni tagħha. Hu u l-​mara tiegħu kienu studjaw il-​Bibbja maʼ familja—missier, omm, u żewġt ibniet żgħażagħ—li kellhom dar kbira. Huma tawh żewġ kmamar biex jgħix fihom. Għal 15-il sena, huma qasmu miegħu ikliet, mumenti sbieħ, u wrewh affezzjoni taʼ l-​aħwa. Il-​bniet ibbenefikaw ħafna mill-​fidi u l-​esperjenza kbira tiegħu, u hu bbenefika mis-​sħubija ferriħija tagħhom. Dan il-​ħu mdaħħal fiż-​żmien għex magħhom sakemm miet fl-​età taʼ 89 sena. Il-​familja għadha tirringrazzja lil Alla għall-​ħafna barkiet li huma rċivew permezz tas-​sħubija miegħu. Huma ‘ma tilfux il-​premju tagħhom’ talli għenu lil seħibhom li hu dixxiplu taʼ Ġesù Kristu.—Mt. 10:42.d

12. X’tistaʼ tagħmel biex turi li jimpurtak b’mod teneru mill-​aħwa li huma mdaħħlin fiż-​żmien?

¹² Forsi int m’intix f’pożizzjoni li tgħin lil xi ħu jew oħt anzjana bil-​mod kif għenet din il-​familja, imma forsi tistaʼ tgħin lil dawk imdaħħlin fiż-​żmien biex jaslu għal-​laqgħat jew joħorġu fil-​ministeru taʼ l-​għalqa. Tistaʼ wkoll tistidinhom id-​dar tiegħek u tinkludihom meta toħroġ xi dawra. Tistaʼ tmur tarahom, speċjalment meta jkunu ma jifilħux jew ma jistgħux joħorġu mid-​dar. Iktar minn hekk, int tistaʼ u għandek dejjem tittrattahom t’adulti maturi. Sakemm għadhom kapaċi mentalment, Kristjani mdaħħlin fiż-​żmien għandhom jiġu inklużi fid-​deċiżjonijiet kollha li jittieħdu u li jkunu jeffettwawhom. Anki dawk li tilfu ħafna mill-​abbiltajiet mentali tagħhom jistgħu jirrealizzaw jekk id-​dinjità tagħhom hijiex tiġi rispettata jew le.

Ġeħova Mhux Se Jinsa x-​Xogħol Tiegħek

13. Għala huwa importanti li nuru konsiderazzjoni għas-​sentimenti taʼ l-​aħwa Kristjani mdaħħlin fiż-​żmien?

¹³ Huwa importanti li turi konsiderazzjoni għas-​sentimenti taʼ dawk li huma mdaħħlin fiż-​żmien. Spiss, dawk li huma mdaħħlin fiż-​żmien iħossuhom imnikktin ferm minħabba li ma jkunux jistgħu jwettqu dak kollu li kienu jagħmlu meta kienu iżgħar u iktar b’saħħithom. Per eżempju, oħt li kienet taqdi lil Ġeħova b’mod attiv għal xi 50 sena u li kienet pijuniera regulari żviluppat marda li dgħajfitha u l-​laqgħat kienet tattendihom b’diffikultà kbira. Meta kienet tqabbel dak li kienet tagħmel qabel fil-​ministeru mal-​limitazzjonijiet preżenti tagħha, hi kienet taqbad tibki. Waqt li kienet qed tibki baxxiet rasha u qalet, “M’għadni nagħmel xejn iktar.”

14. Il-​qaddejja taʼ Ġeħova mdaħħlin fiż-​żmien liema inkuraġġiment mis-​salmi jistgħu jieħdu?

¹⁴ Jekk int persuna mdaħħla fiż-​żmien, esperjenzajt int sentimenti taʼ wġigħ bħal dawn? Jew, kien hemm xi drabi fejn ħassejt li Ġeħova forsi abbandunak? Is-​salmista x’aktarx li kellu sentimenti simili lejn l-​aħħar taʼ ħajtu, għax hu talab: “Tarminix fi żmien ix-​xjuħija; meta l-​qawwa tiegħi tkun qed tonqos, titlaqnix. Sakemm nixjieħ u xagħri jsir griż, O Alla, titlaqnix.” (Salm 71:9, 18) M’għandniex xi ngħidu, Ġeħova ma kienx se jabbanduna lill-​kompożitur taʼ dak is-​salm, u Hu m’huwiex se jabbanduna lilek. F’salm ieħor, David esprima l-​fiduċja tiegħu fl-​appoġġ t’Alla. (Aqra Salm 68:19.) Ibqaʼ ċert li jekk int Kristjan leali mdaħħal fiż-​żmien, Ġeħova qiegħed miegħek u se jkompli jsostnik jum wara l-​ieħor.

15. X’jistaʼ jgħin lil dawk imdaħħlin fiż-​żmien biex iżommu attitudni pożittiva?

¹⁵ Ġeħova qatt ma se jinsa dak kollu li intom għamiltu u li qed tagħmlu għall-​glorja tiegħu bħala Xhieda taʼ Ġeħova mdaħħlin fiż-​żmien. Il-​Bibbja tgħid: “Alla mhux inġust biex jinsa għemilkom u l-​imħabba li wrejtu għal ismu.” (Ebr. 6:10) Għalhekk, tħallix lilek innifsek tiżviluppa attitudni negattiva, billi taħseb b’mod żbaljat li minħabba l-​età avanzata tiegħek int m’għadekx iktar utli għal Ġeħova. Stinka biex tibdel ħsibijiet dipressanti u pessimisti maʼ dawk pożittivi. Ifraħ minħabba l-​barkiet u t-​tama li għandek għall-​futur! Għandna “futur u tama”—l-​aqwa possibbli—u dawn huma garantiti mill-​Ħallieq tagħna. (Ġer. 29:11, 12; Atti 17:31; 1 Tim. 6:19) Irrifletti fuq it-​tama tiegħek, aħdem biex tibqaʼ żagħżugħ f’qalbek u f’moħħok, u qatt tnaqqas il-​valur taʼ l-​attendenza tiegħek fil-​kongregazzjoni!e

16. Ħu mdaħħal fiż-​żmien għala ħaseb li għandu jieqaf jaqdi bħala anzjan, imma l-​ġemgħa taʼ l-​anzjani kif inkuraġġietu?

¹⁶ Ikkunsidra lil Johan, li fl-​età taʼ 80 sena jqattaʼ l-​ħin kollu tiegħu jieħu ħsieb il-​leali martu Sannie, li issa hija marida.f L-​aħwa nisa jitqassmu bejniethom biex joqogħdu maʼ Sannie sakemm Johan imur il-​laqgħat u joħroġ fil-​ministeru. Madankollu, reċentement, Johan ħassu eżawrit emozzjonalment u beda jaħseb li ma setax jibqaʼ jaqdi bħala anzjan fil-​kongregazzjoni. “X’inhu l-​iskop li nibqaʼ anzjan?” staqsa bid-​dmugħ f’għajnejh. “M’għadni nagħmel xejn utli fil-​kongregazzjoni.” L-​anzjani sħabu assigurawh li l-​esperjenza u d-​dehen tiegħu kienu imprezzabbli. Huma ħeġġewh jibqaʼ jaqdi bħala anzjan, anki jekk il-​parteċipazzjoni tiegħu kienet limitata. Minħabba li ħassu tant inkuraġġit, Johan għadu jaqdi bħala anzjan, u dan hu taʼ barka għall-​kongregazzjoni.

Ġeħova Tassew Jimpurtah

17. Liema assiguranza tagħti l-​Bibbja lill-​Kristjani mdaħħlin fiż-​żmien?

¹⁷ L-​Iskrittura tagħmilha ċara li wħud imdaħħlin fiż-​żmien jistgħu jibqgħu jistagħnew spiritwalment minkejja l-​problemi li ġġib magħha x-​xjuħija. Is-​salmista ddikjara: “Dawk li huma mħawlin fid-​dar taʼ Ġeħova . . . jibqgħu sejrin tajjeb anki meta xagħarhom isir griż, jibqgħu mimlijin ħajja u jħaddru.” (Salm 92:13, 14) L-​appostlu Pawlu, li għandu mnejn kien qed jissielet maʼ difett fiżiku, ‘ma qatax qalbu, anki jekk il-​bniedem li kien minn barra kien qed jispiċċa.’—Aqra t-​2 Korintin 4:16-18.

18. Sħabna fit-​twemmin li huma mdaħħlin fiż-​żmien u dawk li jgħinuhom għala għandhom bżonn l-​għajnuna t’oħrajn?

¹⁸ Ħafna eżempji taʼ żmienna juru li dawk imdaħħlin fiż-​żmien jistgħu “jibqgħu sejrin tajjeb.” Imma l-​isfidi li jiġu minħabba l-​mard u l-​età jistgħu jbeżżgħu lil dak li jkun, anki lil dawk li għandhom membri tal-​familja li jieħdu ħsiebhom u li huma lesti li jikkommettu ruħhom biex jgħinuhom. Dawk li jieħdu ħsiebhom ukoll jistgħu jħossuhom eżawriti. Il-​kongregazzjoni għandha l-​privileġġ u r-​responsabbiltà li turi l-​imħabba tagħha bl-​azzjoni għan-​nom taʼ dawk imdaħħlin fiż-​żmien u dawk li jieħdu ħsiebhom. (Gal. 6:10) Għajnuna bħal din turi li aħna fil-​fatt m’aħniex qed ngħidu “isħnu u ixbgħu” mingħajr ma ngħinuhom b’modi prattiċi.—Ġak. 2:15-17.

19. Kristjani leali mdaħħlin fiż-​żmien għala jistgħu jħarsu lejn il-​futur b’fiduċja?

¹⁹ L-​età avanzata tistaʼ tbiddel kemxejn l-​attivitajiet taʼ Kristjan, imma ż-​żmien ma jnaqqasx l-​imħabba li Ġeħova għandu għall-​qaddejja leali tiegħu mdaħħlin fiż-​żmien. Għall-​kuntrarju, dawn il-​Kristjani leali kollha huma prezzjużi f’għajnejh, u hu qatt ma se jitlaqhom. (Salm 37:28; Is. 46:4) Ġeħova se jsostnihom u jiggwidahom fi xjuħithom.—Salm 48:14.

[Noti taʼ taħt]

Int Kif Twieġeb?

• Int għala tqis lill-​Kristjani leali mdaħħlin fiż-​żmien bħala li huma prezzjużi?

• Kif nistgħu nuru li jimpurtana b’mod teneru mill-​aduraturi sħabna li qed jikbru fl-​età?

• X’jistaʼ jgħin lill-​qaddejja taʼ Ġeħova li huma mdaħħlin fiż-​żmien biex ikollhom attitudni pożittiva?

[Stampi f’paġna 18]

Il-​membri tal-​kongregazzjoni għandhom stima kbira lejn dawk imdaħħlin fiż-​żmien