¹ Ġesù ta twissija: “Ishru, . . . biex tkunu tifilħu tgħaddu minn kull” inkwiet li żgur se jiġi. (Lq. 21:36) Qegħdin ngħixu fl-​iktar żmien perikoluż taʼ l-​istorja tal-​bniedem. Hemm diżastru lest għal kulmin hu rieqed spiritwalment. Dan iqiegħed lil kull wieħed u waħda minna fil-​periklu. Ġesù semma l-​ikel, ix-​xorb, u l-​ansjetajiet tal-​ħajja taʼ kuljum. Għala? Għaliex anki dawn l-​affarijiet jistgħu jimlewlna rasna bil-​ħsibijiet, itellfuna, u jwassluna għall-​periklu taʼ li nispiċċaw norqdu spiritwalment.

² Affarijiet li Ġeneralment Itellfuna: Xi wħud tefgħu ħsiebhom fuq rikreazzjoni eċċessiva u dubjuża, saħansitra saru ma jgħaddux mingħajr it-​televixin. Ovvjament, li nfittxu s-​Saltna l-​ewwel ma jfissirx li nevitaw kull forma taʼ rikreazzjoni. Meta nkunu raġunevoli u moderati, ir-​rikreazzjoni tistaʼ tkun taʼ benefiċċju. (Qabbel l-​1 Timotju 4:8.) Iżda din ittellifna meta ssir xi ħaġa prinċipali f’ħajjitna, tiħodilna ħafna mill-​ħin, ir-​riżorsi, jew mis-​sehem tagħna fix-​xogħol taʼ l-​ippridkar tas-​Saltna.

³ Xi ħaġa oħra li ġeneralment ittellifna u ġġagħalna norqdu spiritwalment hija x-​xewqa għal affarijiet materjali li m’humiex bżonnjużi. Din titlob mill-​individwu li jqattaʼ iktar ħin fix-​xogħol sekulari u ġġiegħel lil dak li jkun iwarrab l-​interessi spiritwali fil-​ġenb. Xi wħud tilfu l-​ħarsa tagħhom mill-​miri spiritwali billi saru mitlufin f’li jiksbu affarijiet materjali sabiex ikollhom ħajja iktar komda. Filwaqt li għandna bżonn “x’nieklu u x’nilbsu,” irridu noqogħdu attenti li ma nsirux inħobbu l-​flus, ħaġa li tistaʼ tbegħedna mill-​fidi. (1 Tim. 6:​8-10) Jekk ma nżommux il-​ħarsa tagħna ffokata fuq l-​interessi tas-​Saltna, nistgħu nittraskuraw il-​bżonnijiet spiritwali tal-​familja tagħna u nonqsu li nwettqu l-​ministeru tagħna.—1 Tim. 5:8; 2 Tim. 4:5.

⁴ Xorta waħda, oħrajn iħallu lil qalbhom titmewwet bl-​ansjetajiet tal-​ħajja sal-​punt li jispiċċaw jorqdu spiritwalment. (Lq. 21:34) Xi kultant, ngħaddu minn ansjetajiet minħabba problemi taʼ saħħa jew sitwazzjonijiet taʼ ­inkwiet fil-​familja. Iżda m’għandniex inħallu inkwiet persunali bħal dan inaqqas l-​attenzjoni tagħna mit-​tmiem taʼ din is-​sistema t’affarijiet li qed joqrob b’pass tant mgħaġġel.—Mk. 13:33.

⁵ Tgħidx kemm jieħu gost ix-​Xitan jekk jirnexxilu jġibna qisna qegħdin f’ħolma, niġru wara xi fantasija tad-​dinja. Irridu nissieltu biex nibqgħu mqajmin spiritwalment. Nafu li ‘jum il-​Mulej ġej bħal ħalliel,’ u huwa vitali li nibqgħu mqajmin u f’sensina. (1 Tess. 5:​2, 6) Jekk naraw xi sinjal fina nfusna li qed nonogħsu, huwa urġenti li “nwarrbu . . . l-​għemil tad-​dlam.”—Rum. 13:​11-13.

⁶ Għajnuniet biex Nibqgħu Mqajmin: X’inhuma dawn l-​għajnuniet? It-​talb huwa essenzjali. Irridu nitolbu bla heda. (1 Tess. 5:17) Li nżommu qrib tal-​kongregazzjoni Kristjana se jħajjarna “għall-​imħabba u għall-​għemil tajjeb.” (Lhud 10:24) Eżami regulari, u onest tagħna nfusna jistaʼ jgħinna nibqgħu għassa għall-​bżonn li negħlbu d-​dgħjufijiet. (2 Kor. 13:5) Drawwiet tajbin taʼ studju persunali se jżommuna ‘mrawmin fil-​kliem tal-​fidi.’ (1 Tim. 4:6) Jekk aħna nħabirku, nistgħu nkunu fiduċjużi li se nkunu kapaċi nevitaw it-​tfixkil, filwaqt li ‘nishru, u nżommu sħiħ fil-​fidi.’—1 Kor. 16:13. (km-E 10/95)