Għandek Int Iżżejjed X’Tagħmel?

¹ Pawlu ħeġġiġna biex ‘ikollna dejjem ħafna x’nagħmlu fix-​xogħol tal-​Mulej.’ (1 Kor. 15:58) Aħna mħeġġin biex inżommu rutina taʼ kuljum taʼ studju persunali, li nieħdu sehem regolarment fil-​ministeru, li nattendu l-​laqgħat bil-​lealtà kollha, u li nieħdu ħsieb taʼ inkarigi fil-​kongregazzjoni b’diliġenza. Flimkien maʼ dan, irridu ngħinu lil oħrajn li għandhom bżonn l-​għajnuna tagħna. B’daqshekk xogħol li rridu nagħmlu, taʼ spiss inħossuna li ma nifilħux għal iktar, u naħsbu li hemm bżonn naraw kif se nnaqqsu l-​ammont taʼ xogħol.

² Hemm sitwazzjonijiet li fihom ikun kemm għaqli u kemm raġonevoli li nneħħu ċerti attivitajiet jew innaqqsu l-​ammont tagħhom. Xi individwi jħossuhom li huwa mistenni li jagħmlu dak kollu li ħaddieħor jitlob minnhom. Nuqqas taʼ bilanċ f’dan ir-​rigward jistaʼ jġib pressjoni u stress li jistgħu fl-​aħħar mill-​aħħar isiru qerrieda.

³ Kunu Bbilanċjati: It-​tweġiba għall-​bilanċ qiegħda f’li napplikaw il-​parir taʼ Pawlu biex “tistgħu tkunu żguri mill-​affarijiet iktar importanti.” (Fil. 1:10) Dan sempliċement ifisser li aħna nikkonċentraw fuq l-​affarijiet li verament jiswew u, jekk il-​ħin u ċ-​ċirkostanzi jippermettu, nieħdu ħsieb t’affarijiet b’inqas importanza. L-​obbligi tal-​familja ċertament li jiġu minn taʼ l-​ewwel fost dawk l-​affarijiet li huma vitali. Ċerti responsabbiltajiet sekulari jingħataw attenzjoni. Madankollu, Ġesù għallem li l-​prijoritajiet tagħna għandhom ikunu bbażati fuq il-​prinċipju taʼ li nfittxu l-​ewwel is-​Saltna. Irridu l-​ewwel nagħmlu l-​affarijiet li se jgħinuna nwettqu d-​dedikazzjoni tagħna lejn Jehovah.​—Matt. 5:3; 6:33.

⁴ B’dan f’moħħna, se nkunu ċerti li naqtgħu mill-​iskeda bieżla tagħna xi attivitajiet persunali taʼ bla bżonn, xi attivitajiet taʼ rikreazzjoni li jieħdu ħafna ħin, u xi rbit m’oħrajn li m’huwiex essenzjali. F’li nippjanaw l-​attività tagħna għal kull ġimgħa, se nwarrbu ħin biżżejjed għal studju persunali, għal sehem raġonevoli fis-​servizz, biex nattendu l-​laqgħat, u biex nagħmlu kwalunkwe affarijiet oħrajn marbutin mill-​qrib mal-​qima tagħna. Il-​ħin li jifdal jistaʼ jiġi mqassam bejn attivitajiet oħrajn, jiddependi minn kemm dawn jgħinuna biex niksbu l-​mira primarja tagħna taʼ li nkunu Kristjani bbilanċjati li nżommu s-​Saltna l-​ewwel.

⁵ Saħansitra wara dan kollu, forsi xorta għadna nħossu li t-​tagħbija tagħna hija oppressiva. Jekk dan hu minnu, jeħtieġ li nwieġbu għall-​istedina taʼ Ġesù: “Ejjew għandi, intom ilkoll li qegħdin taħdmu iebes u mgħobbijin wisq, u jien se nirrifreskakom.” (Matt. 11:28) Ukoll, dur lejn Jehovah, “li kuljum iġorr it-​tagħbija għalina” u li jagħti qawwa lill-​għajjien. Hu jwiegħed li qatt ma se jħalli lit-​tajjeb jixxengel. (Salm 55:22; 68:19; Isa. 40:29) Nistgħu nkunu fiduċjużi li t-​talb tagħna se jiġi mwieġeb, u b’hekk jagħmilha possibbli għalina li nipperseveraw f’ħajja attiva t’attività teokratika.

⁶ Fil-​waqt li ċerti li se nibqgħu beżlin f’li niġru wara interessi tas-​Saltna taʼ siwi, nistgħu nifirħu f’li nkunu nafu li t-​taħbit tagħna m’huwiex għalxejn f’konnessjoni mal-​Mulej.​—1 Kor. 15:58.