Kif Nixtru L-Ħin Opportun
1 Meta jkollna ħafna x’nagħmlu fis-servizz taʼ Jehovah inkunu biżlin! (1 Kor. 15:58) Nafu kemm għandna bżonn li nistudjaw personalment u bħala familja, li naqraw il-Bibbja kuljum, li nippreparaw għal u nattendu l-laqgħat tal-kongregazzjoni, u li nieħdu sehem regolarment fil-ministeru taʼ l-għalqa. L-indokraturi għandhom responsabbiltajiet pastorali, u jieħdu ħsieb taʼ dmirijiet oħrajn fil-kongregazzjoni. Xi wħud għandhom responsabbiltajiet familjari kbar jew varjetà t’obbligi lejn oħrajn. Biex kollox isir bir-reqqa, kulħadd għandu bżonn il-bilanċ u organizzar persunali tajjeb.
2 Nagħżlu L-Prijoritajiet: Biex ikollna suċċess f’li ‘nixtru ż-żmien opportun għalina nfusna’ jrid ikollna d-dehen u sens tajjeb taʼ ġudizzju. (Efe. 5:15, 16) Irridu niddeterminaw x’inhuma “l-affarijiet iktar importanti” u npoġġuhom fuqnett fil-lista tagħna taʼ prijoritajiet. (Flp. 1:10) Koppja waħda ddeskriviet il-familja teokratika tagħha b’dan il-mod: “Aħna nimlew ħajjitna bil-verità . . . Il-verità m’hijiex parti minn ħajjitna, hija ħajjitna. Il-bqija jdur madwarha.” Huwa essenzjali li wieħed ipoġġi l-qima u s-servizz lejn Jehovah l-ewwel f’ħajtu.
3 Nidentifikaw Affarijiet Li Jaħlu L-Ħin: Hemm 168 siegħa f’ġimgħa, u jeħtieġ li nagħmlu użu għaqli mill-ħin li għandna. Biex ikollna biżżejjed ħin għal attivitajiet teokratiċi, hemm bżonn li nidentifikaw u nnaqqsu affarijiet li jaħlulna l-ħin. Stħarriġ wera li l-adult medju fl-Istati Uniti jqattaʼ iktar minn 30 siegħa fil-ġimgħa jara t-televixin! Fil-każ t’oħrajn, ħafna ħin jinħela fil-qari taʼ letteratura dinjija. Xi wħud jistgħu jsibu li huma jiddedikaw wisq ħin f’attivitajiet soċjali, f’passatempi, f’rikreazzjoni, jew f’xi għamla t’attività bil-kompjuter. Forsi hemm bżonn li nagħtu daqqa t’għajn sewwa lejn ir-rutina taʼ kuljum tagħna biex naraw kif nistgħu nużaw il-ħin tagħna aħjar. L-għerf jitlob li npoġġu limiti fuq kemm inqattgħu ħin f’attivitajiet li m’humiex essenzjali.
4 Niżviluppaw Rutina Tajba: Huma x’inhuma ċ-ċirkostanzi persunali tagħna, kull wieħed minna jistaʼ jixtri l-ħin għal affarijiet spiritwali. Xi wħud sabu li, jekk kuljum iqumu ftit iktar kmieni, dan jgħinhom biex iwettqu iktar affarijiet. Jekk inqattgħu ħafna ħin nivvjaġġaw għax-xogħol jew nistennew lil oħrajn, nistgħu nużaw ftit minn dak il-ħin għall-qari tal-Bibbja, biex nippreparaw għal-laqgħat, jew biex nisimgħu xi materjal ipprovdut mis-Soċjetà fuq l-audiocassettes. Il-familji jibbenefikaw bil-bosta jekk iwarrbu ħin speċifiku u regulari biex jistudjaw flimkien. Jekk kull membru tal-familja jkun fil-ħin għall-istudju tal-familja, dan jagħti lil kulħadd ftit iktar ħin.
5 Maʼ kull ġurnata li tgħaddi, għandna nsiru iktar konxji li “ż-żmien li fadal huwa mnaqqas.” (1 Kor. 7:29) Il-ħajjiet tagħna jiddependu fuq kif nużaw il-ħin prezzjuż li baqaʼ. Se niġu mberkin jekk nixtru l-ħin opportun sabiex inkunu nistgħu nżommu l-interessi tas-Saltna fl-ewwel post!—Matt. 6:33.