Il-​Laqgħat Iħeġġu Xogħlijiet mill-​Aħjar

¹ Żewġ aspetti essenzjali tal-​qima tagħna huma li nattendu l-​laqgħat tal-​kongregazzjoni u li nieħdu sehem fis-​servizz taʼ l-​għalqa. It-​tnejn li huma jmorru id f’id. Wieħed jinfluwenza lill-​ieħor. Il-​laqgħat Kristjani jħeġġu xogħlijiet mill-​aħjar, li l-​aħjar fosthom huwa x-​xogħol taʼ li nippridkaw dwar is-​Saltna u nagħmlu dixxipli. (Lhud 10:24) Kieku kellna ma nibqgħux nattendu l-​laqgħat, x’aktarx li ma ndumux ma nieqfu nippridkaw għax ma nkunux imħeġġin biex nagħmlu hekk.

² Fil-​laqgħat taʼ kull ġimgħa, nirċievu istruzzjoni spiritwali maħsuba biex timmotivana ħalli nippridkaw. L-​urġenza taż-​żminijiet tissemma ħafna drabi, u dan iħeġġiġna biex nieħdu għand oħrajn il-​messaġġ tal-​Bibbja li jagħti l-​ħajja. Niġu inkuraġġiti u msaħħin biex nissaportu fix-​xogħol taʼ l-​ippridkar. (Matt. 24:​13, 14) Billi nieħdu vantaġġ minn opportunitajiet biex nikkummentaw fil-​laqgħat, nidraw iktar nesprimu l-​fidi tagħna quddiem oħrajn. (Lhud 10:23) Billi ninkitbu fl-​Iskola tal-​Ministeru Teokratiku, nirċievu taħriġ biex inkunu ministri iktar effettivi u biex intejbu l-​abbiltajiet tagħna tat-​tagħlim.​—2 Tim. 4:2.

³ Kif Il-​Laqgħat Tas-​Servizz Iħeġġuna Biex Nippridkaw: Aħna lkoll inkuraġġiti biex ngħaddu l-​materjal f’Il-Ministeru Tas-​Saltna minn qabel. Din l-​informazzjoni mbagħad tissammar f’moħħna hekk kif nattendu l-​Laqgħa tas-​Servizz u naraw turijiet ippreżentati minn fuq il-​platform. Meta nkunu fis-​servizz taʼ l-​għalqa, nistgħu nerġgħu naħsbu f’Il-Ministeru Tas-​Saltna, niftakru l-​preżentazzjonijiet li ntwerew, u b’hekk nagħtu xiehda iktar effettiva. Dan kien minnu fil-​każ taʼ ħafna pubblikaturi.

⁴ Biex ikomplu jaħdmu fuq dak li jkun intqal fil-​Laqgħat tas-​Servizz, xi wħud jagħmlu appuntamenti m’oħrajn biex jieħdu sehem flimkien fil-​ministeru. Il-​pubblikaturi jkollhom il-​punti tas-​servizz friski f’moħħhom u jkunu stimulati biex jipprovawhom għaliex dawn il-​laqgħat inkuraġġewhom biex jieħdu sehem fix-​xogħol taʼ l-​ippridkar kull ġimgħa.

⁵ M’hemm l-​ebda sostitut għal-​laqgħat Kristjani tagħna, fejn niltaqgħu m’adoraturi sħabna u niġu mħeġġin għal xogħlijiet mill-​aħjar. Jekk irridu li l-​ministeru tagħna jiffjorixxi, irridu nattendu regolarment il-​laqgħat tal-​kongregazzjoni. Jalla nuru apprezzament għal dan il-​provvediment meraviljuż mingħand Jehovah billi “ma ninqatgħux mill-​laqgħat tagħna flimkien.”​—Lhud 10:25.