Il-​Ministeru Tagħna—Espressjoni taʼ Mħabba Vera

¹ Bil-​ministeru tagħna aħna nuru l-​ubbidjenza tagħna lejn l-​akbar żewġ kmandamenti. (Mt. 22:​37-39) L-​imħabba tagħna għal Jehovah timmotivana biex nitkellmu b’mod pożittiv fuqu. L-​imħabba għall-​proxxmu tagħna tqanqalna biex ninkuraġġuhom ifittxu l-​għarfien dwar ir-​rieda u l-​iskopijiet taʼ Alla sabiex, bħalna, huma jistgħu jsiru jħobbu lil Jehovah u jkun jixirqilhom jieħdu l-​premju taʼ ħajja taʼ dejjem. Mela, allura, bil-​ministeru tagħna nonoraw l-​isem taʼ Jehovah u naqsmu t-​tama imprezzabbli tas-​Saltna mal-​proxxmu tagħna. Iva, il-​ministeru tagħna huwa espressjoni taʼ mħabba vera għal Alla u għall-​bniedem.

² Imħabbitna ġġagħalna nitkellmu maʼ kull xorta taʼ nies f’kull xorta taʼ ċirkostanzi. (1 Kor. 9:​21-23) Biex nagħtu eżempju: Meta kien qiegħed fuq ajruplan, anzjan Kristjan poġġa bil-​qiegħda ħdejn qassis Kattoliku Ruman. L-​anzjan ħall ilsien il-​qassis billi bit-​tattika staqsieh ftit mistoqsijiet u mbagħad idderieġa d-​diskussjoni lejn is-​Saltna. Sakemm il-​qassis ġie biex jinżel mill-​ajruplan, hu kien aċċetta żewġ kotba minn tagħna. X’riżultat mill-​aħjar għall-​espressjoni taʼ mħabba vera li wera l-​anzjan għall-​proxxmu tiegħu!

³ L-​Imħabba Vera Timmotivana biex Nippridkaw: Dawk li jieħdu sehem fix-​xogħol taʼ pijunier awżiljarju u full-time ċertament li qegħdin jesprimu mħabba vera għal Alla u għall-​proxxmu. Il-​pijunieri qegħdin il-​ħin kollu jissagrifikaw il-​ħin u l-​enerġija tagħhom biex jgħinu lil oħrajn spiritwalment. X’jimmotivahom biex jagħmlu hekk? Waħda pijuniera qalet: “Naf li l-​imħabba hija frotta taʼ l-​ispirtu taʼ Alla. Għalhekk mingħajrha, lanqas biss kont inkun fil-​verità, aħseb u ara kemm kont nirnexxi bħala pijuniera. L-​imħabba ġġagħalni ninteressa ruħi fin-​nies, inkun konxja tal-​bżonnijiet tagħhom, u jien napprezza li n-​nies iwieġbu għall-​imħabba.” Ġesù wera mħabba bħal din għan-​nies. Darba meta hu u d-​dixxipli mifluġin tiegħu kienu sejrin x’imkien biex ‘jistrieħu ftit,’ il-​folol waslu hemm qabilhom. X’għamel Ġesù? Billi “tħassarhom,” hu warrab il-​bżonnijiet persunali tiegħu fil-​ġenb sabiex “jgħallimhom ħafna ħwejjeġ.”​—Mk. 6:​30-34.

⁴ Saħansitra meta n-​nies jirrifjutaw l-​aħbar tajba li noffrulhom, aħna nesperjenzaw ferħ ġewwieni, billi nafu li mqanqlin mill-​imħabba, għamilna l-​aħjar tagħna biex ngħinuhom jiksbu s-​salvazzjoni. Meta fl-​aħħar mill-​aħħar ilkoll kemm aħna niġu ġġudikati minn Kristu, se nkunu henjin ħafna li wrejna mħabba vera billi ‘qdejna sewwa l-​ministeru tagħna.’​—2 Tim. 4:5.